I tingani Timbhoni ta Yehovha leti u ti tivaka? Van’wana va hina hi nga ha va hi ri vaakelani va wena, vatirhi-kuloni kumbe vadyondzi-kuloni. Kumbe hi nga ha va hi tshame hi bula na wena hi Bibele. Kahle-kahle hi vamani naswona ha yini hi byela van’wana malunghana ni leswi hi swi pfumelaka?

Hi vanhu lava tolovelekeke. Hi huma eka mindhavuko ni swiyimo swo hambana-hambana. Van’wana va hina a va nghena tikereke to hambana-hambana, kasi van’wana a va nga pfumeli eka Xikwembu. Hambiswiritano, loko hi nga si va Timbhoni, hinkwerhu ka hina hi tinyike nkarhi wa ku kambisisa hi vukheta leswi Bibele yi swi dyondzisaka. (Mintirho 17:11) Hi pfumelelane ni leswi hi swi dyondzeke kutani hi tiendlela xiboho xo gandzela Yehovha Xikwembu.

Ha vuyeriwa loko hi dyondza Bibele. Ku fana ni munhu un’wana ni un’wana, hi boheka ku langutana ni swiphiqo ni ku tsana ka hina. Kambe endzhaku ko ringeta ku tirhisa milawu ya Bibele siku ni siku, vutomi bya hina byi antswile swinene. (Pisalema 128:1, 2) Xexo i xin’wana xa swivangelo leswi endlaka hi byela van’wana swilo leswinene leswi hi swi dyondzeke eBibeleni.

Hi hanya hi milawu ya Xikwembu. Milawu yoleyo leyi kumekaka eBibeleni, yi hi pfuna leswaku hi titwa hi hlayisekile naswona hi xixima van’wana ni ku endla leswaku hi va ni timfanelo to tanihi ku tshembeka ni musa. Yi endla leswaku vanhu lava yi tirhisaka va va lava hanyeke kahle va tlhela va gingiriteka, naswona yi kondletela vun’we endyangwini ni mahanyelo lamanene. Leswi hi tiyisekaka leswaku “Xikwembu a xi yi hi nghohe,” hi titeka hi ri ndyangu wa le misaveni hinkwayo lowu hlanganisiwaka hi tidyondzo leti hi pfumelaka eka tona, lowu nga riki na rivengo leri vangiwaka hi rixaka ni tipolitiki. Hambileswi hi tolovelekeke, swi hi endla hi va vanhu lava hlawulekeke.—Mintirho 4:13; 10:34, 35.

• I yini leswi Timbhoni ta Yehovha ti fanaka ni vanhu van’wana ha swona?

• Hi yihi milawu leyi Timbhoni ti yi dyondzeke loko ti dyondza Bibele?

Vanhu vo tala va anakanya leswaku vito leri nge, Timbhoni ta Yehovha i vito ra vukhongeri lebyintshwa. Hambiswiritano, emalembeni lama tlulaka 2 700 lama hundzeke, malandza ya Xikwembu xi ri xin’we xa ntiyiso a ma vitaniwa “timbhoni” ta xona. (Esaya 43:10-12) A hi tiviwa tanihi Swichudeni swa Bibele ku fikela hi 1931. Ha yini hi amukele vito leri nge, Timbhoni ta Yehovha?

Ri hlamusela Xikwembu xa hina. Hi ku ya hi matsalwa ya voko ya khale, vito ra Xikwembu leri nge, Yehovha ri humelela minkarhi ya magidi eBibeleni. Eka vuhundzuluxeri byo tala vito leri ri siviwe hi swithopo swo tanihi leswi nge, Hosi kumbe Xikwembu. Kambe, Xikwembu xa ntiyiso xi byele Muxe vito ra xona leri nge, Yehovha, xi ku: “Leri i vito ra mina ra hilaha ku nga riki na makumu.” (Eksoda 3:15) Hi ndlela yoleyo, xi tihambanise ni swikwembu leswin’wana hinkwaswo swa mavunwa. Ha tinyungubyisa hi ku byarha vito ro kwetsima ra Xikwembu.

Ri hlamusela ntirho wa hina. Eminkarhini ya khale vanhu vo tala va nyikele vumbhoni hi ripfumelo ra vona eka Yehovha, ku sukela eka Avele, wanuna wo lulama. Eka malembe-xidzana lama landzeleke, Nowa, Abrahama, Sara, Muxe, Davhida ni van’wana va joyine ‘papa leri lerikulu ra timbhoni.’ (Vaheveru 11:4–12:1) Tanihi leswi munhu a nga ha nyikelaka vumbhoni ehubyeni a yimelela munhu la nga riki na nandzu, na hina hi tiyimisele ku twarisa ntiyiso malunghana ni Xikwembu.

Hi tekelela Yesu. Bibele yi n’wi vitana “mbhoni yo tshembeka ni ya ntiyiso.” (Nhlavutelo 3:14) Yesu u vule leswaku u ‘twarise vito ra Xikwembu’ naswona u hambete a “nyikela vumbhoni malunghana ni ntiyiso” hi Xikwembu. (Yohane 17:26; 18:37) Hikwalaho, valandzeri va Kreste va xiviri va fanele va byarha vito ra Yehovha va tlhela va ri twarisa. Leswi hileswi Timbhoni ta Yehovha ti tikarhatelaka ku swi endla.

• Ha yini Swichudeni swa Bibele swi amukele vito leri nge, Timbhoni ta Yehovha?

• Yehovha u ni nkarhi wo tanihi kwihi a ri ni timbhoni emisaveni?

• I mani Mbhoni leyikulu ya Yehovha?

Bibele yi profete leswaku endzhaku ka rifu ra Kreste, a ku ta humelela vadyondzisi va mavunwa exikarhi ka Vakreste vo sungula kutani va soholota ntiyiso wa Bibele. (Mintirho 20:29, 30) Hi ku famba ka nkarhi, swi endleke hilaha swi profetiweke hakona. Va hlanganise tidyondzo ta Yesu ni ta vuhedeni, kutani ku sungula Vukreste bya mavunwa. (2 Timotiya 4:3, 4) Xana namuntlha hi nga tiyiseka njhani leswaku hi swi twisisa kahle leswi Bibele yi swi dyondzisaka hakunene?

Ku fike nkarhi wa leswaku Yehovha a paluxa ntiyiso. U vule ka ha ri emahlweni leswaku ‘enkarhini wa makumu, vutivi bya ntiyiso a byi ta andza.’ (Daniyele 12:4) Hi 1870, ntlawa lowutsongo wa valavisisi va ntiyiso wu xiye leswaku tidyondzo to tala leti dyondzisiwaka etikerekeni a ti nga humi eMatsalweni. Hikokwalaho, wu sungule ku lavisisa leswaku wu ta twisisa tidyondzo to sungula ta Bibele, kutani Yehovha u wu pfune leswaku wu twisisa matsalwa.

Vanhu lava tshembekaka va dyondze Bibele hi vukheta. Swichudeni swoleswo swa Bibele swa le mahlweni ka hina, swi tirhise endlelo ro dyondza leri ninamuntlha ha ha ri tirhisaka. A swi burisana hi tinhloko-mhaka ta Bibele to hambana-hambana. Loko swi fika eka rungula ra Bibele leri tikaka ku ri twisisa, a swi lava tindzimana tin’wana leti ri hlamuselaka. Loko swi fikelela xiboho lexi fambisanaka kahle ni Matsalwa hinkwawo, a swi xi tsala ehansi. Leswi swi pfumeleleke Bibele yi tihlamusela hi yoxe, swi tlhele swi kuma ntiyiso malunghana ni vito ra Xikwembu ni Mfumo, xikongomelo xa xona hi vanhu ni hi misava, xiyimo xa vafi ni ntshembo wa ku pfuxiwa ka vafi. Ndzavisiso wa swona wu swi ntshunxile eka tidyondzo ni mikhuva yo tala ya mavunwa.—Yohane 8:31, 32.

Hi 1879 Swichudeni swa Bibele swi swi xiyile leswaku a wu fikile nkarhi wo twarisa ntiyiso eka vanhu van’wana. Hikwalaho, hi lembe rero swi sungule ku humesa magazini lowu ha ha wu kandziyisaka ninamuntlha, ku nga Xihondzo xo Rindza Xi Huwelela Mfumo Wa Yehovha. Sweswi hi byela vanhu ntiyiso wa Bibele ematikweni ya 240 hi tindzimi ta kwalomu ka 750. Vutivi bya ntiyiso a byi si tshama byi tala hi ndlela leyi byi nga tala ha yona sweswi!

• Endzhaku ka rifu ra Kreste, ku humelele yini hi ntiyiso wa Bibele?

• I yini lexi endleke leswaku hi tlhela hi kota ku kuma ntiyiso lowu humaka eRitweni ra Xikwembu?

Ku ringana makume ya malembe, Timbhoni ta Yehovha ti tirhise vuhundzuluxeri bya Bibele byo hambana-hambana, ti byi kandziyisa ni ku byi hangalasa. Kambe hi vone xilaveko xo va hi humesa vuhundzuluxeri lebyintshwa lebyi nga ta pfuna vanhu ku dyondza “vutivi lebyi kongomeke bya ntiyiso,” ku nga ku rhandza ka Xikwembu leswaku vanhu hinkwavo va byi kuma. (1 Timotiya 2:3, 4) Hikwalaho, hi 1950 hi sungule ku humesa swiyenge swa Bibele ya hina hi ririmi ra manguva lawa, ku nga Vuhundzuluxeri Bya Misava Leyintshwa. Bibele leyi yi hundzuluxeriwe hi tindzimi to tlula 130 naswona ya tshembeka ni ku pakanisa.

A ku laveka Bibele leyi a yi ta twisiseka hi ku olova. Tindzimi ta cinca hi ku famba ka nkarhi naswona vuhundzuluxeri byo tala bya Bibele, byi ni swiga leswi nga twisisekiki kumbe leswi nga ha tirhisiwiki leswi swi tikaka ku swi twisisa. Nakambe, matsalwa ya khale lama tsariweke hi voko lama pakanisaka swinene lama yelanaka ni matsalwa yo sungula ma kumiwile, leswi endleke leswaku ku twisiseka Xiheveru, Xiaramu ni Xigriki xa le Bibeleni.

A ku laveka vuhundzuluxeri lebyi a byi ta tshembeka eka rito ra Xikwembu. Ematshan’weni yo cinca rito ra Xikwembu leri huhuteriweke, vahundzuluxeri va Bibele va fanele va tsala leswi nga eka matsalwa yo sungula. Hambiswiritano, vuhundzuluxeri byo tala a byi ri tirhisi vito ra Xikwembu leri nge, Yehovha eka Matsalwa yo Kwetsima.

A ku laveka Bibele leyi a yi ta yisa ku dzuneka eka Mutsari wa yona. (2 Samuwele 23:2) Eka Vuhundzuluxeri Bya Misava Leyintshwa, vito ra Yehovha ri tlhele ri tlheriseriwa, laha ri humelelaka minkarhi ya 7 000 eka matsalwa ya khale ya Bibele lama tsariweke hi voko hilaha swi kombisiweke hakona eka xifaniso lexi nga laha hansi. (Pisalema 83:18) Endzhaku ka malembe yo tala yo endla ndzavisiso hi vukheta, ku humesiwe Bibele leyi, leyi swi tsakisaka ku yi hlaya tanihi leswi yi hundziselaka mianakanyo ya Xikwembu. Ku nga khathariseki leswaku u na byona Vuhundzuluxeri Bya Misava Leyintshwa hi ririmi ra wena kumbe a wu na byona, hi ku khutaza ku tiendlela xiyimiso xo hlaya Rito ra Yehovha siku ni siku.—Yoxuwa 1:8; Pisalema 1:2, 3.

• Ha yini hi vone swi fanela leswaku ku va ni vuhundzuluxeri lebyintshwa bya Bibele?

• I mukhuva wihi lowunene lowu munhu loyi a lavaka ku dyondza hi ku rhandza ka Xikwembu a faneleke a wu endla siku ni siku?