Isaka u teke Raveka loko a ri ni malembe ya 40. A a n’wi rhandza swinene. Hi ku famba ka nkarhi va ve ni vana vambirhi va mahahlwa.

Lonkulu wa kona a ku ri Esawu kasi lontsongo a ku ri Yakobo. Esawu a a rhandza ku ya enhoveni naswona a a kota ku hlota. Kambe Yakobo a a rhandza ku tshama ekaya.

Emikarhini yoleyo, n’wana wa jaha lonkulu a a nyikiwa ndhawu leyikulu ni mali loko tata wakwe a fa. Swilo sweswo a swi vitaniwa ndzhaka. Endyangwini wa Isaka, ndzhaka leyi a yi ta kumiwa hi n’wana wakwe wa mativula a yi katsa ku hlanganyela eku hetisiseni ka switshembiso leswi Yehovha a swi tshembiseke Abrahama. Esawu a nga ri na mhaka ni switshembiso sweswo, kambe Yakobo a a swi tiva leswaku i swa nkoka ngopfu.

Siku rin’wana Esawu u vuye hi le ku hloteni a karhele swinene. U twe nun’hwelo wa swakudya swo nandziha leswi Yakobo a a ri eku swi swekeni kutani a ku: ‘Ndzi twa ndlala! Ndzi nyike xiculu xolexo xo tshwuka!’ Yakobo u te: ‘Ndzi ta ku nyika, kambe rhanga u ndzi tshembisa leswaku u ta ndzi nyika ndzhaka ya wena.’ Esawu u te: ‘A ndzi na mhaka ni ndzhaka ya mina! U nga yi teka. Ndzo lava ku dya.’ Xana u ehleketa leswaku Esawu u endle xiboho lexinene? Doo! Esawu u lahle nchumu wa nkoka swinene hikwalaho ka xiculu.

Loko Isaka a dyuhale swinene, se a ku ri nkarhi wa leswaku a katekisa n’wana wakwe lonkulu. Kambe Raveka u pfune Yakobo, loyi a ri lontsongo leswaku a kuma nkateko wolowo. Loko Esawu a twa mhaka leyi, u hlundzuke ngopfu naswona u kunguhate ku dlaya makwavo. Isaka na Raveka a va lava ku sirhelela Yakobo, kutani va te: ‘Famba u ya tshama na Labani makwavo wa mana wa wena kukondza vukarhi bya Esawu byi vohla.’ Yakobo u yingise vatswari vakwe kutani a baleka.

Yehovha u tshembise Yakobo leswaku u ta n’wi sirhelela hilaha a endleke hakona eka Abrahama na Isaka. Yakobo u ye a ya tshama eHarani, laha a nga fika a teka nsati, a va ni ndyangu lowukulu a tlhela a va ni rifuwo ro tala.

Hi ku famba ka nkarhi Yehovha u byele Yakobo a ku: ‘Tlhelela etikweni ra rikwenu.’ Kutani Yakobo ni ndyangu wakwe va teke riendzo ro leha va tlhelela ka rikwavo. Loko va ha ri endleleni vanhu van’wana va te eka Yakobo va ku: ‘Esawu makwenu u ta ni vavanuna va 400!’ Yakobo a a chuhile a ehleketa leswaku Esawu u lava ku n’wi hlasela swin’we ni ndyangu wakwe. U khongele eka Yehovha a ku: ‘Ndzi kombela u ndzi sirhelela eka makwerhu.’ Hi siku leri landzelaka Yakobo u rhumele Esawu tinyimpfu, timbuti, tihomu, tikamela ni timbhongolo, swo tala.

Hi vusiku byebyo loko Yakobo a ri yexe, u vone ntsumi! Ntsumi yi sungule ku lwa na yena. Va lwe kukondza ri xa. Hambileswi Yakobo a a vavisekile, a nga tshikanga ku lwa. Ntsumi yi te: ‘Ndzi tshike ndzi famba.’ Kambe Yakobo u te: ‘A ndzi nge ku tshiki u nga si ndzi katekisa.’

Eku heteleleni ntsumi yi n’wi katekisile. Sweswo swi endle Yakobo a swi tiva leswaku Yehovha a nge pfumeleli Esawu a n’wi hlasela.

Hi mixo wolowo loko Yakobo a languta le kulenyana u vone Esawu ni vavanuna va 400. Yakobo u rhangele ndyangu wakwe kutani a fika a khinsama ka nkombo emahlweni ka makwavo. Esawu u tsutsumele eka Yakobo kutani a n’wi angarha. Va sungule ku rila ni ku rivalelana. U anakanya leswaku Yehovha u titwe njhani hi ndlela leyi Yakobo a yi lulamiseke ha yona mhaka leyi?

Endzhakunyana Esawu u tlhelele ekaya kakwe ivi Yakobo a tlhelela ka rikwavo. Yakobo a a ri ni vana va majaha va 12. Mavito ya vona a ku ri Ruveni, Simiyoni, Levhi, Yuda, Dani, Neftali, Gadi, Axere, Isakara, Zebuloni, Yosefa na Benjamini. Yosefa u tirhisiwe hi Yehovha leswaku a ponisa vanhu Vakwe. Xana wa swi tiva leswaku u n’wi tirhise njhani? Hi ta dyondza swo tala eka ndzima leyi landzelaka.