Leswi Van’wana Va Swi Vuleke

Furwa

“Timbhoni ta Yehovha i vaaki lava xiximaka milawu ya Tiko. . . . A ti xungeti ku rhula ka tiko. Ta tirha, ta hakela swibalo, ta hlanganyela eka minongonoko yo hluvukisa ikhonomi ya tiko ra hina naswona ta nyikela tinyiko eka minhlangano leyi pfunaka vanhu lava pfumalaka. Swa tsakisa ku vona ndlela leyi vanhu lava, lava humaka eka tinxaka ni mindhavuko hinkwayo va hlanganaka swin’we hi ku rhula. . . . Loko vanhu hinkwavo a va ri Timbhoni ta Yehovha, hina maphorisa a hi ta heleriwa hi ntirho.”—Muvulavuleri wa nhlangano wa maphorisa ya le Furwa.

Ukraine

“Timbhoni ta Yehovha ti dyondzisa vana va tona tidyondzo ta mahanyelo leti nga eBibeleni. Ti dyondzisa vana va tona ku papalata mahanyelo, swiendlo ni langutelo leri nga vavisaka vana ni vanhu van’wana, [hambileswi] misava ya namuntlha yi swi tekaka swi ri leswi amukelekaka. Hikwalaho ti lemukisa vana va tona hi makhombo ya ku tirhisa swidzidziharisi, ku dzaha ni ku nwa byala ku tlula mpimo. Ta swi xiya leswaku i swa nkoka ku tshembeka ni ku gingiriteka. . . . Timbhoni ta Yehovha ti dyondzisa vana va tona milawu ya mahanyelo, ku xixima valawuri, vanhu van’wana ni nhundzu ya vona swin’we ni ku hlayisa milawu ya tiko.”—Buku leyi nge The History of Religion in Ukraine, leyi tsariweke hi Profesa Petro Yarotskyi.

Italy

“A ku ri ni vanhu va 30 000 eXitediyamu xa Olympic lava a va tshame va ku whii, va yingisela . . . A ku nga ri na thyaka, a ku nga twakali pongo ni ku huwelela. Sweswo swi humelele eXitediyamu xa Olympic tolo . . . Vanhu a va nga koweteli hi ndlela leyi nga amukelekiki, a ku nga ri na fole ni swikotela swa [byala]. Vanhu a va pfula Tibibele ni ku tsala tinhla swin’we ni vana lava a va rhiye ndleve.”—Phepha-hungu ra L’Unità, loko ri vika hi ta ntsombano wa Timbhoni ta Yehovha eRome.

Britain

“Mudiyakoni-nkulu wa doroba ra Cheltenham u vule leswaku [Kereke ya Nghilandhi] a yi lava mintlawa ya vanhu lava tinyiketeleke lava a va ta famba-famba ku fana ni Timbhoni ta Yehovha.”—Phepha-hungu ra The Gazette, leri kandziyisiwaka hi kereke ya Gloucester Diocese.

Netherlands

Vaakelani lava tshamaka ekusuhi ni Holo ya Mfumo ya le dorobeni ra Leeuwarden va nyike Timbhoni ta kwalaho papila leri a ri ku: “Ha mi nkhensa hileswi mi endlaka leswaku [Gondzo ra Noorder] ri languteka. Swirho swa n’wina swi ambala kahle minkarhi hinkwayo, naswona swi ni mahanyelo lamanene. Vana va tikhoma kahle, vanhu lavakulu a va paki mimovha ya vona hi ndlela leyi nga riki enawini, a va lahleli thyaka exitarateni, naswona ndhawu ya le kusuhi ni Holo ya Mfumo yi tshama yi basile ni ku hleleka. Hi tshemba leswaku mi ta hambeta mi va vaakelani va hina ku ringana nkarhi wo leha hikuva ha swi tsakela swinene ku tshama na n’wina.”

Mexico

Elio Masferrer, profesa ni mulavisisi wa le Xikolweni xa Tiko xa Dyondzo ya Ndhavuko ni Matimu ya Vanhu, u vule leswaku Timbhoni ti pfune vanhu lava “tshameke va va ni swiphiqo swa ndyangu swo fana ni ku pfinyiwa, ku xanisiwa, ku nwa byala ku tlula mpimo ni ku godzomberiwa hi swidzidziharisi.” U vule leswaku tidyondzo ta Timbhoni ti “endla leswaku vanhu lava a va titeka va ri swikangalafula va va ni xindzhuti” ni ku va pfuna va “papalata swiphiqo leswikulu hi ku endla swilo leswi tsakisaka Xikwembu.”—Phepha-hungu ra Excélsior.

Brazil

Phepha-hungu rin’wana ri vike ri ku: “Nhlengeletano ya Timbhoni ta Yehovha ya hlamarisa hakunene. Tindhawu leti ti hlanganaka eka tona ti tshama ti basile minkarhi hinkwayo. Swilo hinkwaswo swi hlelekile . . . Loko minhlangano ya tona yi hela, ti siya tindhawu teto ti basile ku tlula ndlela leyi ti tikumeke ti ri xiswona. Loko ku ri karhi ku nyikeriwa tinkulumo, ku va ku lo whii! Ku hava munhu loyi a susumetaka kumbe ku tlumba van’wana. Vanhu va kona va ni mahanyelo lamanene. . . . Hakunene i vukhongeri lebyi hlelekeke. Ta swi tiva leswi ku gandzela Xikwembu swi vulaka swona.”—Comércio da Franca.

Timbhoni ta Yehovha ti pfumela hi ku helela leswaku ku hava munhu un’wana la tivaka ku tlula Muvumbi leswaku hi yihi milawu leyi vanhu lava a va vumbeke va faneleke va hanya ha yona. (Esaya 48:17, 18) Hikwalaho, Timbhoni ti dzunisa yena loko mahanyelo ya tona lamanene ma susumetela vanhu ku ti bumabumela. Yesu u te: “Ku voninga ka n’wina a ku vonakale emahlweni ka vanhu, leswaku va ta vona mintirho ya n’wina leyinene kutani va vangamisa Tata wa n’wina la nge matilweni.”—Matewu 5:16.