Emutini wa Ura lowu a wu nga ri ekule ni muti wa Babele, vanhu vo tala a va nga gandzeli Yehovha, a va gandzela swikwembu swo tala. Kambe a ku ri ni wanuna un’wana loyi a a tshama eUra loyi a a gandzela Yehovha ntsena. Vito rakwe a ku ri Abrahama.

Yehovha u byele Abrahama a ku: ‘Siya muti wa wena ni maxaka ya wena, u ya etikweni leri ndzi nga ta ku komba rona.’ Kutani Xikwembu xi n’wi tshembisile xi ku: ‘U ta va tiko lerikulu naswona ndzi ta katekisa vanhu emisaveni hinkwayo hikwalaho ka wena.’

Abrahama a a nga ku tivi laha Yehovha a a lava a ya kona kambe a a tshemba Yehovha. Kutani Abrahama, nsati wakwe Sara, tata wakwe Tera na Lota n’wana wa makwavo wakwe va longe swilo swa vona va khoma ndlela.

Abrahama a a ri ni malembe ya 75 loko yena ni ndyangu wakwe va fika etikweni leri Yehovha a a lava leswaku va ri vona. A ku ri tiko ra Kanana. Loko Abrahama a ri kwalaho Xikwembu xi vulavule na yena xi ku: ‘Tiko leri u ri vonaka ndzi ta ri nyika vana va wena.’ Kambe Abrahama na Sara a va dyuharile naswona a va nga ri na vana. Kutani Yehovha a a ta xi hetisisa njhani xitshembiso lexi?

Abrahama na Sara a va ri ni malembe yo tala va tekanile. Va sukele kaya ra vona ro xonga eUra va ya tshama etendeni. Kambe Sara a a nga vileli hikuva a a tshemba Yehovha.

Sara a a lava n’wana hi mbilu yakwe hinkwayo lerova u byele Abrahama a ku: ‘Loko wo va ni n’wana ni nandza wa mina Agara, a swi ta fana ni loko a ri wa mina.’ Hi ku famba ka nkarhi Agara u ve ni n’wana. Vito rakwe a ku ri Iximayele.

Endzhaku ka malembe yo tala, loko Abrahama a ri ni malembe ya 99 kasi Sara a ri ni ya 89, ku fike vaendzi vanharhu. Abrahama u va rhambe leswaku va ta wisa ehansi ka murhi ni ku dya swakudya. Xana wa swi tiva leswaku vaendzi lava a ku ri vamani? A ku ri tintsumi! Ti byele Abrahama ti ku: ‘Lembe leri taka hi nkarhi lowu, wena ni nsati wa wena mi ta va ni n’wana wa jaha.’ Sara a a yingisile a ri endzeni ka tende. U hlekile kutani a tivutisa a ku: ‘Xana ndzi nga ha va ni n’wana ndzi dyuhale hi ndlela leyi?’

Hi lembe leri landzeleke, Sara u veleke n’wana wa jaha, hilaha ntsumi ya Yehovha yi vuleke hakona. Abrahama u n’wi thye vito ra Isaka leri vulaka “Ku Hleka.”

Loko Isaka a ri ni malembe ya kwalomu ka ntlhanu, Sara u vone Iximayele a n’wi endla xihlekiso. Leswi a a lava ku sirhelela n’wana wakwe, u ye eka Abrahama a ya n’wi kombela leswaku a hlongola Agara na Iximayele. Eku sunguleni, Abrahama a a nga swi lavi ku endla leswi a a n’wi kombela swona. Kambe Yehovha u byele Abrahama a ku: ‘Yingisa Sara. Ndzi ta hlayisa Iximayele. Kambe ndzi ta hetisisa switshembiso swa mina hi ku tirhisa Isaka.’