Xana Bibele Yi Vula Yini Loko Yi ku ‘Masiku Yo Hetelela’?
KU NI marito lama tsariweke efasitereni ra xitolo xo karhi: “Masiku Yo Hetelela.” Nhlamuselo ya wona yi le rivaleni. Ma nga ha va ma vula leswaku mbhukuto wu ta hela ku nga ri khale kumbe xitolo xi ta pfariwa. Kambe ku vuriwa yini loko munhu a ku, “Hi hanya emasikwini yo hetelela”? Xana marito wolawo ma vula yini?
Marito lama nge ‘masiku yo hetelela’ ni lama nge ‘nkarhi wa makumu’ i khale ma tirhisiwa. (2 Timotiya 3:1; Daniyele 12:4) Malembe yo tlula 2 500 lama hundzeke, muprofeta Daniyele u kombisiwe swivono swa mimfumo ya misava naswona a yi ta lwa ku fikela “enkarhini wa makumu.” U byeriwe leswaku nhlamuselo ya swivono leswi a yi ta va erivaleni enkarhini wa makumu. (Daniyele 8:17, 19; 11:35, 40; 12:9) Daniyele u tlhele a tsala a ku: “Emasikwini ya tihosi teto Xikwembu xa le tilweni xi ta veka mfumo lowu wu nga ta ka wu nga lovisiwi. Mfumo lowu wu nga ka wu nga hundziseriwi eka vanhu van’wana. Wu ta pfotlosa kutani wu herisa mimfumo leyi hinkwayo, kambe wona wu ta tshama hilaha ku nga riki na makumu.”—Daniyele 2:44.
Yesu Kreste u vulavule hi “makumu” loko a hlamula xivutiso xa malunghana ni “xikombiso xa vukona bya [yena] ni xa makumu ya mafambiselo ya swilo.” (Matewu 24:3-42) Entiyisweni, Daniyele na Yesu a va vulavula hi makumu—ku hundzuka lokukulu loku nga ta khumba vanhu lava nga emisaveni hinkwayo ni lava tshameke va hanya eka yona. Daniyele u tsale hi makumu ya tihulumendhe hinkwato ta laha misaveni. Yesu u vulavule hi “makumu ya mafambiselo ya swilo.”
Xana mhaka leyi yi fanele yi ku karhata? Ina. Vanhu hinkwavo va fanele va karhateka hikuva hinkwavo va katseka. Nilokoswiritano, vo tala a va yi tekeli enhlokweni mhaka leyi. Bibele yi profetile: “Emasikwini ya makumu ku ta va ni vahlekuri lava hlekulaka, va famba hi ku ya hi ku navela ka vona va ku: ‘Byi kwihi vukona byakwe lebyi tshembisiweke? Hikuva, ku sukela siku vatata wa hina va etleleke ha rona eku feni, swilo hinkwaswo swa ha tshame hilaha a swi ri hakona eku sunguleni ka ntumbuluko.’” (2 Petro 3:3, 4) Ina, van’wana namuntlha va vona onge leswi humeleleke enkarhini lowu hundzeke swi ta tlhela swi humelela ni leswaku vutomi byi ta ya emahlweni hi ndlela leyi tolovelekeke hilaha ku nga heriki.
Xana ku ni vumbhoni lebyi kombisaka leswaku hakunene hi hanya enkarhini lowu Bibele yi wu vitanaka masiku yo hetelela? A hi voneni.