Vanhu vo tala va tshike ku ya etikerekeni hikuva a va wu kumi nkongomiso kumbe nchavelelo wa moya. Kutani, ha yini u fanele u ya eminhlanganweni ya Vukreste leyi hleriweke hi Timbhoni ta Yehovha? U ta kuma yini eminhlanganweni yoleyo?

U ta tsakela ku va exikarhi ka vanhu lava nga ni rirhandzu ni lava khathalaka. Hi lembe-xidzana ro sungula, Vakreste a va hleriwile leswaku va hlanganyela emavandlheni naswona a va khoma minhlangano leswaku va gandzela Xikwembu, va dyondza Matsalwa va tlhela va khutazana. (Vaheveru 10:24, 25) Leswi loko va hlengeletanile a va kombisana rirhandzu, a va titwa va ri exikarhi ka vanghana va ntiyiso—vamakwavo va vona va moya. (2 Vatesalonika 1:3; 3 Yohane 14) Na hina hi landzela xikombiso xolexo naswona hi kuma ntsako lowu fanaka.

U ta vuyeriwa hi ku dyondza ndlela leyi u nga yi tirhisaka ha yona milawu ya le Bibeleni. Vavanuna, vavasati ni vana va hlengeletana swin’we hilaha a swi ri hakona eminkarhini ya ku tsariwa ka Bibele. Vadyondzisi lava fanelekaka va tirhisa Bibele leswaku va hi pfuna ku twisisa ndlela leyi hi nga yi tirhisaka ha yona milawu ya yona siku ni siku. (Deteronoma 31:12; Nehemiya 8:8) Hinkwavo lava nga kona va nga hlanganyela eka mabulo lama katsaka vayingiseri ni le ku yimbeleleni, leswi endlaka leswaku hi kota ku phofula ntshembo wa hina wa Vukreste.—Vaheveru 10:23.

U ta kuma nkateko wa ku tiyisiwa ka ripfumelo ra wena eka Xikwembu. Muapostola Pawulo u byele vanhu va le vandlheni rin’wana ra le nkarhini wa yena a ku: “Ndzi navela ku mi vona, . . . leswaku mi ta khutazana, un’wana hi ripfumelo ra un’wana, ra n’wina ni ra mina.” (Varhoma 1:11, 12) Ku hlangana ka hina ni vapfumeri-kulorhi nkarhi na nkarhi eminhlanganweni swi tiyisa ripfumelo ra hina ni ku tiyimisela ka hina ku hanya hi ku pfumelelana ni milawu ya Vukreste.

Hi kombela leswaku loko u rhambiwa u ya tivonela swilo leswi hi wexe. U ta amukeriwa hi mandla mambirhi. Eminhlanganweni ya hina hinkwayo ku ngheniwa mahala naswona ku hava minhlengo leyi humesiwaka.

• Eminhlanganweni ya hina ya vandlha ku landzeriwa xikombiso xihi?

• Hi nga vuyeriwa njhani loko hi ya eminhlanganweni ya Vukreste?

Hambiloko hi boheka ku famba ekhwatini leri tlhumeke kumbe hi nkarhi lowu maxelo ma nga riki manene, ha ya eminhlanganweni ya hina ya Vukreste nkarhi na nkarhi. Ku nga khathariseki mintlhontlho ya vutomi ni ku karhala endzhaku ko tirha siku hinkwaro, ha yini Timbhoni ta Yehovha ti endla matshalatshala yo hlengeletana ni vapfumeri-kulobye?

Swa hi pfuna eka vuhlayiseki bya hina. Loko Pawulo a vulavula hi lava hi hlengeletanaka na vona evandlheni u tsale a ku: ‘Khathalelanani.’ (Vaheveru 10:24) Rito leri ri vula “ku anakanya hi vukheta,” hileswaku hi fanele hi tivana. Hikwalaho marito ya muapostola loyi ma hi khutaza ku khathala hi van’wana. Loko hi tolovelana ni mindyangu yin’wana ya Vakreste, hi ta kuma leswaku van’wana va vona va hlule mintlhontlho leyi fanaka ni ya hina naswona va nga hi pfuna leswaku na hina hi yi hlula.

Swi endla leswaku hi va ni xinghana lexi tiyeke. Eminhlanganweni ya hina, hi hlengeletana ni ntlawa wa vanghana va hina lavakulu, ku nga ri vanhu lava hi va toloveleke ntsena. Minkarhi yin’wana, hi heta nkarhi hi ri na vona hi tihungasa hi ndlela leyinene. Ku hlengeletana koloko ku hi vuyerisa njhani? Hi dyondza ku tekana hi ri va nkoka naswona sweswo swi tiyisa rirhandzu ra hina. Kutani loko vanghana va hina va ri ni swiphiqo, hi hatla hi va pfuna hikuva se hi ni vunghana lebyi tiyeke. (Swivuriso 17:17) Loko hi tihlanganisa ni swirho hinkwaswo swa vandlha ra ka hina, hi kombisa leswaku ha “khathalelana hi ndlela leyi fanaka.”—1 Vakorinto 12:25, 26.

Hi ku khutaza ku hlawula vanghana lava endlaka ku rhandza ka Xikwembu. Vanghana volavo u ta va kuma exikarhi ka Timbhoni ta Yehovha. Hi kombela leswaku u nga pfumeleli nchumu xi ku tshikisa ku hlengeletana na tona.

• Ha yini swi hi vuyerisa ku hlengeletana swin’we eminhlanganweni?

• U ta ta rini eminhlanganweni leswaku u ta tolovelana ni Timbhoni?

Minhlangano ya Vakreste va lembe-xidzana ro sungula a yi katsa tinsimu, swikhongelo ni ku hlayiwa ka Matsalwa ma tlhela ma hlamuseriwa, a ku nga ri na mihivahivani. (1 Vakorinto 14:26) Hileswi u nga swi langutelaka eminhlanganweni ya hina.

Tidyondzo ta kona ti sekeriwe eBibeleni naswona ta twisiseka. Hi mahelo-vhiki, Timbhoni ta Yehovha ta hlengeletana emavandlheni yo hambana-hambana leswaku ti ta yingisela nkulumo leyi sekeriweke eBibeleni ya timinete ta 30, leyi hlamuselaka ndlela leyi Matsalwa ma khumbaka vutomi bya hina ha yona ni minkarhi leyi hi hanyaka eka yona. Hinkwerhu ka hina ha khutaziwa leswaku hi pfula Tibibele ta hina loko ku hlayiwa matsalwa. Endzhaku ka nkulumo, ku landzela Dyondzo ya “Xihondzo xo Rindza” leyi tekaka awara, laha eka yona xirho xin’wana ni xin’wana xa vandlha xi pfumeleriweke ku hlamula hi nkarhi wa dyondzo. Dyondzo leyi yi hi pfuna leswaku hi tirhisa nkongomiso wa Bibele evuton’wini bya hina. Eka mavandlha lama tlulaka 110 000 emisaveni hinkwayo ku dyondziwa rungula leri fanaka.

Ha pfuniwa leswaku hi antswisa ntirho wa hina wo chumayela. Hi tlhela hi khoma minhlangano ya swiyenge swinharhu ya Mahanyelo Ni Ntirho Wa Hina Wo Chumayela, leyi sekeriweke eka xiyimiso xa minhlangano xa n’hweti na n’hweti, xa Mahanyelo Ni Ntirho Wa Hina Wo Chumayela. Xiyenge xo sungula eka minhlangano leyi ku nga Leswi Hi Swi Dyondzaka eBibeleni, xi hi pfuna leswaku hi tolovelana ni rungula ra Bibele leri swirho swa vandlha swi ri hlayeke swi nga si ya eminhlanganweni. Xiyenge xa vumbirhi ku nga Ndzetelo Wa Ntirho Wo Chumayela, xi katsa minkombiso ya ndlela leyi hi nga bulaka ni van’wana hi Bibele ha yona. Loyi a nyikelaka ndzayo u nyikela swiringanyeto leswi hi pfunaka leswaku hi antswisa ndlela leyi hi hlayaka ha yona swin’we ni ndlela leyi hi dyondzisaka ha yona. (1 Timotiya 4:13) Xiyenge xo hetelela ku nga Mahanyelo Ya Vukreste xi kombisa ndlela leyi hi nga tirhisaka misinya ya milawu ya Bibele ha yona evuton’wini siku ni siku. Leswi swi katsa ni bulo ra swivutiso ni tinhlamulo leri hi pfunaka ku antswisa ndlela leyi hi yi twisisaka ha yona Bibele.

Loko u ya eminhlanganweni ya hina, handle ko kanakana u ta tsakisiwa hi nkoka wa dyondzo ya Bibele leyi u yi kumaka.—Esaya 54:13.

• I yini leswi u nga rindzelaka ku swi dyondza eminhlanganweni ya Timbhoni ta Yehovha?

• U nga tsakela ku ya eka minhlangano yihi ya vhiki na vhiki enkarhini lowu taka?

Xana u yi xiyile ndlela leyi Timbhoni ta Yehovha ti ambalaka kahle ha yona loko ti ya eminhlanganweni ya tona ya vandlha, eswifanisweni leswi nga eka broxara leyi? Ha yini hi ambala ni ku tilunghisa hi ndlela leyinene?

Hi kombisa leswaku hi xixima Xikwembu xa hina. I ntiyiso leswaku Xikwembu a xi languti ndlela leyi hi langutekaka ha yona. (1 Samuwele 16:7) Hambiswiritano, loko hi hlangana leswaku hi xi gandzela, hi lava ku xi kombisa hi timbilu ta hina hinkwato leswaku ha xi xixima ku katsa ni vagandzeri-kulorhi. Loko hi fanele hi yima ehubyeni emahlweni ka muavanyisi, handle ko kanakana ha tiyiseka leswaku hi languteka kahle. Hilaha ku fanaka, ndlela leyi hi langutekaka ha yona loko hi ri eminhlanganweni yi kombisa ndlela leyi hi n’wi xiximaka ha yona “Muavanyisi wa misava hinkwayo,” Yehovha Xikwembu, swin’we ni ndhawu leyi hi n’wi gandzelaka eka yona.—Genesa 18:25.

Hi kombisa nkoka wa milawu leyi hi hanyaka ha yona. Bibele yi khutaza Vakreste leswaku va ambala ‘hi ndlela ya xichavo ni mianakanyo yo hluteka.’ (1 Timotiya 2:9, 10) Ku ambala ‘hi ndlela ya xichavo’ swi vula ku papalata swiambalo leswi nga kokaka mahlo ya vanhu, leswi pfuxaka nyanyuko wa rimbewu kumbe leswi vonikelaka. Nakambe, ku va ni “mianakanyo yo hluteka” swi ta hi pfuna leswaku hi xava swiambalo swo saseka leswi langutekaka ni leswi nga swinene. Kambe a swi vuli swona leswaku a hi fanelanga hi tihlawulela swiambalo leswi hi swi rhandzaka. Ndlela leyi hi langutekaka ha yona yi nga “sasekisa dyondzo ya Muponisi wa hina” ni ku “dzunisa Xikwembu.” (Tito 2:10; 1 Petro 2:12) Loko hi ambala kahle loko hi ya eminhlanganweni hi endla leswaku vanhu va vona nkoka wo gandzela Yehovha.

Hambiloko u nga ri na swiambalo leswi xiximekaka, wa rhambiwa ku ta eminhlanganweni eHolweni ya Mfumo. Hi nga ambala hi ndlela leyi fanelekaka, hi va lava baseke naswona hi languteka handle ko xava swiambalo swo durha kumbe swo hlawuleka.

• Ndlela leyi hi ambalaka ha yona loko hi gandzela Xikwembu i ya nkoka ku fikela kwihi?

• I milawu yihi leyi kongomisaka ndlela leyi hi ambalaka ni ku tilunghisa ha yona?

Loko u dyondza Bibele ni un’wana wa Timbhoni ta Yehovha, a swi kanakanisi leswaku u ringeta ku lunghiselela leswi u nga ta swi dyondza ka ha ri emahlweni nkarhi na nkarhi. Leswaku u ta vuyeriwa ngopfu, i swinene leswaku u endla leswi fanaka u nga si ya eminhlanganweni ya vandlha. Hi ta vuyeriwa loko hi titoloveta ku lunghiselela nkarhi na nkarhi.

Hlela leswaku u fanele u lunghiselela rini naswona kwihi. Hi wihi nkarhi lowu u nga kotaka ku nyikela nyingiso eka leswi u swi dyondzaka? Xana ku nga va ku ri nimixo swinene, loko u nga si sungula ntirho wa siku kumbe nivusiku swinene, loko vana va etlele? Hambiloko u nga ta swi kota ku dyondza nkarhi wo leha, hlela leswaku i nkarhi wo tanihi kwihi lowu u nga ta wu heta u ri eku dyondzeni naswona ringeta leswaku u nga kavanyetiwi hi nchumu. Lava ndhawu leyi rhuleke naswona u tima xiya-ni-moya, thelevhixini ni selfoni hikuva swi nga ku kavanyeta. Ku khongela loko u nga si sungula ku dyondza swi ta ku pfuna leswaku u ntshunxeka eka mivilelo ya siku leswaku u kota ku dzikisa mianakanyo ya wena eka Rito ra Xikwembu.—Vafilipiya 4:6, 7.

Fungha tinhlamulo naswona u lunghekela ku hlamula. Sungula hi ku twisisa leswi dyondzo hinkwayo yi vulavulaka hi swona. Anakanyisisa hi nhloko-mhaka kumbe ndzima, xiya ndlela leyi swihlokwana hinkwaswo swi fambisanaka ha yona ni nhloko-mhaka, u kambisisa swifaniso ni ku pfuxeta swivutiso leswi kandziyisaka tinhla-nkulu. Endzhaku hlaya ndzimana yin’wana ni yin’wana kutani u languta nhlamulo ya xivutiso lexi tsariweke. Hlaya matsalwa lama kombisiweke naswona u anakanyisisa hi ndlela leyi ma fambisanaka ha yona ni rungula leri u ri hlayaka. (Mintirho 17:11) Loko u kuma nhlamulo ya xivutiso yi khwatihate kumbe u fungha marito-nkulu kumbe xivulwa eka ndzimana, leswi nga ta ku tsundzuxa nhlamulo ya kona hi nkarhi wa minhlangano. Kutani eminhlanganweni, u nga tlakusa voko loko u swi tsakela ivi u vula nhlamulo yo koma hi marito ya wena.

Hi ku lunghiselela leswi nga ta dyondziwa eminhlanganweni vhiki ni vhiki, u ta engetela mianakanyo leyintshwa ‘evuhlayiselweni bya xuma’ xa wena bya vutivi bya Bibele.—Matewu 13:51, 52.

• Hi rihi endlelo leri hi faneleke hi ri tirhisa loko hi lunghiselela minhlangano?

• U nga tilunghiselela njhani leswaku u ta hlamula eminhlanganweni?

Ku sukela eminkarhini leyi hundzeke, Yehovha a a lava leswaku mindyangu yi heta nkarhi swin’we, yi akana hi tlhelo ra moya ni ku tiyisa vuxaka bya yona. (Deteronoma 6:6, 7) Hi yona mhaka leyi Timbhoni ta Yehovha ti vekelaka etlhelo nkarhi vhiki ni vhiki leswaku ti gandzela swin’we tanihi ndyangu—ti burisana hi swilaveko swa tona swa moya. Hambiloko u tshama u ri wexe, u nga wu tirhisa kahle nkarhi wolowo hi ku va ni dyondzo ya Bibele, u dyondza rungula leri u ri hlawuleke.

I nkarhi wo tshinela ekusuhi na Yehovha. “Tshinelani eka Xikwembu, kutani xi ta tshinela eka n’wina.” (Yakobo 4:⁠8) Hi ta n’wi tiva kahle Yehovha loko hi dyondza hi vumunhu byakwe ni hi mintirho yakwe eRitweni rakwe, ku nga Bibele. Ndlela yo olova ya ku sungula vugandzeri bya n’wina bya ndyangu, i ku va nkarhi wun’wana mi wu tirhisela ku hlaya Bibele swin’we kumbexana mi nga ha tirhisa xiyimiso xa Mahanyelo Ni Ntirho Wa Hina Wo Chumayela xa vhiki na vhiki. Xirho xin’wana ni xin’wana xa ndyangu xi fanele xi va ni xiavelo xa ku hlaya kutani endzhaku hinkwenu mi nga bula hi leswi mi swi dyondzeke eMatsalweni.

I nkarhi wa leswaku swirho swa ndyangu swi tshinelelana. Vavanuna ni vavasati, ku katsa vatswari ni vana va tiyisa vuxaka bya vona loko va dyondza Bibele tanihi ndyangu. Ku fanele ku va xiendlakalo lexi un’wana ni un’wana endyangwini a xi languteleke hi mahlo-ngati vhiki na vhiki. Vatswari va nga hlawula tinhloko-mhaka hi ku ya hi malembe ya vana va vona, leti va nga bulaka ha tona kumbexana va tirhisa leti nga eka Xihondzo xo Rindza ni Xalamuka! kumbe eka website ya hina ya jw.org/ts. Mi nga vulavula hi xiphiqo lexi vana va n’wina va hlanganeke na xona exikolweni ni leswaku va nga langutana njhani na xona. Hikwalaho ka yini mi nga hlaleli nongonoko wa Vuhaxi Bya JW (tv.jw.org/ts) kutani mi bula hi tinhla leti mi ti kumeke. Mi nga ha tsakela ku titoloveta tinsimu leti nga ta yimbeleriwa eminhlanganweni kutani endzhaku ka vugandzeri bya ndyangu mi nga dya swakudya mi nwa ni swo tima torha.

Nkarhi lowu wo hlawuleka lowu mi wu tirhiselaka ku gandzela Yehovha swin’we vhiki na vhiki wu ta mi pfuna hinkwenu ku tsakela ku dyondza Rito ra Xikwembu naswona u ta ma katekisa swinene matshalatshala ya n’wina.—Pisalema 1:1-3.

• Ha yini hi tivekela nkarhi wa vugandzeri bya ndyangu?

• Vatswari va nga swi endla njhani leswaku nkarhi lowu wu tsakisa hinkwavo endyangwini?

Ha yini vanhu lava va languteka va tsakile swinene? Va te eka yin’wana ya tinhlengeletano ta hina. Ku fana ni malandza ya Xikwembu ya le nkarhini lowu hundzeke, lawa a ma lerisiwe ku hlengeletana kanharhu hi lembe, hi swi langutela hi mahlo-ngati ku hlengeletana hi mintlawa leyikulu. (Deteronoma 16:16) Lembe ni lembe, hi va ni tinhlengeletano tinharhu: tinhlengeletano timbirhi ta miganga leti ha yin’we ya tona yi tekaka siku rin’we ni nhlengeletano ya xifundzha leyi tekaka masiku manharhu. Hi vuyeriwa njhani eka tinhlengeletano leti?

Ti tiyisa vuxaka bya hina ni vamakwerhu. Tanihi leswi Vaisrayele va tsakeleke ku dzunisa Yehovha ‘etinhlengeletanweni,’ na hina hi tiphina hi ku n’wi gandzela swin’we etinhlengeletanweni. (Pisalema 26:12, nhlamuselo ya le hansi; 111:1) Tinhlengeletano leti ti hi nyika nkarhi wo hlangana ni Timbhoni leti humaka emavandlheni man’wana kumbe ematikweni man’wana. Ninhlikanhi, hi tiphina swin’we hi swakudya endhawini leyi nhlengeletano yi khomeriweke eka yona, leswi engetelaka moya wa xinghana hi nkarhi wa tinhlengeletano leti. (Mintirho 2:42) Etinhlengeletanweni toleto hi tivonela hi ya hina rirhandzu leri endlaka leswaku ‘nhlengeletano ya vamakwerhu hinkwayo’ emisaveni yi va ni vun’we.—1 Petro 2:17.

Ti hi pfuna ku endla nhluvuko hi tlhelo ra moya. Vaisrayele na vona va vuyeriwile hi leswi va ‘twisiseke marito’ ya Matsalwa lawa va hlamuseriweke wona. (Nehemiya 8:8, 12) Na hina hi wu teka wu ri wa nkoka ndzetelo wa le Bibeleni lowu hi wu kumaka etinhlengeletanweni ta hina. Nongonoko wun’wana ni wun’wana wu sekeriwe eka nhloko-mhaka ya le Matsalweni. Hi ku tirhisa tinkulumo leti tsakisaka, minxaxamelo ni minkombiso ya leswi endlekaka, hi dyondza ku endla ku rhandza ka Xikwembu evuton’wini bya hina. Ha khutaziwa loko hi twa mintokoto ya lava langutanaka ni ntlhontlho wa ku hanya tanihi Vakreste eminkarhini leyi yo tika. Etinhlengeletanweni ta xifundzha, tidrama ta xikhale ti endla rungula ra le Bibeleni ri va ra xiviri eka hina naswona ti hi dyondzisa tidyondzo ta nkoka. Enhlengeletanweni yin’wana ni yin’wana ku khuvuriwa vanhu lava lavaka ku kombisa ku tinyiketela ka vona eka Xikwembu.

• Ha yini tinhlengeletano ti tsakisa?

• U nga vuyeriwa njhani loko wo ya enhlengeletanweni?

Emahlweninyana ka ku fa kakwe, Yesu u te: “Mahungu lamanene lawa ya Mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.” (Matewu 24:14) Kambe, xana ntirho lowu wo chumayela emisaveni hinkwayo a wu ta endliwa njhani? Hi ku landzela xikombiso lexi Yesu a xi vekeke loko a ri laha misaveni.—Luka 8:1.

Hi ringeta ku vulavurisana ni vanhu emakaya ya vona. Yesu u letele vadyondzisiwa va yena ku chumayela mahungu lamanene hi yindlu ni yindlu. (Matewu 10:11-13; Mintirho 5:42; 20:20) Vachumayeri volavo va lembe-xidzana ro sungula a va averiwe ku chumayela etindhawini to karhi. (Matewu 10:5, 6; 2 Vakorinto 10:13) Hilaha ku fanaka, ninamuntlha ntirho wa hina wo chumayela wu hleriwe kahle naswona vandlha rin’wana ni rin’wana ri averiwe ndhawu leyi ri faneleke ri yi tirha. Leswi swi endla leswaku hi kota ku hetisisa xileriso xa Yesu xo “chumayela evanhwini ni ku nyikela vumbhoni bya rixaladza.”—Mintirho 10:42.

Hi tikarhatela ku fikelela vanhu kun’wana ni kun’wana laha va nga kumekaka kona. Yesu u tlhele a veka xikombiso hi ku chumayela vanhu etindhawini ta mani na mani, ku fana ni le ribuweni ra lwandle kumbe exihlobyeni lexi vanhu va yaka va ya ka mati eka xona. (Marka 4:1; Yohane 4:5-15) Na hina hi vulavurisana ni vanhu hi Bibele kun’wana ni kun’wana—eswitarateni, etindhawini ta mabindzu, etiphakeni kumbe hi tinqingho. Loko hi pfulekeriwa hi nkarhi hi tlhela hi chumayela vaakelani va hina, vatirhi-kulorhi, vadyondzi-kulorhi ni maxaka ya hina. Matshalatshala lawa hinkwawo ma endle leswaku vanhu va timiliyoni emisaveni hinkwayo va kota ku twa “mahungu lamanene ya ku ponisiwa.”—Pisalema 96:2.

Xana u kona munhu loyi u nga tsakelaka ku n’wi byela mahungu lamanene ya Mfumo wa Xikwembu ni ndlela leyi ma nga n’wi vuyerisaka ha yona enkarhini lowu taka? U nga tshami ni rungula rolero. Ri byele van’wana hi xihatla hilaha u nga kotaka hakona.

• Hi wahi “mahungu lamanene” lama faneleke ma chumayeriwa?

• Timbhoni ta Yehovha ti xi tekelela njhani xikombiso xa Yesu xa ku chumayela?

Rito “phayona” hakanyingi ri vula munhu la yaka ensin’wini leyintshwa kutani a fika a bula ndlela leswaku van’wana va ta landzela. Yesu a a fana ni phayona, tanihi leswi a a rhumiwe emisaveni leswaku a ta endla vutirheli lebyi nyikaka vutomi ni ku nyika vanhu nkarhi wa ku ponisiwa. (Matewu 20:28) Namuntlha, valandzeri va yena va n’wi tekelela hi ku heta nkarhi wo tala hilaha va nga kotaka hakona ‘va endla vanhu vadyondzisiwa.’ (Matewu 28:19, 20) Van’wana va kote ku nghenela ntirho lowu hi wu vitanaka vuphayona.

Phayona i munhu la chumayelaka nkarhi hinkwawo. Timbhoni ta Yehovha hinkwato i vahuweleri va mahungu lamanene. Hambiswiritano, van’wana va hlele swiyimo swa vona evuton’wini leswaku va va maphayona ya nkarhi hinkwawo, va heta tiawara ta 70 entirhweni wo chumayela n’hweti na n’hweti. Leswaku va kota ku endla tano, vo tala a va tirhi nkarhi hinkwawo entirhweni wa ku tihanyisa. Van’wana va hlawuriwa ku ya va maphayona yo hlawuleka etindhawini leti ku nga ni xilaveko lexikulu xa vahuweleri va Mfumo, va tirha tiawara ta 130 kumbe ku tlula ensin’wini n’hweti na n’hweti. Maphayona ma enerisekile hi ku hanya vutomi bya xiyimo xa le hansi, ma tiyiseka leswaku Yehovha u ta ma nyika swilo leswi ma swi pfumalaka evuton’wini. (Matewu 6:31-33; 1 Timotiya 6:6-8) Lava tsandzekaka ku phayona nkarhi hinkwawo va nga va maphayona ya nkarhinyana hi nkarhi lowu va swi kotaka ha wona, va tirha tiawara ta 30 kumbe ta 50 n’hweti na n’hweti entirhweni wo chumayela.

Phayona ri susumeteriwa hi ku rhandza Xikwembu ni vanhu. Ku fana na Yesu, ha swi xiya leswaku vanhu vo tala va swi lava swinene ku tiva Xikwembu ni swikongomelo swa xona namuntlha. (Marka 6:34) Kambe hi ni vutivi lebyi nga va pfunaka sweswi, byi va nyika ntshembo lowu tiyeke wa vumundzuku. Ku rhandza vaakelani swi susumetela phayona ku nyikela hi nkarhi wa rona ni matimba ya rona leswaku ri ta pfuna van’wana va twa mahungu lamanene. (Matewu 22:39; 1 Vatesalonika 2:8) Hikwalaho, ripfumelo ra phayona ra tiyisiwa, ri tshinela eka Xikwembu ri tlhela ri kuma ntsako lowukulu.—Mintirho 20:35.

• U nga ri hlamusela njhani phayona?

• I yini leswi susumetelaka van’wana ku phayona nkarhi hinkwawo?

I khale Timbhoni ta Yehovha ti tiviwa hi dyondzo ya Bibele. Dyondzo yo hlawuleka yi lunghiseleriwa lava tirhisaka nkarhi wa vona wo tala entirhweni wo chumayela hi Mfumo leswaku va ‘hetisisa vutirheli bya vona hi xitalo.’—2 Timotiya 4:5.

Xikolo xa Ntirho wa Vuphayona. Loko phayona ri heta lembe ra rona ro sungula entirhweni wa nkarhi hinkwawo, ri tsarisiwa exikolweni lexi tekaka masiku ya tsevu lexi nga ha khomiwaka eHolweni ya Mfumo ya le kusuhi. Xikongomelo xa xikolo lexi i ku pfuna phayona leswaku ri tshinela eka Yehovha, ri va ni vutshila eka swiyenge hinkwaswo swo chumayela naswona ri hambeta ri phayona hi ku tshembeka.

Xikolo xa Vachumayeri va Mfumo. Xikolo lexi, lexi tekaka tin’hweti timbirhi, xi endleriwe ku letela maphayona lama nga ni ntokoto lama tsakelaka ku suka laha ma tshamaka kona ma ya chumayela kun’wana ni kun’wana laha ma lavekaka kona. Entiyisweni ma ri, “Hi mina loyi! Ndzi rhume,” ma tekelela Muevhangeli lonkulu, loyi a tshameke a va kona laha misaveni, ku nga Yesu Kreste. (Esaya 6:8; Yohane 7:29) Ku rhurhela ekule ni le kaya swi nga ha lava leswaku ma titoloveta ku hanya vutomi byo olova. Ndhavuko, maxelo ni swakudya swi nga ha va swi hambane hi ku helela ni leswi ma swi toloveleke. Nakambe swi nga ha lava leswaku ma dyondza ririmi lerintshwa. Xikolo lexi xi pfuna vamakwerhu va xinuna ni va xisati lava nga nghenelangiki vukati ni mimpatswa, lava nga exikarhi ka malembe ya 23 ku ya eka 65, leswaku va hlakulela timfanelo ta moya leti va nga ta ti lava eka xiavelo xa vona ni vuswikoti lebyi nga ta va pfuna leswaku va tirhisiwa hi ku helela hi Yehovha ni nhlengeletano yakwe.

Xikolo xa Bibele xa Giliyadi xa Watchtower. Hi Xiheveru, rito “Giliyadi” ri vula “Vumbhoni byo Tala.” Ku sukela loko xikolo xa Giliyadi xi simekiwile hi 1943, mathwasana yo tlula 8 000 lama leteriweke eka xona ma rhumeriwe tanihi varhumiwa leswaku ma ya nyikela vumbhoni ku ya fikela “emakun’wini ya misava,” naswona ku ve ni vuyelo lebyikulu. (Mintirho 13:47) Loko varhumiwa va fika ro sungula ePeru, a ku nga ri na mavandlha etikweni. Sweswi ku ni mavandlha yo tlula 1 000. Loko varhumiwa va fika eJapani, a ku ri ni Timbhoni leti nga fikiki eka khume etikweni. Sweswi ku ni Timbhoni to tlula 200 000. Khoso ya xikolo xa Giliyadi leyi tekaka tin’hweti ta ntlhanu yi katsa dyondzo leyi dzikeke ya Rito ra Xikwembu. Lava nga maphayona yo hlawuleka kumbe varhumiwa lava nga emarhavini kumbe entirhweni wo endzela mavandlha va rhambiwa exikolweni lexi ku ta kuma ndzetelo lowu dzikeke leswaku va pfuneta ku tiyisa ntirho lowu endliwaka emisaveni hinkwayo.

• Hi xihi xikongomelo xa Xikolo xa Ntirho wa Vuphayona?

• Xi endleriwe vamani Xikolo xa Vachumayeri va Mfumo?