Endzhaku ka malembe ya 400 makhumbi ya muti wa Yerusalema ma pfuxiwile, muprista la vuriwaka Zakariya ni nsati wakwe Elizabeta a va tshama ekusuhi ni muti wolowo. A va ri ni malembe yo tala va tekanile kambe a va nga ri na vana. Siku rin’wana loko Zakariya a ri karhi a nyikela xitlhavelo endhawini leyi nga rivala etempeleni, ntsumi Gabriyele u humelele eka yena. Zakariya a a chuhile, kambe Gabriyele u te: ‘U nga chavi. Ndzi ku tisele mahungu lamanene lama humaka eka Yehovha. Nsati wa wena Elizabeta u ta veleka n’wana wa jaha naswona vito rakwe ku ta va Yohane. Yehovha u hlawule Yohane leswaku a ta endla ntirho wo hlawuleka.’ Zakariya u te: ‘A ndzi swi tshembi leswi u swi vulaka. Mina ni nsati wa mina a hi nge he n’wi kumi n’wana hikuva se hi dyuharile.’ Gabriyele u te: ‘Xikwembu hi xona lexi ndzi rhumeke leswaku ndzi ta ku byela mahungu lawa. Kambe leswi u nga ndzi tshembangiki, u nge he swi koti ku vulavula ku kondza n’wana a velekiwa.’

Zakariya u hete nkarhi wo leha swinene endhawini yo kwetsima ku tlula wa ntolovelo. Loko a ta hetelela a humile, vanhu lava a va yime hala handle a va lava ku tiva leswaku ku endleke yini. Kambe Zakariya a a nga ha swi koti ku vulavula. A a vulavula hi mavoko ntsena. Kutani vanhu va swi xiyile leswaku u kume rungula leri humaka eka Xikwembu.

Hi ku famba ka nkarhi, Elizabeta u ve ni khwiri ivi a veleka n’wana wa jaha hilaha ntsumi yi vuleke hakona. Maxaka ni vanghana vakwe va n’wi endzerile leswaku va ta vona n’wana. A va tsakile swinene. Kutani Elizabeta u te: ‘Vito rakwe ku ta va Yohane.’ Va te: ‘A ku na munhu la vuriwaka Yohane endyangwini wa ka n’wina. N’wi thye vito ra tata wakwe, ku nga Zakariya.’ Kambe Zakariya u tsale ehansi a ku: ‘Vito rakwe i Yohane.’ Zakariya u tlhele a kota ku vulavula hi nkarhi wolowo! Mhaka ya ku velekiwa ka n’wana yoloye yi hangalake ni tiko hinkwaro ra Yudiya naswona vanhu a va tivutisa va ku: ‘Xana n’wana loyi u ta va yini loko a kula?’

Kutani Zakariya u sungule ku tala hi moya lowo kwetsima. U profete a ku: ‘A ku dzunisiwe Yehovha. U tshembise Abrahama leswaku U ta rhumela muponisi, ku nga Mesiya leswaku a ta hi kutsula. Yohane u ta va muprofeta naswona u ta lunghiselela Mesiya ndlela.’

Ku tlhele ku endleka nchumu wo hlamarisa eka Mariya xaka ra Elizabeta. A hi dyondzeni hi mhaka leyi eka ndzima leyi landzelaka.

Elizabeta a a ri ni xaka leri vuriwaka Mariya, leri a a ri tshama emutini wa Nazareta eGaleliya. Mariya a a tshembisiwe ku tekiwa hi Yosefa loyi a a ri muvatli. Loko Elizabeta a ri ni tin’hweti ta tsevu a tikile, ntsumi Gabriyele yi humelele eka Mariya. Yi te: ‘Xewani, Mariya! Yehovha u ku tsakerile swinene.’ Mariya a a nga swi twisisi leswi Gabriyele a a swi vula. Hiloko Gabriyele a ku: ‘U ta tika naswona u ta veleka n’wana wa jaha, u fanele u n’wi thya vito ra Yesu. U ta va Hosi. Mfumo wakwe wu ta va wa hilaha ku nga heriki.’

Mariya u te: ‘Kambe a ndzi si tshama ndzi etlela ni wanuna. Kutani ndzi ta n’wi kumisa ku yini n’wana?’ Gabriyele u te: ‘Yehovha a nga tsandziwi hi nchumu. Moya lowo kwetsima wu ta endla leswaku u veleka n’wana wa jaha. Xaka ra wena Elizabeta na yena u tikile.’ Hiloko Mariya a ku: ‘Ndzi hlonga ra xisati ra Yehovha. Onge swi nga endleka hilaha u vuleke hakona.’

Mariya u endzele Elizabeta etikweni leri a ri ri ni tintshava. Elizabeta u twe n’wana a tshukatshuka ekhwirini rakwe loko Mariya a n’wi xeweta. Moya lowo kwetsima wu susumetele Elizabeta ku vula a ku: ‘Mariya, Yehovha u ku katekisile. I nkateko ku endzeriwa hi mana wa Hosi ya mina.’ Mariya u te: ‘Ndzi dzunisa Yehovha hi mbilu ya mina hinkwayo.’ Mariya u tshame na Elizabeta tin’hweti tinharhu, endzhaku ka sweswo u tlhelele eNazareta.

Loko Yosefa a twa leswaku Mariya u tikile, u lave ku n’wi tshika. Kambe ntsumi yi humelele eka yena enorhweni ivi yi ku: ‘U nga chavi ku n’wi teka. A nga dyohanga nchumu.’ Yosefa u teke Mariya a va nsati wakwe ivi va tshama swin’we.