Vusiku byin’wana, Hosi Nebukadnetsara u ve ni norho lowu nga tolovelekangiki. Wu n’wi karhate ngopfu lerova a heleriwa ni hi vurhongo. U vitane vanhu lava a va endla masalamusi kutani a ku eka vona: ‘Ndzi hlamuseleni norho lowu ndzi wu lorheke.’ Va te: ‘Hi byele leswi u swi lorheke hosi.’ Kambe Nebukadnetsara u te: ‘Doo! N’wina ndzi byeleni leswi ndzi swi lorheke, handle ka swona ndzi ta mi dlaya.’ Va tlhele va ku eka yena: ‘Hi byele leswi u swi lorheke, kutani hi ta ku hlamusela.’ U te: ‘Hinkwenu ka n’wina mi ringeta ku ndzi kanganyisa. Ndzi byeleni leswi ndzi swi lorheke!’ Va byele hosi va ku: ‘A nga kona munhu loyi a nga kotaka ku endla sweswo. Leswi u swi kombelaka a swi koteki.’

Nebukadnetsara a a hlundzuke ngopfu lerova a lerisa leswaku vavanuna hinkwavo vo tlhariha etikweni va fanele va dlayiwa. Vavanuna volavo a va katsa Daniyele, Xadraka, Mixaka na Abedinigo. Daniyele u kombele hosi leswaku yi n’wi nyika nkarhinyana. Kutani yena ni vanghana vakwe va khongele eka Yehovha, va kombela leswaku a va pfuna. Yehovha u endle yini?

Exivonweni, Yehovha u kombe Daniyele norho wa Nebukadnetsara a tlhela a n’wi nyika nhlamuselo ya wona. Hi siku leri landzelaka, Daniyele u ye eka nandza wa hosi a ku: ‘Mi nga va dlayi vavanuna volavo vo tlhariha. Ndzi ta wu hlamusela norho wa hosi.’ Nandza yoloye u teke Daniyele a n’wi yisa eka Nebukadnetsara. Daniyele u byele hosi a ku: ‘Xikwembu xi ku kombe leswi nga ta endleka enkarhini lowu taka. Hi lowu norho wa wena: U vone xifaniso lexikulu lexi nhloko ya xona a yi ri ya nsuku, xifuva ni mavoko ya xona a swi ri swa silivhere, khwiri ra xona ni mindzhumbi ya xona a swi ri swa koporo, milenge ya xona a yi ri ya nsimbi kasi mikondzo ya xona a yi ri ya nsimbi leyi pfanganisiweke ni vumba. Endzhaku ku hume ribye entshaveni ivi ri ba mikondzo ya xifaniso xexo. Xifaniso xexo xi pfotlosiwe xi va mapa kutani ma biwa hi moya. Ribye rero ri ve ntshava leyikulu naswona ri tate misava hinkwayo.’

Kutani Daniyele u te: ‘Hi leyi nhlamuselo ya norho wa wena: Mfumo wa wena i nhloko ya nsuku. Silivhere yi yimela mfumo lowu nga ta landzela wa wena. Endzhaku ka wona ku ta va ni mfumo lowu fanaka ni koporo lowu nga ta fuma misava hinkwayo. Mfumo lowu nga ta landzela wu ta va ni matimba ku fana na nsimbi. Eku heteleleni, ku ta va ni mfumo lowu nga ta avana, lowu swiphemu swin’wana swa wona swi nga ta va ni matimba ku fana ni nsimbi kasi swiphemu leswin’wana swi ta fana ni vumba swi nga vi ni matimba. Ribye leri veke ntshava ri yimela Mfumo wa Xikwembu. Wu ta herisa mifumo hinkwayo naswona wona wu ta tshama hilaha ku nga heriki.’

Nebukadnetsara u wele ehansi hi xikandza emahlweni ka Daniyele. U te: ‘Xikwembu xa wena xi ku hlamusele norho lowu ndzi wu lorheke. A xi kona Xikwembu xo fana na xona.’ Ematshan’weni yo dlaya Daniyele, Nebukadnetsara u n’wi endle ndhuna ya vavanuna hinkwavo vo tlhariha ni mufumi exifundzheni hinkwaxo xa Babilona. Xana wa yi vona ndlela leyi Yehovha a xi hlamuleke ha yona xikhongelo xa Daniyele?

Endzhaku ka loko Hosi Nebukadnetsara a lorhe hi xifaniso, u endle xifaniso lexikulu xa nsuku. U xi veke erivaleni ra Dura kutani a vitana vanhu hinkwavo lava xiximekaka ku katsa na Xadraka, Mixaka na Abedinigo leswaku va hlengeletana emahlweni ka xona. Hosi yi te: ‘Loko mi twa mpfumawulo wa timhalamhala, tiharipa ni tinanga mi fanele mi khinsama emahlweni ka xifaniso lexi! Loyi a nga ta ka a nga khinsami u ta lahleriwa ekheleni leri pfurhaka ndzilo.’ Xana majaha lawa manharhu ya Vaheveru a ma ta xi khinsamela kumbe a ma ta hambeta ma gandzela Yehovha ntsena?

Kutani hosi yi lerise leswaku ku tlangiwa vuyimbeleri. Vanhu hinkwavo va khinsamile va gandzela xifaniso handle ka Xadraka, Mixaka na Abedinigo. Vavanuna van’wana va swi xiyile sweswo kutani va byela hosi va ku: ‘Majaha lawaya manharhu ya Vaheveru ma ala ku gandzela xifaniso xa wena.’ Nebukadnetsara u lerise leswaku va tisiwa eka yena kutani a ku: ‘Ndzi ta tlhela ndzi mi nyika nkarhi wa leswaku mi gandzela xifaniso. Loko mi nga xi gandzeli, ndzi ta mi hoxa ekheleni ra ndzilo. A ku na xikwembu lexi nga mi ponisaka evokweni ra mina.’ Va te: ‘A hi lavi ku nyikiwa nkarhi wun’wana. Xikwembu xa hina xi nga hi ponisa. Kambe hambiloko xi nga hi ponisi a hi nge xi gandzeli xifaniso xa wena hosi.’

Nebukadnetsara u hlundzuke ngopfu. U byele vavanuna va yena a ku: ‘Hlanganyetani ndzilo wu hisa hi mpimo lowu andzisiweke ka nkombo!’ Kutani a lerisa masocha yakwe a ku: ‘Bohani vavanuna lava mi va hoxa ekheleni ra ndzilo!’ Khele leri a ri hisa swinene lerova loko masocha ma tshinele ekusuhi na rona ma nambe ma fela kwalaho. Majaha manharhu ya Vaheveru ma wele endzilweni. Kambe loko Nebukadnetsara a languta endzeni ka khele, u vone vavanuna va mune va ri karhi va fambafamba endzeni ka rona ematshan’weni ya vavanuna vanharhu. U sungule ku chava kutani a vutisa vatirhi vakwe a ku: ‘Xana a hi hoxanga vavanuna vanharhu ekheleni? Ndzi vona mune wa vona naswona un’wana wa vona u languteka ku fana ni ntsumi!’

Nebukadnetsara u tshinelele khele kutani a huwelela a ku: ‘Humani, n’wina malandza ya Xikwembu Lexi Nge Henhlahenhla!’ Vanhu hinkwavo va hlamarile loko va vona Xadraka, Mixaka na Abedinigo va huma endzilweni va nga tshwanga. Nhlonge ya vona, misisi ni swiambalo swa vona a swi nga tshwanga naswona a va nga ri na risema ra ndzilo.

Nebukadnetsara u te: ‘Xikwembu xa Xadraka, Mixaka na Abedinigo i xikulu swinene. Xi rhumele ntsumi ya xona leswaku yi va ponisa. A xi kona xikwembu lexi fanaka na xona.’

Xana u tiyimiserile ku tshama u tshembekile eka Yehovha hambiloko u ringiwa ku fana ni majaha manharhu ya Vaheveru?