Nkongomiso Wa Ndlela Leyi Ha Yona U Nga Hanyisanaka Hi Ku Rhula Ni Van’wana

Rivalela

“Yanani emahlweni mi . . . rivalelana hi ku tshunxeka hambiloko munhu a ri ni xivangelo xa ku vilerisiwa hi un’wana.”—VAKOLOSA 3:13.

Hinkwerhu ha swi endla swihoxo. Hi nga ha khunguvanyisa van’wana kumbe vona va hi khunguvanyisa. Leswi vulaka leswaku hinkwerhu hi fanele hi rivalela naswona hi lava van’wana va hi rivalela. Loko hi rivalela, hi tshika ku va ni xikhomela eka munhu loyi a hi hlundzukiseke. A hi “tlheriseli swo biha hi swo biha” naswona a hi tshameli ku tsundzuxa munhu loyi a hi hoxeleke hi swihoxo swakwe. (Varhoma 12:17) Kambe a hi nge hi twisiwe ku vava swinene naswona a hi swi koti ku rivala hi leswi endlekeke? Kutani hi fanele hi vulavula hi ndlela ya xichavo ni munhu yoloye hi mhaka yoleyo exihundleni. Xikongomelo xa hina ku fanele ku va ku endla ku rhula, ku nga ri ku vona munhu yoloye xihoxo.—Varhoma 12:18.

Titsongahate U Tlhela U Va Ni Xichavo

“Hi ku titsongahata mi teka van’wana va ri lava tlakukeke eka n’wina.”—VAFILIPIYA 2:3.

Loko hi titsongahata hi tlhela hi va ni xichavo, vanhu va ta tsakela ku va na hina. Va swi tiva leswaku hi ta va ni musa hi tlhela hi va anakanyela naswona a hi nge va twisi ku vava hi vomu. Kambe loko hi vona onge hi va nkoka eka van’wana kumbe loko mikarhi hinkwayo hi sindzisa ku endla swilo hi ndlela leyi rhandziwaka hi hina, hi ta endla leswaku ku va na ku nga twanani. Vanhu va ta fambela ekule na hina naswona loko ho va ni vanghana va ta va vatsongo.

U Nga Vi Na Xihlawuhlawu

“Xikwembu a xi na xihlawuhlawu, kambe eka tiko rin’wana ni rin’wana munhu loyi a xi chavaka a tlhela a endla leswinene wa amukeleka eka xona.”—MITIRHO 10:34, 35.

Muvumbi wa hina a nga teki vanhu van’wana va antswa ku tlula van’wana hikwalaho ka rixaka ra vona, ririmi, swa timali kumbe nhlonge ya vona. “Hi munhu un’we xi endle tinxaka hinkwato ta vanhu.” (Mitirho 17:26) Leswi vulaka leswaku vanhu hinkwavo i vamakwavo. Loko hi xixima vanhu hinkwavo hi tlhela hi va ni musa, hi va endla va tsaka, na hina ha tsaka naswona hi tsakisa Muvumbi wa hina.

Vana Wo Rhula

“Ambalani . . . ku rhula.”—VAKOLOSA 3:12.

Loko hi ri vanhu vo rhula, hi endla leswaku vanhu van’wana va tshunxeka. Swa va olovela ku vulavula na hina hambi ku ri ku hi lulamisa hikuva va swi tiva leswaku hi ta tshama hi ri lava rhuleke. Loko munhu un’wana a hi hlundzukerile, ndlela yo rhula leyi hi hlamulaka ha yona yi nga thova munhu yoloye. Swivuriso 15:1 yi ri: “Nhlamulo leyinene yi tlherisa vukarhi, kambe rito leri tlhavaka ri vanga ku hlundzuka.”

Vana Ni Malwandla U Tlhela U Khensa

“Ku nyika swi tisa ntsako lowukulu ku tlula ku amukela.”—MITIRHO 20:35.

Vanhu vo tala namuntlha va ni makwanga naswona va tianakanyela vona ntsena. Kambe ntsako wa xiviri wu kumiwa hi lava nga ni malwandla. (Luka 6:38) Vanhu lava nga ni malwandla va tsakile hikuva va rhandza vanhu ku tlula rifuwo. Rirhandzu rolero ri va endla va khensa ni ku kombisa ku tlangela loko un’wana a va komba malwandla. (Vakolosa 3:15) Tivutise, ‘Xana ndzi lava ku va ni vanhu lava tsonanaka ni lava nga khensiki kumbe ndzi lava ku va ni vanhu lava nga ni malwandla ni lava khensaka?’ Hi dyondza yini eka mhaka leyi? Vana muxaka wa munhu loyi u lavaka vanhu van’wana va va wona.—Matewu 7:12.