Lota a a tshama na Abrahama, makwavo wa tata wakwe etikweni ra Kanana. Hi ku famba ka nkarhi, Abrahama na Lota va ve ni swifuwo swo tala lerova a ku nga ha ri na ndhawu ya swona. Abrahama u byele Lota a ku: ‘A swi nge he koteki leswaku hi tshama swin’we. Ndzi kombela u hlawula ndhawu leyi u tsakelaka ku ya tshama eka yona, naswona mina ndzi ta ya eka yin’wana.’ Hakunene Abrahama a a rhangisa vanhu van’wana.

Lota u vone ndhawu yo saseka ekusuhi ni muti lowu vuriwaka Sodoma. A ku ri ni mati yo tala ni byanyi bya rihlaza. Kutani u hlawule ndhawu leyi ivi a rhurhela kona swin’we ni ndyangu wakwe.

Vanhu va le Sodoma ni le Gomora a va ri ni mahanyelo yo biha swinene. A va tikhome hi ndlela yo biha lerova Yehovha a tiyimisela ku va herisa. Kambe Xikwembu a xi lava ku ponisa Lota ni ndyangu wakwe, kutani xi rhumele tintsumi timbirhi leswaku ti ya va lemukisa ti ku: ‘Hatlisani! Humani emutini lowu! Yehovha u lava ku wu herisa.’

Lota a nga humanga hi nkarhi wolowo. U hlwerile. Kutani tintsumi ti khome Lota, nsati wakwe ni vana vakwe vambirhi va vanhwanyana ti va humesa emutini, ti ku: ‘Tsutsumani! Ponisani vutomi bya n’wina naswona mi nga languti endzhaku. Loko mo languta endzhaku mi ta fa!’

Loko va fika emutini lowu vuriwaka Sowara, Yehovha u endle leswaku ku na ndzilo ni xivavula emutini wa Sodoma ni wa Gomora. Miti yoleyo yi lovisiwe yi hela. Loko nsati wa Lota a ta va a nga n’wi yingisanga Yehovha ivi a languta endzhaku, u hundzuke tshuka ra munyu! Kambe Lota ni vana vakwe va ponile hikuva va yingise Yehovha. Swi fanele swi va twise ku vava leswi nsati wa Lota a nga n’wi yingisangiki Yehovha. Kambe a va tsakile leswi va yingiseke Yehovha.

Abrahama u dyondzise n’wana wakwe Isaka ku rhandza Yehovha ni ku tlhela a tshemba switshembiso swakwe. Kambe loko Isaka a ri ni malembe ya kwalomu ka 25, Yehovha u kombele Abrahama leswaku a endla nchumu wun’wana wo tika swinene. A ku ri yini nchumu wa kona?

Xikwembu xi byele Abrahama xi ku: ‘Ndzi kombela u teka n’wana wa wena loyi a ngo va yexe u endla gandzelo ha yena entshaveni etikweni ra Moriya.’ Abrahama a a nga swi tivi leswaku ha yini Yehovha a n’wi kombele ku endla sweswo. Kambe u n’wi yingisile.

Hi siku leri landzelaka nimixo, Abrahama u teke Isaka ni malandza yakwe mambirhi va ya eMoriya. Endzhaku ka masiku manharhu, va sungule ku vona tintshava va ri ekule. Abrahama u byele malandza yakwe leswaku ma va rindza loko yena na Isaka va ya endla gandzelo. U khomise Isaka tihunyi kutani yena a teka mukwana. Isaka u vutise tata wakwe a ku: ‘Xi kwihi xiharhi lexi hi nga ta endla gandzelo ha xona?’ Abrahama u te: ‘N’wananga, Yehovha u ta hi nyika xona.’

Loko va fika entshaveni, va ake alitari. Kutani Abrahama a boha Isaka mavoko ni milenge ivi a n’wi etlerisa ehenhla ka alitari.

Abrahama u teke mukwana. Hi nkarhi wolowo, ntsumi ya Yehovha yi huwelerile yi ri etilweni yi ku: ‘Abrahama! U nga vavisi mufana! Se ndza swi tiva leswaku u ni ripfumelo eka Xikwembu hikuva a wu tiyimisele ku endla gandzelo hi n’wana wa wena.’ Kutani Abrahama u vone nyimpfu yi phasekile hi timhondzo exikhwatanini. U hatle a tshunxa Isaka kutani a endla gandzelo hi nyimpfu yoleyo.

Ku sukela kwalaho, Yehovha u vitane Abrahama a ku i munghana wakwe. Wa swi tiva leswaku ha yini? Abrahama u endle xin’wana ni xin’wana lexi Yehovha a a lava leswaku a xi endla, hambiloko a nga swi twisisi leswaku ha yini Yehovha a n’wi kombela leswaku a xi endla.

Yehovha u tlhele a phindha xitshembiso xakwe eka Abrahama lexi nge: ‘Ndzi ta ku katekisa naswona ndzi ta andzisa vana kumbe mbewu ya wena.’ Leswi a swi vula leswaku Yehovha a a ta katekisa vanhu hinkwavo lavanene hi ku tirhisa ndyangu wa Abrahama.