EKSODHUSI

1 A mavito ya vana va Izrayeli lava va nga famba na Jakobe le Gibhite, a wanuna mun’we ni mun’wani na a hi ni ngango wakwe,+ hi lawa: 2 Rubheni, na Simeyoni, na Levhi, na Judha,+ 3 na Isakari, na Zebhuloni, na Bhenjamini, 4 na Dhani, na Naftali, na Gadhi, na Axeri.+ 5 Vontlhe lava va nga pswalelwe Jakobe* va wa hi 70 wa vanhu,* kanilezvi Josefa i wa sina a hi Gibhite.+ 6 Hi kugumesa, Josefa i nofa,+ yena, ni vontlhe a vamakabye vakwe, ni vontlhe va cizukulwana leco. 7 A vaIzrayeli* va no pswalelana va sangula ku tala nguvhu; va no simama ku andza ni kuva ni ntamu hi ndlela yo hlamalisa laha ka kuza va tata tiko.+

8 Hi kufamba ka cikhati, ku no huma hosi ya yiswa Gibhite, leyi yi nga kala yi nga mu tivi Josefa. 9 Makunu a hosi leyo yi no byela vanhu va yona, yiku: “A vaIzrayeli va tele nguvhu niku va na ni ntamu a ku hundza hina.+ 10 A hi va woneleni pulani. Loku hi nga mahi lezvo, va ta simama ku talelana, niku loku ku vhuka yimpi, va ta ti patsa ni valala va hina valwa na hina va gumesa va huma lomu tikweni.”

11 Makunu va no yimisa a tihosana ta ku va mahisa mitiro ya cikurumeta kasi ti va xanisa hi mitiro yo bindza.+ Hikwalaho, va no aka madhoropa ya Faro yo veketela titshomba, ku nga Pitomi ni Ramsese.+ 12 Kanilezvi laha va ngaya va engetela ku va xanisa, a vaIzrayeli va wo andza ni ku simama ku hangalaka laha ka kuza a vaGibhite va va chava nguvhu a vaIzrayeli.+ 13 Hi kota ya lezvo, a vaGibhite va no xanisa vaIzrayeli va va maha tikhumbi.+ 14 Va no va bindzisela wutomi hi ku va nyika a ntiro wo bindza wa ku vhuva argamasa ya wumba ni ku maha zvitini, ni ku va mahisa mitiro ya tixaka tontlhe ta wukhumbi lomu masin’wini. Kunene, va no va mahisa mitiro ya tixaka tontlhe ta wukhumbi ka zviyimo zvo nonoha.+

15 Hi kufamba ka cikhati, a hosi ya Gibhite yi no wulawula ni masingalakati* mambiri ya vaHebheru, lawa a mavito yabye ku nga hi Xifra na Puwa, 16 yiku kabye: “A cikhati leci mu va vhunako ku pswala a vavasati va vaHebheru,+ cuwukani na va ha pswala. Loku a n’wanana loye a hi mufana, dayani, kanilezvi loku a hi nhanyana, mu tsikeni a hanya.” 17 Kanilezvi a masingalakati* lawo ma wa chava a Nungungulu wa lisine, hikwalaho, a ma mahangi lezvi a hosi ya Gibhite yi nga ma byelile. Wutshan’wini ga lezvo, ma no tsika a zvivanana zva vafana zvi hanya.+ 18 Hi kufamba ka cikhati, a hosi ya Gibhite yi no vitana a masingalakati* yi ta ma wutisa, yiku: “Hikuyini mu nga tsika a zvivanana zva vafana zvi hanya?” 19 A masingalakati* ma no hlamula Faro, maku: “A vavasati va vaHebheru a va fani ni vavasati va vaGibhite. A vavasati va vaHebheru va na ni ntamu; a singalakati gi chikela gi va kuma na va pswalile kale.”

20 Hikwalaho, Nungungulu i no katekisa a masingalakati* lawo, niku a vanhu va no simama ku talelana va tlhela vava ni ntamu nguvhu. 21 Kota lezvi a masingalakati* lawo ma chavileko a Nungungulu wa lisine, hi kufamba ka cikhati Nungungulu i no ma nyika mingango. 22 Hi kugumesa, Faro i no laya a vanhu vakwe vontlhe, aku: “Ni wihi a mufana wa muHebheru a to pswaliwa mu hoxeni lomu congweni wa Nilo, kanilezvi a vanhanyana vontlhe va tsikeni va hanya.”+

2 Ka cikhati leco, a wanuna wo kari wa yindlu ya Levhi i no chadha ni nhanyana wa Levhi.+ 2 A nhanyana loye i no xura nyimba a pswala mufana. A cikhati leci a nga wona lezvaku a mufana loye i sasekile nguvhu, i no mu fihla hi tihweti tinharu.+ 3 Laha a nga kala a nga ha zvi koti ku mu fihla,+ i no teka ndzhava* wo mahiwa hi majeka* a wu bhama hi bhitume* ni hlakati, a lata n’wanana ka wona, a ya wu veka cikari ka hlanga mbhirini ya Congo wa Nilo. 4 Kanilezvi a makabye wa cisati wa n’wanana loye+ i no yima hi le kulana kasi a wona ku zvini zvi to mu humelela.

5 A cikhati leci a nhanyana wa Faro a nga relela kasi ku ya hlamba lomu Congweni wa Nilo, a malandza yakwe ma wa famba hi mbhiri ya Congo wa Nilo. I no wona ndzhava wu nga hi lomu cikari ka hlanga, a tekela ku ruma a khumbi yakwe ya cisati kasi yi ya wu teka.+ 6 A cikhati leci a nga vhulula ndzhava, i no wona n’wanana wa mufana na a kari a rila. I no mu zwela wusiwana, kanilezvi i te: “Loyi mun’we wa vanana va vaHebheru.” 7 A makabye wa cisati wa n’wanana loye i no wutisa n’waFaro, aku: “Ndzi ya ku vitanela a wasati wa muHebheru kasi a ta ku an’wisela n’wanana loyi ke?” 8 N’wafaro i no mu hlamula, aku: “Famba!” Zvalezvo a nhanyana loye i noya a ya vitana a mamani wa n’wanana.+ 9 N’wafaro i te ngalo kakwe: “Teka n’wanana loyi u tshama naye u ndzi an’wisela, ndzi ta ku hakhela.” Hikwalaho, a wasati i no teka n’wanana a mu an’wisa. 10 Laha a n’wanana a nga kula i no mu heleketa ka n’waFaro a ya maha n’wana wakwe.+ I no mu chula ku hi Mosi,* aku: “Hi ku ndzi mu humesile lomu matini.”+

11 Masikwini lawo, andzhako ka loku Mosi a kulile,* i no huma aya ka vamakabye vakwe a ya wona lezvi va nga korokisa zvona hi ku mahiswa mitiro yo bindza.+ I no wona muGibhite na a kari aba muHebheru, a mun’we wa vamakabye vakwe. 12 I no cuwuka seno ni seno a nga woni munhu, a se daya muGibhite a mu tumbeta lomu vhunyeni.+

13 Kanilezvi i no huma kambe ka siku gi nga landzela a ya kuma vaHebheru vambiri na valwa hi civona. I no wutisa loyi a nga hi hava razawu, aku: “U mu bela yini a makabye wa wena?”+ 14 Yena aku: “Himani a nga ku yimisa a kuva hosana ni mulamuli hehla ka hina? U lava ku ndzi daya a ku fana ni lezvi u nga daya muGibhite?”+ Makunu Mosi i no chava, aku: “Hakunene a mhaka leyi yi tivekile!”

15 Faro i no zvizwa a zama ku daya Mosi; kanilezvi Mosi i no tsutsuma Faro a ya hanya tikweni ga Midhiyani.+ Laha a nga chikela seyo, i no tshama a humula kusuhani ni hlowo. 16 A mupristi wa le Midhiyani+ i wa hi ni 7 wa vanhanyana. A vanhanyana lavo va no chikela kasi ku ta khelela mati va tata zvigowolo va fela ku nwisa a ntlhambi wa papayi wabye. 17 Kanilezvi kota tolovelo, ku no chikela varisi va va hlongola. Hi kota ya lezvo, Mosi i no suka a vhuna* vanhanyana lavo a tlhela a nwisa ntlhambi wabye. 18 A cikhati leci va nga tlhela kaya ka papayi wabye Reweli,*+ i no hlamala, aku: “Zvi no mahisa kuyini a ku hatla mu wuya kaya nyamutlha?” 19 Va no hlamula, vaku: “Mugibhite wo kari+ a nga hi tlhatlhisa ka varisi. I tlhelile a hi khela mati a nwisa ntlhambi.” 20 I no wutisa vanhanyana vakwe, aku: “Makunu i kwihi? Mu mu siyele yini? Fambani mu ya mu vitana kasi a taga na hina.” 21 Andzhako ka lezvo, Mosi i no vhumela ku tshama ni wanuna loye; yena i no nyikela a nhanyana wakwe Zipora+ ka Mosi, a chadha naye. 22 Hi kufamba ka cikhati, Zipora i no mu pswalela mufana, Mosi a mu chula ku hi Gerxomi,*+ hakuva i waku: “Ndzi mahile muluveli ka gin’wani tiko.”+

23 Loku ku hundzile cikhati co leha,* a hosi ya Gibhite yi nofa+ kanilezvi a vaIzrayeli va wa ha simama a ku keta ni ku rila na va khala hi kota ya wukhumbi. A kurila kabye ka ku lava ku vhuniwa hi kota ya wukhumbi ku wa simama kuya ka Nungungulu wa lisine.+ 24 Hi kufamba ka cikhati, Nungungulu i nozwa a kurila kabye,+ a alakanya a civhumelwano leci a ci mahileko na Abrahama, na Isaka na Jakobe.+ 25 Nungungulu i no cuwuka vaIzrayeli, a wona kuxaniseka kabye.

3 Mosi i nova murisi wa ntlhambi wa bava wakwe Jetro,+ a mupristi wa le Midhiyani. Laha Mosi a nga kari a gula a ntlhambi wuya le mupela-gambo wa ciwula, i no chikela citsungeni ca Nungungulu wa lisine, le Horebhe.+ 2 A ngilozi ya Jehovha yi no woneka kakwe lomu ka langavi ga ndzilo khuhweni ga mimizwa.+ Laha a nga kari a simama ku cuwuka, i no wona lezvaku a khuhu ga mimizwa gi wo vhura ndzilo, hambulezvo gi wa nga mbheli. 3 Hikwalaho, Mosi i te: “Ndza ha tshinela ndzi ya ci wona khwatsi a cihlamaliso leci, kasi ndzi wona a ku hikuyini a khuhu ga mimizwa gi kalako gi ngaswi.” 4 A cikhati leci Jehovha a nga wona lezvaku Mosi wa tshinela kasi a ta zvi wona, i no mu vitana hi lomu khuhweni ga mimizwa, aku: “Mosi! Mosi!” Yena aku: “Hi mina loyi.” 5 Nungungulu aku: “U nga ha tshineli kambe! Tlhatlha masandalia mikondzweni ya wena, hakuva a wutshamu legi u yimileko ka gona wutshamu go basa.”

6 I no simama ku wulawula, aku: “Hi mina Nungungulu wa papayi wa wena, a Nungungulu wa Abrahama,+ a Nungungulu wa Isaka,+ ni Nungungulu wa Jakobe.”+ Makunu Mosi i no fihla nghohe yakwe, hakuva i wa chava ku cuwuka a Nungungulu wa lisine. 7 Jehovha a engeta, aku: “Hakunene ndzi wonile a hlomulo wa vanhu va mina lava va nga le Gibhite, niku ndzi zwile a kurila kabye hi kota ya lava va va kurumetako ku tira; ndza ku tiva khwatsi a kubayisa loku va ku zwako.+ 8 Ndzi ta relela kasi ndzi ya va tlhatlhisa canjeni ga vaGibhite+ ndzi va humesa tikweni lego vaya ka tiko ga ginene ni ga hombe, a tiko gi khulungako masi ni wulombe,+ gi nga tiko ga vaKhanani, ni ga vaHiti, ni ga vaAmori, ni ga vaPerezi, ni ga vaHivhi, ni ga vaJebhusi.+ 9 A kurila ka va ka Izrayeli ku chikele ka mina niku ndzi wonile lezvaku a vaGibhite va va xanisa nguvhu.+ 10 Makunu tana ndzi ta ku ruma uya ka Faro u ya humesa a vanhu va mina, a vaIzrayeli, le Gibhite.”+

11 Kanilezvi Mosi i no wutisa a Nungungulu wa lisine, aku: “Ndzova mina mani wo kala ndziya ka Faro ndzi ya humesa a vaIzrayeli Gibhite ke?” 12 Nungungulu aku: “Ndzi tava na wena.+ A cikombiso ca lezvaku hi mina ndzi nga ku ruma hi leci: Andzhako ka loku u humesile vanhu tikweni ga Gibhite, mu ta tirela* a Nungungulu wa lisine ka citsunga leci.”+

13 Kanilezvi Mosi i no wutisa a Nungungulu wa lisine, aku: “Ahati loku ndzoya ka vaIzrayeli ndzi yaku kabye: ‘A Nungungulu wa vakokwani va n’wina i ndzi rumele ka n’wina,’ vona vaku: ‘Himani a vito gakwe?’+ Ndzi ta va hlamula yini?” 14 Nungungulu a byela Mosi, aku: “Ndzi Tava Lezvi Ndzi To Hlawula* Kuva Zvona.”*+ A engeta aku: “U ta byela a vaIzrayeli, uku: ‘“Ndzi Tava” i ndzi rumile ka n’wina.’”+ 15 Nungungulu i no tlhela a byela Mosi, aku:

“U ta byela a vaIzrayeli, uku: ‘Jehovha, a Nungungulu wa vakokwani va n’wina, a Nungungulu wa Abrahama,+ a Nungungulu wa Isaka,+ ni Nungungulu wa Jakobe,+ i ndzi rumile ka n’wina.’ Legi hi gona a vito ga mina kala kupindzuka,+ hi zvalezvi va to ndzi alakanyisa zvona ka cizukulwana ni cizukulwana. 16 Makunu famba, u ya tlhanganisa a madhota ya ka Izrayeli u ma byela lezvi: ‘Jehovha, a Nungungulu wa vakokwani va n’wina, a Nungungulu wa Abrahama, na Isaka, na Jakobe, i wonekile ka mina, aku: “Hakunene ndza mu wona+ niku ndza zvi wona lezvi va mu mahako lomu Gibhite. 17 Hikwalaho, ndzi ngalo: Ndzi ta mu tlhatlhisa hlomulweni+ lowu mu nga ka wona mandleni ya vaGibhite muya tikweni ga vaKhanani, ni ga vaHiti, ni ga vaAmori,+ ni ga vaPerezi, ni ga vaHivhi, ni ga vaJebhusi,+ a tiko gi khulungako masi ni wulombe.”’+

18 “Kunene va ta ingisa a gezu ga wena.+ Wena ni madhota ya ka Izrayeli mu taya ka hosi ya Gibhite mu yaku ka yona: ‘Jehovha, a Nungungulu wa vaHebheru,+ i wulawulile na hina. Hikwalaho, hi kombela lezvaku u hi tsika hi maha liendzo la masiku manharu hiya ciwuleni kasi hi ya mu mahela muphahlo Jehovha, a Nungungulu wa hina.’+ 19 Kanilezvi ndza zvi tiva khwatsi lezvaku a hosi ya Gibhite yi nga ta mu vhumelela ku famba loku yi nga kurumetiwi hi canja ga ntamu.+ 20 Hikwalaho, zvi ta lava ku ndzi nawuluta a canja ga mina ndziba Gibhite hi yontlhe a mitiro ya mina yo hlamalisa leyi ndzi to yi maha seyo, hi kona a to mu tsika mu famba.+ 21 Ndzi ta maha lezvaku a vanhu lava va kuma thomo mahlweni ka vaGibhite; a cikhati leci mu to huma, mu nga ta famba hi mandla.+ 22 A wasati mun’we ni mun’wani i fanele ku kombela a zvilo zva prata ni zva ouro, ni tinguwo ka muakelani wakwe ni ka wasati a rureleko mutini wakwe. A zvilo lezvo mu ta bohisa a vafana va n’wina ni vanhanyana va n’wina; mu ta phanga vaGibhite.”+

4 Kanilezvi Mosi i no hlamula, aku: “Ahati loku va nga kholwi ka mina va tlhela va nga ingisi a gezu ga mina ke,+ hakuva va taku: ‘Jehovha a nga wonekangi ka wena.’” 2 Jehovha i no mu wutisa, aku: “Cini leco ci nga canjeni ga wena?” I no hlamula, aku: “I nhonga.” 3 I te ngalo kakwe: “Yi hoxe lahasi.” I no yi hoxa lahasi yi se cica yi maha nyoka;+ Mosi a yi tsutsuma. 4 Jehovha i no byela Mosi, aku: “Nawuluta a canja ga wena u yi khoma hi mudhoza.”* I no nawuluta a canja gakwe a yi khoma, yi se cica yi maha nhonga canjeni gakwe. 5 Makunu Nungungulu i te ngalo: “Lezvi zvi fela ku va kholwisa lezvaku Jehovha, a Nungungulu wa vakokwani vabye, a Nungungulu wa Abrahama, a Nungungulu wa Isaka ni Nungungulu wa Jakobe,+ i wonekile ka wena.”+

6 Jehovha i no wulawula kambe kakwe, aku: “Nghenisa a canja ga wena lomu ka cipetswa ca nguwo ya wena.” Hikwalaho, i no nghenisa a canja gakwe lomu ka cipetswa ca nguwo yakwe. Laha a nga humesa a canja gakwe, gi wa pomelwe hi hlokonho yo khwatsi i gapongo!+ 7 Hi kulandzela, Nungungulu i no byela Mosi, aku: “Tlhelisa a canja ga wena lomu ka cipetswa ca nguwo ya wena.” Hikwalaho, i no tlhelisa a canja gakwe lomu ka cipetswa ca nguwo yakwe. A cikhati leci a nga gi humesa hi lomu ka nguwo, gi wa hanyile; gi wa fana ni miri wakwe wontlhe. 8 Nungungulu aku: “Loku va nga kholwi ka wena kutani ku chela kota ka wukustumunyu ga cihlamaliso co sangula, va ta kholwa ka wukustumunyu ga cihlamaliso ca wumbiri.+ 9 Hambulezvo, loku va nga kholwi ka zvihlamaliso lezvi zva zvimbiri, va ala ku ingisa gezu ga wena, u taya u yakha matana lomu congweni wa Nilo u ta ma halata laha ka misava yo woma. A mati lawo u toya u yakha congweni wa Nilo ma ta cica ma maha nkhata laha ka misava yo woma.”+

10 Makunu Mosi i no byela Jehovha, aku: “Ndzi tsetselele Jehovha, hakuva a ndzi se tshuka ndzi zvi kota ku wulawula khwatsi — ku ngava ka cikhati ci hundzileko kutani kusukela ka cikhati leci u nga wulawula ni nandza ga wena — hakuva ndzi munhu wa manghakamela* ni wo nonoka ku wulawula.”+ 11 Jehovha i te ngalo kakwe: “Kasi himani a mu nyikileko nomu a munhu? Kona himani a mahako munhu ava mbeveve, afa tindleve, a wona khwatsi kutani ava cikhumu ke? A hi mina Jehovha ke? 12 Wena famba, ndzi tava na wena a cikhati leci u to wulawula,* ndzi ku gondzisa lezvi u faneleko ku wula.”+ 13 Kanilezvi Mosi i te: “Ndzi tsetselele Jehovha, ndzi kombela lezvaku u ruma ni wihi u lavako ku mu ruma.” 14 Zvalezvo a zanga ya Jehovha yi no vhindlukela Mosi, aku: “Kasi a nga kona a makabye wa wena Aroni,+ a muLevhi ke? Ndza zvi tiva lezvaku yena wa wulawula khwatsi. Zvezvi i lomu ndleleni ya kuta a ku khinga. Laha a to ku wona, a mbilu yakwe yi ta tsaka.+ 15 Hikwalaho, wulawula naye, u chela magezu non’wini wakwe.+ Mina ndzi tava na n’wina a cikhati leci mu to wulawula,+ ndzi mu gondzisa lezvi mu to maha. 16 Hi yena a to ku wulawulela mahlweni ka vanhu, ava muwulawuli wa wena; wena u ta ku khwatsi u Nungungulu kakwe.+ 17 U ta famba ni nhonga leyi canjeni ga wena u ya maha hi yona a zvihlamaliso.”+

18 Hikwalaho, Mosi i no tlhela ka bava wakwe Jetro,+ a yaku: “Ndzi lava ku famba, ndzi tlhela ka vamakabye va mina le Gibhite kasi ndzi ya wona ku va ha hanya ke.” Jetro aku ka Mosi: “Famba hi kurula.” 19 Andzhako ka lezvo, Jehovha i no byela Mosi, aku: “Tlhela Gibhite, hakuva vontlhe a vanhu lava va nga lava ku ku daya* va file.”+

20 Makunu Mosi i no teka a sati wakwe ni vafana vakwe a va khilelisa mbongola, a tlhela tikweni ga Gibhite. Ahandle ka lezvo, Mosi i no welela a nhonga ya Nungungulu wa lisine canjeni gakwe. 21 Jehovha i no byela Mosi, aku: “Loku u tlhelile Gibhite, maha a zvihlamaliso zvontlhe lezvi ndzi nga ku nyika ntamu wa ku u zvi maha mahlweni ka Faro.+ Kanilezvi ndzi ta mu tsika a nonohisa mbilu yakwe,+ a nga tlhatlhi vanhu va famba.+ 22 U ta byela Faro, uku: ‘Jehovha i ngalo: “Izrayeli i n’wana wa mina, a matewula ya mina.+ 23 Ndza ku byela, ndziku: Tlhatlha a n’wana wa mina kasi a ya ndzi tirela. Kanilezvi loku u ala ku mu tlhatlha, ndzi ta daya a n’wana wa wena wa matewula.”’”+

24 Ndzeni ka lipfhumba lelo, na va hi ka wutshamu go etlela ka gona, Jehovha+ i no tlhangana naye niku i wa lava ku mu daya.+ 25 Hi kugumesa, Zipora+ i no teka a ribye go kariha a mu maha hi gona wukwera* a n’wana wakwe; i no maha lezvaku a bhebhe ga le magumo ka ciro ca wubeleki ca mufana wakwe gi henya mikondzo yakwe, aku: “Hi ku u noivho ya mina ya nkhata.” 26 Hikwalaho, i no mu tsika a famba. Ka cikhati leco, Zipora i wulile ku “noivho ya nkhata” hi kota ya wukwera.*

27 Makunu Jehovha i no byela Aroni, aku: “Famba ciwuleni kasi u ya tlhangana na Mosi.”+ Hikwalaho, i no famba a ya tlhangana naye le citsungeni ca Nungungulu wa lisine,+ a mu losa hi ku mu pswopswa. 28 Mosi i no hlawutela Aroni a timhaka tontlhe ta Jehovha, loyi a nga mu rumile,+ ni zvihlamaliso zvontlhe lezvi a mu leleteleko ku maha.+ 29 Andzhako ka lezvo, Mosi na Aroni va no tlhanganisa a madhota wontlhe ya ka Izrayeli.+ 30 Aroni i no va hlawutela a timhaka tontlhe leti Jehovha a nga byelile Mosi. Yena i no maha zvihlamaliso+ mahlweni ka vanhu. 31 Hi kota ya lezvo, a vanhu va no kholwa.+ Laha va ngazwa lezvaku Jehovha i alakanyile a vaIzrayeli+ ni lezvaku i wonile a hlomulo wabye,+ va no khizama, va korama lahasi.

5 Andzhako ka lezvo, Mosi na Aroni va noya va ya wulawula na Faro, vaku: “Jehovha, a Nungungulu wa Izrayeli, i ngalo: ‘Tlhatlha vanhu va mina va famba kasi va ya ndzi mahela mubuzo ciwuleni.’” 2 Kanilezvi Faro i te: “Himani Jehovha,+ wo kala ndzi ingisa a gezu gakwe ndzi tlhatlha a vaIzrayeli va famba?+ A ndzi mu tivi Jehovha, ne ndzi nga ta tlhatlha a vaIzrayeli va famba.”+ 3 Kanilezvi vona va te: “A Nungungulu wa vaHebheru i wulawulile na hina. Hikwalaho, hi lava ku maha liendzo la masiku manharu hiya ciwuleni hi ya mu mahela muphahlo Jehovha, a Nungungulu wa hina;+ loku hi nga mahi lezvo, i ta hiba hi mababyi kutani hi cipadha.” 4 A hosi ya Gibhite yi no va hlamula, yiku: “Hikuyini wena Mosi na Aroni mu tsikisako vanhu a ku tira? Tlhelani mitirweni* ya n’wina!”+ 5 Faro i no engeta, aku: “Hi nga wonani a kutala ka vanhu lava va nga kona lomu tikweni; n’wina mu lava ku va tsikisa ku tira.”

6 Ka siku galego, Faro i no laya a varangeli va mitiro ya cikurumeta ni vawoneleli, aku: 7 “Mu nga ha va nyiki byanyi ga ku maha hi gona zvitini.+ Va wa fambe va lavetela hi voce. 8 Kanilezvi simamani ku va londza a ntsengo wa zvitini wo fana ni walowu va nga kari vaba kale. Mu nga hunguli hakuva va loloha. Hi cigelo leco va nge: ‘Hi lava ku famba hi ya mu mahela muphahlo a Nungungulu wa hina!’ 9 Va tiriseni nguvhu mu tlhela mu va maha va tshama na va khomekile kasi va nga cheli kota hi mawunwa.”

10 Hikwalaho, a varangeli va mitiro ya cikurumeta+ ni vawoneleli va no huma va ya byela vanhu, vaku: “Faro i wulile lezvi: ‘A ndza ha mu nyiki kambe a byanyi. 11 Fambani mu ya lava byanyi ha n’wece ni kwihi lomu mu to gi kuma kona, kanilezvi a ntiro wa n’wina wu nga ta hunguliwa ne ni kutsongwani.’” 12 Makunu a vanhu va no hangalaka tikweni gontlhe ga Gibhite kasi va hlengeletela tihlanga kasi ti maha byanyi. 13 A varangeli va mitiro ya cikurumeta va wa simama ku va kama, vaku: “Siku ni siku, a mun’we ni mun’wani i fanele ku mbheta a ntiro wakwe wa siku a ku fana ni cikhati leci mu nga kari mu nyikiwa byanyi.” 14 Ahandle lezvo, a vawoneleli va ka vaIzrayeli, lava va nga yimisilwe hi varangeli va Faro va mitiro ya cikurumeta kasi ku rangela vanhu, va no biwa,+ va wutisiwa ku: “Hikuyini a tolo ni nyamutlha mu nga kala ku chiketa a ntsengo wa zvitini lezvi mu nga kari muba kale ke?”

15 A vawoneleli va vaIzrayeli va noya ka Faro va ya khala, vaku: “Hikuyini u ma mahelako lezvi a malandza ya wena ke? 16 A malandza ya wena a ma ha nyikiwi byanyi, kanilezvi va hi byela ku: ‘Banani zvitini!’ A malandza ya wena ma biwa kuveni a vanhu va wena hi vona va nga ni nandzu.” 17 Faro aku: “Mo loloha, mo loloha n’wina!+ Hi caleco ci mu mahako muku: ‘Hi lava ku famba hi ya mu mahela muphahlo Jehovha.’+ 18 Fambani, mu tlhela mu ya tira! Mu nga ta nyikiwa byanyi, kanilezvi mu fanele ku simama muba ntsengo wa n’wina wa zvitini lowu wu yimisilweko.”

19 A vawoneleli va vaIzrayeli va no wona lezvaku va wa hi cikaratweni ca hombe hi kota ya cileletelo leci caku: “Mu nga hunguli ne ni kutsongwani a ntsengo wu yimisilweko wa zvitini lezvi mu faneleko kuba siku ni siku.” 20 Andzhako ka lezvo, a cikhati leci va nga huma hi ka Faro, va no kumana na Mosi na Aroni, lava va nga yimile kwalaho kasi va tlhangana navo. 21 Va no tekela ku va byela lezvi: “Jehovha i wa mu cuwuke a lamula, hakuva mu hi mahile hi chepetiwa hi Faro ni malandza yakwe* niku mu vekile cipadha canjeni gabye kasi va hi daya.”+ 22 Mosi i no khongela ka Jehovha, aku: “Jehovha, hikuyini u xanisako a vanhu lava ke? U ndzi rumele yini? 23 Kusukela ka cikhati leci ndzi ngaya mahlweni ka Faro ndzi ya wulawula naye hi vito ga wena,+ a vanhu lava i va xanisa nguvhu a ku hundza kale.+ Wena a wu tlhatlhisangi a vanhu va wena.”+

6 Jehovha i no byela Mosi, aku: “Makunu u ta zvi wona lezvi ndzi to maha ka Faro.+ Hi canja ga ntamu ndzi ta mu kurumeta lezvaku a tlhatlha vanhu va mina va famba niku hi canja ga ntamu ndzi ta mu kurumeta lezvaku a va hlongola tikweni gakwe.”+

2 Nungungulu i no engeta a byela Mosi, aku: “Hi mina Jehovha. 3 Ndzi wa tala ku woneka ka Abrahama, ni ka Isaka, ni ka Jakobe kota Nungungulu wa Ntamu Wontlhe,+ kanilezvi xungetano hi vito ga mina gaku Jehovha,+ a ndzi ti tivekisangi kabye.+ 4 Ahandle ka lezvo, ndzi yimisile a civhumelwano ca mina navo ca ku va nyika tiko ga Khanani, a tiko legi va hanyileko ka gona kota valuveli.+ 5 Makunu ndzi zwile a kuketa ka vanhu va ka Izrayeli lava a vaGibhite va va mahako tikhumbi, ndzi alakanya a civhumelwano ca mina.+

6 “Hikwalaho, byela a vaIzrayeli, uku: ‘Hi mina Jehovha; ndzi ta mu rula mindzhwalo ya vaGibhite, ndzi mu tlhatlhisa wukhumbini gabye.+ Ndzi ta mu tlhatlhisa hi woko ga mina gi nawulutilweko* ni kulamula ka hombe.+ 7 Ndzi ta mu teka muva vanhu va mina, mina ndziva Nungungulu wa n’wina.+ Hakunene mu ta zvi tiva lezvaku hi mina Jehovha, a Nungungulu wa n’wina, loyi a mu tlhatlhisako ka mindzhwalo ya vaGibhite. 8 Ndzi ta mu nghenisa tikweni legi ndzi nga tlakusa a canja ga mina ndzi hlambanya a ku nyika Abrahama, na Isaka, na Jakobe. Ndzi ta gi nyikela ka n’wina kota tshomba.+ Hi mina Jehovha.’”+

9 Hi ndzhako ka cikhati, Mosi i no hlawutela timhaka leti ka vaIzrayeli kanilezvi a va mu ingisangi hi lezvi va nga mbhelile ntamu ni lezvi a wukhumbi gabye gi nga tshingile.+

10 Jehovha i no byela Mosi, aku: 11 “Famba u ya byela Faro, a hosi ya Gibhite, lezvaku a tlhatlha vaIzrayeli va huma lomu tikweni gakwe.” 12 Kanilezvi Mosi i no hlamula Jehovha, aku: “A vaIzrayeli a va ndzi ingisangi,+ makunu Faro i ta ndzi ingisisa kuyini lezvi zvi ndzi karatelako ku wulawula ke?”+ 13 Kanilezvi Jehovha i no phinda ka Mosi na Aroni a zvileletelo lezvi va nga fanele ku byela a vaIzrayeli na Faro, a hosi ya Gibhite, kasi a humesa a vaIzrayeli tikweni ga Gibhite.

14 A tihloko ta tiyindlu ta vapapayi vabye hi leti: A vana va Rubheni, a matewula ya Izrayeli+ kuve Hanoke, na Palu, na Hezroni, na Karmi.+ Leyi mingango ya Rubheni.

15 A vana va Simeyoni kuve Jemuweli, na Jamina, na Ohadhe, na Jakina, na Zohare, na Xawule, a n’wana wa wasati wa muKhanani.+ Leyi mingango ya Simeyoni.

16 A mavito ya vana va Levhi+ hi kuya hi lomu a mingango yabye yi sukelako kona hi lawa: Gerxoni, na Kohate, na Merari.+ Levhi i no hanya 137 wa malembe.

17 A vana va Gerxoni kuve Libni na Ximeyi, hi mingango yabye.+

18 A vana va Kohate kuve Amramu, na Izhare, na Hebroni, na Uziyeli.+ Kohate i no hanya 133 wa malembe.

19 A vana va Merari kuve Mali na Muxi.

Leyi yive mingango ya vaLevhi hi kuya hi lomu a mingango yabye yi sukelako kona.+

20 Amramu i no teka Jokebhedhe, a makabye wa papayi wakwe, ava sati wakwe.+ Jokebhedhe i no mu pswalela Aroni na Mosi.+ Amramu i no hanya 137 wa malembe.

21 A vana va Izhare kuve Kora,+ na Nefega, na Zikri.

22 A vana va Uziyeli kuve Mixayeli, na Elizafane,+ na Sitri.

23 Makunu Aroni i no teka Elixebha, a nhanyana wa Aminadhabha, a makabye wa Naxoni,+ ava sati wakwe. Elixebha i no mu pswalela Nadhabhe, na Abhihu, na Eleyazari, na Itamare.+

24 A vana va Kora kuve Asira, na Elkana, na Abhiyasafa.+ Leyi yive mingango ya va ka Kora.+

25 Eleyazari,+ a mufana wa Aroni, i no teka mun’we wa vanhanyana va Putiyeli ava sati wakwe. I no mu pswalela Finiyasi.+

Leti tihloko ta tiyindlu ta vapapayi ta vaLevhi hi mingango yabye.+

26 Loyi hi Aroni na Mosi lava Jehovha a ngaku kabye: “Humesani a vaIzrayeli lomu tikweni ga Gibhite hi mabutho yabye.”+ 27 Mosi na Aroni hi vona va nga byela Faro, a hosi ya Gibhite, lezvaku a humesa a vaIzrayeli tikweni ga Gibhite.+

28 Ka siku lego, a cikhati leci Jehovha a nga wulawula na Mosi tikweni ga Gibhite, 29 Jehovha i no byela Mosi, aku: “Hi mina Jehovha. Byela Faro, a hosi ya Gibhite, zvontlhe lezvi ndzi ku byelako.” 30 Mosi i no wutisa Jehovha, aku: “Faro i ta ndzi ingisisa kuyini lezvi ndzi kalako ndzi nga wulawuli khwatsi ke?”+

7 Jehovha i no byela Mosi, aku: “Tiva lezvi, ndzi ku mahile u ku khwatsi u Nungungulu* mahlweni ka Faro; Aroni, a makabye wa wena, i tava muphrofeti wa wena.+ 2 U ta phinda zvontlhe lezvi ndzi to ku leletela; Aroni, a makabye wa wena, i ta wulawula ka Faro niku yena i ta tsika a vaIzrayeli va huma lomu tikweni gakwe. 3 Mina ndzi ta tsika a mbilu ya Faro yi nonoha;+ ndzi ta maha zvihlamaliso zvo tala lomu tikweni ga Gibhite.+ 4 Kanilezvi Faro a nga ta mu ingisa. Makunu ndzi ta tlhateka canja ga mina hehla ka Gibhite ndzi humesa a citshungu ca mina,* a vanhu va mina, a vaIzrayeli, ndzi va humesa tikweni ga Gibhite hi kulamula ka hombe.+ 5 A vaGibhite hakunene va ta zvi tiva lezvaku hi mina Jehovha+ a cikhati leci ndzi to nawuluta a canja ga mina ndzi vhukela a tiko ga Gibhite ndzi humesa a vaIzrayeli cikari kabye.” 6 Mosi na Aroni va no maha lezvi Jehovha a nga va leletele; va no zvi mahisa zvalezvo. 7 Mosi i wa hi ni 80 wa malembe; Aroni i wa hi ni 83 wa malembe a cikhati leci va nga wulawula na Faro.+

8 Makunu Jehovha i no byela Mosi na Aroni, aku: 9 “Loku Faro aku: ‘Mahani cihlamaliso’, byela Aroni, uku: ‘Teka a nhonga ya wena u yi hoxa lahasi mahlweni ka Faro.’ Yi ta cica yi maha nyoka ya hombe.”+ 10 Hikwalaho, Mosi na Aroni va noya ka Faro va ya maha zvalezvi Jehovha a nga va leletele. Aroni i no hoxa a nhonga yakwe mahlweni ka Faro ni mahlweni ka malandza yakwe, yi se cica yi maha nyoka ya hombe. 11 Faro i no vitanisa a titlhari, ni valoyi, ni vapristi va masalamuso va Gibhite+ va ta mahawu zvalezvo hi masalamuso yabye.+ 12 A mun’we ni mun’wani wabye i no hoxa a nhonga yakwe lahasi; a tinhonga leto ti no cica ti maha tinyoka ta hombe, kanilezvi a tinhonga tabye ti no mitiwa hi leyi ya Aroni. 13 Hambulezvo, a mbilu ya Faro yi no nonoha,+ a nga va ingisi, kota lezvi Jehovha a nga wulile.

14 Jehovha i no byela Mosi, aku: “A mbilu ya Faro yi nonohile.+ Wa ala ku tlhatlha vanhu va famba. 15 Famba ka Faro ni mixo. Hi gaya, wa huma aya le matini. Makunu u ta yima laha mbhirini ya Congo wa Nilo kasi u tlhangana naye. Teka a nhonga leyi yi nga cicile yi maha nyoka u famba nayo.+ 16 Mu byele, uku: ‘Jehovha, a Nungungulu wa vaHebheru, i ndzi rumile ka wena.+ I te: “Tlhatlha a vanhu va mina va famba va ya ndzi tirela le ciwuleni”, kanilezvi wena a wu vhumeli kala lezvi. 17 Makunu Jehovha i ngalo: “U ta zvi tiva lezvaku hi mina Jehovha hi kota ya lezvi ndzi lavako ku maha.+ Ndzi taba mati ya Congo wa Nilo hi nhonga leyi yi nga canjeni ga mina niku wona ma ta cica ma maha nkhata. 18 A tinjhanjhi leti ti nga lomu Congweni wa Nilo ti tafa. A Congo wa Nilo wu ta nuha; a vaGibhite va nga ta zvi kota kunwa mati ya Nilo.”’”

19 Jehovha i te ngalo ka Mosi: “Byela Aroni, uku: ‘Teka a nhonga ya wena u nawuluta a canja ga wena hehla ka mati ya Gibhite,+ ni hehla ka micongo ya kona, ni hehla ka minonga ya kona,* ni hehla ka zvicongwana zva kona,+ ni hehla ka matshamu wontlhe yo hlengeletela mati, kasi ma cica ma maha nkhata.’ Ku tava ni nkhata tikweni gontlhe ga Gibhite, hambu lomu ka zvibya zvo vatliwa ni zva maribye.” 20 Mosi na Aroni va no tekela ku maha zvalezvi Jehovha a nga va leletele. Aroni i no tlakusa nhonga aba mati ya Congo wa Nilo mahlweni ka Faro ni malandza yakwe. A mati wontlhe ya congo ma no cica ma maha nkhata.+ 21 A tinjhanjhi leti ti nga hi lomu congweni ti nofa,+ a congo wu sangula ku nuha. A vaGibhite va wa nga ha zvi koti kunwa mati ya Nilo.+ Ku nova ni nkhata tikweni gontlhe ga Gibhite.

22 Hambulezvo, a vapristi va masalamuso va Gibhite va no mahawu zvalezvo hi wutlhari gabye ga fihlakalo;+ hikwalaho, a mbilu ya Faro yi no simama ku nonoha, a nga va ingisi, kota lezvi Jehovha a nga wulile.+ 23 Faro i no tlhela kaya kakwe kanilezvi a nga chelangi kota hi lezvo. 24 A vaGibhite vontlhe va wo kela matlhelweni wontlhe ya Nilo kasi va kuma mati ya kunwa, hakuva a mati ya Nilo ma wa nga nweki. 25 Ku no hundza 7 wa masiku Jehovha na a bile Congo wa Nilo.

8 Jehovha i no byela Mosi, aku: “Famba ka Faro u ya mu byela lezvi: ‘Jehovha i ngalo: “Tlhatlha vanhu va mina va famba kasi va ya ndzi tirela.+ 2 Loku u simama ku ala ku va tlhatlha va famba, ndzi ta tsayisa tiko ga wena gontlhe hi ntungu wa makhele.+ 3 A Congo wa Nilo wu ta tala hi makhele; ma ta kandziha ma nghena lomu ndlwini ya wena, ni lomu kwartwini ya wena, ma kandziha laha mubhedhini wa wena. Ma ta nghena ni lomu tindlwini ta malandza ya wena ni ta vanhu va wena, ma nghena ni lomu ka tiforno ta n’wina ni lomu ka zvibya* zva n’wina zvo vhuvela ka zvona mapa.+ 4 A makhele ma ta kandziha mata ka wena, ni ka vanhu va wena, ni ka wontlhe malandza ya wena.”’”

5 Hi ndzhako ka cikhati, Jehovha i no byela Mosi, aku: “Byela Aroni, uku: ‘Nawuluta canja legi gi nga ni nhonga hehla ka micongo, ni ka minonga ya Nilo, ni ka zvicongwana, u humesa makhele hehla ka tiko ga Gibhite.’” 6 Hikwalaho, Aroni i no tlakusa canja gakwe hehla ka mati ya Gibhite; ku no sangula ku huma makhele ma fenengeta tiko ga Gibhite. 7 A vapristi va masalamuso va no mahawu zvalezvo hi wutlhari gabye ga fihlakalo. Vonawu va no humesa makhele hehla ka tiko ga Gibhite.+ 8 Makunu Faro i no vitanisa Mosi na Aroni, a taku: “Khongotelani Jehovha lezvaku a susa makhele ka mina ni ka vanhu va mina,+ hakuva ndzi lava ku tlhatlha vanhu va famba kasi va ya mu mahela muphahlo Jehovha.” 9 Mosi i no byela Faro, aku: “Ndzi byele wena a ku hi rini ndzi faneleko ku kombela Nungungulu lezvaku a susa makhele ka wena, ni ka malandza ya wena, ni ka vanhu va wena, ni lomu tindlwini ta n’wina. Ma to sala ntsena le congweni wa Nilo.” 10 Faro aku: “Mandziko.” Mosi aku: “Zvi ta mahisa zvalezvi u nga wula kasi u zvi tiva lezvaku a ku na mun’wani wo fana na Jehovha, a Nungungulu wa hina.+ 11 A makhele ma ta suka ka wena, ni lomu tindlwini ta wena, ni ka malandza ya wena, ni ka vanhu va wena. Ma to sala ntsena le congweni wa Nilo.”+

12 Mosi na Aroni va no suka mahlweni ka Faro. Mosi i no khongotela Jehovha xungetano hi makhele lawa a nga ma tisile ka Faro.+ 13 Jehovha i no maha zvalezvi Mosi a nga kombele. A makhele ma no sangula ku fetetela lomu tindlwini, ni lomu mitsendzeleni,* ni lomu masin’wini. 14 A vanhu va wo ma wungeletela ma maha tinhulu ta tsandza-vahlayi, a tiko gi sangula ku nuha. 15 A cikhati leci Faro a nga wona lezvaku i tlhatlhisilwe, i no nonohisa a mbilu yakwe,+ a ala ku va ingisa, kota lezvi Jehovha a nga wulile.

16 Makunu Jehovha i no byela Mosi, aku: “Byela Aroni uku: ‘Tlakusa nhonga ya wena uba ntshuri wa misava, a ntshuri wa misava wu ta cica wu maha tisuna tikweni gontlhe ga Gibhite.’” 17 Va no maha zvalezvo. Aroni i no tlakusa canja gakwe legi a nga khomile hi gona a nhonga yakwe aba ntshuri wa misava, ni tisuna ti no pomela vanhu ni zvihari. A ntshuri wontlhe wa misava wu no cica wu maha tisuna tikweni gontlhe ga Gibhite.+ 18 A vapristi va masalamuso va no zama ku mahawu zvalezvo kasi ku humesa tisuna hi wutlhari gabye ga fihlakalo+ kanilezvi a va zvi kotangi. A tisuna ti no pomela vanhu ni zvihari. 19 Hikwalaho, a vapristi va masalamuso va no byela Faro, vaku: “Leli litiho la Nungungulu!”+ Kanilezvi a mbilu ya Faro yi no simama ku nonoha, a nga va ingisi, kota lezvi Jehovha a nga wulile.

20 Jehovha i no byela Mosi, aku: “Vindzuka ni mixo u ya yima mahlweni ka Faro. Hi gaya, wa huma aya le matini. Mu byele lezvi: ‘Jehovha i ngalo: “Tlhatlha vanhu va mina va famba kasi va ya ndzi tirela. 21 Kanilezvi loku u nga tlhatlhi a vanhu va mina va famba, ndzi ta rumela mabhowani ka wena, ni ka malandza ya wena, ni ka vanhu va wena, ni lomu tindlwini ta n’wina. A tiyindlu ta Gibhite ti ta tala hi mabhowani; ma ta fenengeta misava leyi a vaGibhite va kandzihetelako. 22 Ka siku lego, ndzi ta hambanisa a tiko ga Goxeni, lomu ku hanyako vanhu va mina. Seyo ku nga tava ni mabhowani.+ Hi kota ya lezvo, mu ta zvi tiva lezvaku mina Jehovha ndzi lomu ka tiko legi.+ 23 Ndzi ta hambanisa vanhu va wena ni vanhu va mina. A cikombiso leci ci ta maheka mandziko.”’”

24 Jehovha i no maha lezvo. A mabhowani yo tala ma no sangula ku dhumela a yindlu ya Faro, ni tiyindlu ta malandza yakwe, ni tiko gontlhe ga Gibhite.+ A tiko gi no hlaselwa hi mabhowani.+ 25 Hi kugumesa, Faro i no vitanisa Mosi na Aroni, a taku: “Fambani mu ya mu mahela muphahlo a Nungungulu wa n’wina kwalomu tikweni legi.” 26 Kanilezvi Mosi aku: “A zvi ringani a ku hi zvi mahisa lezvo. Hakuva lezvi hi to mu mahela hi zvona muphahlo Jehovha, a Nungungulu wa hina, cinyenyeko ka vaGibhite.+ Loku hi wo maha muphahlo hi zvilo zvi nyenyiwako hi vaGibhite na va kari va hi wona, va wa nga ta hi gandla hi maribye ke? 27 Hi ta maha liendzo la masiku manharu hiya ciwuleni hi ya mu mahela kona muphahlo Jehovha, a Nungungulu wa hina, kota lezvi a hi byelileko.”+

28 Makunu Faro i te: “Ndzi ta mu tlhatlha mu famba kasi mu ya mu mahela muphahlo Jehovha, a Nungungulu wa n’wina, le ciwuleni. Ntsena lezvaku mu ngayi kule nguvhu. Ndzi kombeleleni.”+ 29 Mosi aku: “Makunu ndza suka mahlweni ka wena. Ndzi ta ku kombelela ka Jehovha. A mandziko a mabhowani ma ta suka ka Faro, ni ka malandza yakwe, ni ka vanhu vakwe. Kanilezvi Faro i fanele ku tsika ku hlakana hi hina hi ku ala ku tlhatlha vanhu va famba va ya mu mahela muphahlo Jehovha.”+ 30 Mosi i no suka ka Faro a ya khongotela Jehovha.+ 31 Hikwalaho, Jehovha i no maha zvalezvi Mosi a nga zvi wulile; a mabhowani ma no suka ka Faro, ni ka malandza yakwe, ni ka vanhu vakwe. A ku salangi ne gin’we. 32 Hambulezvo, Faro i no nonohisa kambe a mbilu yakwe, a nga tlhatlhi vanhu va famba.

9 Jehovha i no byela Mosi, aku: “Famba ka Faro u ya mu byela lezvi: ‘Jehovha, a Nungungulu wa vaHebheru, i ngalo: “Tlhatlha vanhu va mina va famba kasi va ya ndzi tirela.+ 2 Kanilezvi loku u simama ku ala ku va tsika va famba u tlhela u va khomeletela, 3 a canja ga Jehovha+ gi ta vhukela a mitlhambi ya wena yi nga le handle. Ku tava ni khombo gi hlaselako+ a mahaxi, ni timbongola, ni makameli, ni tihomu, ni tiyivhu. 4 Hakunene Jehovha i ta veka kuhambana cikari ka mitlhambi ya vaIzrayeli ni mitlhambi ya vaGibhite. A ci kona ci lumbako vaIzrayeli ci tofa.”’”+ 5 Ahandle ka lezvo, Jehovha i yimisile cikhati ca kona, aku: “A mandziko, Jehovha i ta maha lezvo lomu tikweni.”

6 Ka siku gi nga landzela, Jehovha i no maha zvalezvo; a mitlhambi ya tixaka tontlhe ya vaGibhite yi no sangula kufa+ kanilezvi ne cifuyo cin’we ca vaIzrayeli ci ngafa. 7 A cikhati leci Faro a nga wutisa lezvi zvi mahekileko, i no tiva lezvaku ne cifuyo cin’we ca vaIzrayeli ci nga file. Hambulezvo, a mbilu ya Faro yi no simama ku nonoha, a nga tlhatlhi vanhu va famba.+

8 Jehovha i no byela Mosi na Aroni, aku: “Nusani khuma laha khumbarini mu tata mandla; Mosi i wa gi xwanye laha moyeni mahlweni ka Faro. 9 Gi ta cica gi maha lithuri tikweni gontlhe ga Gibhite. A lithuri lelo li ta hundzuka liva zvidlayi zvi nga ni minomu ka vanhu ni ka zvihari tikweni gontlhe ga Gibhite.”

10 Hikwalaho, va no nusa khuma laha khumbarini va ya yima mahlweni ka Faro. Mosi i no gi xwanya laha moyeni gi se hundzuka giva zvidlayi zvi humesako wubovhu ka vanhu ni ka zvihari. 11 A vapristi va masalamuso va wa nga zvi koti ku yima mahlweni ka Mosi hi kota ya zvidlayi, hakuva zvi wa humile ka vapristi va masalamuso ni ka vaGibhite vontlhe.+ 12 Kanilezvi Jehovha i no tsika mbilu ya Faro yi nonoha, a nga va ingisi, kota lezvi Jehovha a nga byelile Mosi.+

13 Makunu Jehovha i no byela Mosi, aku: “Vindzuka ni mixo u ya yima mahlweni ka Faro, u mu byela lezvi: ‘Jehovha, a Nungungulu wa vaHebheru, i ngalo: “Tlhatlha vanhu va mina va famba kasi va ya ndzi tirela. 14 Hakuva ndzi hoxela a zvibhakela zva mina zvontlhe kasi zviba a mbilu ya wena, ni malandza ya wena, ni vanhu va wena, u fela ku zvi tiva lezvaku a ku na mun’wani wo fana na mina misaveni yontlhe.+ 15 Kala lezvi, na ndzi nawulutile a canja ga mina ndzi kuba ni vanhu va wena hi khombo gi hlaselako. Phela na u swiyelwe* laha misaveni. 16 Hambulezvo, kuve hi kota ya cigelo leci ndzi ku tsikileko u hanya: Kasi ndzi ku komba a ntamu wa mina ni lezvaku a vito ga mina gi kanelwa misaveni yontlhe.+ 17 Wa ha ti kulisa mahlweni ka vanhu va mina hi ku ala ku va tlhatlha va famba ke? 18 A mandziko ndzi ta nisa maralala ya hombe hi cikhati caleci, ya ku a ma se tshuka mava kona lomu Gibhite kusukela ka siku legi a tiko ga Gibhite gi nga akiwa hi gona kala lezvi. 19 Hikwalaho, rumela gezu ga ku va vhalela lomu michacheni zvontlhe a zvifuyo zva wena ni zvontlhe zvilo zva wena zvi nga le handle. Ni wihi munhu kutani cihari ci to kumiwa le handle na ci nga vhalelwangi lomu ndlwini, ci ta dawa hi maralala.”’”

20 Vontlhe lava va nga kari va chava a gezu ga Jehovha, cikari ka malandza ya Faro, va no hatla va wuyisa malandza yabye ni mitlhambi yabye lomu tindlwini, 21 kanilezvi ni wihi loyi a nga kala ku khatala hi gezu ga Jehovha, i no tsika malandza yakwe ni mitlhambi yakwe le handle.

22 Makunu Jehovha i no byela Mosi, aku: “Nawuluta canja ga wena gi xungeta matilweni kasi kuwa maralala tikweni gontlhe ga Gibhite+ hehla ka vanhu, ni zvihari, ni tisinya tontlhe ta khwati tikweni ga Gibhite.”+ 23 Hikwalaho, Mosi i no tlakusa nhonga yakwe yi xungeta matilweni. Jehovha i no rumela a kudzindza ni maralala, kuwa ni ndzilo* laha misaveni; Jehovha i no simama ku nisa maralala tikweni ga Gibhite. 24 Ku nova ni maralala, ku tlhela ku hatima ndzilo cikari ka maralala. A vhula ya maralala yi wa hi ya hombe nguvhu; ku wa nga se tshuka kuva ni maralala yo fana ni lawo lomu tikweni kusukela loku Gibhite a vile tiko.+ 25 A maralala ma no wela zvontlhe lezvi zvi nga hi handle lomu tikweni gontlhe ga Gibhite, kusukela ka vanhu kala ka zvihari. Ma no hlasela zvontlhe lezvi zvi nga milile, ma tshoveletela tontlhe tisinya ta khwati.+ 26 I tiko ga Goxeni goce, lomu a vaIzrayeli va nga kari va hanya kona, gi nga kala ku welwa hi maralala.+

27 Hikwalaho, Faro i no vitanisa Mosi na Aroni, a taku: “Ndzi wonhile ka khati legi. Jehovha i lulamile, mina ni vanhu va mina hi hina hi nga goha. 28 Khongotelani Jehovha kasi a kudzindza ni maralala ya Nungungulu zvi nyima. Andzhako ka lezvo, ndzi ta mu tlhatlha mu famba; mu nga ta ha tshama lomu.” 29 Hikwalaho, Mosi i te ngalo kakwe: “Zvalezvi ndzi to huma lomu dhoropeni, ndzi ta tlakusa mandla ya mina mahlweni ka Jehovha. A kudzindza ku ta miyela, ni maralala ma nga ta hawa, kasi u fela ku zvi tiva lezvaku a misava yi lumba Jehovha.+ 30 Kanilezvi ndzi sina ndzi zvi tiva lezvaku wena ni malandza ya wena mu nga ta mu chava Jehovha Nungungulu.”

31 A wukene* ni sevhadha zvi no tshoveletelwa, hakuva a sevhadha yi wa rumbukile, ni wukene gi wa pfepfile. 32 Kanilezvi a trigo ni trigo yo pswhuka a zvi tshoveletelwangi, hakuva zvi wa hi timbewu to salela ndzhako.* 33 Makunu Mosi i no suka mahlweni ka Faro, a huma lomu dhoropeni a ya tlakusa mandla yakwe mahlweni ka Jehovha. A kudzindza ni maralala zvi no nyima, ni vhula yonawu yi no nyima kuna laha misaveni.+ 34 A cikhati leci Faro a nga wona lezvaku a vhula, ni maralala, ni kudzindza zvi nyimile, i no wonha kambe a tlhela a nonohisa a mbilu yakwe,+ yena zvin’we ni malandza yakwe. 35 A mbilu ya Faro yi no simama ku nonoha, a nga tlhatlhi vaIzrayeli va famba, kota lezvi Jehovha a nga wulile hi ku tirisa Mosi.+

10 Jehovha i no byela Mosi, aku: “Famba ka Faro, hakuva ndzi tsikile a mbilu yakwe ni timbilu ta malandza yakwe ti nonoha+ kasi ndzi fela ku maha zvikombiso zva mina mahlweni kakwe.+ 2 Ndzi mahile lezvo kambe kasi u hlawutela vana va wena ni vazukulu va wena lezvi ndzi nga gi tsayisisa zvona a tiko ga Gibhite, a ku patsa ni zvikombiso lezvi ndzi zvi mahileko cikari kabye;+ hakunene mu ta zvi tiva lezvaku hi mina Jehovha.”

3 Hikwalaho, Mosi na Aroni va noya ka Faro va yaku kakwe: “Jehovha, a Nungungulu wa vaHebheru, i ngalo: ‘Kala rini na wa ha ala ku ti koramisa ka mina ke?+ Tlhatlha a vanhu va mina va famba kasi va ya ndzi tirela. 4 Hakuva loku u simama ku ala ku tlhatlha vanhu va mina, a mandziko ndzi ta ku nehela humbi* lomu tikweni gontlhe ga wena. 5 Yi ta fenengeta misava. A vanhu va ta tsandzeka ni ku wona misava. A humbi yi taga lezvi zvi seleko, lezvi zvi nga pona maralala, yiga ni tontlhe a tisinya ta wena leti ti kulako le handle ka dhoropa.+ 6 Yi ta tata tiyindlu ta wena, ni ta malandza ya wena, ni ta vontlhe a vaGibhite, hi ndlela ya ku a vapapayi va wena ni vakokwani va wena a va tshukangi va zvi wona kusukela ka cikhati leci va nga pswaliwa hi cona tikweni legi kala nyamutlha.’”+ Zvalezvo Mosi i no hundzuluka a suka mahlweni ka Faro a famba.

7 A malandza ya Faro ma te ngalo kakwe: “Kala rini inaloyi na a ha hi ntlhamu ka hina? Tlhatlha vanhu lava va famba kasi va ya khozela Jehovha, a Nungungulu wabye. A wu se zvi wona lezvaku a tiko ga Gibhite gi hahlulilwe?” 8 Hikwalaho, Mosi na Aroni va no tlhelisiwa ka Faro, a ya va byela lezvi: “Fambani mu ya tirela Jehovha, a Nungungulu wa n’wina. Kanilezvi hi vamani va to famba?” 9 Mosi aku: “Hi ta famba ni vanana va hina, ni zvikhosana zva hina, ni vafana va hina, ni vanhanyana va hina, ni tiyivhu ta hina, ni tihomu ta hina,+ hakuva hi lava ku ya mu mahela mubuzo Jehovha.”+ 10 Faro aku kabye: “Loku ndzo mu tlhatlha mu famba ni vanana va n’wina, hakunene Jehovha i na n’wina!+ Zva ti komba ku mu na ni mixuvo ya hava. 11 Ne! Ku wa fambe vavanuna basi va ya tirela Jehovha, hakuva hi zvalezvo mu nga kombela.” Zvalezvo va no hlongoliwa mahlweni ka Faro.

12 Makunu Jehovha i no byela Mosi, aku: “Nawuluta a canja ga wena hehla ka Gibhite u vitanisa a humbi kasi yita hehla ka tiko ga Gibhite yi taga a tisinya tontlhe ta tiko — zvontlhe lezvi zvi nga siyiwa hi maralala.” 13 Zvalezvo Mosi i no tlakusa a nhonga yakwe hehla ka tiko ga Gibhite. Jehovha i no maha lezvaku kuba a moya wa cikobani* lomu tikweni ka siku lego gontlhe ni ka wusiku ga kona. Laha gi ngaca, a moya wa cikobani wu no tisa a humbi. 14 Ku nota a humbi lomu tikweni ga Gibhite, yi relela lomu tikweni gontlhe ga Gibhite.+ A humbi leyo yi wa hlasela nguvhu;+ ku wa nga se tshuka kuva ni humbi yo talisa lezvo niku yi nga ta ha tshuka yiva kona kambe yo talisa lezvo. 15 Yi no fenengeta misava yontlhe. A tiko gi no phuma hi humbi. Yi noga tisinya tontlhe ta tiko ni mihandzu yontlhe ya tisinya leyi yi nga ponile maralala. A ku salangi ne ni tluka lomu tisinyeni kutani ka lezvi zvi milako lomu masin’wini tikweni gontlhe ga Gibhite.

16 Hikwalaho, Faro i no vitanisa Mosi na Aroni hi kuhatlisa, a taku: “Ndzi wonhele Jehovha, a Nungungulu wa n’wina, ndzi tlhela ndzi wonhela na n’winawu. 17 Ndzi kombela ku mu ndzi tsetselela a khati legi basi, mu khongotela Jehovha, a Nungungulu wa n’wina, kasi a susa hehla ka mina a khombo legi gi dayako.” 18 Hikwalaho, i* no suka mahlweni ka Faro a ya khongotela Jehovha.+ 19 Jehovha i no jikisa moya, kuba moya wa hombe wa nyaka* wu kukuleta a humbi wu ya yi hoxa Bimbini go Pswhuka. A ku salangi ne humbi yin’we tikweni gontlhe ga Gibhite. 20 Kanilezvi Jehovha i no tsika a mbilu ya Faro yi nonoha,+ a nga tlhatlhi a vaIzrayeli va famba.

21 Makunu Jehovha i no byela Mosi, aku: “Nawuluta a canja ga wena gi xungeta matilweni kasi kuva ni munyama tikweni gontlhe ga Gibhite, ina, a munyama wo tshisa nguvhu.” 22 Mosi i no tekela ku nawuluta a canja gakwe gi xungeta matilweni, ku seva ni munyama wo dema tikweni gontlhe ga Gibhite hi masiku manharu.+ 23 A vaGibhite va wa nga wonani; i hava a nga zvi kota ku suka laha a nga hi kona hi masiku manharu; kanilezvi vontlhe a vaIzrayeli va wa hi ni kuwonekela lomu va nga tshama kona.+ 24 Faro i no vitanisa Mosi, a taku: “Fambani mu ya tirela Jehovha.+ Ntsena lezvaku a tiyivhu ni tihomu ti wa sale. Hambu a vanana va n’wina fambani navo.” 25 Kanilezvi Mosi i te ngalo: “Wena wutsumbu u ta hi nyika a miphahlo ni minyikelo ya kuhiswa hi ya yi nyikela ka Jehovha, a Nungungulu wa hina.+ 26 A zvifuyo zva hina zvonawu hi ta famba nazvo. Ku nga ta sala ne cifuyo* cin’we, hakuva hi ta tirisa zvokari kasi hi mu khozela hi zvona Jehovha, a Nungungulu wa hina, niku a hi zvi tivi a ku hi zvihi hi to nyikela kasi ku khozela Jehovha kala hi chikela seyo.” 27 Hikwalaho, Jehovha i no tsika a mbilu ya Faro yi nonoha, a nga vhumeli a ku va tsika va famba.+ 28 Faro i no byela Mosi, aku: “Suka laha mahlweni ka mina! U nga ha tshuki u zama ku wona a nghohe ya mina kambe, hakuva a siku legi u to wona nghohe ya mina u tafa.” 29 Hi kota ya lezvo, Mosi i te: “Kota lezvi u wulileko, ndzi nga ta ha zama ku wona a nghohe ya wena kambe.”

11 Jehovha i no byela Mosi, aku: “Ndza ha ta tisa gin’wani khombo hehla ka Faro ni hehla ka Gibhite. Andzhako ka lezvo, i ta mu tlhatlha mu huma lomu.+ A cikhati leci a to mu tlhatlha mu huma, i taya hi ku mu hlongola kunene.+ 2 Makunu byela vanhu vontlhe, a vavanuna ni vavasati, lezvaku va fanele ku kombela zvilo zva prata ni zva ouro ka vaakelani vabye.”+ 3 Jehovha i no va nyika thomo a vanhu mahlweni ka vaGibhite. Ahandle ka lezvo, Mosi i wa kombiwa nguvhu cichavo lomu tikweni ga Gibhite hi malandza ya Faro ni vanhu.

4 Makunu Mosi i no wula lezvi: “Jehovha i te ngalo: ‘Cikari ka wusiku, ndzi ta hundza hi lomu Gibhite.+ 5 A matewula wontlhe ya lomu tikweni ga Gibhite ma tafa,+ kusukela ka matewula ya Faro loyi a tshamileko citshan’wini cakwe ca wuhosi kala ka matewula ya nandza ga cisati legi gi tirako cigayweni ca mandla, ni wontlhe a matewula ya ntlhambi.+ 6 Tikweni gontlhe ga Gibhite, ku tava ni cirilo ca hombe ca ku a ci se tshuka civa kona niku ci nga ta hava kona kambe.+ 7 Kanilezvi hambu a mbyana yi nga ta ahlama nomu wa yona* yi vhukela a vaIzrayeli — a vanhu kutani mitlhambi yabye — kasi mu zvi tiva lezvaku Jehovha wa zvi kota ku hambanisa cikari ka vaGibhite ni vaIzrayeli.’+ 8 Hakunene wontlhe a malandza ya wena ma tata ka mina ma ta khizama, maku: ‘Huma ni vanhu vontlhe lava va ku landzelako.’ Andzhako ka lezvo, ndzi ta huma.”+ Zvalezvo i no suka mahlweni ka Faro na a zangarile nguvhu.

9 Makunu Jehovha i no byela Mosi, aku: “Faro a nga ta mu ingisa+ kasi ndzi maha zvihlamaliso zvo tala lomu tikweni ga Gibhite.”+ 10 Mosi na Aroni va no maha zvontlhe a zvihlamaliso lezvi mahlweni ka Faro,+ kanilezvi Jehovha i no tsika a mbilu ya Faro yi nonoha, a nga tlhatlhi a vaIzrayeli va huma tikweni gakwe.+

12 Makunu Jehovha i no byela Mosi na Aroni le tikweni ga Gibhite, aku: 2 “A hweti leyi yi tava yo sangula ka tihweti ta n’wina; ka n’wina yi tava hweti yo sangula ya lembe.+ 3 Byela a hlengeletano yontlhe ya ka Izrayeli, uku: ‘Hi siku ga wu 10 ga hweti leyi, a mun’we ni mun’we i wa ti hlawulele a yivhu+ kasi yiva ya ngango* wakwe, yivhu yin’we hi ngango. 4 Kanilezvi loku a vanhu va ngango lowo va hi va tsongwani kasi ku mbheta yivhu, vona ni lava va gamekeneko navo* va ta patsana vaga zvin’we mutini wabye hi kuya hi ntsengo wa vanhu. Laha mu hlayako a ntsengo wa vanhu, pimani ku i nyama yo kota kwihi ya yivhu leyi a munhu ni munhu a toga. 5 A yivhu ya n’wina yi fanele kuva ya yinene,+ ya matsune, yi nga ni lembe gin’we. Mu nga hlawula yivhana ya matsune kutani mbuti. 6 Mu ta yi hlayisa kala ka siku ga wu 14 ga hweti leyi,+ niku a bandla gontlhe ga hlengeletano ya ka Izrayeli gi fanele ku yi daya na gi ku pswite.*+ 7 Va wa teke a nkhata wo kari va tota matlhelo mambiri ya tiaro ta tivati ta tiyindlu leti va to gela ka tona; va wa tote ni le hehla ka aro.+

8 “‘Va taga a nyama ka wusiku galego.+ Va fanele ku yi woca laha ndzilweni, va yiga zvin’we ni tipawa to kala comelo+ ni matluka yo bava.+ 9 Mu ngagi ya yimbisi ne ya ku khoniwa hi mati. Kanilezvi wocani a nyama yontlhe laha ndzilweni, a ku patsa ni hloko ya kona, ni masondzo ya kona, ni lezvi zva lomu ndzeni. 10 Mu nga veki nchumu kala ka mixo yi landzelako, kanilezvi ni zvihi zvi to sala kala ka mixo yi landzelako zvi fanele ku hisiwa hi ndzilo.+ 11 Mu ta yiga na mu bohile tibhandi zviwunwini zva n’wina, ni masandalia mikondzweni ya n’wina, na mu khomile nhonga canjeni ga n’wina; yi geni hi kuhatlisa. Legi i Phasika ga Jehovha. 12 Hakuva ka wusiku lego ndzi ta hundza hi lomu tikweni ga Gibhite ndzi daya a matewula wontlhe ya lomu tikweni ga Gibhite, kusukela ka matewula ya munhu kala ka matewula ya cihari.+ Ndzi ta lamula vontlhe a vanungungulu va Gibhite.+ Hi mina Jehovha. 13 A nkhata wu tava cikombiso ca n’wina ka tiyindlu leti mu tova ka tona. Ndzi ta wona nkhata ndzi hundza hi le hehla, ni khombo gi nga tata hehla ka n’wina gi ta mu lovisa a cikhati leci ndzi toba a tiko ga Gibhite.+

14 “‘A siku legi gi tava cialakanyiso ka n’wina; mu ta gi alakanya kota mubuzo mu mahelako Jehovha zvizukulwaneni zva n’wina zvontlhe. Mu ta gi alakanya kota cileletelo ca kala kupindzuka. 15 Mu taga tipawa to kala comelo hi 7 wa masiku.+ Hi siku go sangula, mu fanele ku humesa comelo lomu tindlwini ta n’wina, hakuva ni wihi munhu* a gako lezvi zvi nga ni comelo, kusukela ka siku go sangula kala ka siku ga wu 7, i fanele ku tsemiwa* cikari ka vaIzrayeli. 16 Hi siku go sangula, mu ta maha gotsovanyano wo basa niku hi siku ga wu 7 mu ta maha wun’wani gotsovanyano wo basa. Mu nga tiri nchumu ka masiku lawo.+ Mu ngo longisela ntsena lezvi zvi lavekako kasi a munhu aga.

17 “‘Mahani a Mubuzo wa Tipawa to kala Comelo,+ hakuva ka siku galego ndzi ta humesa a mabutho ya n’wina tikweni ga Gibhite. Mu fanele ku hlayisa a siku legi zvizukulwaneni zva n’wina zvontlhe kota cileletelo ca kala kupindzuka. 18 Hi siku ga wu 14, ka hweti yo sangula, a gambo na gi pelile, mu taga tipawa to kala comelo kala ka siku ga wu 21 ga hweti, a gambo na gi pelile.+ 19 Ndzeni ka 7 wa masiku, ku nga tshami comelo lomu tindlwini ta n’wina, hakuva loku a wokari aga lezvi zvi nga ni comelo, kani muluveli kutani muIzrayeli wa mabeleko,+ a munhu* loye i fanele ku tsemiwa* cikari ka hlengeletako ya ka Izrayeli.+ 20 Mu ngagi nchumu wu nga ni comelo. Mitini ya n’wina yontlhe, ganani tipawa to kala comelo.’”

21 Mosi i no tekela ku vitanisa a madhota wontlhe ya ka Izrayeli,+ a taku: “Fambani mu ya hlawula cihari* ca ngango ni ngango, mu gumesa mu daya a muphahlo lowo wa Phasika. 22 Andzhako ka lezvo, petani a musase wa hisope* lomu nkhateni lowu wu nga lomu basiyeni mu tota matlhelo mambiri ya aro ni le hehla ka yona. I hava a faneleko ku huma lomu ndlwini yakwe na gi nga seca. 23 Makunu a cikhati leci Jehovha a to hundza kasi ku neha khombo ka vaGibhite, a wona nkhata le hehla ka aro ni lomu matlhelweni mambiri ya yona, hakunene Jehovha i ta hundza hi le hehla ka nyangwa; a nga ta tsika khombo ga kudaya gi nghena lomu tindlwini ta n’wina.+

24 “Mahani cialakanyiso ca cimaho leci kota cileletelo ca kala kupindzuka, ka n’wina ni ka vana va n’wina.+ 25 Laha mu to nghena ka tiko legi Jehovha a to mu nyika kota lezvi a wulileko, hlayisani a cialakanyiso leci.+ 26 A cikhati leci a vana va n’wina va to mu wutisa, vaku: ‘A cialakanyiso leci ci wula yini ka n’wina?’,+ 27 hlamulani muku: ‘Lowu muphahlo wa Phasika wu mahelwako Jehovha, loyi a nga hundza hi le hehla ka tiyindlu ta vaIzrayeli le Gibhite a cikhati leci a nga neha khombo ka vaGibhite a ponisa tiyindlu ta hina.’”

Zvalezvo, a vanhu va no korama va gumesa va khizama. 28 Hikwalaho, a vaIzrayeli va noya va ya maha zvalezvi Jehovha a nga leletele Mosi na Aroni.+ Va no zvi mahisa zvalezvo.

29 Makunu cikari ka wusiku, Jehovha i no daya a matewula wontlhe ya lomu tikweni ga Gibhite,+ kusukela ka matewula ya Faro, loyi a tshamileko citshan’wini cakwe ca wuhosi, kala ka matewula ya khumbi, leyi yi nga hi lomu paxweni,* ni matewula wontlhe ya zvifuyo.+ 30 Ka wusiku galego, Faro i no vhuka, ni wontlhe malandza yakwe ni vaGibhite vontlhe lava van’wani. Ku nova ni cirilo ca hombe cikari ka vaGibhite, hakuva ku wa nga hi na muti wo kala cirumbi.+ 31 Zvalezvo Faro i no vitanisa Mosi na Aroni,+ ni wusiku, a taku: “Sukani, mu huma cikari ka vanhu va mina, n’wina ni vaIzrayeli lava van’wani. Fambani mu ya tirela Jehovha kota lezvi mu wulileko.+ 32 Tekani ni tiyivhu ta n’wina, ni timbuti ta n’wina, ni tihomu ta n’wina mu famba kota lezvi mu wulileko.+ Kanilezvi mu fanele ku ndzi katekisa na minawu.”

33 A vaGibhite va no sangula ku kurumeta vanhu lezvaku va huma hi kuhatlisa+ lomu tikweni gabye hakuva, va waku: “Zvo khwatsi hontlheni hi file!”+ 34 Hikwalaho, a vanhu va no teka a mapa ma vhuvilweko ma nga hiko na comelo, va teka ni zvibya* zvabye zvo vhuvela ka zvona mapa va zvi phutsela lomu ka tinguwo tabye va zvi pinga makatleni yabye. 35 A vaIzrayeli va no maha lezvi Mosi a nga va byelile; va no kombela zvilo zva prata ni zva ouro, ni tinguwo ka vaGibhite.+ 36 Jehovha i no va nyika thomo a vanhu vakwe mahlweni ka vaGibhite, va va nyika lezvi va nga kombela; va no phanga vaGibhite.+

37 Makunu a vaIzrayeli va no suka hi le Ramesese+ vaya Sukote;+ va wa hi cipimo ca 600 000 wa vavanuna va ku famba hi minenge, na ku nga hlayiwi a vanana.+ 38 Va no famba zvin’we ni vanhu vo tala va tixakaxaka.*+ Va no famba ni tiyivhu, ni timbuti, ni tihomu, a mitlhambi yo tala ya zvifuyo. 39 Va no sangula ku maha tipawa ta redhonda hi mapa ma vhuvilweko ma nga hiko na comelo lawa va nga suka nawo hi le Gibhite, va woca. Ma wa nga hi na comelo hakuva va hlongolilwe va huma hi kuhatlisa le Gibhite, va vhumala ni cikhati ca ku longiselela timbuva.+

40 A malembe lawa a vaIzrayeli va nga tshama le Gibhite+ ma wa hi 430.+ 41 Ka siku galegi ma nga mbhela hi gona a malembe lawo ya 430, a mabutho wontlhe ya Jehovha ma no huma tikweni ga Gibhite. 42 Legi hi gona wusiku legi va to maha hi gona cialakanyiso ca kuva Jehovha a va humesile tikweni ga Gibhite. A wusiku legi gi fanele ku alakanyiwa* hi vanhu vontlhe va ka Izrayeli mahlweni ka Jehovha zvizukulwaneni zvabye zvontlhe.+

43 Makunu Jehovha i no byela Mosi na Aroni, aku: “A cileletelo ca Phasika hi leci: Gi nga giwi hi muluveli.+ 44 Kanilezvi loku a wokari a hi ni khumbi ya cinuna leyi a yi xavileko hi mali yakwe, yi fanele ku mahiwa wukwera.*+ Andzhako ka lezvo, yi ngaga. 45 A muhlavha ni mutiri a tholilweko va ngagi. 46 A yivhana yi fanele ku giwa ka muti walowu wa wun’we. A nyama yi nga humi lahandle ka muti niku mu nga tshovi ne rambu gin’we ga yivhana.+ 47 Yontlhe hlengeletano ya vaIzrayeli yi wa mahe Phasika. 48 Loku a muluveli a hanyako cikari ka n’wina a lava ku mu mahela Phasika Jehovha, a vavanuna vontlhe va ngango wakwe va fanele ku mahiwa wukwera.* Andzhako ka lezvo, a nga tshinela a taga Phasika; i ta fana ni vaIzrayeli va mabeleko. Kanilezvi gi nga giwi hi wanuna wo kala ku mahiwa wukwera.+ 49 I nayo wun’we wu to tira ka muIzrayeli wa mabeleko ni ka muluveli loyi a hanyako cikari ka n’wina.”+

50 Hikwalaho, a vaIzrayeli vontlhe va no maha zvalezvi Jehovha a nga leletele Mosi na Aroni. Va no zvi mahisa zvalezvo. 51 Ka siku galego, Jehovha i no humesa vaIzrayeli zvin’we ni mabutho yabye tikweni ga Gibhite.

13 Jehovha i no engeta a byela Mosi, aku: 2 “Ndzi basisele* a matewula wontlhe ya cinuna* cikari ka vaIzrayeli. A matewula ya cinuna, kani ya munhu kutani ya cifuyo, ma lumba mina.”+

3 Mosi i no byela vanhu, aku: “Alakanyani a siku legi, legi mu nga huma hi gona le Gibhite,+ a ndlwini ya wukhumbi, hakuva Jehovha i mu humesile lomu hi canja ga ntamu.+ Hikwalaho, mu ngagi nchumu wu nga ni comelo. 4 Nyamutlha mo huma, hi hweti ya Abhibhi.*+ 5 A cikhati leci Jehovha a to mu nghenisa tikweni ga vaKhanani, ni ga vaHiti, ni ga vaAmori, ni ga vaHivhi, ni ga vaJebhusi,+ legi a hlambanyileko ka vakokwani va n’wina a ku mu nyika gona,+ a tiko gi khulungako a masi ni wulombe,+ mahani a cialakanyiso leci ka hweti leyi. 6 Ndzeni ka 7 wa masiku, mu taga tipawa to kala comelo.+ Hi siku ga wu 7 ku tava ni mubuzo wu mahelwako Jehovha. 7 Ndzeni ka 7 wa masiku, ganani tipawa to kala comelo.+ Ku nga kumiwi nchumu wu nga ni comelo ka n’wina,+ ne ku nga kumiwi comelo lomu cipandzeni* ca n’wina contlhe. 8 Ka siku lego, byela n’wana wa wena, uku: ‘Ndzi maha lezvi hi kota ya lezvi Jehovha a nga ndzi mahela ka siku legi ndzi nga huma le Gibhite.’+ 9 Leci ci tava cikombiso canjeni ga wena ni cialakanyiso cikandzeni* ca wena+ kasi a nayo wa Jehovha wuva non’wini wa wena, hakuva Jehovha i ku humesile tikweni ga Gibhite hi canja ga ntamu. 10 Hlayisa a cileletelo leci hi cikhati ci yimisilweko, lembe ni lembe.+

11 “A cikhati leci Jehovha a to ku nghenisa tikweni ga vaKhanani, legi a hlambanyileko ka wena ni ka vakokwani va wena a ku ku nyika gona,+ 12 u fanele ku nyika Jehovha a matewula wontlhe ya cinuna,* ni matewula wontlhe ya vamatsune va lomu ntlhambini lowu u to fuya; zvi lumba Jehovha.+ 13 A matewula wontlhe ya timbongola u fanele ku ma tlhatlhisa hi yivhu, kanilezvi loku u nga ma tlhatlhisi, ma tshove nhamu. U ta tlhatlhisa a matewula wontlhe ya vafana va wena.+

14 “Loku, hi kufamba ka cikhati, a n’wana wa wena a tshuka a ku wutisa, aku: ‘Zvi wula yini lezvi?’, u ta mu hlamula, uku: ‘Jehovha i hi humesile hi canja ga ntamu le Gibhite, a ndlwini ya wukhumbi.+ 15 A cikhati leci Faro a nga ti nonohisa, a ala ku hi tlhatlha hi huma,+ Jehovha i no daya a matewula wontlhe tikweni ga Gibhite, kusukela ka matewula ya vanhu kala ka matewula ya zvihari.+ Hi caleco ci ndzi mahako ndzi mu mahela muphahlo Jehovha hi matewula wontlhe ya zvifuyo zva vamatsune* ndzi tlhela ndzi tlhatlhisa a matewula wontlhe ya vafana va mina.’ 16 Leci ci tava cikombiso canjeni ga wena ni cikombiso cikandzeni* ca wena,+ hakuva Jehovha i hi humesile hi canja ga ntamu le Gibhite.”

17 Laha Faro a nga tlhatlha vanhu va famba, Nungungulu a nga va rangelangi va famba hi ndlela ya ku nghena tikweni ga vaFilistiya hambu lezvi yi nga kari yi tsema. Hakuva Nungungulu i waku: “A vanhu va nga cica maalakanyo va tlhela Gibhite loku va kumana ni yimpi.” 18 Hikwalaho, Nungungulu i no rendzelekisa vanhu va famba hi ndlela ya ciwula ca Bimbi go Pswhuka.+ A vaIzrayeli va humile Gibhite na va xaxametilwe khwatsi a ku fana ni mitlawa ya masochwa. 19 Mosi i no teka ni marambu ya Josefa a huma nawo, hakuva Josefa i wa hlambanyisile a vana va Izrayeli, aku: “Hakunene Nungungulu i ta mu alakanya. Mu fanele ku teka marambu ya mina mu huma nawo lomu.”+ 20 Va no suka hi Sukote va ya gova Etama, mbhirini ya ciwula.

21 Jehovha i wa famba mahlweni kabye; ni mumu i wa va rangela hi mhinga ya refu,+ ni wusiku a va rangela hi mhinga ya ndzilo wu fela ku va woningela kasi va zvi kota ku famba mumu ni wusiku.+ 22 Ni mumu, a mhinga ya refu yi wa nga suki mahlweni kabye, hambu a mhinga ya ndzilo ni wusiku.+

14 Makunu Jehovha i no byela Mosi, aku: 2 “Byela vaIzrayeli lezvaku va tlhela va ya gova hi le mahlweni ka Pi-Hahirote, cikari ka Migdhole ni bimbi, na va wona Bhaali-Zefoni.+ Mu ta gova kusuhani ni bimbi na mu cuwukene ni Bhaali-Zefoni. 3 Xungetano hi vaIzrayeli, Faro i taku: ‘Vo pepetseka lomu tikweni, ne a va ci tivi co maha. A ciwula ci va phasile.’ 4 Ndzi ta tsika mbilu ya Faro yi nonoha.+ I ta va landza hi le ndzhako niku ndzi ta ti dhumisa hi Faro ni butho gakwe gontlhe;+ a vaGibhite hakunene va ta zvi tiva lezvaku hi mina Jehovha.”+ Hikwalaho, a vaIzrayeli va no maha zvalezvo.

5 Hi ndzhako ka cikhati, a hosi ya Gibhite yi no byeliwa lezvaku a vanhu va tsutsumile. Zvalezvo, Faro ni malandza yakwe va no cica mawonela yabye hi vanhu,+ vaku: “Hi wa zvi mahela yini zvezvi? Hi tlhatlhile vaIzrayeli va tsika ku hi tirela kota tikhumbi.” 6 Hikwalaho, Faro i no longisela a tikareta takwe ta yimpi, a famba ni vanhu vakwe.+ 7 I no teka a 600 wa tikareta leti ta tinene ta kona, ni tontlhe tikareta leti tin’wani ta Gibhite. Tontlhe ti wa hi ni masochwa. 8 Hi ndlela leyo, Jehovha i no tsika a mbilu ya Faro, a hosi ya Gibhite, yi nonoha. I no landza vaIzrayeli hi le ndzhako a cikhati leci a vaIzrayeli va nga kari va huma na va nga chavi nchumu.*+ 9 A vaGibhite va no va landza hi le ndzhako.+ A mahaxi wontlhe ya ku koka tikareta ta Faro, ni vakhileli vakwe va mahaxi, ni butho gakwe va no va tshinelela laha va nga govile mbhirini ya bimbi, kusuhani ni Pi-Hahirote, va cuwuka le Bhaali-Zefoni.

10 Laha Faro a nga kari a tshinela, a vaIzrayeli va no tlakusa a mahlo yabye va wona a vaGibhite na va va landza. A vaIzrayeli va no chava va sangula ku rila ka Jehovha.+ 11 Va no wutisa Mosi, vaku: “Xana ko kala ku nga hi na zvilahla le Gibhite a kuza u hi tisa seno kasi hi ta fela lomu ciwuleni ke?+ Zvini zvezvi u nga hi maha hi ku hi humesa Gibhite? 12 A hi zvalezvi hi nga ku byela le Gibhite a cikhati leci hi ngaku: ‘Hi tsike hi tirela vaGibhite ke’? Hakuva, ka hina, i chukwana a ku tirela vaGibhite a ku hundza ku fela lomu ciwuleni.”+ 13 Makunu Mosi i no byela vanhu, aku: “Mu nga chavi nchumu.+ Yimani mu tiya mu wona a kuhanyisa loku Jehovha a lavako ku mu mahela nyamutlha,+ hakuva a vaGibhite lava mu va wonako nyamutlha mu nga ta ha tshuka mu va wona kambe.+ 14 Hi Jehovha ha yece a to mu lwela,+ n’wina mu ta miyela mu ku hwi.”

15 Makunu Jehovha i no byela Mosi, aku: “Hikuyini u tshamelako ku ndzi rilela? Byela vaIzrayeli lezvaku va suka vaya mahlweni. 16 Wena Mosi, tlakusa nhonga ya wena u nawuluta canja ga wena hehla ka bimbi, u gi avanyisa kasi a vaIzrayeli va famba hi laha cikari ka bimbi, ka misava yo woma. 17 Mina ndzi ta tsika timbilu ta vaGibhite ti nonoha kasi va nghena lomu bimbini va mu landza; hi ndlela leyo, ndzi ta ti dhumisa hi Faro ni gontlhe a butho gakwe, ni tikareta takwe ta yimpi, ni vakhileli vakwe va mahaxi.+ 18 A vaGibhite hakunene va ta zvi tiva lezvaku hi mina Jehovha a cikhati leci ndzi to ti dhumisa hi Faro, ni tikareta takwe ta yimpi, ni vakhileli vakwe va mahaxi.”+

19 Makunu a ngilozi ya Nungungulu wa lisine+ leyi yi nga kari yi famba mahlweni ka wugovelo ga ka Izrayeli, yi no suka yiya hi le ndzhako kabye. A mhinga ya refu leyi yi nga hi phambeni kabye yonawu yi no suka yi ya yima hi le ndzhako kabye.+ 20 Hikwalaho, yi nova cikari ka wugovelo ga vaGibhite ni wugovelo ga vaIzrayeli.+ Ka tlhelo gin’we, a refu gi wa vanga munyama; ka tlhelo legi gin’wani, gi wa vanga kuwonekela ni wusiku.+ Lezvo zvi no maha ku a ntlawa wun’we wu nga tshineli ka lowu wun’wani a wusiku gontlhe.

21 Makunu Mosi i no nawuluta a canja gakwe hehla ka bimbi;+ Jehovha i no kukuleta a mati ya bimbi hi moya wa hombe wa cikobani* a wusiku gontlhe, a avanyisa mati ya bimbi ku sala misava yo woma.+ 22 A vaIzrayeli va no tsemakanya hi laha cikari ka bimbi, ka misava yo woma,+ a mati na ma mahile khurisi hi tlhelo gabye ga cinene ni tlhelo gabye ga cibhabha.+ 23 A vaGibhite va no va landza; wontlhe a mahaxi ya Faro, ni tikareta takwe ta yimpi, ni vakhileli vakwe va mahaxi, va no sangula ku va landza va nghena lomu cikari ka bimbi.+ 24 Laha gi ngaya kuceni,* Jehovha i no cuwuka a butho ga vaGibhite hi lomu ka mhinga ya ndzilo ni ya refu+ a maha lezvaku kuva ni vhilinganya lomu ka butho ga vaGibhite. 25 I no simama ku khumulela a marodha ya tikareta tabye laha ka ku va ti fambisa hi kukarateka. A vaGibhite vaku: “A hi tsutsumeni a vaIzrayeli, hakuva Jehovha o va lwela, a vhukela vaGibhite.”+

26 Jehovha aku ka Mosi: “Nawuluta a canja ga wena hehla ka bimbi kasi a mati ma wuya hehla ka vaGibhite, ni ka tikareta tabye, ni ka vakhileli vabye va mahaxi.” 27 Mosi i no tekela ku nawuluta canja gakwe hehla ka bimbi. Laha gi ngaca, a bimbi gi no tlhela gi tshamisa lezvi gi tshamisako zvona. Laha a vaGibhite va nga kari va gi tsutsuma, Jehovha i no va mbombomelisa cikari ka bimbi.+ 28 A mati ma no wuya ma ta khubhunyeta tikareta ta yimpi, ni vakhileli va mahaxi, ni gontlhe a butho ga Faro legi gi nga nghenile lomu bimbini hi le ndzhako kabye.+ Ne mun’we wabye a nga ponangi laho.+

29 Kanilezvi a vaIzrayeli va no famba hi laha ka misava yo woma cikari ka bimbi.+ A mati ma no maha khurisi hi tlhelo gabye ga cinene ni tlhelo gabye ga cibhabha.+ 30 Hi ndlela leyo, Jehovha i no ponisa Izrayeli ka siku lego canjeni ga vaGibhite;+ a vaIzrayeli va no wona a zvirumbi zva vaGibhite mbhirini ya bimbi. 31 A vaIzrayeli va no wona ni ntamu wa hombe* lowu Jehovha a nga wu tirisa kasi ku vhukela vaGibhite. A vanhu va no sangula ku chava Jehovha va tlhela va kholwa ka Jehovha ni ka Mosi, a nandza gakwe.+

15 Ka cikhati caleco, Mosi ni vaIzrayeli va no yimbelela lisimu leli ka Jehovha:+

“Ndzi ta yimbelela ka Jehovha, hakuva i tlakusilwe nguvhu.+

I hoxele haxi ni mukhileli wa gona lomu bimbini.+

 2 Jah* i ntamu wa mina, hakuva ive kuhanyiswa ka mina.+

Loyi i Nungungulu wa mina, ndzi ta mu dhumisa;+ i Nungungulu wa papayi wa mina,+ ndzi ta mu tlakusa.+

 3 Jehovha i nhenha ya ntamu.+ A vito gakwe hi Jehovha.+

 5 A mati ma zangarileko ma va fenengetile, va rikha vaya kueteni a ku fana ni ribye.+

 9 A nala i te: ‘Ndzi ta va hlongolisela niku ndzi ta va kuma!

Ndzi ta avanyisa a muphango kala ndzi* xura!

Ndzi ta hlomula a cipadha ca mina. A canja ga mina gi ta va khozisa!’+

11 O Jehovha, hi wihi cikari ka vanungungulu a fanako na wena?+

Himani a nga wa ntamu ni wo basa a ku fana na wena?+

Loyi a faneleko ku chaviwa ni ku dhumiswa hi tisimu; Loyi a mahako zvihlamaliso ke?+

12 U nawulutile a canja ga wena ga cinene, a misava yi va mita.+

Vontlhe a vahanyi va le Khanani va ta mbhela ntamu.+

16 A kuchava ni kururumela ku tava hehla kabye.+

18 Jehovha i ta fuma kota hosi kala kupindzuka ni kupindzuka.+

20 Miriyamu, a muphrofeti wa cisati tlhelo makabye wa Aroni, i no teka mutandanda canjeni gakwe, ni vavasati vontlhe va no mu landzela na va hi ni mitandanda na va kari va kina. 21 Miriyamu i no amukela lisimu ka vavanuna a yimbelela, aku:

“Yimbelelani ka Jehovha, hakuva i tlakusilwe nguvhu.+

I hoxele haxi ni mukhileli wa gona lomu bimbini.”+

22 Andzhako ka lezvo, Mosi i no rangela vaIzrayeli va suka Bimbini go Pswhuka vaya ciwuleni ca Xure. Va no famba masiku manharu lomu ciwuleni kanilezvi a va kumangi mati. 23 Va no chikela le Mara+ kanilezvi a va zvi kotangi kunwa mati ya kona hakuva ma wa bava. Hi caleco ci nga maha lezvaku a wutshamu lego a gi chula ku Mara.* 24 Hikwalaho, a vanhu va no sangula ku ngurangurela Mosi,+ vaku: “Hi tanwa yini?” 25 I no rila ka Jehovha,+ Jehovha a mu komba sinya. Laha a nga yi hoxela lomu matini, a mati ma no cica mava yo nandziha.

Kwalaho i no va nyika nayo ni tshinya ga kulamula a tlhela a va ringa,+ 26 aku: “Loku mu ingisela khwatsi a gezu ga Jehovha, a Nungungulu wa n’wina, ni ku maha zvakululama mahlweni kakwe mu tlhela mu chela kota ka zvileletelo zvakwe ni ku hlayisa a milayo yakwe yontlhe,+ ndzi nga ta mu tisela ne wubabyi gin’we cikari ka mababyi lawa ndzi ma tiseleko vaGibhite,+ hakuva mina Jehovha, hi mina ndzi mu hanyisako.”+

27 Andzhako ka lezvo, va noya Elima lomu ku nga hi ni 12 wa zvibuka zva mati ni 70 wa micindzu. Hikwalaho, va no gova laho, kusuhani ni mati.

16 Andzhako ka loku a hlengeletano yontlhe ya ka Izrayeli yi sukile le Elima, yi no chikela ciwuleni ca Sini,+ leci ci nga cikari ka Elima ni Sinayi, hi siku ga wu 15 ka hweti ya wumbiri andzhako ka loku va humile tikweni ga Gibhite.

2 A hlengeletano yontlhe ya ka Izrayeli yi no sangula ku ngurangurela Mosi na Aroni lomu ciwuleni.+ 3 A vaIzrayeli va wa tshamela ku wula lezvi: “Zvi wa hi chukwana loku hi wa no dawa hi canja ga Jehovha le tikweni ga Gibhite na hi tshamile cikari ka tipanela ta nyama,+ lezvo na higa zvakuga* hi xura. N’wina mu hi humesile mu hi tisa ciwuleni leci kasi mu ta dayisa a bandla gontlhe legi hi ndlala.”+

4 Makunu Jehovha i no byela Mosi, aku: “Ndzi ta mu nisela zvakuga hi le matilweni.+ A mun’we ni mun’wani cikari ka vanhu i wa hume a ya rolela zvakuga zva siku ni siku,+ kasi ndzi va ringa, ndzi fela ku wona lezvaku va ta famba nayweni wa mina ke.+ 5 Kanilezvi hi siku ga wu 6,+ loku va longisela lezvi va roleleko, va wa tirise a lipimo li wuyetilweko kumbiri la lezvi va rolelako ka masiku lawa man’wani.”+

6 Hikwalaho, Mosi na Aroni va no byela vaIzrayeli vontlhe, vaku: “Laha a gambo gi to pela, hakunene mu ta zvi tiva lezvaku hi Jehovha loyi a mu humesileko tikweni ga Gibhite.+ 7 Ni mixo mu ta wona a kungangamela ka Jehovha, hakuva Jehovha i zvi zwile a cikhati leci mu nga mu ngurangurela. Hova hina vamani ko kala mu hi ngurangurela ke?” 8 Mosi i no engeta, aku: “A cikhati leci Jehovha a to mu nyika nyama kasi muga kupeleni ka gambo, ni zvakuga* ni mixo kasi muga mu xura, mu ta zvi wona lezvaku Jehovha i ku zwile a kungurangura ka n’wina loku mu nga mu ngurangurela. Kanilezvi hina hova vamani? A mu ngurangurelangi hina, mu ngurangurele Jehovha.”+

9 Mosi i no byela Aroni, aku: “Byela a hlengeletano yontlhe ya ka Izrayeli, uku: ‘Tshinelani mahlweni ka Jehovha, hakuva i ku zwile a kungurangura ka n’wina.’”+ 10 Zvalezvi Aroni a nga mbheta ku wulawula ni hlengeletano yontlhe ya ka Izrayeli, va no hundzuluka va cuwuka ciwula; a kungangamela ka Jehovha ku no woneka lomu refini.+

11 Jehovha i no engeta a wulawula na Mosi, aku: 12 “Ndzi ku zwile a kungurangura ka vaIzrayeli.+ Va byele, uku: ‘Na gi ku pswite,* mu taga nyama. Ni mixo mu ta xura hi zvakuga+ niku mu ta zvi tiva lezvaku hakunene hi mina Jehovha, a Nungungulu wa n’wina.’”+

13 Hikwalaho, ka gambo lego, ku nota tihwari ti ta fenengeta wugovelo.+ Ni mixo ku nova ni ndzhokati matlhelweni wontlhe ya wugovelo. 14 Laha a ndzhokati yi nga tlhatlheka, ku no woneka a zvilwana zva zvitsongwani zvo olova a ku zvi khema na zvi hi lahasi lomu ciwuleni.+ Zvi wa hi zvitsongwani a ku fana ni gapongo laha misaveni. 15 A cikhati leci a vaIzrayeli va nga zvi wona, va no wutisana, vaku: “Zvini zvezvi?”, hakuva va wa nga zvi tivi a ku zvini. Mosi i no va hlamula, aku: “Lezvi i zvakuga lezvi Jehovha a mu nyikileko kasi muga.+ 16 Jehovha i layile lezvi: ‘A mun’we ni mun’wani i fanele ku rolela zvo ringana mpimo lowu a gako. A munhu ni munhu mu ta mu rolelela zvo ringana omeri* yin’we,+ mu rolela hi kuya hi ntsengo wa vanhu lava a mun’we ni mun’wani a nga navo lomu tendeni gakwe.’” 17 A vaIzrayeli va no sangula ku maha lezvo, va zvi rolela. A vokari va no rolela zvotala, a van’wani va rolela zvitsongwani. 18 A cikhati leci va nga zvi pimelela hi omeri, zvi wa nga sali ka lava va nga rolele zvotala niku hambu lava va nga rolele zvitsongwani va wa nga kiyelelwi.+ A mun’we ni mun’wani i no rolela zvo ringana kuga.

19 Makunu Mosi i te ngalo kabye: “I hava a faneleko ku zvi siya kala ni mixo.”+ 20 Kanilezvi a va mu ingisangi. Laha a vanhu vo kari va nga siya zvo kari kala ni mixo, zvi no huma zviwungwani zvi tlhela zvi nuha. Mosi i no va zangarela. 21 Va wa rolela mixo ni mixo, a mun’we ni mun’we hi kuya hi mpimo wa lezvi a gako. Loku a gambo gi hisa, zvi wo nyeka.

22 Hi siku ga wu 6, va no rolela zvakuga* zvi wuyetilweko kumbiri,+ tiomeri timbiri hi munhu. Hikwalaho, tontlhe a tihosana ta hlengeletano ti noya ti ya hlawutela a mhaka leyi ka Mosi. 23 Zvalezvo i te ngalo kabye: “Jehovha i wulile zvezvo. A mandziko gi tava siku ga kuhumula ko mbhelela, i sabhadho go basa gi mahelwako Jehovha.+ Wocani lezvi mu lavako ku woca, mu khona lezvi mu lavako ku khona;+ vekani ni cihi ci to sala, mu zvi hlayisa kala ni mixo.” 24 Hikwalaho, va no zvi veka kala ni mixo kota lezvi Mosi a nga va layile; a zvi nuhangi ne a zvi humangi zviwungwani. 25 Makunu Mosi i te ngalo: “Zvi geni nyamutlha, hakuva nyamutlha i sabhadho gi mahelwako Jehovha. Nyamutlha mu nga ta zvi kuma lahasi. 26 Mu ta zvi rolela hi 6 wa masiku kanilezvi hi siku ga wu 7, ku nga sabhadho,+ mu nga ta zvi kuma.” 27 Hambulezvo, a vokari va no huma kasi va ya rolela hi siku ga wu 7, kanilezvi a va kumangi nchumu.

28 Hikwalaho, Jehovha i no byela Mosi, aku: “Kala rini na ma ha ala ku hlayisa zvileletelo zva mina ni milayo ya mina ke?+ 29 Mu nga rivali lezvaku Jehovha i mu nyikile sabhadho.+ Hi cigelo leco, i mu nyika zvakuga zva masiku mambiri hi siku ga wu 6. A mun’we ni mun’we i wa tshame laha a nga kona; i hava a faneleko ku suka laha wutshan’wini gakwe hi siku ga wu 7.” 30 Hikwalaho, a vanhu va no humula hi siku ga wu 7.+

31 A vanhu va ka Izrayeli va no chula a zvakuga lezvo vaku i “mana”.* Zvi wa hi zvo basa a ku fana ni tinyungi ta kowentro niku zvi wa nandzihisa ku khwatsi zvibabana zvi mahilweko ni wulombe.+ 32 Makunu Mosi i te ngalo: “Jehovha i layile lezvi: ‘Rolelani a omeri ya mana kasi ma hlayisiwa zvizukulwaneni zva n’wina zvontlhe,+ va fela ku wona zvakuga lezvi ndzi mu nyikileko muga lomu ciwuleni a cikhati leci ndzi nga mu humesa tikweni ga Gibhite.’” 33 Hikwalaho, Mosi i no byela Aroni, aku: “Teka a jaro u chela omeri ya mana u ma veka mahlweni ka Jehovha kasi ma hlayisiwa zvizukulwaneni zva n’wina zvontlhe.”+ 34 Aroni i no veka mana mahlweni ka Kustumunyu+ kasi ma hlayiseka kota lezvi Jehovha a nga leletele Mosi. 35 A vaIzrayeli va noga mana 40 wa malembe+ kala va chikela ka tiko legi gi nga hi ni vaaki.+ Va noga mana kala va chikela mimbhinganweni ya tiko ga Khanani.+ 36 A omeri cipandze ca wukhume ca efa.*

17 A hlengeletano yontlhe ya ka Izrayeli yi no suka le ciwuleni ca Sini+ yi famba hi zvigava zvo kari hi kuya hi cileletelo ca Jehovha,+ niku va noya va ya gova le Refidhime.+ Kanilezvi kwaseyo ku wa nga hi na mati ya ku a vanhu vanwa.

2 Hikwalaho, a vanhu va no sangula ku holovisa Mosi,+ vaku: “Hi nyike mati hinwa.” Kanilezvi Mosi i te ngalo kabye: “Hikuyini mu ndzi holovisako? Kona hikuyini mu simamako ku ringa Jehovha?”+ 3 Kanilezvi a vanhu va wazwa nguvhu tora. Hikwalaho, va no simama ku ngurangurela Mosi,+ vaku: “U hi humesele yini tikweni ga Gibhite kasi u ta hi daya hi tora, hina, ni vana va hina, ni zvifuyo zva hina ke?” 4 Hi kugumesa, Mosi i no rila ka Jehovha, aku: “Ndzi ku yini hi vanhu lava? Phela ko kiyela kutsongwani kasi va ndzi gandla hi maribye!”

5 Makunu Jehovha i te ngalo ka Mosi: “Teka a madhota yo kari ya ka Izrayeli ni nhonga ya wena leyi u ngaba hi yona a Congo wa Nilo,+ u ranga mahlweni ka vanhu. Teka a nhonga u famba. 6 Ndzi tava mahlweni ka wena laha ribyeni le Horebhe. U taba ribye ku huma mati, a vanhu vanwa.”+ Mosi i no maha zvalezvo mahlweni ka madhota ya ka Izrayeli. 7 Hikwalaho, i no chula wutshamu lego a ku Masa*+ ni Meribha*+ hi kota ya lezvi a vaIzrayeli va nga holovisa Mosi ni lezvi va nga ringa Jehovha+ hi ku wula ku: “Jehovha i kona cikari ka hina kutani a nga kona ke?”

8 Makunu ku nota a vaAmaleki+ va talwa ni vaIzrayeli le Refidhime.+ 9 Zvalezvo, Mosi i no byela Joxuwa,+ aku: “Hi hlawulele vavanuna mu famba mu yalwa ni vaAmaleki. A mandziko ndzi ta yima le hehla ka citsungana, na ndzi hi ni nhonga ya Nungungulu wa lisine canjeni ga mina.” 10 Joxuwa i no maha zvalezvi Mosi a nga mu byelile,+ alwa ni vaAmaleki. Mosi, na Aroni, na Hura+ va no kandziha vaya hehla ka citsungana.

11 Laha Mosi a nga simama na a tlakusile mawoko yakwe, a vaIzrayeli va wo hlula, kanilezvi neti a releta mawoko yakwe, a vaAmaleki va wo hlula. 12 Laha a mawoko ya Mosi ma nga karele, va no teka ribye va gi veka lahasi, a tshamela. Aroni na Hura va no yima hi lomu matlhelweni yakwe va khoma mawoko yakwe kasi ma nga rereki kala a gambo gi pela. 13 Hi ndlela leyo, Joxuwa i no hlula Amaleki ni vanhu vakwe hi cipadha.+

14 Makunu Jehovha i te ngalo ka Mosi: “Tsala lezvi lomu bhukwini kasi zviva cialakanyiso u tlhela u byela Joxuwa, uku: ‘Ndzi ta fuvisa a vaAmaleki va nga ha alakanyiwi kambe lahasi ka matilo.’”+ 15 Mosi i no aka a alati a gi chula ku Jehovha-Nisi,* 16 aku: “Kota lezvi a canja ga vaAmaleki gi vhukelako a citshamu ca wuhosi ca Jah,*+ Jehovha i talwa yimpi ni vaAmaleki ka cizukulwana ni cizukulwana.”+

18 Makunu Jetro, a mupristi wa le Midhiyani tlhelo bava wa Mosi,+ i nozwa zvontlhe lezvi Nungungulu a nga mahele Mosi ni vanhu vakwe, a vaIzrayeli, ni lezvi Jehovha a nga va humesisa zvona vaIzrayeli le tikweni ga Gibhite.+ 2 Jetro, a bava wa Mosi, i wa amukele Zipora, a sati wa Mosi, laha a nga tlhelisilwe kakwe 3 zvin’we ni vafana vakwe va vambiri.+ A mun’we ku wa hi Gerxomi,*+ hakuva Mosi i wa te: “Ndzi mahile muluveli ka gin’wani tiko.” 4 Loyi mun’wani ku wa hi Eliyezeri,* hakuva i wa te ngalo: “A Nungungulu wa papayi wa mina muvhuni wa mina, loyi a ndzi tlhatlhisileko ka cipadha ca Faro.”+

5 Hikwalaho, Jetro, a bava wa Mosi, zvin’we ni vafana va Mosi ni sati wakwe va noya ka Mosi ciwuleni lomu a nga govile kona, citsungeni ca Nungungulu wa lisine.+ 6 Jetro i no rumela gezu ka Mosi, aku: “Mina bava wa wena Jetro,+ ndzata ka wena, ni sati wa wena, ni vafana vakwe va vambiri.” 7 Zvalezvo Mosi i no huma a khinga a bava wakwe; i no korama a mu pswopswa. Va no ambisana mahungu va gumesa va nghena tendeni.

8 Mosi i no hlawutela a bava wakwe zvontlhe lezvi Jehovha a nga mahile ka Faro ni Gibhite hi kota ya vaIzrayeli,+ ni zvikarato zvontlhe lezvi zvi va weleko lomu ndleleni,+ ni lezvi Jehovha a nga va tlhatlhisisa zvona. 9 Jetro i no tsaka hi kota ya zvilo zva zvinene lezvi Jehovha a nga mahele vaIzrayeli hi ku va tlhatlhisa Gibhite.* 10 Jetro i te ngalo: “I wa dhumiswe Jehovha, loyi a mu tlhatlhisileko le Gibhite ni ka Faro, loyi a tlhatlhisileko vanhu canjeni ga Gibhite. 11 Makunu ndza zvi tiva lezvaku Jehovha wa hombe a ku hundza a vanungungulu vontlhe lava van’wani,+ hi kota ya lezvi a mahileko ka lava va nga ti kulisa hehla ka vanhu vakwe.” 12 Jetro, a bava wa Mosi, i no neha a munyikelo wa kuhiswa ni miphahlo ka Nungungulu. Aroni ni wontlhe a madhota ya ka Izrayeli va nota va taga a zvakuga ni bava wa Mosi mahlweni ka Nungungulu wa lisine.

13 Ka siku gi nga landzela, Mosi i no tshama a lamula vanhu kota lezvi a nga tolovela ku maha. A vanhu va no simama ku ta yima mahlweni ka Mosi kusukela ni mixo kala a gambo gi pela. 14 A cikhati leci a bava wa Mosi a nga wona lezvi Mosi a nga kari a mahela vanhu, i no mu wutisa, aku: “Zva kuyini zvalezvi u mahelako vanhu? Hikuyini u tshamako laha u lamula wece, a vanhu vontlhe na va yimile mahlweni ka wena kusukela ni mixo kala gi pela ke?” 15 Mosi i no hlamula a bava wakwe, aku: “Hi ku a vanhu va tshamela kuta ka mina va ta wutisa ka Nungungulu. 16 Loku ku vhuka a mhaka yo kari cikari ka vanhu vambiri va yi tisa seno ka mina, kasi ndzi lamula ndzi gumesa ndzi tivisa a zviboho zva Nungungulu wa lisine ni milayo yakwe.”+

17 A bava wa Mosi i no mu byela lezvi: “Lezvi u mahako a hi zvinene. 18 U ta karala, wena ni vanhu lava u nga navo, hakuva lowu i ndzhwalo wa hombe nguvhu ka wena; a wu nge zvi koti ku wu rwala wece. 19 Makunu zwana mina. Ndzi ta ku nyika wusungukati, na Nungungulu i tava zvin’we na wena.+ Wena u tava muyimeli wa vanhu mahlweni ka Nungungulu wa lisine,+ niku u fanele ku yisa a timhaka ka Nungungulu wa lisine.+ 20 U ta va gondzisa zvileletelo ni milayo,+ u tlhela u va tivisa a ndlela leyi va faneleko ku famba hi yona ni ntiro lowu va faneleko ku maha. 21 Kanilezvi hlawula a vavanuna vo kari va nga ni wutlhari cikari ka vanhu,+ lava va chavako Nungungulu, na va hi vo tsumbeka, lava va vengako a bhindzu go biha,+ u va yimisa hehla ka vanhu kota varangeli va mitlawa ya 1000 wa vanhu, ni varangeli va mitlawa ya 100 wa vanhu, ni varangeli va mitlawa ya 50 wa vanhu, ni varangeli va mitlawa ya 10 wa vanhu.+ 22 Va ta lamula vanhu loku ku vhuka timhaka.* A timhaka to karata va ta ti tisa ka wena,+ kanilezvi leti ta titsongwani va ta lamula vona. Ti olovisele ntiro hi ku va tsika va ku vhuna a ndzhwalo.+ 23 Loku u maha lezvo, na zvi hi zvalezvi Nungungulu a ku layako, u ta wu kota a ndzhwalo lowu, ni vanhu va ta tlhela kaya na va xalele.”

24 Mosi i no tekela ku ingisa a bava wakwe, a maha zvontlhe lezvi a nga wulile. 25 Mosi i no hlawula a vavanuna va nga ni wutlhari cikari ka vaIzrayeli vontlhe, a va yimisa kota tihosana hehla ka vanhu, vava varangeli va mitlawa ya 1000 wa vanhu, ni varangeli va mitlawa ya 100 wa vanhu, ni varangeli va mitlawa ya 50 wa vanhu, ni varangeli va mitlawa ya 10 wa vanhu. 26 Hikwalaho, va wa lamula a vanhu loku ku vhuka timhaka. A timhaka to karata va wa ti yisa ka Mosi,+ kanilezvi tontlhe a timhaka ta titsongwani hi vona va nga kari va lamula. 27 Andzhako ka lezvo, Mosi i no salisana ni bava wakwe,+ a khoma ndlela aya tikweni gakwe.

19 Hi hweti ya wunharu, andzhako ka loku a vaIzrayeli va humile tikweni ga Gibhite, va no chikela ciwuleni ca Sinayi hi siku galego.* 2 Va no suka hi le Refidhime+ vaya ciwuleni ca Sinayi va ya gova kona. A vaIzrayeli va no gova laho, mahlweni ka citsunga.+

3 Makunu Mosi i no kandziha aya ka Nungungulu wa lisine; Jehovha i no mu vitana na a hi laha citsungeni,+ aku: “U ta byela a yindlu ya Jakobe, va nga vana va Izrayeli, uku: 4 ‘N’wina mu zvi wonile hi n’wece lezvi ndzi mahileko ka vaGibhite+ kasi ndzi mu rwala hi tipapa ta gama ndzi mu tisa ka mina.+ 5 Makunu, loku mu ingisa a gezu ga mina hi kutsumbeka, ni ku hlayisa a civhumelwano ca mina, hakunene mu tava tshomba ya mina yo hlawuleka* cikari ka matiko wontlhe,+ hakuva a misava yontlhe yi lumba mina.+ 6 Ka mina, mu tava mufumo wa vapristi ni tiko go basa.’+ Lawa magezu u to byela a vaIzrayeli.”

7 Makunu Mosi i noya a ya vitanisa a madhota wontlhe ya vanhu a ma byela magezu wontlhe lawa Jehovha a nga mu leletele.+ 8 Andzhako ka lezvo, a vanhu vontlhe va no hlamula hi khatigin’we, vaku: “Zvontlhe lezvi Jehovha a nga wula hi ta maha.”+ Mosi i no tekela ku tlhelisa hlamulo wa vanhu ka Jehovha. 9 Jehovha i no byela Mosi, aku: “Ndzata ka wena hi lomu refini ga ntima, kasi a vanhu va zvizwa a cikhati leci ndzi to wulawula na wena ni lezvaku va fela ku kholwa ka wena kambe contlhe cikhati.” Hi kulandzela, Mosi i no byela Jehovha lezvi a vanhu va zvi wulileko.

10 Jehovha i no byela Mosi, aku: “Famba ka vanhu u ya va basisa, nyamutlha ni mandziko; va wa hlazve a tinguwo tabye. 11 Va wa ti longisele a siku ga wunharu, hakuva hi siku ga wunharu Jehovha i ta relela le hehla ka Citsunga ca Sinayi mahlweni ka vanhu vontlhe. 12 Va vekele a mimbhingano a vanhu matlhelweni wontlhe ya citsunga, u va byela, uku: ‘Ti woneleni, mu nga kandzihi citsunga ne hambu ku henya a mimbhingano ya cona. Ni wihi loyi a to henya citsunga i ta dawa. 13 I hava a faneleko ku henya a munhu a nga ni nandzu. A munhu loyi a nga ni nandzu i ta gandliwa hi maribye kutani ku gwaziwa hi tlhari.* Kani cihari kutani munhu, a nga ta hanya.’+ Kanilezvi loku ku biwa a linanga* la yivhu, + va nga tshinela laha citsungeni.”

14 Andzhako ka lezvo, Mosi i no relela hi le citsungeni aya ka vanhu a ya va basisa; vona va no hlazva tinguwo tabye.+ 15 I no byela vanhu, aku: “Ti longiseleni a siku ga wunharu. Mu nga hlengeli masango.”*

16 Ni mixo ya siku ga wunharu, ku no dzindza ni ku hatima ku tlhela kuva ni refu ga munyama+ le hehla ka citsunga, ku zwala a kuvhuma ka hombe ka linanga;* a vanhu vontlhe lomu wugovelweni va no sangula ku rurumela.+ 17 Makunu Mosi i no humesa vanhu lomu wugovelweni kasi va ya tlhangana ni Nungungulu wa lisine. Va noya va ya yima wutshan’wini gabye lahasi ka citsunga. 18 A Citsunga ca Sinayi ci wo tuvika musi matlhelweni wontlhe, hakuva Jehovha i wa relele hehla ka cona hi ndzilo;+ a musi wa citsunga wu wa tuvikisa ku khwatsi i musi wa ndzhimbo* niku a citsunga contlhe ci wo tsekatseka nguvhu.+ 19 Laha a kuvhuma ka linanga* ku ngaya ku engeteleka, Mosi i no wulawula, a gezu ga Nungungulu wa lisine gi mu hlamula.

20 Hikwalaho, Jehovha i no relela ata madembeleni ya Citsunga ca Sinayi. Jehovha i no vitana Mosi le hehla ka citsunga, Mosi a kandziha.+ 21 Makunu Jehovha i no byela Mosi, aku: “Relela u ya tlharihisa vanhu lezvaku va nga zami ku tlula mimbhingano na va fela ku wona Jehovha, hakuva ku nga lova vanhu vo tala. 22 A vapristi lava va tshinelako mahlweni ka Jehovha va wa ti basise kasi Jehovha a nga va dayi.”+ 23 Mosi i no byela Jehovha, aku: “A vanhu va nga ta kandziha le hehla ka citsunga hakuva u sina u hi tlharihisile, uku: ‘Vekani a mimbhingano matlhelweni wontlhe ya citsunga, mu ci basisa.’”+ 24 Hambulezvo, Jehovha i te ngalo kakwe: “Famba, relela, andzhako ka lezvo u ta kandziha kambe na Aroni, kanilezvi u nga tsiki vapristi ni vanhu va tsemakanya a mimbhingano vata ka Jehovha kasi a nga va dayi.”+ 25 Hikwalaho, Mosi i no relela aya ka vanhu a ya va hlawutela a mahungu lawo.

20 Nungungulu i no wula timhaka leti tontlhe,+ aku:

2 “Hi mina Jehovha, a Nungungulu wa wena, loyi a ku humesileko tikweni ga Gibhite, a ndlwini ya wukhumbi.+ 3 U ngavi ni van’wani vanungungulu ahandle ka mina.*+

4 “U nga ti maheli cifananiso ci kehlilweko kutani nchumu wo fana ni cihi cilo ci nga le hehla matilweni, kutani lahasi misaveni, kutani lomu matini lahasi ka misava.+ 5 U nga zvi khizameli ne u nga vhumeli ku kucetelwa u zvi tirela,+ hakuva mina Jehovha, a Nungungulu wa wena, ndzi Nungungulu loyi a londzako ku khozelwa yece,+ loyi a nehako tsayiselelo wa cigoho ca vapapayi hehla ka vana vabye, kala ka cizukulwana ca wunharu ni ca wumune ca lava va ndzi vengako, 6 kanilezvi a kombisako lirandzo li nga mbheliko kala ka cizukulwana ca wu 1000 ca lava va ndzi randzako ni ku hlayisa a zvileletelo zva mina.+

7 “U nga hlakani hi vito ga Jehovha, a Nungungulu wa wena,+ hakuva Jehovha a nga ta tsika ku tsayisa loyi a hlakanako hi vito Gakwe.+

8 “Alakanya a siku ga sabhadho kasi u gi basisa.+ 9 U ta tira, u maha mitiro ya wena yontlhe hi 6 wa masiku,+ 10 kanilezvi a siku ga wu 7, i sabhadho ga Jehovha, a Nungungulu wa wena. U nga tiri nchumu, wena hambu mufana wa wena, ne nhanyana wa wena, ne khumbi ya wena ya cinuna, ne khumbi ya wena ya cisati, ne cifuyo ca wena, ne muluveli wa wena loyi a nga cikari ka madhoropa ya wena.*+ 11 Hakuva ka 6 wa masiku Jehovha i mahile matilo, ni misava, ni bimbi, ni zvontlhe zvi nga ka zvona, a gumesa a sangula ku humula hi siku ga wu 7.+ Hi cigelo leco, Jehovha i no katekisa a siku ga sabhadho a tlhela a gi basisa.

12 “Kombisa cichavo ka papayi wa wena ni ka mamani wa wena+ kasi u hanya a cikhati co leha tikweni legi Jehovha, a Nungungulu wa wena, a ku nyikako.+

13 “U nga dayi.+

14 “U nga mahi wubhayi.+

15 “U nga yivi.+

16 “U nga hembi a cikhati leci u kustumunyelako a munhu-kuloni.+

17 “U nga naveli yindlu ya munhu-kuloni. U nga naveli a sati wa wanuna-kuloni,+ ne khumbi yakwe ya cinuna ne ya cisati, ne dhuna gakwe ga homu, ne mbongola yakwe, hambu ni wihi nchumu wa munhu-kuloni.”+

18 Makunu a vanhu vontlhe va wa kari vazwa a kudzindza ni ku wona a kuhatima, ni kuzwa a kuvhuma ka linanga,* a citsunga na ci kari ci tuvika musi. Laha va nga wona lezvo, va no rurumela va yima hi le kule.+ 19 Hikwalaho, va no byela Mosi, vaku: “Wulawula wena na hina, hi ta ku ingisela, kanilezvi Nungungulu a nga wulawuli na hina, hakuva hi ngafa.”+ 20 Makunu Mosi i no byela vanhu, aku: “Mu nga chavi, hakuva Nungungulu wa lisine i tela ku ta mu ringa,+ mu fela ku simama ku mu chava kasi mu nga wonhi.”+ 21 Hikwalaho, a vanhu va no simama ku yima hi le kule, kanilezvi Mosi i no tshinela laha kusuhani ka refu ga ntima laha a Nungungulu wa lisine a nga hi kona.+

22 Makunu Jehovha i no byela Mosi, aku: “U ta byela vaIzrayeli, uku: ‘Mu zvi wonile hi n’wece lezvaku ndzi wulawulile na n’wina hi le tilweni.+ 23 Mu nga ti maheli a vanungungulu va prata kasi mu va khozela ahandle ka mina, ne mu nga ti maheli a vanungungulu va ouro.+ 24 U ta ndzi akela a alati ga misava, legi u to nyikela ka gona a minyikelo ya wena ya kuhiswa, ni miphahlo ya wena ya kuhlengela,* ni tiyivhu ta wena, ni tihomu ta wena. Ka ni gihi wutshamu legi ndzi to maha lezvaku a vito ga mina gi alakanyiwa,+ ndzi tata ka wena ndzi ta ku katekisa. 25 Loku u ndzi akela a alati ga maribye, u nga gi aki hi maribye ma tsemilweko hi feramenta,+ hakuva loku u tirisa chizelo hehla ka gona, u ta gi nyenyezisa. 26 U nga nomi laha alatini ga mina hi cikadha kasi a wumbyiri ga wena gi nga woneki laho.’

21 “A zviboho zva kulamula lezvi u to va byela hi lezvi:+

2 “Loku u xava a khumbi ya muHebheru,+ yi ta ku tirela a 6 wa malembe kanilezvi hi lembe ga wu 7 yi ta tlhatlheka na yi nga rihangi nchumu.+ 3 Loku yi tile yoce yi ta famba yoce. Loku yi tile ni sati, yi ta famba ni sati wa yona. 4 Loku a n’winyi wa yona a yi nyika sati, a sati loye a yi pswalela vafana ni vanhanyana, a sati loye ni vana va kona va ta lumba a n’winyi wa yona. Yona yi ta famba yoce.+ 5 Kanilezvi loku a khumbi leyo yi kurumeta yiku: ‘Ndza mu randza a n’winyi wa mina, ni sati wa mina, ni vana va mina, a ndzi zvi lavi a ku tlhatlhiwa’,+ 6 a n’winyi wa yona i ta yi neha mahlweni ka Nungungulu wa lisine. Hi kulandzela, i ta yi khigetela laha livatini kutani laha ka aro, a yi bhoxa ndleve hi litlhawo; yi tava khumbi yakwe wutomini gontlhe.

7 “Loku a wanuna wo kari a xavisa a nhanyana wakwe kota khumbi, a nhanyana loye a nga ta tlhatlhisiswa a ku fana ni lezvi a khumbi ya cinuna yi tlhatlhisiswako zvona. 8 Loku a n’winyi wakwe a nga xalali hi yena ni loku a nga mu mahi sati wakwe wa mutsongwani,* i wa mu tsike a tlhatlhiswa hi mun’wani munhu, kanilezvi a nga tava ni fanelo ya ku mu xavisa ka vamatiko, hakuva i mu kanganyisile. 9 Loku a mu nyikela ka mufana wakwe, i wa mu nyike tifanelo ta n’wana wa nhanyana. 10 Loku a teka mun’wani sati, a nga hunguli nchumu ka zvakuga, ni tinguwo, ni tifanelo ta wukati+ lezvi zvi faneleko a sati loyi wa hombe. 11 Loku a nga mu maheli lezvi zva zvinharu, i ta tlhatlheka a ti fambela na a nga hakhelangi mali.

12 “Ni wihi loyi a bako munhu laha ka kuza afa, i fanele ku dawa.+ 13 Kanilezvi loku a zvi maha hi kuphazama, a Nungungulu wa lisine a zvi tsika zvi humelela, ndzi ta ku yimisela wutshamu legi a to tsutsumela ka gona.+ 14 Loku a munhu a zangarela munhu-kulobye, a mu daya hi womu,+ yenawu i wa dawe hambu loku zvi lava ku u mu susa hi laha alatini ga mina.+ 15 Loyi a bako a papayi wakwe kutani mamani wakwe i wa dawe.+

16 “Loku a wokari a yiva munhu+ a mu xavisa kutani a kumiwa mandleni yakwe,+ i wa dawe.+

17 “Ni wihi loyi a rukatelako* a papayi wakwe kutani mamani wakwe i wa dawe.+

18 “Loku a vanhu vambiri va holova, a mun’we aba munghana hi ribye kutani hi cibhakela* a ngafi, kanilezvi a etlela sangweni, ku wa mahiwe lezvi: 19 Loku loyi a bilweko a zvi kota ku suka a yimayima le handle ka muti na a famba hi chetengelo, loyi a nga muba a nga ta tsayisiwa. I ta riha ntsena a cikhati leci loyi a bayisilweko a nga ci mbheta na a nga tiri kala a hanya a mbhelela.

20 “Loku a wanuna aba khumbi yakwe ya cinuna kutani ya cisati yi fela mandleni yakwe, a khumbi leyo yi fanele ku photelwa.+ 21 Hambulezvo, loku yi ngafi ndzeni ka siku kutani masiku mambiri, yi nga ta photelwa hakuva munhu a xavilweko hi mali ya n’winyi wakwe.

22 “Loku a vavanuna valwa va bayisa a wasati wa nyimba, a pswala na ma nga se chikela masiku*+ kanilezvi ku ngafi munhu,* loyi a mahileko mhango leyo i ta riha a ntsengo lowu wu to wuliwa hi nuna wa wasati loye. I ta riha a ntsengo lowo mahlweni ka valamuli.+ 23 Kanilezvi loku kufa munhu,* ku fanele ku hakhelwa wutomi hi wutomi,*+ 24 a tihlo hi tihlo, a tino hi tino, a canja hi canja, a nkondzo hi nkondzo,+ 25 a kuhisiwa hi kuhisiwa, a cilondza hi cilondza, a cibhakela hi cibhakela.

26 “Loku a munhu aba tihlo ga khumbi yakwe ya cinuna kutani ya cisati, gifa, i fanele ku yi tsika yi famba na yi tlhatlhekile kota ndlela ya ku riha tihlo ga yona.+ 27 Loku a tshova a tino ga khumbi yakwe ya cinuna kutani ya cisati, i ta yi tsika yi famba na yi tlhatlhekile kota ndlela ya ku riha tino ga yona.

28 “Loku a homu yi vhindla wanuna kutani wasati hi timhondzo afa,+ yi fanele ku gandliwa hi maribye kala yifa. A nyama ya kona yi nga giwi, hambulezvo a n’winyi wa homu a nga ta tsayisiwa. 29 Kanilezvi loku ku hi lezvaku a homu leyo yi wa tolovela ku vhindla, a n’winyi wa yona a tlharihisiwa kanilezvi a nga yi woneleli, yi daya wanuna kutani wasati, a homu leyo yi ta gandliwa hi maribye, niku a n’winyi wa yona yenawu i fanele ku dawa. 30 Loku a londziwa a hakhelo, i ta nyikela zvontlhe lezvi a to londziwa kota hakhelo ya kutlhatlhisa wutomi* gakwe. 31 Kani yi tlhavile mufana kutani nhanyana, ku ta tirisiwa a ciboho caleci ca cin’we ca kulamula ka n’winyi wa homu. 32 Loku a homu yi vhindla khumbi ya cinuna kutani ya cisati, a n’winyi wa homu i ta nyikela 30 wa maxekeli* ka n’winyi wa khumbi. A homu leyo yi ta gandliwa hi maribye kala yifa.

33 “Loku a munhu a tsika hlowo na yi nga vhaliwangi kutani a kela nkele a nga wu vhali ku gumesa ku wela a homu kutani mbongola, 34 a n’winyi wa nkele lowo i fanele ku riha.+ I wa hakhele a mali ka n’winyi wa cifuyo. Leci cofa ci tava cakwe. 35 Loku a homu ya munhu yi bayisa a homu ya mun’wani yifa, va fanele ku xavisa a homu leyi yo hanya va avelana a mali leyi va nga xavisa hi yona; va wa avelane kambe ni cifuyo leci cofa. 36 Loku ku hi ku a homu leyo yi wa tolovela ku vhindla, kanilezvi a n’winyi wa kona a nga yi woneleli, i fanele ku riha a homu hi homu. Leyi yofa yi tava yakwe.

22 “Loku a munhu a yiva dhuna ga homu kutani yivhu a daya kutani a xavisa, i ta hakhela a ntlhanu wa madhuna loku gi hi dhuna ga homu; loku yi hi yivhu i ta hakhela mune wa tona.+

2 (“Loku a khamba+ gi kumiwa na gi pandza yindlu, gi biwa gifa, loyi a nga gi daya a nga tava ni nandzu wa nkhata. 3 Kanilezvi loku zvi maheka a gambo na gi humele, i na ni nandzu wa nkhata.)

“A khamba lego gi fanele ku hakhela. Loku gi nga hi na nchumu gi wa xavisiwe kasi ku hakhela lezvi gi nga yiva. 4 Loku leci a nga yiva ci kumiwa canjeni gakwe na ca ha hanya, kani i homu, kutani mbongola, kutani yivhu, i wa hakhele na a wuyetile kumbiri.

5 “Loku a wokari a teka zvihari zvakwe a ya zvi gisela lomu masin’wini kutani lomu civhineni,* a zvi tsika zvi yaga lomu masin’wini ya mun’wani i ta hakhela hi lezvi zva zvinene nguvhu zva simu gakwe kutani hi lezvi zva zvinene nguvhu zva civhina cakwe.

6 “Loku ku lumekiwa ndzilo wu thapela makhuho ya mimizwa wu ya hisa tinyandza ta timbewu, kutani timbewu ti byalilweko, kutani simu gontlhe, loyi a lumekeleko a ndzilo lowo i fanele ku riha lezvi zvi ngaswa.

7 “Loku a munhu a mu khomisa mali a munhu-kulobye kutani zvilo kasi a zvi hlayisa zvi gumesa zvi yiviwa lomu ndlwini ya munhu loye, loku a khamba gi kumiwa gi fanele ku riha na zvi wuyetilwe kumbiri.+ 8 Loku a khamba gi nga kumeki, a n’winyi wa yindlu i ta yisiwa mahlweni ka Nungungulu wa lisine+ kasi ku tiveka lezvaku hi yena a nga teka a* tshomba ya munhu-kulobye ke. 9 Contlhe cikhati laha a munhu a to lumbetiwa kuva ni nchumu wo kala wu nga hi wakwe — kani i dhuna ga homu, kutani mbongola, kutani yivhu, kutani nguwo hambu ni cihi ci lahlekileko leci a munhu a nga banganako ni mun’wani hi cona, aku: ‘Leci ca mina!’ — hi wumbiri gabye va ta yisa a mhaka yabye mahlweni ka Nungungulu wa lisine.+ Loyi Nungungulu a to hi yena a nga ni nandzu, i ta riha munghana wakwe na a wuyetile kumbiri.+

10 “Loku a munhu a chatisa* mbongola, kutani dhuna ga homu, kutani yivhu, kutani ni cihi cifuyo ka munhu-kulobye ci gumesa cifa, kutani ci bayisiwa, kutani ci khomiwa na zvi nga woniwi hi munhu, 11 ku fanele kuva ni cihlambanyo cikari kabye mahlweni ka Jehovha ca lezvaku loyi a nga chatisiwa a nga tekangi a* tshomba ya munghana wakwe niku a n’winyi wa kona i fanele ku vhumela a kuhlambanya loko. Loyi mun’wani a nga ta riha.+ 12 Kanilezvi loku a cihari ci yivilwe mandleni yakwe, i ta riha ka n’winyi wa kona. 13 Loku ci no pfhemulwa hi civandza ca khwati i wate ni cihari leci ci pfhemulweko a ta kombisa. A nga ta riha a nchumu wu pfhemulweko hi civandza ca khwati.

14 “Loku a munhu wo kari a lomba cihari ca munhu-kulobye ci ya bayisiwa kutani ci mu fela na a nga hi kona a n’winyi wa cona, loyi a nga lomba a cihari leco i wa rihe. 15 Loku a n’winyi wa cona a hi kona, a nga ta riha. Loku ku hi lezvaku ci wa no lugariwa, a mali leyi ci nga lugariwa hi yona hi yona hakhelo.

16 “Makunu loku a wanuna a xengetela a nhwana* wo kala a nga se tsumbisiwa ku chadha a etlela naye, i fanele ku mu lowola ava sati wakwe.+ 17 Kanilezvi loku a papayi wakwe a ala ku mu nyikela kakwe, a wanuna loye i ta hakhela a mali yi ringanako ku lowola nhwana.*

18 “Mu nga tsiki wasati wa ku loya a hanya.+

19 “Ni wihi loyi a etlelako ni cihari i wa dawe.+

20 “Ni wihi a mahako miphahlo ka van’wani vanungungulu ahandle ka Jehovha, i fanele ku dawa.+

21 “U nga xanisi muluveli kutani ku mu mahela xapi,+ hakuva n’winawu mu wa hi valuveli tikweni ga Gibhite.+

22 “Mu nga xanisi a noni* kutani a n’wanana a nga hiko na papayi.*+ 23 Loku mu va xanisa, vona va rila ka mina, hakunene ndzi tazwa a kurila kabye;+ 24 a zanga ya mina yi ta vhura ndzi mu daya hi cipadha, a vasati va n’wina va maha tinoni, ni vanana va n’wina va sala va nga hi na vapapayi.

25 “Loku u pembisa mali ka ni cihi cisiwana* cikari ka vanhu va mina, a munhu loyi a hanyako na wena, u nga mahisi a ku khwatsi u mupembisi kakwe. U nga mu londzi majuro.+

26 “Loku u mu khomela a kumba munhu-kuloni kota citiyisekiso ca lezvi a ku dhevhako,+ mu tlhelisele kupeleni ka gambo, 27 hakuva a nga na wun’wani kumba, i nguwo yakwe yo fenengeta miri* wakwe. Makunu i ta etlela laha ka yini?+ Loku a rila ka mina, hakunene ndzi ta muzwa, hakuva ndza zwela wusiwana.+

28 “U nga rukateli Nungungulu+ ne u nga rukateli hosana* cikari ka vanhu va wena.+

29 “U nga kanakani ku nyikela a minyikelo ya pfuno wa wena ni ya lezvi zvi talako zvi halakela zvigowolweni* zva wena.+ U ta ndzi nyika a matewula ya vafana va wena.+ 30 Hi dhuna ga wena ga homu ni yivhu ya wena, u ta maha lezvi:+ Zvi ta tshama 7 wa masiku ni mamani wa zvona. Hi siku ga wu 8, u ta zvi nyikela ka mina.+

31 “Mu fanele kuva vanhu vo basa ka mina;+ mu ngagi nyama ya ni cihi cihari ci pfhemulweko lomu khwatini hi civandza ca khwati.+ Mu ta yi hoxela ka timbyana.

23 “U nga hangalasi* a mahungu ya mawunwa.+ U nga hlengeli ni wakubiha u maha kustumunyu wo lava ku bayisa mun’wani.+ 2 U nga landzeli citshungu kasi ku maha zvakubiha. Laha u kustumunyako a mhaka yo kari, u nga soholoti a nongameto hi ku fela ku seketela citshungu.* 3 U ngavi na cihlawulela timhakeni ti khumbako a cisiwana.+

4 “Loku u kuma a dhuna ga homu kutani mbongola ya nala wa wena na yi lahlekile, yi helekete ka n’winyi wa yona.+ 5 Loku u wona lezvaku a mbongola ya munhu a ku vengako yi wile ni ndzhwalo wa yona, u nga yi tsiki u famba. Mu vhune ku tlhatlhisa a cifuyo leco.+

6 “U nga soholoti a nongameto laha u xuxako a mhaka ya cisiwana ci hanyako cikari ka wena.+

7 “U nga ti ngheniseli kulumbeteni ne u nga dayi munhu a nga hiko na nandzu ni wa kululama, hakuva a munhu wa kubiha ndzi nga ta mu wula wo lulama.+

8 “U nga vhumeli kuxavelelwa, hakuva a kuxavelela ku vhala matihlo ya lava vo tlhariha niku ku nga soholota a magezu ya vanhu vo lulama.+

9 “U nga xanisi a muluveli. N’wina ma gi tiva a wutomi ga muluveli, hakuva n’winawu mu wa hi valuveli tikweni ga Gibhite.+

10 “U ta byala mbewu lomu tikweni ga wena u tlhela u hlengeleta a pfuno wa kona hi 6 wa malembe.+ 11 Kanilezvi hi lembe ga wu 7 u nga rimi. U ta tsika tiko gi etlela kasi a zvisiwana lezvi zvi nga cikari ka vanhu va wena zvi fela kuga mihandzu ya kona; lezvi zvi to siyiwa hi zvisiwana zvi ta giwa hi zvihari zva khwati. U ta maha zvezvo hi civhina* ca wena ni miolivha ya wena.

12 “U ta maha mitiro ya wena hi 6 wa masiku kanilezvi hi siku ga wu 7, u nga tiri nchumu kasi a dhuna ga wena ga homu ni mbongola ya wena zvi humula, ni mufana wa khumbi ya wena ya cisati ni muluveli vonawu va humula.+

13 “Chelani kota, mu maha zvontlhe lezvi ndzi mu byelileko.+ Mu nga kumbuki mavito ya van’wani vanungungulu; ma nga zwiwi minon’wini ya n’wina.+

14 “U ta ndzi mahela mubuzo makhati manharu hi lembe.+ 15 U ta maha a Mubuzo wa Tipawa to kala Comelo.+ U taga tipawa to kala comelo hi 7 wa masiku hi cikhati ci yimisilweko hi hweti ya Abhibhi,*+ kota lezvi ndzi ku leleteleko, hakuva kuve hi hweti leyo u nga huma tikweni ga Gibhite. I hava a faneleko kuta ka mina na a nga hi na nchumu.+ 16 A ku tsika lezvo, u ta maha Mubuzo wa Kutshovela* wa mihandzu yo sangula yo buvha ya ntiro wa wena ya lezvi u byalako lomu masin’wini,+ ni Mubuzo wa Kuhlengeleta* kumbheleni ka lembe, laha u to hlengeleta a mihandzu ya ntiro wa wena wa lomu masin’wini.+ 17 Makhati manharu hi lembe, a vavanuna vontlhe va ta ti wonekelisa mahlweni ka Jehovha, a Hosi ya lisine.+

18 “U nga nyikeli a nkhata wa muphahlo wa mina zvin’we ni zvilo zvi nga ni comelo. A miphahlo ya mafura leyi yi nyikelwako ka mibuzo ya mina yi nga tshami wusiku gontlhe kala ni mixo.

19 “U ta neha mihandzu yo sangula yo buvha ya tiko ga wena, leyi ya yinene nguvhu, ndlwini ya Jehovha, a Nungungulu wa wena.+

“U nga khoni cimbutana hi masi ya mamani wa cona.+

20 “Ndza rumela ngilozi mahlweni ka wena+ kasi yi ku wonelela lomu ndleleni ni ku ku nghenisa ka wutshamu legi ndzi longiseleko.+ 21 Chela kota hi yona, u ingisa gezu ga yona. U nga yi hluwukeli hakuva yi nga ta tsetselela a zvihambunyeto+ zva n’wina kota lezvi a vito ga mina gi nga ka yona. 22 Kanilezvi loku u ingisa a gezu ga yona hi kutsumbeka, u maha zvontlhe lezvi ndzi wulako, ndzi ta kombisa livengo ka valala va wena ndzi tlhela ndzi vhukela lava va ku vhukelako. 23 A ngilozi ya mina yi ta ranga mahlweni ka wena yi ku yisa ka vaAmori, ni vaHiti, ni vaPerezi, ni vaKhanani, ni vaHivhi, ni vaJebhusi, ndzi va lovisa.+ 24 U nga korami mahlweni ka vanungungulu vabye kutani ku vhumela ku kucetelwa u va tirela ne u nga pimanyisi a mitiro yabye.+ Kanilezvi u fanele ku khungumulela a vanungungulu vabye u tlhela u fayetela a mapilari yabye yo basa.*+ 25 Tirelani Jehovha, a Nungungulu wa n’wina,+ yena i ta katekisa a zvakuga zva n’wina ni mati ya n’wina.+ Ndzi ta susa mababyi cikari ka n’wina.+ 26 A vavasati va lomu tikweni ga wena va nga ta humelwa hi tinyimba kutani kuva tingon’wa.+ Ndzi ta ku maha u hanya malembe yo tala.*

27 “Ndzi ta rumela a kuchava mina mahlweni ka wena,+ niku ndzi ta maha lezvaku vontlhe vanhu lava mu to tlhangana navo va jujeka kupima, ndzi tlhela ndzi maha lezvaku a valala va n’wina vontlhe va hluliwa, va mu tsutsuma.*+ 28 Ndzi ta rumela a gome* mahlweni ka wena;+ ku ta hlongola a vaHivhi, ni vaKhanani, ni vaHiti mahlweni ka wena.+ 29 Ndzi nga ta tekela ku va hlongola mahlweni ka wena hi lembe gin’we kasi a tiko gi nga mahi ciwula, ku pswalelana zvihari zva khwati zvi ku vhukela.+ 30 Ndzi ta va hlongola hi kutsongwani-kutsongwani kala mu pswalelana mu fumela tiko.+

31 “Ndzi ta yimisa mbhingano wa wena kusukela Bimbini go Pswhuka kala bimbini ga vaFilistiya ni kusukela ciwuleni kala Congweni;*+ ndzi ta nyikela a vahanyi va tiko canjeni ga wena, u va hlongola mahlweni ka wena.+ 32 U nga mahi civhumelwano navo kutani ni vanungungulu vabye.+ 33 Va nga hanyi lomu tikweni ga wena, kasi va nga ku mahi u ndzi wonhela, hakuva u wa ta tirela a vanungungulu vabye niku lezvo zvi wa tava ntlhamu ka wena.”+

24 Andzhako ka lezvo, i no byela Mosi, aku: “Kandziha uya ka Jehovha, wena, na Aroni, na Nadhabhe, na Abhihu,+ ni 70 wa madhota ya ka Izrayeli, mu ya korama hi le kulana. 2 Mosi i fanele ku tshinela ka Jehovha na a hi yece; lava van’wani va nga tshineli niku a vanhu va ka Izrayeli va nga kandzihi zvin’we naye.”+

3 Makunu Mosi i noya a ya byela vanhu a magezu wontlhe ya Jehovha ni zvontlhe zviboho zva kulamula,+ ni vanhu vontlhe va no hlamula hi gezu gin’we, vaku: “A timhaka tontlhe leti Jehovha a ti wulileko hi ta ti maha.”+ 4 Hikwalaho, Mosi i no tsala a timhaka tontlhe ta Jehovha.+ I no vindzuka ni mixo a aka alati lahasi ka citsunga, a yimisa 12 wa mapilari hi kuya hi 12 wa tixaka ta ka Izrayeli. 5 Andzhako ka lezvo, i no ruma majaha ya vaIzrayeli ma nyikela minyikelo ya kuhiswa, ni madhuna ya tihomu kota miphahlo ya kuhlengela+ yi mahelwako Jehovha. 6 Mosi i no teka a khihlanya ga nkhata a chela lomu ka zvingelwana a gumesa a teka khihlanya legi gin’wani a n’watsekela a alati. 7 Makunu i no teka bhuku ga civhumelwano a lerela vanhu hi gezu go tlakuka.+ Vona vaku: “Zvontlhe lezvi Jehovha a zvi wulileko hi ta zvi maha hi tlhela hi ingisa.”+ 8 Hikwalaho, Mosi i no teka nkhata a n’watsekela vanhu,+ aku: “Lowu i nkhata wa civhumelwano leci Jehovha a ci mahileko na n’wina hi kuyelana ni wontlhe a magezu lawa.”+

9 Mosi, na Aroni, na Nadhabhe, na Abhihu va no kandziha ni 70 wa madhota ya ka Izrayeli; 10 va no wona a Nungungulu wa Izrayeli.+ Lahasi ka mikondzo yakwe ku wa hi ni co fana ni wutshamu go bambatelwa gi nga ni ribye ga safira, na gi hi ginene nguvhu a ku fana ni matilo ha woce.+ 11 A nga bayisangi a vavanuna vo chaviseka va ka Izrayeli;+ va no wona muwoniso wa Nungungulu wa lisine niku va noga ni kunwa.

12 Makunu Jehovha i no byela Mosi, aku: “Kandziha uta citsungeni u ta yima kona. Ndzi ta ku nyika timbila ta maribye ti nga ni zvileletelo lezvi ndzi to tsala kasi a vanhu va gondzisiwa.”+ 13 Hikwalaho, Mosi i no suka ni nandza gakwe Joxuwa;+ Mosi i no kandziha citsunga ca Nungungulu wa lisine.+ 14 Kanilezvi i no byela madhota, aku: “Hi nyimeleni kwalaha kala hi wuya.+ Mu ta sala na Aroni na Hura.+ Ni wihi a nga ni mhaka i wa byele vona.”+ 15 Mosi i no kandziha citsunga a refu na gi kari gi ci fenengeta.+

16 A kungangamela ka Jehovha+ ku no simama hehla ka Citsunga ca Sinayi,+ ni refu gi no ci fenengeta hi 6 wa masiku. Hi siku ga wu 7 i no vitana Mosi hi lomu cikari ka refu. 17 Ka vaIzrayeli lava va nga zvi wona, a kungangamela ka Jehovha ku wa wonekisa ku khwatsi i ndzilo wu vavamelako le hehla ka citsunga. 18 Mosi i no nghena lomu refini a kandziha citsunga.+ Mosi i no tshama citsungeni a 40 wa masiku ni 40 wa wusiku.+

25 Makunu Jehovha i no byela Mosi, aku: 2 “Byela a vaIzrayeli lezvaku va tisa minyikelo ka mina; mu ta amukela a minyikelo ya mina hi ka vontlhe vanhu lava a timbilu tabye ti va kucako.+ 3 A minyikelo leyi mu to yi amukela hi kabye hi leyi: Ouro,+ ni prata,+ ni kobre,+ 4 ni tihindza ta azuli, ni woya go pswhuka, ni tihindza to pswhuka, ni wukene* ga ginene, ni woya ga mbuti, 5 ni mabhebhe ya tiyivhu ta vamatsune ma pendilweko ma pswhuka, ni mabhebhe ya macalo,* ni mapulango ya akasia,+ 6 ni mafura ya tikandiya,+ ni bhalsamu kasi ku maha hi yona mafura ya ku tota,+ ni libani lo nuhela,+ 7 ni maribye ya onikisi, ni man’wani maribye ya ku nameketela laha ka efodhe+ ni laha ka phaketi ga laha cifuveni.*+ 8 Va wa ndzi mahele wutshamu go basa ndzi fela ku tshama cikari kabye.+ 9 Mu ta maha a tabhernakeli ni zvontlhe zvibya zva gona na mu landzela khwatsi a planta leyi ndzi to mu komba.+

10 “Va fanele ku maha a arke* hi mapulango ya akasia; gi tava ni mikono* yimbiri ni khihlanya a kuleha, ni nkono wun’we ni khihlanya a kuanama, ni nkono wun’we ni khihlanya a kutlakuka.+ 11 Andzhako ka lezvo, u ta gi nameketela a ouro ya yinene.+ Gi nameketele ndzeni ni handle, u tlhela u maha makhara* ya ouro kontlhe lomu mareveni ya gona.+ 12 U ta gi mahela mune wa masindza hi ouro yi nyekisilweko u ma vekela hehla ka minenge ya gona ya mune. A mambiri ma tava ka tlhelo gin’we, ni mambiri ka tlhelo legi gin’wani. 13 U ta maha mipingu hi sinya ya akasia u yi nameketela ouro.+ 14 U ta tlhoma a mipingu lomu ka masindza lawa ma nga lomu matlhelweni ya Arke kasi ku gi pinga hi yona. 15 A mipingu yi ta tshama lomu ka masindza ya Arke, yi nga humesiwi.+ 16 Lomu ka Arke u ta veka a Kustumunyu leyi ndzi to ku nyika.+

17 “U ta maha tapa hi ouro ya yinene. Yi tava ya mikono yimbiri ni khihlanya a kuleha, ni nkono wun’we ni khihlanya a kuanama.+ 18 U ta maha makerubhima mambiri hi ouro. U ta ma betha hi ouro mava ka magumo mambiri ya tapa.+ 19 Maha makerubhima lomu magumo mambiri ya tapa: A kerubhima gin’we seno, ni gin’wani seniya. 20 A makerubhima ma wa tshambulute a tipapa ta wona ta timbiri tiya hehla, ma fenengeta a tapa hi tipapa ta wona,+ a gin’we na gi hi phambeni ka gin’wani. A tinghohe ta makerubhima ti wa cuwuke laha ka tapa. 21 U ta tlhateka a tapa+ laha ka Arke. Lomu ka Arke u ta veka a Kustumunyu leyi ndzi to ku nyika. 22 Ndzi ta ti wonekelisa ka wena, ndzi wulawula na wena hi laha hehla ka tapa.+ Hi laha cikari ka makerubhima mambiri lawa ma nga le hehla ka Arke ga Wukustumunyu, ndzi ta ku tivisa zvileletelo zvontlhe lezvi ndzi to ku ruma lezvaku u byela vaIzrayeli.

23 “U ta maha ni meza+ hi mapulango ya akasia, ya mikono yimbiri a kuleha ni nkono wun’we a kuanama, ni nkono wun’we ni khihlanya a kutlakuka.+ 24 U ta yi nameketela ouro ya yinene u tlhela u maha makhara* ya ouro kontlhe lomu mareveni ya yona. 25 U ta vekela pulango ga kuanama ku ringana canja* gi rendzelekela a matlhelo ya meza, u maha makhara* ya ouro lomu mareveni ya gona. 26 U ta yi mahela mune wa masindza hi ouro u ma vekela ka mune wa makhona ya meza lomu a mune wa minenge yi nga khweleketwa kona. 27 A masindza ma fanele kuva kusuhani ni pulango kasi ku tlhoma ka wona a mipingu ya ku tlakula hi yona a meza. 28 U ta maha mipingu hi sinya ya akasia u yi nameketela ouro kasi u tlakula hi yona a meza.

29 “U ta maha ni tiparato, ni tikopo ta kona, ni tijaro ta kona ni zvingelwana lezvi va to chulula hi zvona a minyikelo ya zvakunwa. U ta zvi maha hi ouro ya yinene.+ 30 U ta veka a tipawa ta munyikelo laha mezeni mahlweni ka mina contlhe cikhati.+

31 “U ta maha a nenge wa tikandiya+ hi ouro ya yinene. A nenge wa tikandiya wu fanele kuya hi ku bethiwa. A tshako ga kona, ni simbi ya kona ya laha cikari, ni madhavi ya kona, ni tikopo ta kona, ni tibutawu ta kona, ni zvitsangi zva kona zvi wave nchumu wun’we.+ 32 Hi laha ka simbi ya laha cikari ya nenge wa tikandiya, ku ta huma a 6 wa madhavi: A manharu ka tlhelo gin’we, ni manharu ka tlhelo legi gin’wani. 33 A dhavi ni dhavi ka tlhelo gin’we gi tava ni tikopo tinharu to fana ni citsangi ca mendwa ti cicanako cikari ka zvitsangi ni tibutawu niku a dhavi ni dhavi ka tlhelo legi gin’wani gi tava ni tikopo tinharu to fana ni citsangi ca mendwa ti cicanako cikari ka zvitsangi ni tibutawu. Ma ta tshamisa lezvo a 6 wa madhavi lawa ma sukelako laha ka simbi ya laha cikari ya nenge wa tikandiya. 34 Laha ka simbi ya laha cikari ya nenge wa tikandiya ku tava ni mune wa tikopo to fana ni citsangi ca mendwa ti cicanako cikari ka zvitsangi ni tibutawu. 35 Hi lahasi ka madhavi mambiri yo sangula lawa ma sukelako laha ka simbi ya laha cikari ku tava ni butawu; a butawu yin’wani yi tava lahasi ka madhavi mambiri lawa ma landzelako, ni yin’wani butawu yiva lahasi ka madhavi mambiri yo gumesa. Zvi ta tshamisa lezvo ka 6 wa madhavi lawa ma sukelako laha ka simbi ya laha cikari. 36 A tibutawu, ni madhavi, ni nenge wontlhe wa tikandiya zvi ta bethiwa hi ouro ya yinene, zviva nchumu wun’we.+ 37 U ta wu mahela a 7 wa tikandiya. Laha a tikandiya ti to lumekiwa, ti ta woningela a wutshamu gontlhe ga le mahlweni ka wona.+ 38 A zvitimo* zva kona ni zvibya zva kona zva ku woka hi zvona ndzilo zvi fanele kuva zva ouro ya yinene.+ 39 A nenge wa tikandiya ni zvibya lezvi zvi fanele ku mahiwa hi talenta* yin’we ya ouro ya yinene. 40 Chela kota u maha hi ku landza mufananiso lowu u nga kombiwa le citsungeni.+

26 “Maha a tabhernakeli+ hi 10 wa tinguwo ta tenda ta wukene* ga ginene gi lukilweko, ni tihindza ta azuli, ni woya go pswhuka, ni tihindza to pswhuka. Ti mahe na ti bhordharilwe makerubhima.+ 2 A nguwo yin’we ni yin’wani yi tava ni 28 wa mikono* a kuleha ni mune wa mikono a kuanama. Tontlhe a tinguwo ta tenda ti tava ni lipimo lin’we.+ 3 A ntlhanu wa tinguwo ti fanele ku rungiwa ti lungelelana, leti tin’wani ta ntlhanu tonawu ti ta rungiwa ti lungelelana. 4 U ta maha zvibhandana hi tihindza ta azuli le magumo ka nguwo yo gumesa ka leti to lungelelana u tlhela u maha zvalezvo kambe le magumo ka nguwo yo gumesa ka leti tin’wani to lungelelana hi laha a tinguwo leto ti to tlhangana kona. 5 U ta maha 50 wa zvibhandana ka nguwo yin’we, ni 50 wa zvibhandana ka nguwo leyi yin’wani kasi a zvibhandana lezvo zvi cuwukana laha a tinguwo leto ti to tlhangana kona. 6 U ta maha a 50 wa zvihariketo zva ouro, u tlhavinyeta hi zvona a tinguwo leto to lungelelana; a tabhernakeli gi tava nchumu wun’we.+

7 “U ta maha kambe ni tinguwo hi woya ga mbuti+ kasi ti maha tenda hehla ka tabhernakeli. U ta maha 11 wa tinguwo ta tenda.+ 8 A nguwo yin’we ni yin’wani yi tava ni 30 wa mikono a kuleha ni mune wa mikono a kuanama. Tontlhe a tinguwo leti ta 11 ti tava ta lipimo lin’we. 9 U ta lungelela a ntlhanu wa tinguwo ti maha yin’we, u lungelela kambe leti tin’wani ta 6 ti maha yin’we, u gumesa u petsa a nguwo leyi ya wu 6 laha phambeni ka tenda. 10 U ta maha a 50 wa zvibhandana le magumo ka nguwo yo gumesa ya leti to lungelelana, ni 50 wa zvibhandana le magumo ka nguwo leyi yi nga le magumo ka leti tin’wani to lungelelana, hi laha a tinguwo leto ti to tlhangana kona. 11 U ta maha 50 wa zvihariketo zva kobre u gumesa u nghenisa a zvibhandana ka zvihariketo lezvo kasi ku tlhavinyeta tenda gi maha nchumu wun’we. 12 Ku tava ni tinguwo ta tenda ti to sala ti cikila laha ka tenda. A khihlanya ga nguwo leyi yi to sala yi ta cikila hi le ndzhako ka tabhernakeli. 13 A nkono lowu wu to sala hi tlhelo ga seno ni wa tlhelo ga seniya wa kuleha ka tinguwo ta tabhernakeli wu ta cikila lomu matlhelweni ya gona kasi ku gi fenengeta.

14 “U ta maha ni cifenengeto ca tenda hi mabhebhe ya tiyivhu ta vamatsune ma pendilweko ma pswhuka, u gumesa u tlhateka a cifenengeto ca mabhebhe ya macalo* hi le hehla.+

15 “U ta maha a makwadru*+ ya tabhernakeli hi mapulango ya akasia ma yima ma ku pswhe.+ 16 A kwadru gin’we ni gin’wani gi tava ni 10 wa mikono a kutlakuka ni nkono wun’we ni khihlanya a kuanama. 17 Ka kwadru gin’we ni gin’wani, ku tava ni matorno mambiri ma khomeneko. Hi zvalezvo u to ma mahisa zvona a makwadru wontlhe ya tabhernakeli. 18 U ta maha a 20 wa makwadru ya tlhelo ga dzonga* ga tabhernakeli ma cuwuka dzongeni.

19 “U ta maha a 40 wa zvikhato zva prata+ u zvi veka lahasi ka makwadru lawa ya 20: zvikhato zvimbiri lahasi ka kwadru gin’we kasi ku nghena a matorno ya gona ya mambiri ni zvikhato zvimbiri lahasi ka kwadru gin’we ni gin’wani ka lawa ma to landzela kasi ku nghena matorno ya kona ya mambiri.+ 20 Maha a 20 wa makwadru ya tlhelo legi gin’wani ga tabhernakeli, gi nga tlhelo ga n’walungu,* 21 ni zvikhato zva kona zva prata zva 40: zvikhato zvimbiri lahasi ka kwadru gin’we, ni zvikhato zvimbiri lahasi ka kwadru gin’we ni gin’wani ka lawa ma to landzela. 22 U ta maha 6 wa makwadru ya cipandze ca le ndzhako ca tabhernakeli hi tlhelo ga mupela-gambo.+ 23 U ta maha makwadru mambiri kasi mava maziki* ya makhona mambiri ya le ndzhako ka tabhernakeli. 24 A makwadru lawa ma fanele kuva ni zvipandze zvimbiri zva mapulango kusukela lahasi kala le hehla laha ma to tlhangana kona ka sindza go sangula. Lezvo zvi ta mahiwa ka makwadru hi wumbiri ga wona; wona ma tava maziki* mambiri ya lomu makhoneni. 25 Ku tava ni 8 wa makwadru ni zvikhato zva kona zva prata zva 16: zvikhato zvimbiri lahasi ka kwadru gin’we, ni zvikhato zvimbiri lahasi ka kwadru gin’we ni gin’wani ka lawa ma to landzela.

26 “U ta maha tivalelo hi sinya ya akasia: ntlhanu wa tivalelo ta makwadru ya tlhelo gin’we ga tabhernakeli,+ 27 ni ntlhanu wa tivalelo ta makwadru ya tlhelo legi gin’wani ga tabhernakeli, ni ntlhanu wa tivalelo ta makwadru ya tlhelo ga mupela-gambo ga tabhernakeli, ci nga cipandze ca le ndzhako ka gona. 28 A livalelo leli li tshamako hi laha cikari na cikari ka makwadru li fanele kusukela magumo kala magumo.

29 “U ta nameketela ouro ka makwadru,+ u maha a masindza ya kona hi ouro kasi ku tlhomeka a tivalelo. U ta nameketela ouro ka tivalelo. 30 U ta maha a tabhernakeli na u landzela a planta leyi u nga kombiwa le citsungeni.+

31 “U ta maha kortina+ hi tihindza ta azuli, ni woya go pswhuka, ni tihindza to pswhuka ni tinguwo ta wukene* ga ginene gi lukilweko. Gi ta mahiwa na gi bhordharilwe a makerubhima. 32 U ta gi hayeka ka mune wa timhandze ta akasia ti nameketilweko ouro. A tihuka ta kona ti tava ta ouro. A timhandze ti ta yimiswa hehla ka mune wa zvikhato zva prata. 33 U ta hayeka a kortina lahasi ka zvihariketo, u neha Arke ga Wukustumunyu+ lomu ndzeni, le ndzhako ka kortina. A kortina gi ta mu hambanisela a Wutshamu go Basa+ ni Wutshamu go Basabasa.+ 34 U ta tlhateka a tapa laha ka Arke ga Wukustumunyu lomu Wutshan’wini go Basabasa.

35 “U ta veka meza le handle ka kortina u tlhela u veka a nenge wa tikandiya+ hi tlhelo ga le dzongeni ga tabhernakeli wu cuwukana ni meza; a meza u ta yi veka hi le n’walungu. 36 A nyangwa ya tenda u ta yi mahela a kortina gi lukilweko hi tihindza ta azuli, ni woya go pswhuka, ni tihindza to pswhuka ni wukene* ga ginene gi lukilweko.+ 37 U ta maha ntlhanu wa timhandze hi akasia kasi tiva ta kortina, u ti nameketa a ouro. A tihuka ta kona ti fanele kuva ta ouro u tlhela u maha ntlhanu wa zvikhato zva timhandze hi kobre yi nyekisilweko.

27 “U ta maha alati hi mapulango ya akasia.+ Gi tava ni ntlhanu wa mikono* a kuleha ni ntlhanu wa mikono a kuanama. A alati gi tava ni mune wa matlhelo yo ringana. A kutlakuka ka gona ku tava mikono yinharu.+ 2 U ta maha timhondzo+ lomu ka mune wa makhona ya gona; a timhondzo leto ti tava cipandze ca alati niku u ta nameketa a kobre ka alati.+ 3 U ta maha mabhaketi ya ku wola hi wona khuma,* ni mafoxola, ni mingelo, ni magarfo ni zvibya zva ku woka hi zvona ndzilo; zvontlhe a zvibya zva gona u ta zvi maha hi kobre.+ 4 U ta maha a citlhata ca alati — ci nga citlhata ca kobre — u vekela a mune wa masindza ya kobre lomu ka makhona ya cona ya mune. 5 U ta ci vekela lahasi ka pulango legi gi rendzelekeleko a nomu wa alati, ci tshama laha cikari na cikari ka alati. 6 U ta maha mipingu ya alati hi sinya ya akasia u yi nameketela a kobre. 7 A mipingu leyo yi ta tlhomekiwa hi lomu ka masindza kasi yi tshama hi lomu matlhelweni loku a alati gi rwaliwa.+ 8 Maha a alati gi ku khwatsi i bhokisa go vhuleka ga mapulango. Gi fanele ku mahiswa zvalezvi Yena a nga ku kombisa zvona le citsungeni.+

9 “U ta maha a tsendzele*+ wa tabhernakeli. Tlhelweni ga le dzongeni* ga tsendzele, gi cuwukeneko ni dzonga, ku ta hayekiwa a kortina ga wukene* ga ginene gi lukilweko ga 100 wa mikono a kuleha hi tlhelo lego.+ 10 Ku tava ni 20 wa timhandze ni 20 wa zvikhato zva kobre. A tihuka ta timhandze ni masindza ya kona zvi tava zva prata. 11 A makortina lawa ma to hayekelwa tlhelweni ga n’walungu* wonawu ma tava ni 100 wa mikono a kuleha. Ku tava ni timhandze ta kona ta 20, ni zvikhato zva kona zva kobre zva 20 zvin’we ni tihuka ni masindza ya prata ya timhandze. 12 A makortina lawa ma to hayekelwa tlhelweni ga mupela-gambo ga tsendzele ma tava ni 50 wa mikono a kuleha, zvin’we ni 10 wa timhandze ni 10 wa zvikhato. 13 A kuanama ka tsendzele hi le tlhelweni ga mutsuwuka-gambo, gi cuwukeneko ni mutsuwuka-gambo, ku tava 50 wa mikono. 14 Ka tlhelo gin’we ga tsendzele ku ta hayekelwa a makortina ma nga ni 15 wa mikono, ni timhandze tinharu, ni zvikhato zvinharu.+ 15 Ka tlhelo legi gin’wani konawu ku ta hayekelwa makortina ma nga ni 15 wa mikono, ni timhandze tinharu, ni zvikhato zvinharu.

16 “Laha nyangweni ya tsendzele ku tava ni kortina ga 20 wa mikono a kuleha gi mahilweko hi tihindza ta azuli, ni woya go pswhuka, ni tihindza to pswhuka, ni wukene ga ginene gi lukilweko gi rungiwa,+ ni mune wa timhandze, ni zvikhato zva kona zva mune.+ 17 A timhandze tontlhe ti randzeleko a tsendzele ti tava ni zvihariketo zva prata ni tihuka ta prata, kanilezvi a zvikhato zva kona zvi tava zva kobre.+ 18 A tsendzele wu tava ni 100 wa mikono a kuleha,+ ni 50 wa mikono a kuanama, ni 5 wa mikono a kutlakuka. Wu ta mahiwa hi wukene ga ginene go lukiwa. Wu tava ni zvikhato zva kobre. 19 Zvontlhe a zvibya lezvi zvi tirisiwako ntirweni wa tabhernakeli, zvin’we ni zvikhongwani zva tenda, ni zvontlhe zvikhongwani zva tsendzele zvi tava zva kobre.+

20 “U ta leletela a vaIzrayeli lezvaku va ku tisela mafura ya manene ya olivha ya ku wona hi wona kasi a tikandiya ti tshama na ti vhura contlhe cikhati.+ 21 Lomu tendeni ga mutlhangano, hi le handle ka kortina legi gi nga laha kusuhani ni Kustumunyu,+ Aroni ni vana vakwe va ta maha ntiro wa ku wonelela kasi a tikandiya ti tshama na ti vhura mahlweni ka Jehovha,+ kusukela ni gambo kala ni mixo. Leci cileletelo ca kala kupindzuka ci to landzelwa hi vaIzrayeli zvizukulwaneni zvabye zvontlhe.+

28 “Cikari ka vaIzrayeli u ta vitana a makabye wa wena Aroni, zvin’we ni vana vakwe, kasi a ndzi tirela kota mupristi+ — Aroni+ zvin’we na Nadhabhe, na Abhihu,+ na Eleyazari, na Itamare,+ a vana va Aroni.+ 2 U ta mu mahela tinguwo to basa Aroni, a makabye wa wena, kasi tiva cikombiso ca wudzundzo ni ca kusaseka.+ 3 U ta wulawula ni vontlhe va nga ni wutlhari,* lava ndzi va tatileko hi moya wa wutlhari,+ kasi va mu mahela tinguwo Aroni ta kubasiswa kakwe a fela ku ndzi tirela kota mupristi.

4 “A tinguwo leti va to maha hi leti: Phaketi ga laha cifuveni,*+ ni efodhe,+ ni nghanju yo kala mawoko,+ ni nguwo yo leha ya xadreji, ni turbhanti,*+ ni bhandi;+ va ta mu mahela tinguwo leti to basa a makabye wa wena Aroni ni vana vakwe kasi yena a ndzi tirela kota mupristi. 5 A vatiri va nga ni wutlhari va ta tirisa a ouro, ni tihindza ta azuli, ni woya go pswhuka, ni tihindza to pswhuka, ni wukene* ga ginene.

6 “Va ta maha a efodhe hi ouro, ni tihindza ta azuli, ni woya go pswhuka, ni tihindza to pswhuka, ni wukene* ga ginene gi lukilweko, niku yi fanele ku bhordhariwa.+ 7 Yi tava ni zvipandze zvimbiri zva tinguwo zva lomu makatleni zvi tlhanganisiwako hi lomu tichokeni ta zvona ta timbiri ta le hehla. 8 A libhandi li lukilweko,+ leli li tshamako laha ka efodhe kasi ku yi boha yi tiya wutshan’wini ga yona, lonawu li fanele ku mahiwa hi zvilo zvalezvi zva zvin’we: ouro, ni tihindza ta azuli, ni woya go pswhuka, ni tihindza to pswhuka, ni wukene* ga ginene gi lukilweko.

9 “U ta teka a maribye mambiri ya onikisi,+ u kehla ka wona a mavito ya vana va Izrayeli,+ 10 a 6 wa mavito ka ribye gin’we ni 6 wa mavito lawa man’wani ka legi gin’wani hi ku landza a xaxameto wa kupswaliwa kabye. 11 A mukehli wa maribye i ta kehla a mavito ya vana va Izrayeli laha ka maribye mambiri a ku khwatsi hi lezvi a kehlisako zvona a cifungo.+ Andzhako ka lezvo, u ta vekelisa a zvimanyiso zva ouro lomu mareveni ya wona. 12 U ta vekela maribye lawo ya mambiri ka zvipandze zva efodhe zva lomu makatleni kota maribye ya cialakanyiso ka vana va Izrayeli.+ Aroni i ta rwala a mavito yabye mahlweni ka Jehovha ka zvipandze zvimbiri zva nguwo makatleni yakwe, kota cialakanyiso. 13 U ta maha zvimanyiso zva ouro 14 ni zvichinana zvimbiri zva ouro ya yinene zvi lukilweko a ku fana ni lingoti+ u gumesa u hariketa a zvichinana lezvo ka zvimanyiso lezvo zva zvimbiri.+

15 “Ruma munhu a nga ni wutlhari ga ku bhordhara tinguwo kasi a maha a phaketi ga laha cifuveni*+ ga kulamula. Gi fanele ku mahiwa gi fana ni efodhe, gi mahiwa hi ouro, ni tihindza ta azuli, ni tihindza to pswhuka, ni wukene* ga ginene gi lukilweko.+ 16 Gi fanele kuva kwadradho loku gi petsilwe, palmo gin’we* a kuleha ni palmo gin’we a kuanama. 17 Laha ka gona, u ta folisa a mune wa tilinya ta maribye. A linya yo sangula yi tava ya rubhi, ni topazi, ni esmeraldha. 18 A linya ya wumbiri yi tava ya turkeza, ni safira, ni jasperi. 19 A linya ya wunharu yi tava ya ribye ga léshem,* ni agata, ni ametista. 20 A linya ya wumune yi tava ya krizolite, ni onikisi, ni jadhe; ma ta tiyisiwa hi zvimanyiso zva ouro. 21 A maribye lawo ma ta ringana a mavito ya 12 wa vana va Izrayeli. A ribye gin’we ni gin’wani gi ta kehliwa a ku fana ni cifungo, a vito gin’we ni gin’wani na gi yimela a lixaka lin’we ka leti ta 12.

22 “U ta maha zvichinana zvi lukilweko zva phaketi ga laha cifuveni, zvo fana ni tingoti ta ouro ya yinene.+ 23 U ta maha masindza mambiri ya ouro ya phaketi ga laha cifuveni, u ma manya lomu tichokeni ta phaketi ga laha cifuveni. 24 U ta nghenisa a tingoti leto ta timbiri ta ouro hi lomu ka masindza mambiri, u manya a maanilia mambiri lomu tichokeni timbiri ta phaketi ga laha cifuveni. 25 U ta nghenisa a tingoti leto ta timbiri hi lomu ka zvimanyiso zvimbiri u ya ti boha hi le phambeni ka zvipandze zvimbiri zva efodhe zva lomu makatleni. 26 U ta maha masindza mambiri ya ouro u ma vekela lomu tichokeni timbiri ta phaketi ga laha cifuveni hi lomu ndzeni, hi tlhelo legi gi cuwukeneko ni efodhe.+ 27 U ta maha masindza man’wani ya mambiri hi ouro u ma veka le mahlweni ka efodhe hi lahasi ka zvipandze zvimbiri zva lomu makatleni kusuhani ni laha zvi tlhanganako kona, hi le hehla ka libhandi li lukilweko la efodhe.+ 28 Ku ta bohelelwa a lingoti la azuli lomu ka masindza ya gona li ya boha lomu ka masindza ya efodhe kasi a phaketi ga laha cifuveni gi tshama wutshan’wini ga gona. Lezvo zvi ta maha ku a phaketi ga laha cifuveni giva wutshan’wini ga gona laha ka efodhe, hi le hehla ka libhandi li lukilweko.

29 “Aroni i fanele ku boha a mavito ya vana va Izrayeli laha ka phaketi ga laha cifuveni ga kulamula hehla ka mbilu yakwe a cikhati leci a nghenako lomu wutshan’wini go Basa, kota cialakanyiso ca pindzukelwa mahlweni ka Jehovha. 30 U ta chela a Urima ni Tumima*+ lomu ka phaketi ga laha cifuveni ga kulamula; zvi fanele kuva hehla ka mbilu ya Aroni a cikhati leci a nghenako mahlweni ka Jehovha. Contlhe cikhati Aroni i ta rwala a zvilo lezvi zva kulamula hi zvona cifuveni cakwe mahlweni ka Jehovha kasi ku lamula vaIzrayeli.

31 “U ta maha a nghanju yo kala mawoko ya efodhe hi tihindza ta azuli basi.+ 32 Ku tava ni bhoxo laha hehla ka yona* hi laha cikari na cikari. A bhoxo lego gontlhe gi ta bhordhariwa hi muluki. Gi ta fana ni legi ga cikatawu ca simbi kasi gi nga handzuki. 33 U ta maha a maromã hi tihindza ta azuli, ni woya go pswhuka, ni tihindza to pswhuka ma rendzelekela le hasi ka nguwo yontlhe zvin’we ni vanyangende* va ouro va cicanako cikari ka wona. 34 U ta vekela nyangende wa ouro, ku landzela a romã, ku gamela nyangende wa ouro, ku landzela a romã kambe, zvi rendzelekela lomu mbhirini yontlhe ya le hasi ka nghanju yo kala mawoko. 35 Yi ta bohiwa hi Aroni kasi a tira. A kuvhuma ka zvona ku fanele ku zwala a cikhati leci a nghenako lomu wutshan’wini go basa mahlweni ka Jehovha ni loku a huma kasi a ngafi.+

36 “U ta maha a cixapana co phatima ca ouro ya yinene, u kehla ka cona a ku fana ni loku a munhu a kehla cifungo, uku: ‘A kubasa ku lumba Jehovha.’+ 37 U ta ci bohelela laha ka turbhanti*+ hi lingoti la azuli; ci fanele ku tshama laha phambeni ka turbhanti. 38 Ci ta tshama laha cikandzeni ca Aroni niku Aroni hi yena a to hlamula loku a munhu wo kari a hambunyeta nayo wa zvilo zvo basa+ lezvi a vaIzrayeli va zvi basisako a cikhati leci va zvi nyikelako kota zvinyikiwo zvo basa. Contlhe cikhati ci fanele kuva cikandzeni cakwe kasi a vanhu va amukeleka mahlweni ka Jehovha.

39 “U ta runga a nguwo yo leha ya xadreji hi wukene* ga ginene, u maha ni turbhanti* hi wukene ga ginene, u maha ni bhandi.+

40 “U ta maha ni tinguwo to leha, ni mabhandi, ni zva ku fenengeta tihloko ta vana va Aroni+ kota cikombiso ca wudzundzo ni ca kusaseka.+ 41 U ta bohisa a makabye wa wena Aroni zvin’we ni vana vakwe, u va tota,+ u va yimisa,*+ ni ku va basisa; vona va ta ndzi tirela kota vapristi. 42 Ahandle ka lezvo, va mahele zvimolowani* zva wukene* kasi va fihla a wumbyiri gabye.+ A zvimolowani lezvo zvi fanele ku sukela laha ciwunwini kala lomu ka mathanga. 43 Zvi ta bohiwa hi Aroni ni vana vakwe a cikhati leci va nghenako lomu tendeni ga mutlhangano kutani loku va tshinela laha alatini kasi ku tira laha wutshan’wini go basa lezvaku va nga kumi nandzu vafa. Leci cileletelo ca kala kupindzuka ka yena ni ka pswalo* wakwe andzhako kakwe.

29 “Maha lezvi kasi u va basisa lezvaku va ndzi tirela kota vapristi: Teka a cidhunana ca homu, ni tiyivhu timbiri ta vamatsune ta tinene,+ 2 ni tipawa ti nga hiko na comelo, ni tipawa to khwatsi tiphera ti nga hiko na comelo, ti mahilweko hi mapa ma vhuvilweko ni mafura, ni tipawa ta zviphamana to kala comelo ti totilweko mafura.+ U ta zvi maha hi mapa ya trigo ma sililweko khwatsi 3 u zvi chela lomu ka cindzala,* u zvi nyikela na zvi hi kwalomo ka cindzala.+ U ta zvi nyikela zvin’we ni dhuna ga homu ni tiyivhu timbiri ta vamatsune.

4 “U ta yisa Aroni ni vana vakwe laha nyangweni ya tenda ga mutlhangano+ u va hlambisa hi mati.+ 5 U ta teka tinguwo,+ u mu bohisa nguwo yo leha Aroni, ni nghanju yo kala mawoko ya efodhe, ni efodhe, ni phaketi ga laha cifuveni, u mu boha libhandi li lukilweko la efodhe li tiya ciwunwini cakwe.+ 6 U ta mu bohisa turbhanti* hlokweni yakwe, u vekela a cikombiso co basa* ca ku ti nyikela laha ka turbhanti,+ 7 u teka a mafura ya ku tota+ u ma chulula hlokweni yakwe, u mu tota.+

8 “Hi kulandzela, u ta tshineta a vana vakwe u ta va bohisa a tinguwo to leha+ 9 u tlhela u va boha mabhandi, u bohisa Aroni ni vana vakwe u gumesa u va bohisa zva ku fenengeta tihloko tabye. A wupristi gi ta maha gabye kota cileletelo ca kala kupindzuka.+ Hi zvalezvi u to mu yimisisa zvona Aroni ni vana vakwe kasi va tira kota vapristi.*+

10 “Andzhako ka lezvo, u ta neha a dhuna ga homu mahlweni ka tenda ga mutlhangano; Aroni ni vana vakwe va ta tlhateka mandla yabye hlokweni ya gona.+ 11 Daya dhuna lego ga homu laha nyangweni ya tenda ga mutlhangano mahlweni ka Jehovha.+ 12 Teka nkhata wo kari wa dhuna lego hi litiho la wena u tota timhondzo ta alati+ u gumesa u chulula a nkhata wontlhe lowu wu salako laha tshakweni ga alati.+ 13 Andzhako ka lezvo, teka a mafura wontlhe+ lawa ma fenengetako a marumbu, ni mafura ya laha ka civindzi, ni tiswa timbiri zvin’we ni mafura lawa ma nga ka tona, u zvi hisa kasi zvi tuvika laha alatini.+ 14 Kanilezvi a nyama ya dhuna ga homu, ni bhebhe ga kona, ni swanyi wa kona, u ta zvi hisa hi ndzilo le handle ka wugovelo. Lowu munyikelo wa ciwonho.

15 “Ka tiyivhu leti ta timbiri ta vamatsune u ta teka yin’we; Aroni ni vana vakwe va ta tlhateka mandla yabye laha hlokweni ya yona.+ 16 Daya a yivhu leyo ya matsune, u teka a nkhata wa kona u n’watsekela matlhelweni wontlhe ya alati.+ 17 Tsemelela yivhu leyo ya matsune, u hlazva a marumbu ya kona+ ni masondzo ya kona u gumesa u veketela a zvipandze lezvi zvi phaphulelweko, a cin’we civa tlhelweni ga cin’wani, zvin’we ni hloko ya kona. 18 U ta hisa a yivhu yontlhe ya matsune, yiswa laha alatini. Lowu munyikelo wa kuhiswa wa masema yo nuhela+ wu mahelwako Jehovha; munyikelo wu hisiwako hi ndzilo wu mahelwako Jehovha.

19 “Hi kulandzela, u ta teka a yivhu leyi yin’wani ya matsune; Aroni ni vana vakwe va ta tlhateka mandla yabye laha hlokweni ya yona.+ 20 Andzhako ka lezvo, daya a yivhu leyo ya matsune u teka nkhata wo kari u tota a ndleve ya Aroni ya cinene hi lahasi ka yona, ni tindleve ta cinene ta vana vakwe hi laha hasi ka tona, ni tikhudzu ta mandla yabye ya cinene, ni tikhudzu ta mikondzo yabye ya cinene, u tlhela u n’watsekela nkhata matlhelweni wontlhe ya alati. 21 Andzhako ka lezvo, teka nkhata wo kari ka lowu wu nga laha alatini ni mafura yo kari ya ku tota,+ u n’watsekela Aroni ni tinguwo takwe, ni vana vakwe ni tinguwo tabye kasi yena ni tinguwo takwe, ni vana vakwe ni tinguwo tabye va fela ku basa.+

22 “Laha ka yivhu ya matsune teka a mafura, ni mudhoza* wa yona wo kuluka, ni mafura wontlhe lawa ma fenengetako a marumbu, ni mafura ya laha ka civindzi, ni tiswa timbiri zvin’we ni mafura lawa ma nga ka tona,+ ni nenge wa cinene, hakuva i yivhu ya ku yimisa hi yona.+ 23 Lomu ka cindzala* ca tipawa to kala comelo leci ci nga mahlweni ka Jehovha, teka ni pawa ya redhonda, ni pawa ya mafura yo kala comelo yo khwatsi i phera, ni pawa ya ciphamana. 24 Teka zvontlhe u zvi tlhateka mandleni ya Aroni ni mandleni ya vana vakwe u zvi yisa phambeni ni ndzhako kota munyikelo wa kundziwilitelwa mahlweni ka Jehovha. 25 Hi kulandzela, zvi teke mandleni yabye u zvi hisa laha alatini hi le hehla ka munyikelo wa kuhiswa kota masema yo nuhela ma tsakisako Jehovha. Lowu munyikelo wu hisiwako hi ndzilo wu mahelwako Jehovha.

26 “Teka cifuva ca yivhu ya kuyimisa hi yona,+ leci ci nyikelwako hi kota ya Aroni, u ci yisa phambeni ni ndzhako kota munyikelo wa kundziwilitelwa mahlweni ka Jehovha, leco ci tava ciavelo ca wena. 27 Ka yivhu yi nyikelweko kasi ku yimisa+ Aroni ni vana vakwe, basisa a cifuva ca munyikelo wa kundziwilitelwa ni nenge wa cipandze co basa lowu wu ndziwilitelweko. 28 A zvipandze lezvi zvi tava zva Aroni ni vana vakwe kota cileletelo ca kala kupindzuka ci faneleko ku landzelwa hi vaIzrayeli, hakuva cipandze co basa niku ci tava cipandze ci to nyikelwa hi vaIzrayeli.+ Leci cipandze cabye co basa ca miphahlo yabye ya kuhlengela leyi va nyikelako ka Jehovha.+

29 “A tinguwo to basa+ leti ti lumbako Aroni ti ta bohiwa hi vana vakwe+ andzhako kakwe laha va to totiwa ni ku yimiswa kota vapristi. 30 A n’wana wakwe loyi a to mu landzela a maha mupristi, loyi a to nghena lomu tendeni ga mutlhangano kasi ku tira lomu wutshan’wini go basa, i ta boha a tinguwo leto a 7 wa masiku.+

31 “U ta bhika a nyama ya yivhu ya ku yimisa hi yona lomu wutshan’wini go basa.+ 32 Aroni ni vana vakwe va taga+ a nyama ya yivhu ya matsune laha nyangweni ya tenda ga mutlhangano, ni tipawa leti ti nga lomu ka cindzala.* 33 Va fanele kuga a zvilo lezvi wu mahilweko hi zvona a muphahlo wa ku kombela ku tsetselelwa zviwonho kasi va yimisiwa kota vapristi* ni ku basiswa. Kanilezvi a ku na munhu a nga vhumelelwiko* a toga, hakuva zvilo zvo basa.+ 34 Ni yihi nyama yi to sala ya muphahlo wa kuyimiswa ni tipawa leti ti to sala kala ni mixo, zvi fanele ku hisiwa hi ndzilo.+ Zvi nga giwi, hakuva zvilo zvi basileko.

35 “Lezvi hi lezvi u faneleko ku maha ka Aroni ni vana vakwe hi kuya hi zvontlhe lezvi ndzi ku leleteleko. U ta mbheta 7 wa masiku na u va yimisa kota vapristi.*+ 36 Siku ni siku, u ta maha muphahlo wa ku kombela ku tsetselelwa zviwonho hi ku nyikela a dhuna ga homu kota munyikelo wa ciwonho. Hi ndlela leyo, u ta basisa a alati ka ciwonho. A ku tsika lezvo, chulula a mafura laha alatini kasi u gi basisa.+ 37 U ta mbheta 7 wa masiku na u mahela a alati a muphahlo wa ku kombela ku tsetselelwa zviwonho niku u fanele ku gi basisa kasi giva alati go basabasa.+ Ni wihi loyi a henyako alati i fanele ku ngha a basile.

38 “Lezvi u to nyikela laha alatini contlhe cikhati hi lezvi: Tiyivhana timbiri ta vamatsune ta lembe gin’we, siku ni siku.+ 39 Ni mixo u ta nyikela a yivhana yin’we ya matsune, leyi yin’wani u nyikela na gi ku pswite.*+ 40 A yivhana yo sangula ya matsune yi nyikele ni cipandze ca wukhume ca efa* ya mapa ma sililweko khwatsi ma vhuvilweko ni cipandze ca wumune ca hini* ya mafura ya manene, ni munyikelo wa zvakunwa zvo ringana a cipandze ca wumune ca hini ya vhinyo. 41 A yivhana ya wumbiri ya matsune u ta yi nyikela na gi ku pswite* zvin’we ni minyikelo ya tindzhoho ni ya zvakunwa yo fana ni leyi ya ni mixo. U ta zvi nyikela kota masema yo nuhela, wu nga munyikelo wu hisiwako hi ndzilo wu mahelwako Jehovha. 42 Wu tava munyikelo wa kuhiswa wu mahiwako hi kukhandzakanya zvizukulwaneni zva n’wina zvontlhe laha nyangweni ya tenda ga mutlhangano mahlweni ka Jehovha, laha ndzi to ti wonekelisa kona ka n’wina ndzi wulawula na n’wina na ndzi hi laho.+

43 “Ndzi ta ti wonekelisa laho mahlweni ka vaIzrayeli, ni wutshamu lego gi ta basiswa hi kungangamela ka mina.+ 44 Ndzi ta basisa a tenda ga mutlhangano ni alati ndzi tlhela ndzi basisa Aroni ni vana vakwe+ kasi va ndzi tirela kota vapristi. 45 Ndzi ta tshama cikari ka vanhu va ka Izrayeli niku ndzi tava Nungungulu wabye.+ 46 Hakunene va ta zvi tiva lezvaku hi mina Jehovha, a Nungungulu wabye, loyi a va humesileko tikweni ga Gibhite kasi ndzi tshama cikari kabye.+ Hi mina Jehovha, a Nungungulu wabye.

30 “U ta maha alati kasi giva wutshamu go hisela kona libani;+ u ta gi maha hi mapulango ya akasia.+ 2 Gi fanele kuva ni mune wa matlhelo yo ringana: A nkono* wun’we a kuleha, ni nkono wun’we a kuanama ni mikono yimbiri a kutlakuka. A timhondzo ta gona ti tava laha ka gona, zviva nchumu wun’we.+ 3 U ta gi nameketela a ouro ya yinene: Le hehla ka gona, ni matlhelweni ya gona wontlhe, ni timhondzo ta gona. U ta maha makhara* ma gi rendzelekela. 4 U ta gi mahela ni masindza mambiri ya ouro hi lahasi ka makhara* ka tlhelo ga seno ni masindza mambiri ka tlhelo ga seniya kasi ku tlhomeka ka wona a mipingu ya ku gi tlakula hi yona. 5 Maha mipingu hi sinya ya akasia u yi nameketela a ouro. 6 U ta veka alati mahlweni ka kortina legi gi nga kusuhani ni Arke ga Wukustumunyu,+ phambeni ka tapa leyi yi nga hehla ka Kustumunyu, laha ndzi to ti wonekelisa kona ka wena.+

7 “Aroni+ i ta hisa a libani lo nuhela+ hehla ka gona,+ a li maha li tuvika mixo ni mixo laha alatini a cikhati leci a longiselako a tikandiya.+ 8 A ku tsika lezvo, laha Aroni a lumekako tikandiya na gi ku pswite,* i ta hisa a libani. Lowu munyikelo wo khandzakanya wa libani mahlweni ka Jehovha zvizukulwaneni zva n’wina zvontlhe. 9 Mu nga tshuki mu nyikela laho a libani+ la lin’wani lixaka, kutani munyikelo wa kuhiswa, kutani munyikelo wa tindzhoho, ne mu nga chululi a munyikelo wa zvakunwa laha ka gona. 10 Aroni i ta maha muphahlo wa ku kombela ku tsetselelwa zviwonho laha ka timhondzo ta gona, khati gin’we hi lembe.+ I ta teka a nkhata wo kari wa munyikelo wa ciwonho wa muphahlo wa ku kombela ku tsetselelwa zviwonho+ a maha hi wona a muphahlo wa ku kombela ku tsetselelwa zviwonho, a mahela alati, khati gin’we hi lembe, zvizukulwaneni zva n’wina zvontlhe. A alati gi basile nguvhu ka Jehovha.”

11 Jehovha i no engeta a byela Mosi, aku: 12 “Ni ka cihi cikhati u mahako citsalela ni ku hlaya a vanana va ka Izrayeli,+ a mun’we ni mun’wani wabye i fanele ku nyikela hakhelo ya kutlhatlhisa a wutomi* gakwe mahlweni ka Jehovha hi cikhati ca citsalela. Lezvo zvi mahela ku va nga welwi hi khombo laha va tsalelwako. 13 Makunu vontlhe lava va tsalelwako va ta nyikela lezvi: Khihlanya ga xekeli* hi kuya hi xekeli ga wutshamu go basa.*+ A xekeli gin’we i 20 wa magera.* A khihlanya ga xekeli munyikelo wu mahelwako Jehovha.+ 14 Vontlhe lava va to tsalelwa na va hi ni 20 wa malembe ni ku hundza va ta nyikela a munyikelo lowo ka Jehovha.+ 15 Loyi wo ganya a nga faneli ku humesa zvo hundza khihlanya ga xekeli* ne hambu a cisiwana ci nga humesi zvo kala ku chikela a khihlanya ga xekeli kota munyikelo wu mahelwako Jehovha kasi ku mahiwa muphahlo wa ku tlhatlhisa wutomi ga n’wina. 16 U ta teka mali ya prata ya muphahlo wa ku kombela ku tsetselelwa zviwonho ka vaIzrayeli u yi nyikela kasi yi tira ntirweni wa tenda ga mutlhangano yi fela kuva cialakanyiso ka Izrayeli mahlweni ka Jehovha lezvaku mu maha muphahlo wa ku tlhatlhisa wutomi ga n’wina.”

17 Jehovha i no engeta a byela Mosi, aku: 18 “Maha basiya ya kobre kasi ku hlambela ka yona+ u tlhela u maha cikhatelo ca yona ca kobre. U ta yi veka cikari ka tenda ga mutlhangano ni alati, u chela mati ka yona.+ 19 Aroni ni vana vakwe va ta hlamba mandla yabye ni mikondzo yabye lomo.+ 20 A cikhati leci va nghenako lomu tendeni ga mutlhangano kutani loku va tshinela laha alatini kasi ku tira ni ku nyikela minyikelo yi hisiwako hi ndzilo yi mahelwako Jehovha, va ta hlamba hi mati kasi va ngafi. 21 Va fanele ku hlamba mandla yabye ni mikondzo yabye kasi va ngafi. Leci ci tava cileletelo ca kala kupindzuka kabye, ku nga ka yena ni ka pswalo wakwe, zvizukulwaneni zvabye zvontlhe.”+

22 Jehovha i no engeta a byela Mosi, aku: 23 “Hi kulandzela, teka zvilo lezvi zva zvinene zvo nuhela: 500 wa maxekeli ya mira yo tiya, ni khihlanya ga ntsengo lowo, ku nga 250 wa maxekeli ya kanela* yo tsombela, ni 250 wa maxekeli ya kalamu, 24 ni 500 wa maxekeli ya kasiya, zvi pimilweko hi xekeli ga wutshamu go basa,*+ zvin’we ni hini* ya mafura ya olivha. 25 Hi zvilo lezvo, maha a mafura yo basa ya ku tota hi wona. Zvi fanele ku jutiwa hi wutlhari.*+ Ma tava mafura yo basa ya ku tota hi wona.

26 “U ta tota a tenda ga mutlhangano+ ni Arke ga Wukustumunyu hi mafura lawo, 27 a ku patsa ni meza ni zvontlhe zvibya zva yona, ni nenge wa tikandiya ni zvibya zva wona, ni alati ga libani, 28 ni alati ga munyikelo wa kuhiswa ni zvontlhe zvibya zva gona, ni basiya ni cikhatelo ca kona. 29 U ta zvi basisa kasi zviva zvo basabasa.+ Ni wihi loyi a zvi henyako i fanele ku ngha a basile.+ 30 U ta tota Aroni+ ni vana vakwe,+ u va basisa kasi va ndzi tirela kota vapristi.+

31 “U ta byela vaIzrayeli, uku: ‘Lawa ma ta simama mava mafura yo tota zvizukulwaneni zva n’wina.+ 32 Ma nga toliwi lomu mirini ne mu nga mahi mafura man’wani yo fana nawo. I nchumu wo basa niku ma ta simama kuva nchumu wo basa ka n’wina. 33 Ni wihi loyi a mahako mafura yo fana nawo ni loyi a totako yo kari ka munhu a nga vhumelelwiko* i ta tsemiwa* cikari ka vanhu vakwe.’”+

34 Jehovha i no engeta a byela Mosi, aku: “Teka tipimo to fana ta zvilo lezvi zvo nuhela:+ Hlakati ya stakte, ni onixa, ni galbhano yo nuhela, ni hlakati ya yinene yo nuhela. 35 Hi zvilo lezvo, maha libani;+ a zvilo lezvi u mahako hi zvona libani zvi fanele ku jutiwa hi wutlhari.* A libani li ta cheliwa munyu,+ liva linene li tlhela liva lo basa. 36 U ta sila lokari li maha mapa ya manene, u chela mapa yo kari mahlweni ka Kustumunyu lomu tendeni ga mutlhangano laha ndzi to ti wonekelisa kona ka wena. A libani leli li fanele kuva lo basabasa ka n’wina. 37 A libani leli u mahako hi zvilo lezvi u nga li mahi kasi u li tirisa wena.+ Li wone kota nchumu wo basa mahlweni ka Jehovha. 38 Ni wihi loyi a mahako libani lo fana ni leli kasi kuzwa masema ya lona yo nuhela, i fanele ku tsemiwa* cikari ka vanhu vakwe.”

31 Jehovha i no engeta a byela Mosi, aku: 2 “Ndzi hlawulile* Bhezaleli,+ a n’wana wa Uri, a n’wana wa Hura, wa lixaka la ka Judha.+ 3 Ndzi ta mu tata hi moya wa Nungungulu, ndzi mu nyika wutlhari, ni kuzwisisa, ni wutivi ga ku maha mitiro ya tixaka tontlhe ta wumeseri, 4 kasi ku tsamba mitiro, ni ku tira hi ouro, ni prata, ni kobre, 5 ni ku tsema ni ku veketela a maribye,+ ni ku maha tixaka tontlhe ta zvilo zva mapulango.+ 6 A ku tsika lezvo, ndzi yimisile Oholiyabha,+ a n’wana wa Ahisamaka, wa lixaka la ka Dhani, kasi a mu vhuna. Ndzi ta chela wutlhari timbilwini ta vontlhe lava va nga vameseri* kasi va maha zvontlhe lezvi ndzi ku leleteleko,+ ku nga lezvi: 7 Tenda ga mutlhangano,+ ni Arke ga Wukustumunyu+ ni tapa+ leyi yi nga hehla ka gona, ni zvontlhe zvibya zva tenda, 8 ni meza+ ni zvibya zva yona, ni nenge wa tikandiya wo mahiwa hi ouro ni zvontlhe zvibya zva wona,+ ni alati ga libani,+ 9 ni alati ga munyikelo wa kuhiswa+ ni zvontlhe a zvibya zva gona, ni basiya ni cikhatelo ca kona,+ 10 ni tinguwo ti rungilweko khwatsi, ni tinguwo to basa ta mupristi Aroni, ni tinguwo ta vana vakwe kasi va tira kota vapristi,+ 11 ni mafura ya ku tota hi wona, ni libani lo nuhela kasi li tirisiwa wutshan’wini go basa.+ Va ta maha zvontlhe lezvi ndzi ku leleteleko.”

12 Jehovha i no engeta a byela Mosi, aku: 13 “Byela a vaIzrayeli, uku: ‘A ca lisima ka zvontlhe, hlayisani a masabhadho ya mina,+ hakuva leco cikombiso cikari ka mina na n’wina zvizukulwaneni zva n’wina kasi mu fela ku tiva lezvaku mina Jehovha, hi mina ndzi mu basisako. 14 Hlayisani sabhadho, hakuva i nchumu wo basa ka n’wina.+ Ni wihi a gi chakisako i fanele ku dawa. Loku a wokari a maha ni wihi ntiro hi siku lego, a munhu* loye i fanele ku tsemiwa* cikari ka vanhu vakwe.+ 15 U ta maha mitiro ya wena hi 6 wa masiku, kanilezvi a siku ga wu 7, i sabhadho ga kuhumula ko mbhelela.+ I nchumu wo basa ka Jehovha. Ni wihi loyi a to tira hi sabhadho i fanele ku dawa. 16 A vaIzrayeli va fanele ku hlayisa sabhadho; va wa alakanye sabhadho zvizukulwaneni zvabye zvontlhe. Leci civhumelwano ca kala kupindzuka; 17 cikombiso ca pindzukelwa cikari ka mina ni vanhu va ka Izrayeli,+ hakuva Jehovha i mahile matilo ni misava hi 6 wa masiku, kanilezvi hi siku ga wu 7, i no humula a ti tangalisa.’”+

18 Makunu zvalezvi a nga mbheta ku wulawula naye le Citsungeni ca Sinayi, i no nyika Mosi a timbila timbiri ta maribye ta Wukustumunyu+ ku nga tsalilwe zvokari ka tona hi litiho la Nungungulu.+

32 Laha a vanhu va nga wona lezvaku Mosi wa hlwela ku wuya hi le citsungeni,+ va no hlengeletana ka Aroni, vaku kakwe: “Suka u hi mahela a nungungulu loyi a to hi rangela+ hakuva a hi zvi tivi ku zvini zvi humeleleko inaloyi Mosi, a wanuna loyi a hi humesileko tikweni ga Gibhite.” 2 Hikwalaho, Aroni i te ngalo kabye: “Tlhatlhani a tiphera* ta ouro+ ti nga tindleveni ta vasati va n’wina, ni ta vafana va n’wina, ni ta vanhanyana va n’wina muta nato ka mina.” 3 Makunu a vanhu vontlhe va no tlhatlha tiphera* ta ouro leti ti nga hi tindleveni tabye va famba nato ka Aroni. 4 Andzhako ka lezvo, i no teka ouro leyi va nga mu nehele a maha cifananiso* ca cihon’wana hi feramenta ya ku kehla hi yona.+ A vanhu vaku: “O Izrayeli, loyi hi yena Nungungulu wa wena, loyi a ku humesileko tikweni ga Gibhite.”+

5 Laha Aroni a nga wona lezvo, i no aka alati mahlweni ka gona. Andzhako ka lezvo, i no tivisa hi gezu ga hombe, aku: “A mandziko ku tava ni mubuzo wu mahelwako Jehovha.” 6 Hikwalaho, ka siku gi nga landzela, va no vhuka ni mixo va nyikela a minyikelo ya kuhiswa ni miphahlo ya kuhlengela. Andzhako ka lezvo, a vanhu va no tshama hasi vaga ni kunwa, va gumesa va suka va hlakana.+

7 Makunu Jehovha i no byela Mosi, aku: “Famba, relela, hakuva a vanhu va wena lava u va humesileko tikweni ga Gibhite va ti bihisile.+ 8 Va hatlisile ku hambuka ndleleni leyi ndzi va leleteleko ku famba hi yona.+ Va ti mahele cifananiso* ca cihon’wana, niku va simama ku ci khizamela ni ku ci mahela miphahlo, na vaku: ‘O Izrayeli, loyi hi yena Nungungulu wa wena, loyi a ku humesileko tikweni ga Gibhite.’” 9 Jehovha i no engeta a byela Mosi, aku: “Ndza zvi wona ku a vanhu lava vanhu va tinhamu to nonoha.+ 10 Makunu ndzi tsike ndzi va hihirita va ku bhi zangeni ya mina yi vhurako; ndzi ta ku maha tiko ga hombe wutshan’wini gabye.”+

11 Makunu Mosi i no khongotela Jehovha, a Nungungulu wakwe,+ aku: “O Jehovha, hikuyini u tsikako a zanga ya wena yi vhurako yi vhukela a vanhu va wena lava u va humesileko tikweni ga Gibhite hi ntamu wa hombe ni canja ga ntamu ke?+ 12 Hikuyini a vaGibhite va nga wa taku: ‘Ehe, i wa hi ni makungo yo biha a cikhati leci a nga va humesa. I wa fela ku va daya le zvitsungeni ni ku va hihirita laha misaveni’ ke?+ Tlhelisa a zanga ya wena yi vhurako, u hlolisisa* ciboho ca wena ca ku neha khombo ka vanhu va wena. 13 Alakanya a malandza ya wena, Abrahama, na Isaka, na Izrayeli, lava u hlambanyileko kabye hi wutsumbu ga wena, uku: ‘Ndzi ta andzisa a pswalo* wa n’wina wu fana ni tinyeleti ta matilo+ niku gontlhe a tiko legi ndzi mu kombileko ndzi ta gi nyikela ka pswalo* wa n’wina wu fela ku gi teka kota tshomba ya wona ya kala kupindzuka.’”+

14 Hikwalaho, Jehovha i no hlolisisa* ciboho cakwe, a nga ha nehi khombo legi a nga wulile ku i ta nehela a vanhu vakwe.+

15 Mosi i no hundzuluka, a relela hi le citsungeni na a welele timbila timbiri ta maribye ta Wukustumunyu+ canjeni gakwe.+ A timbila leto ta maribye ti wa tsalilwe seno ni seno; ti wa tsalilwe phambeni ni ndzhako. 16 A timbila leto ta maribye ti wa mahilwe hi Nungungulu niku lezvi zvi nga tsalilwe ka tona zvi wa kehlilwe hi Nungungulu.+ 17 Laha Joxuwa a nga sangula kuzwa a guwa ga vanhu hi kota ya lezvi va nga kari va banguleka, i no byela Mosi, aku: “Ku zwala guwa ga yimpi lomu wugovelweni.” 18 Kanilezvi Mosi i te:

19 Zvalezvi Mosi a nga tshinela kusuhani ni wugovelo a wona role+ ni vanhu na va kina, a zanga yakwe yi no sangula ku vhura, a hoxa timbila ta maribye ti nga hi mandleni yakwe, a ti faya lahasi ka citsunga.+ 20 I no teka role legi va nga gi mahile a gi hisa hi ndzilo a tlhela a gi sila gi maha mapa;+ i no teka mapa lawo a ma xwanya lomu matini a gumesa a nwisa a vaIzrayeli.+ 21 Hi kulandzela, Mosi i no wutisa Aroni, aku: “Kasi va no ku wonhela yini a vanhu lava a kuza u va nehela a ciwonho co kulisa lezvi ke?” 22 Aroni i no hlamula, aku: “U nga zangari, hosi yanga. Wena wa zvi tiva khwatsi lezvaku a vanhu lava va byekelele ka zvakubiha.+ 23 Hikwalaho, va te ngalo ka mina: ‘Hi mahele a nungungulu loyi a to hi rangela hakuva a hi zvi tivi ku zvini zvi humeleleko inaloyi Mosi, a wanuna loyi a hi humesileko tikweni ga Gibhite.’+ 24 Hikwalaho, ndzi no va byela, ndziku: ‘Ni wihi loyi a nga ni nchumu wa ouro, i wa tlhatlhe a ndzi nyika.’ Andzhako ka lezvo, ndzi no zvi hoxela laha ndzilweni, ku se huma a role legi.”

25 Mosi i no wona lezvaku a vanhu va wa nga lawuleki hakuva Aroni i wa va tsikile va nga ha lawuleki. Lezvo zvi va mahile vava manyala mahlweni ka valala vabye. 26 Makunu Mosi i no yima laha nyangweni ya wugovelo, aku: “Himani a nga tlhelweni ga Jehovha? I wate ka mina!”+ A vaLevhi vontlhe va no hlengeletana va mu randzela. 27 Mosi aku kabye: “Jehovha, a Nungungulu wa Izrayeli, i te ngalo: ‘A mun’we ni mun’wani i wa hlome a cipadha cakwe a famba kontlhe lomu wugovelweni, a hundza hi ka nyangwa yin’we ni yin’wani, a daya makabye wakwe, ni muakelani wakwe, ni munghana wakwe.’”+ 28 A vaLevhi va no maha lezvi zvi wulilweko hi Mosi. Hikwalaho, ka siku lego, ku no dawa a cipimo ca 3000 wa vanhu. 29 Makunu Mosi i te ngalo: “Nyamutlha ti hambaniseni ni lava van’wani* kasi mu tirela Jehovha, hakuva a mun’we ni mun’wani wa n’wina i vhukele a mufana wakwe ni makabye wakwe;+ nyamutlha yena i ta mu nyika cikatekiso.”+

30 Ka siku gi nga landzela, Mosi i no byela vanhu, aku: “Mu mahile ciwonho ca hombe, makunu ndzi ta kandziha citsungeni ndzi ya khongotela Jehovha. Kuzvilava i ta mu tsetselela ciwonho ca n’wina.”+ 31 Hikwalaho, Mosi i no tlhela ka Jehovha, a yaku: “A vanhu lava va mahile ciwonho ca kulela ga cima! Va ti mahele a nungungulu wa ouro.+ 32 Makunu loku u zvi lava, va tsetselele a ciwonho cabye;+ loku zvi nga hi lezvo, ndzi vhinye lomu bhukwini ga wena legi u gi tsalileko.”+ 33 Kanilezvi Jehovha i te ngalo ka Mosi: “Ni wihi loyi a ndzi wonhelako hi yena ndzi to mu vhinya lomu bhukwini ga mina. 34 Makunu famba u ya rangela vanhu vaya ka wutshamu legi ndzi ku byelileko. A ngilozi ya mina yi ta famba mahlweni ka wena+ niku ka siku legi ndzi to va lamula, ndzi ta va nehela tsayiselelo hi kota ya ciwonho cabye.” 35 Jehovha i no neha khombo ka vanhu hi kota ya lezvi va nga mahile role — a role legi gi nga mahiwa hi Aroni.

33 Jehovha i no engeta a byela Mosi, aku: “Suka u famba ni vanhu lava u va humesileko tikweni ga Gibhite, uya tikweni legi ndzi hlambanyileko ka Abrahama, ni ka Isaka, ni ka Jakobe, ndziku: ‘Ndzi ta gi nyikela ka pswalo* wa n’wina.’+ 2 Ndzi ta rumela ngilozi mahlweni ka n’wina+ niku ndzi ta hlongola a vaKhanani, ni vaAmori, ni vaHiti, ni vaPerezi, ni vaHivhi, ni vaJebhusi.+ 3 Kandziha uya tikweni gi khulungako a masi ni wulombe.+ Kanilezvi mina ndzi nga ta famba cikari ka n’wina, hakuva mu vanhu va tinhamu to nonoha,+ ndzi nga tshuka ndzi mu hihirita mu ku bhi lomu ndleleni.”+

4 A cikhati leci a vanhu va ngazwa a magezu lawo yo chavisa, va no rila. I hava ni mun’we wabye a nga boha a zvilo zvakwe zvo ti sasekisa hi zvona. 5 Jehovha i te ngalo ka Mosi: “Byela a vaIzrayeli, uku: ‘N’wina mu vanhu va tinhamu to nonoha.+ Na ndzi nghenile cikari ka n’wina ndzi mu hihirita mu ku bhi hi citshuketi.+ Hikwalaho, nghanani mu veka a zvilo zva n’wina zvo ti sasekisa hi zvona na ndza ha alakanyela lezvi ndzi lavako ku maha hi n’wina.’” 6 Hi cigelo leco, kusukela le Citsungeni ca Horebhe, a vaIzrayeli a va ha bohangi* a zvilo zvabye zvo ti sasekisa hi zvona.

7 Makunu Mosi i no simula a tenda gakwe a ya gi gwimba le handle ka wugovelo, gi tsawukana ni wugovelo, a gi chula ku i tenda ga mutlhangano. Vontlhe lava va nga wutisa zvokari ka Jehovha,+ va wa huma vaya tendeni ga mutlhangano legi gi nga hi le handle ga wugovelo. 8 Laha Mosi a ngaya tendeni, vontlhe vanhu va wa suka va yima lomu tinyangweni ta matenda yabye va landzelela Mosi hi matihlo kala a ya nghena lomu tendeni. 9 Neti Mosi a nghena lomu tendeni, ku wa relela a mhinga ya refu+ yi ta yima laha nyangweni ya tenda, Nungungulu na a kari a wulawula na Mosi.+ 10 Laha a vanhu vontlhe va nga kari va wona a mhinga ya refu na yi yimile laha nyangweni ya tenda, a mun’we ni mun’wani wabye i wa korama na a hi nyangweni ya tenda gakwe. 11 Jehovha i wa wulawula na Mosi nghohe ni nghohe+ a ku fana ni loku a munhu a wulawula ni munhu-kulobye. A cikhati leci Mosi a nga tlhela wugovelweni, Joxuwa,+ a n’wana wa Nuni, a nandza ga Mosi tlhelo muvhuneteli wakwe,+ i wa nga humi lomu tendeni.

12 Makunu Mosi i no byela Jehovha, aku: “U ndzi byela ku: ‘Rangela a vanhu lava’, kanilezvi a wu ndzi byelangi ku hi mani u to mu rumela na mina. A ku tsika lezvo, u te: ‘Ndza ku tiva hi vito* niku u kumile thomo mahlweni ka mina.’ 13 Loku ndzi kumile thomo mahlweni ka wena, ndzi tivise a tindlela ta wena+ kasi ndzi ku tiva ni ku simama ndzi kuma thomo mahlweni ka wena. U nga rivali kambe lezvaku a vanhu lava vanhu va wena.”+ 14 Hikwalaho, yena i te: “Mina wutsumbu* ndzi ta famba na wena,+ ndzi ku nyika kuhumula.”+ 15 Makunu Mosi i te ngalo kakwe: “Loku wena* u nga fambi na hina, u nga hi susi laha. 16 Zvi ta tivekisa kuyini lezvaku ndzi kumile thomo mahlweni ka wena, mina ni vanhu va wena? A hi loku wena u famba na hina+ kasi zvi woneka lezvaku mina ni vanhu va wena hi hambene ni vontlhe a vanhu lava van’wani va laha misaveni ke?”+

17 Jehovha i no engeta a byela Mosi, aku: “Lezvi u nga kombela zvonawu ndzi ta maha, hakuva u kumile thomo mahlweni ka mina niku ndza ku tiva hi vito.” 18 Mosi aku: “Ndzi kombela ku u ndzi komba a kungangamela ka wena.” 19 Kanilezvi yena i te ngalo: “Ndzi ta hundzisa a wunene ga mina gontlhe hi mahlweni ka nghohe ya wena ndzi tlhela ndzi huwelela a vito ga Jehovha mahlweni ka wena.+ Ndzi ta mu nyika thomo loyi ndzi to mu nyika thomo, ndzi mu mahela wuxinji loyi ndzi to mu mahela wuxinji.”+ 20 Kanilezvi i no engeta, aku: “U nga ta yi wona a nghohe ya mina, hakuva a ku na munhu a ndzi wonako a hanya.”

21 Jehovha i no engeta, aku: “Hi legi wutshamu laha kusuhani na mina. Nyima laha ribyeni. 22 A cikhati leci a kungangamela ka mina ku to hundza, ndzi ta ku nghenisa lomu mhakweni ya ribye ndzi ku fenengeta hi canja ga mina kala ndzi hundza. 23 Andzhako ka lezvo, ndzi ta susa a canja ga mina u sala u wona hlanha wa mina. Kanilezvi a nghohe ya mina a yi woniwi.”+

34 Makunu Jehovha i no byela Mosi, aku: “Vatla timbila timbiri ta maribye to fana ni leti to sangula.+ Ndzi ta tsala laha ka timbila leto a magezu lawa ma nga hi ka leti to sangula,+ leti u nga faya.+ 2 Ti longiselele a mandziko ni mixo, kota lezvi ni mixo ya kona u to kandziha Citsungeni ca Sinayi u ya ti wonekelisa mahlweni ka mina le madembeleni ya citsunga.+ 3 Kanilezvi u nga fambi ni munhu, ne ku nga woneki munhu ka ni gihi tlhelo ga citsunga. Hambu tiyivhu kutani tihomu ti nga giselwi mahlweni ka citsunga leco.”+

4 Mosi i no vatla timbila timbiri ta maribye to fana ni leti to sangula. I no vhuka ni mixo nguvhu a kandziha Citsungeni ca Sinayi, kota lezvi Jehovha a nga mu leletele, na a hi ni timbila leto ta timbiri ta maribye mandleni yakwe. 5 Hi kulandzela, Jehovha i no relela+ hi refu a yima naye laho a huwelela a vito ga Jehovha.+ 6 Jehovha i no hundza mahlweni kakwe na a huwelela, aku: “Jehovha, Jehovha, a Nungungulu wa wuxinji,+ ni wa ku zwela wusiwana,+ ni wa ku nonoka ku zangara,+ a teleko hi lirandzo li nga mbheliko+ ni lisine,*+ 7 loyi a kombisako lirandzo li nga mbheliko ka makume ya mazana,+ loyi a tsetselelako cigoho, ni cihambunyeto, ni ciwonho;+ kanilezvi a nga ta tsika ku tsayisa loyi a nga ni nandzu,+ hakuva i ta tsayisa a vana ni vazukulu hi kota ya cigoho ca vapapayi vabye, hehla ka cizukulwana ca wunharu ni hehla ka cizukulwana ca wumune.”+

8 Zvalezvo, Mosi i no hatlisa a korama laha misaveni, a khizama, 9 aku: “O Jehovha, loku ndzi kumile thomo mahlweni ka wena, Jehovha, ndzi kombela ku u famba zvin’we na hina uva cikari ka hina,+ hambu lezvi hi nga vanhu va tinhamu to nonoha.+ Tsetselela a cigoho ca hina ni ciwonho ca hina,+ u hi amukela kota tshomba ya wena.” 10 Yena a mu hlamula, aku: “Ndza maha civhumelwano leci na wena: Ndzi ta maha zvilo zvo hlamalisa mahlweni ka vontlhe vanhu va wena zva ku a zvi se tshuka zvi mahiwa* misaveni yontlhe, kutani cikari ka matiko wontlhe.+ A vanhu vontlhe lava u hanyako cikari kabye va ta wona a mitiro ya Jehovha, hakuva lezvi ndzi mahako na wena zvilo zvo hlamalisa.+

11 “Chela kota ka lezvi ndzi ku leletelako nyamutlha.+ Ndzi ta hlongola a vaAmori, ni vaKhanani, ni vaHiti, ni vaPerezi ni vaHivhi, ni vaJebhusi mahlweni ka wena.+ 12 Ti wonele kasi u nga mahi civhumelwano ni vahanyi va tiko legi u yako ka gona,+ kasi va ngavi ntlhamu cikari ka n’wina.+ 13 Kanilezvi mu ta khungumulela a maalati yabye, mu fayetela ni mapilari yabye yo basa,* mu wisetela ni tisinya tabye to basa.*+ 14 U nga khozeli a mun’wani nungungulu+ hakuva Jehovha i tiviwa kota* loyi a londzako ku khozelwa yece. Ina, yena i Nungungulu loyi a londzako ku khozelwa yece.+ 15 Ti wonele kasi u nga mahi civhumelwano ni vahanyi va tiko lego, hakuva laha va mahako wubhayi ni vanungungulu vabye, ni ku maha miphahlo va mahela a vanungungulu vabye,+ a wokari i ta ku ramba u yaga a muphahlo wakwe.+ 16 Hakunene u ta teka a vokari va vanhanyana vabye vava vasati va vafana va wena,+ ni vanhanyana vabye va ta maha wubhayi ni vanungungulu vabye, va xengetela a vafana va wena lezvaku va maha wubhayi ni vanungungulu vabye.+

17 “U nga ti maheli vanungungulu va simbi yi nyekisilweko.+

18 “U ta maha a Mubuzo wa Tipawa to kala Comelo.+ U taga a tipawa to kala comelo kota lezvi ndzi ku leleteleko. Maha lezvo hi 7 wa masiku hi cikhati ci yimisilweko, hi hweti ya Abhibhi,*+ hakuva mu humile tikweni ga Gibhite hi hweti ya Abhibhi.

19 “A matewula wontlhe ya cinuna* ya mina,+ a ku patsa ni wontlhe a matewula ya ntlhambi wa n’wina, kani i dhuna ga matewula ga homu kutani i yivhu ya matewula ya matsune.+ 20 A matewula ya timbongola u fanele ku ma tlhatlhisa hi yivhu, kanilezvi loku u nga ma tlhatlhisi, ma tshove nhamu. U ta tlhatlhisa a matewula wontlhe ya vafana va wena.+ I hava a faneleko kuta ka mina na a nga hi na nchumu.

21 “U ta tira a 6 wa masiku, kanilezvi hi siku ga wu 7 u ta humula.*+ U ta humula hambu ku hi nguva ya kurima ni ya kutshovela.

22 “U ta maha Mubuzo wa Mavhiki hi mihandzu yo sangula yo buvha ya kutshovelwa ka trigo, ni Mubuzo wa Kuhlengeleta* kumbheleni ka lembe.+

23 “Makhati manharu hi lembe, a vavanuna vontlhe va ta ti wonekelisa mahlweni ka Jehovha, a Hosi ya lisine tlhelo Nungungulu wa Izrayeli.+ 24 Ndzi ta hlongola matiko mahlweni ka wena,+ ndzi anamisa a tiko ga wena. I hava a to navela a tiko ga wena a cikhati u yako u ya wona a nghohe ya Jehovha, a Nungungulu wa wena, makhati manharu hi lembe.

25 “U nga nyikeli a nkhata wa muphahlo wa mina zvin’we ni zvilo zvi nga ni comelo.+ A muphahlo wa Mubuzo wa Phasika wu nga vekiwi wu tshama wusiku gontlhe kala ni mixo.+

26 “U ta neha mihandzu yo sangula yo buvha ya tiko ga wena, leyi ya yinene nguvhu, ndlwini ya Jehovha, a Nungungulu wa wena.+

“U nga khoni cimbutana hi masi ya mamani wa cona.”+

27 Jehovha i no engeta a byela Mosi, aku: “Tsala a magezu lawa,+ hakuva hi kuyelana ni magezu lawa, ndzo maha civhumelwano na wena zvin’we ni vaIzrayeli.”+ 28 Mosi i no tshama leyo na Jehovha a 40 wa masiku ni 40 wa wusiku. A nga gangi nchumu ne kunwa mati.+ Niku Yena i no tsala a magezu ya civhumelwano laha ka timbila, a Khume ga Milayo.*+

29 Makunu Mosi i no relela hi Citsungeni ca Sinayi, na a welele a timbila timbiri ta maribye ta Wukustumunyu canjeni gakwe.+ A cikhati leci Mosi a nga relela hi citsungeni, i wa nga zvi tivi lezvaku a hlonge ya nghohe yakwe yi wa ngangamela hi lezvi a nga wulawulile na Nungungulu. 30 Laha Aroni ni vontlhe a vaIzrayeli va nga wona Mosi, va no wona hlonge ya nghohe yakwe na yi ngangamela, va chava ku tshinela kakwe.+

31 Kanilezvi i no va vitana. Hikwalaho, Aroni i noya kakwe ni tontlhe a tihosana ta hlengeletano. Mosi i no wulawula navo. 32 Andzhako ka lezvo, a vaIzrayeli vontlhe va no tshinela kakwe, a va byela zvileletelo lezvi Jehovha a nga mu nyikile le Citsungeni ca Sinayi.+ 33 Khati ni khati Mosi a nga mbheta ku bhula navo, i wa fenengeta a nghohe yakwe hi vhewu.*+ 34 Kanilezvi a cikhati leci a nga ti wonekelisa mahlweni ka Jehovha kasi ku wulawula naye, i wa susa vhewu kala a huma.+ Andzhako ka lezvo, i waya a ya byela a vaIzrayeli a zvileletelo lezvi a zvi amukeleko.+ 35 A vaIzrayeli va no wona lezvaku a hlonge ya nghohe yakwe yi wa ngangamela. Mosi i no tlhela a ti fenengeta nghohe hi vhewu kala a nghena kasi a wulawula na Nungungulu.*+

35 Hi ndzhako ka cikhati, Mosi i no tsombanisa hlengeletano yontlhe ya ka Izrayeli, aku kabye: “A zvilo lezvi Jehovha a leleteleko a ku zvi mahiwa hi lezvi:+ 2 Mu ta tira a 6 wa masiku, kanilezvi a siku ga wu 7 gi tava nchumu wo basa ka n’wina, i sabhadho ga kuhumula ko mbhelela ka Jehovha.+ Ni wihi loyi a to tira hi siku lego i ta dawa.+ 3 Mu nga dziveli ndzilo ni ka gihi wutshamu legi mu hanyako ka gona hi siku ga sabhadho.”

4 Andzhako ka lezvo, Mosi i no byela a hlengeletano yontlhe ya ka Izrayeli, aku: “Lezvi Jehovha a leleteleko hi lezvi: 5 ‘Humesani a munyikelo wa Jehovha cikari ka n’wina.+ Vontlhe lava a timbilu tabye ti va kucako+ va wa nehe a munyikelo ka Jehovha, hi zvilo lezvi: Ouro, ni prata, ni kobre, 6 ni tihindza ta azuli, ni woya go pswhuka, ni tihindza to pswhuka, ni wukene* ga ginene, ni woya ga mbuti,+ 7 ni mabhebhe ya tiyivhu ta vamatsune ma pendilweko ma pswhuka, ni mabhebhe ya macalo,* ni mapulango ya akasia, 8 ni mafura ya tikandiya, ni bhalsamu kasi ku maha hi yona mafura ya ku tota, ni ya ku maha libani lo nuhela,+ 9 ni maribye ya onikisi, ni man’wani maribye kasi ku ma nameketa laha ka efodhe+ ni laha ka phaketi ga laha cifuveni.+

10 “‘Vontlhe lava va nga vameseri*+ cikari ka n’wina va wate va ta maha zvontlhe lezvi Jehovha a leleteleko, 11 ku nga lezvi: Tabhernakeli, ni tenda ga gona, ni cifenengeto ca gona, ni zvihariketo zva gona, ni makwadru* ya gona, ni tivalelo ta gona, ni timhandze ta gona, ni zvikhato zva gona; 12 ni Arke,*+ ni mipingu ya gona,+ ni tapa,+ ni kortina+ ga ku hambanisa; 13 ni meza,+ ni mipingu ya yona, ni zvontlhe a zvibya zva yona, ni tipawa ta munyikelo;+ 14 ni nenge wa tikandiya+ kasi ku woningela, ni zvibya zva wona, ni tikandiya ta kona, ni mafura ya tikandiya;+ 15 ni alati ga libani+ ni mipingu ya gona; ni mafura ya ku tota, ni libani lo nuhela;+ ni kortina ga laha nyangweni ya tabhernakeli; 16 ni alati ga munyikelo wa kuhiswa,+ ni citlhata ca gona ca kobre, ni mipingu ya gona, ni zvontlhe a zvibya zva gona; ni basiya ni cikhatelo ca kona;+ 17 ni makortina ya laha tsendzeleni,*+ ni timhandze ta kona, ni zvikhato zva kona; ni kortina ga laha nyangweni ya tsendzele; 18 ni zvikhongwani zva tenda ga tabhernakeli, ni zvikhongwani zva tenda ga laha tsendzeleni* ni tingoti ta kona;+ 19 ni tinguwo ti rungilweko+ khwatsi ta ku tira hi tona lomu wutshan’wini go basa, a tinguwo to basa ta mupristi Aroni+ ni tinguwo ta vana vakwe kasi va tira hi tona kota vapristi.’”

20 Hikwalaho, yontlhe a hlengeletano ya ka Izrayeli yi no suka mahlweni ka Mosi. 21 Makunu vontlhe lava a timbilu tabye ti va kucileko+ ni lava a moya wabye wu va kucileko, va no neha a minyikelo yabye ka Jehovha kasi yi ta tirisiwa tendeni ga mutlhangano, ntirweni wa gona wontlhe, ni kumaheni ka tinguwo to basa. 22 A vavanuna ni vavasati lava a timbilu tabye ti nga va kuca va no simama ku neha zvingwavila, ni tiphera ta tindleve,* ni tiphera ta titiho, ni zvin’wani zvilo zva lisima, a ku patsa ni tixaka tontlhe ta zvilo zva ouro. Vontlhe va no nyikela a minyikelo yabye* ya ouro ka Jehovha.+ 23 Vontlhe lava va nga hi ni tihindza ta azuli, ni woya go pswhuka, ni tihindza to pswhuka, ni wukene* ga ginene, ni woya ga mbuti, ni mabhebhe ya tiyivhu ta vamatsune ma pendilweko ma pswhuka ni mabhebhe ya macalo,* va nota nazvo. 24 Vontlhe lava va nyikeleko hi prata ni kobre va no neha a munyikelo ka Jehovha niku vontlhe lava va nga hi ni mapulango ya akasia va nota nawo kasi ku maha ni wihi ntiro.

25 Vontlhe a vavasati lava va nga zvi tiva+ ku swula va no swula hi mandla yabye va gumesa vata ni lezvi va nga swulile: tihindza ta azuli, ni woya go pswhuka, ni tihindza to pswhuka, ni wukene* ga ginene. 26 Vontlhe a vavasati lava va nga zvi kota ku swula, lava a timbilu tabye ti va kucileko, va no swula a woya ga timbuti.

27 A tihosana ti no neha a maribye ya onikisi, ni man’wani maribye ya ku nameketela laha ka efodhe ni laha ka phaketi ga laha cifuveni,+ 28 ni bhalsamu, ni mafura ya tikandiya, ni ya ku maha mafura ya ku tota,+ ni ya ku maha libani lo nuhela.+ 29 Vontlhe a vavanuna ni vavasati lava a timbilu tabye ti va kucileko va no neha zvokari ntirweni lowu Jehovha a leleteleko hi nomu wa Mosi lezvaku wu mahiwa. A vaIzrayeli va no zvi neha ka Jehovha kota munyikelo wa kuzvirandza.+

30 Makunu Mosi i no byela a vaIzrayeli, aku: “Jehovha i hlawulile Bhezaleli, a n’wana wa Uri, a n’wana wa Hura, wa lixaka la ka Judha.+ 31 I mu tatile hi moya wa Nungungulu, a mu nyika wutlhari, ni kuzwisisa, ni wutivi ga ku maha mitiro ya tixaka tontlhe ta wumeseri, 32 kasi ku tsamba mitiro, ni ku tira hi ouro, ni prata, ni kobre, 33 ni ku tsema ni ku veketela a maribye, ni ku maha mitiro ya tixaka tontlhe ta wumeseri hi mapulango. 34 I chelile mbilwini ya Bhezaleli ni ya Oholiyabha,+ a n’wana wa Ahisamaka, wa lixaka la ka Dhani, a wutlhari ga ku gondzisa van’wani. 35 I va tatile hi wutlhari*+ ga ku maha a mitiro yontlhe ya wumeseri, ni ga ku bhordhara, ni ga ku runga hi tihindza ta azuli, ni woya go pswhuka, ni tihindza to pswhuka, ni wukene* ga ginene, ni wutlhari ga ku luka. A vavanuna lava va ta maha a mitiro ya tixaka tontlhe va tlhela va tsamba tixaka tontlhe ta mitiro.

36 “Bhezaleli i ta tira na Oholiyabha zvin’we ni vavanuna vontlhe va nga ni wutlhari,* lava Jehovha a va nyikileko a wutlhari ni kuzwisisa kasi va tiva a ku maha a mitiro yontlhe ya ntiro wo basa, kota lezvi Jehovha a leleteleko.”+

2 Makunu Mosi i no vitana Bhezaleli na Oholiyabha zvin’we ni vavanuna vontlhe lava Jehovha a nga chelile wutlhari timbilwini tabye,+ vontlhe lava a timbilu tabye ti nga va kuca a ku tira hi kuzvirandza.+ 3 Va no teka a minyikelo yontlhe ka Mosi+ leyi a vaIzrayeli va nga nehile kasi yi tiriselwa a ntiro wo basa. Hambulezvo, mixo ni mixo, a vaIzrayeli va no simama ku neha a minyikelo kakwe hi kuzvirandza.

4 Andzhako ka loku va sangulile ku maha a ntiro wo basa, vontlhe a vatiri va nga ni wutlhari va waya hi kulandzelana 5 va ya byela Mosi, vaku: “A vanhu vo neha zvilo zvo tala nguvhu a ku hundza lezvi zvi lavekako ntirweni lowu Jehovha a leleteleko lezvaku wu mahiwa.” 6 Hikwalaho, Mosi i no leletela lezvaku ku mahiwa a citiviso lomu wugovelweni gontlhe, caku: “Vavanuna ni vavasati, mu nga ha nehi a zvilo zvin’wani zva munyikelo wo basa.” Hi ndlela leyo, a vanhu va no nyimisiwa a ku neha a zvilo zvin’wani. 7 A materiyali lawa va nga nehile ma wa enela kasi ku maha a ntiro ma tlhela ma sala.

8 Hikwalaho, vontlhe a vatiri va wutlhari+ va no maha a tabhernakeli+ hi 10 wa tinguwo ta tenda ta wukene* ga ginene gi lukilweko, ni tihindza ta azuli, ni woya go pswhuka, ni tinguwo to pswhuka; yena* i no ti maha na ti bhordharilwe makerubhima.+ 9 A nguwo yin’we ni yin’wani yi wa hi ni 28 wa mikono* a kuleha ni mune wa mikono a kuanama. Tontlhe a tinguwo ti wa hi ta lipimo lin’we. 10 I no runga a ntlhanu wa tinguwo ti lungelelana, a tlhela a runga leti tin’wani ta ntlhanu tonawu ti lungelelana. 11 I no maha zvibhandana hi tihindza ta azuli le magumo ka nguwo yo gumesa ka leti to lungelelana a tlhela a maha zvalezvo kambe le magumo ka nguwo yo gumesa ka leti tin’wani to lungelelana, hi laha a tinguwo leto ti nga wa ta tlhangana kona. 12 I no maha 50 wa zvibhandana ka nguwo yin’we, ni 50 wa zvibhandana ka nguwo leyi yin’wani kasi a zvibhandana lezvo zvi cuwukana laha a tinguwo leto ti nga wa ta tlhangana kona. 13 Hi kugumesa, i no maha a 50 wa zvihariketo zva ouro a tlhavinyeta hi zvona a tinguwo leto to lungelelana. Hikwalaho, a tabhernakeli gi nova nchumu wun’we.

14 I no maha tinguwo hi woya ga mbuti kasi ti maha tenda hehla ka tabhernakeli. I no maha 11 wa tinguwo ta tenda.+ 15 A nguwo yin’we ni yin’wani yi wa hi ni 30 wa mikono a kuleha ni mune wa mikono a kuanama. Tontlhe a tinguwo leti ta 11 ti wa hi ta lipimo lin’we. 16 I no lungelela a ntlhanu wa tinguwo ti maha yin’we, a lungelela kambe leti tin’wani ta 6 ti maha yin’we. 17 Hi kulandzela, i no maha a 50 wa zvibhandana le magumo ka nguwo yo gumesa ya leti to lungelelana, ni 50 wa zvibhandana le magumo ka nguwo leyi yi nga le magumo ka leti tin’wani to lungelelana hi laha a tinguwo leto ti nga tlhangana kona. 18 I no maha 50 wa zvihariketo zva kobre a tlhavinyeta hi zvona a tenda gi maha nchumu wun’we.

19 I no maha cifenengeto ca tenda hi mabhebhe ya tiyivhu ta vamatsune ma pendilweko ma pswhuka, a gumesa a tlhateka a cifenengeto ca mabhebhe ya macalo* hi le hehla.+

20 Hi kulandzela, i no maha a makwadru* ya tabhernakeli hi mapulango ya akasia+ ma yima ma ku pswhe.+ 21 A kwadru gin’we ni gin’wani gi wa hi ni 10 wa mikono a kutlakuka ni nkono wun’we ni khihlanya a kuanama. 22 Ka kwadru gin’we ni gin’wani ku wa hi ni matorno mambiri ma khomeneko. Hi zvalezvo a nga ma mahisa zvona a makwadru wontlhe ya tabhernakeli. 23 Hi ndlela leyo, i no maha a 20 wa makwadru ya tlhelo ga dzonga* ga tabhernakeli, ma cuwuka dzongeni. 24 I no maha a 40 wa zvikhato zva prata a zvi veka lahasi ka makwadru lawa ya 20: zvikhato zvimbiri lahasi ka kwadru gin’we kasi ku nghena a matorno ya gona ya mambiri ni zvikhato zvimbiri lahasi ka kwadru gin’we ni gin’wani ka lawa ma nga landzela kasi ku nghena matorno ya kona ya mambiri.+ 25 I no maha a 20 wa makwadru ya tlhelo legi gin’wani ga tabhernakeli, gi nga tlhelo ga n’walungu,* 26 ni zvikhato zva kona zva prata zva 40 — zvikhato zvimbiri lahasi ka kwadru gin’we, ni zvikhato zvimbiri lahasi ka kwadru gin’we ni gin’wani ka lawa ma nga landzela.

27 I no maha 6 wa makwadru ya cipandze ca le ndzhako ca tabhernakeli hi tlhelo ga mupela-gambo.+ 28 I no maha makwadru mambiri kota maziki* ya makhona mambiri ya le ndzhako ka tabhernakeli. 29 A makwadru lawo ma wa hi ni zvipandze zvimbiri zva mapulango kusukela lahasi kala le hehla laha ma nga tlhangana kona ka sindza* go sangula. Hi zvalezvo a nga maha ka maziki* mambiri ya lomu makhoneni. 30 Hikwalaho, ku wa hi ni 8 wa makwadru zvin’we ni zvikhato zva kona zva prata zva 16 — zvikhato zvimbiri lahasi ka kwadru gin’we ni gin’wani.

31 I no maha tivalelo hi sinya ya akasia: ntlhanu wa tivalelo ta makwadru ya tlhelo gin’we ga tabhernakeli,+ 32 ni ntlhanu wa tivalelo ta makwadru ya tlhelo legi gin’wani ga tabhernakeli, ni ntlhanu wa tivalelo ta makwadru ya tabhernakeli kasi tiva ta cipandze ca le ndzhako ka gona, hi le mupela-gambo. 33 I no maha a livalelo la laha cikari hi ndlela ya ku li hundza hi laha cikari na cikari ka makwadru kusukela magumo kala magumo. 34 I no nameketela ouro ka makwadru, a maha a masindza ya kona hi ouro kasi ku tlhomeka a tivalelo a gumesa a nameketela ouro ka tivalelo leto.+

35 I no maha kortina+ hi tihindza ta azuli, ni woya go pswhuka, ni tihindza to pswhuka ni tinguwo ta wukene* ga ginene gi lukilweko. I no gi maha na gi bhordharilwe a makerubhima.+ 36 Hi kulandzela, i no gi mahela a mune wa timhandze ta akasia a ti nameketa ouro, zvin’we ni tihuka ta ouro. I no ti mahela a mune wa zvikhato hi prata yi nyekisilweko. 37 Hi kulandzela, i no maha kortina ga laha nyangweni ya tenda hi tihindza ta azuli, ni woya go pswhuka, ni tihindza to pswhuka, ni wukene* ga ginene gi lukilweko,+ 38 zvin’we ni ntlhanu wa timhandze ni tihuka ta kona. I no nameketa ouro le hehla ka tona a tlhela a nameketa ka masindza ya kona, kanilezvi a zvikhato zva kona zva ntlhanu zvi wa hi zva kobre.

37 Makunu Bhezaleli+ i no maha a Arke*+ hi mapulango ya akasia. Gi wa hi ni mikono* yimbiri ni khihlanya a kuleha, ni nkono wun’we ni khihlanya a kuanama, ni nkono wun’we ni khihlanya a kutlakuka.+ 2 I no gi nameketela ouro ya yinene, ndzeni ni handle a gumesa a maha makhara* ya ouro kontlhe lomu mareveni ya gona.+ 3 Andzhako ka lezvo, i no gi mahela mune wa masindza hi ouro yi nyekisilweko kasi mava ya le hehla ka minenge ya gona ya mune; a mambiri mava ka tlhelo gin’we, ni mambiri ka tlhelo legi gin’wani. 4 Hi kulandzela, i no maha mipingu hi sinya ya akasia a yi nameketela ouro.+ 5 I no tlhoma a mipingu lomu ka masindza lawa ma nga lomu matlhelweni ya Arke kasi ku gi pinga hi wona.+

6 I no maha tapa hi ouro ya yinene.+ Yi wa hi ni mikono yimbiri ni khihlanya a kuleha, ni nkono wun’we ni khihlanya a kuanama.+ 7 Lomu ka magumo mambiri ya tapa+ i no maha makerubhima mambiri+ hi ouro yi bethilweko hi hamela. 8 I no ma maha mava ka magumo mambiri ya tapa: A kerubhima gin’we seno, ni gin’wani seniya. 9 A makerubhima lawo ya mambiri ma wa tshambulutile a tipapa tiya hehla, ma fenengeta a tapa hi tipapa ta wona.+ A gin’we gi wa hi phambeni ka gin’wani, ni tinghohe ta wona ti wa cuwukile laha ka tapa.+

10 I no maha meza hi mapulango ya akasia.+ Yi wa hi ni mikono yimbiri a kuleha, ni nkono wun’we a kuanama, ni nkono wun’we ni khihlanya a kutlakuka.+ 11 I no yi nameketela ouro ya yinene a tlhela a maha makhara* ya ouro kontlhe lomu mareveni ya yona. 12 Hi kulandzela, i no vekela a pulango ga kuanama ku ringana canja* gi rendzelekela meza; a maha makhara* ya ouro lomu mareveni ya gona. 13 A ku tsika lezvo, i no yi mahela mune wa masindza hi ouro yi nyekisilweko a ma vekela ka mune wa makhona ya meza, lomu a mune wa minenge yi nga khweleketilwe kona. 14 A masindza ma wa hi kusuhani ni pulango kasi ku tlhoma ka wona a mipingu ya ku tlakula hi yona a meza. 15 I no maha mipingu hi sinya ya akasia a yi nameketela ouro kasi ku tlakula hi yona a meza. 16 Andzhako ka lezvo, i no teka a ouro ya yinene a maha hi yona a zvibya zva laha mezeni, ku nga tiparato ta kona, ni tikopo ta kona, ni tijaro ta kona, ni zvingelwana lezvi va nga wa ta chulula hi zvona a minyikelo ya zvakunwa.+

17 I no maha a nenge wa tikandiya+ hi ouro ya yinene. A nenge lowo wa tikandiya i noya hi ku wu betha. A tshako ga kona, ni simbi ya kona ya laha cikari, ni madhavi ya kona, ni tikopo ta kona, ni tibutawu ta kona ni zvitsangi zva kona zvi nova nchumu wun’we.+ 18 Ku no huma a 6 wa madhavi hi laha ka simbi ya laha cikari ya nenge wa tikandiya: A manharu ka tlhelo gin’we, ni manharu ka tlhelo legi gin’wani. 19 A dhavi ni dhavi ka tlhelo gin’we gi wa hi ni tikopo tinharu to fana ni citsangi ca mendwa ti cicanako cikari ka zvitsangi ni tibutawu niku a dhavi ni dhavi ka tlhelo legi gin’wani gi wa hi ni tikopo tinharu to fana ni citsangi ca mendwa ti cicanako cikari ka zvitsangi ni tibutawu. Ma wa tshamisile lezvo a 6 wa madhavi lawa ma nga sukela laha ka simbi ya laha cikari ya nenge wa tikandiya. 20 Laha ka simbi ya laha cikari ya nenge wa tikandiya ku wa hi ni mune wa tikopo to fana ni citsangi ca mendwa ti cicanako cikari ka zvitsangi ni tibutawu. 21 Hi lahasi ka madhavi mambiri yo sangula lawa ma sukelako laha ka simbi ya laha cikari ku wa hi ni butawu; a butawu yin’wani yi wa hi lahasi ka madhavi mambiri lawa ma landzelako, ni yin’wani butawu yiva lahasi ka madhavi mambiri yo gumesa. Zvi wa tshamisile lezvo ka 6 wa madhavi lawa ma sukelako laha ka simbi ya laha cikari ya nenge wa tikandiya. 22 A tibutawu, ni madhavi, ni nenge wontlhe wa tikandiya zvi wa bethilwe hi ouro ya yinene, zviva nchumu mun’we. 23 I no maha a tikandiya ta kona ta 7,+ ni zvitimo* zva kona, ni zvibya zva kona zva ku woka hi zvona ndzilo hi ouro ya yinene. 24 I no maha a nenge wa tikandiya ni zvontlhe zvibya zva wona hi talenta* yin’we ya ouro ya yinene.

25 Makunu i no maha a alati ga libani+ hi mapulango ya akasia. Gi wa hi ni mune wa matlhelo yo ringana; gi wa hi ni nkono wun’we a kuleha, ni nkono wun’we a kuanama, ni mikono yimbiri a kutlakuka. A timhondzo ta gona ti wa hi laha ka gona, zviva nchumu mun’we.+ 26 I no gi nameketela ouro ya yinene le hehla ka gona, ni matlhelweni ya gona wontlhe, ni timhondzo ta gona, a maha makhara* ya ouro kontlhe lomu mareveni ya gona. 27 I no gi mahela ni masindza mambiri ya ouro hi lahasi ka makhara* ka tlhelo ga seno ni masindza mambiri ka tlhelo ga seniya kasi ku tlhomeka ka wona a mipingu ya ku gi tlakula hi yona. 28 Andzhako ka lezvo, i no maha mipingu hi sinya ya akasia, a yi nameketela ouro. 29 I no maha ni mafura yo basa ya ku tota hi wona,+ ni libani la linene lo nuhela,+ li jutilweko hi wutlhari.*

38 I no maha alati ga munyikelo wa kuhiswa hi mapulango ya akasia. Gi wa hi ni mune wa matlhelo yo ringana: Ntlhanu wa mikono* a kuleha, ni ntlhanu wa mikono a kuanama, ni mikono yinharu a kutlakuka.+ 2 Hi kulandzela, i no maha mune wa timhondzo ta alati lomu ka mune wa makhona ya gona. A timhondzo ta gona ti wa hi laha ka gona, zviva nchumu wun’we. Hi kulandzela, i no gi nameketa kobre.+ 3 Andzhako ka lezvo, i no maha a zvibya zvontlhe zva alati: A mabhaketi, ni mafoxola, ni magarfo, ni zvingelwana, ni zvibya zva ku woka hi zvona ndzilo. Zvontlhe a zvibya zva gona i no zvi maha hi kobre. 4 I no maha ni citlhata ca alati — ci nga citlhata ca kobre — hi lahasi ka pulango legi gi rendzelekeleko a nomu wa alati, ci kumekela laha ka kuya cikari na cikari ka alati. 5 I no maha a mune wa masindza ma nyekisilweko a ma vekela ka mune wa makhona, kusuhani ni citlhata ca kobre kasi ku tlhoma ka wona a mipingu. 6 Andzhako ka lezvo, i no maha mipingu hi sinya ya akasia a yi nameketa kobre. 7 A tlhoma mipingu lomu ka masindza yi tshama hi lomu matlhelweni ya alati kasi gi rwaliwa hi yona. I no maha a alati gi ku khwatsi i bhokisa go vhuleka.

8 I no maha basiya ya kobre+ ni cikhatelo ca kona hi kobre na a tirisa a zvibuko* zva vavasati lava va nga xaxametilwe kasi va tira nyangweni ya tenda ga mutlhangano.

9 I no maha a tsendzele.*+ Tlhelweni ga le dzongeni* ga tsendzele, gi cuwukeneko ni dzonga, i no maha a makortina ya wukene ga ginene gi lukilweko ya 100 wa mikono a kuleha kasi ma hayekiwa.+ 10 Ku wa hi ni 20 wa timhandze ni 20 wa zvikhato zva kobre. A tihuka ta timhandze ni masindza ya kona zvi wa hi zva prata. 11 Tlhelweni ga n’walungu* konawu ku wa hayekelwe a makortina ya 100 wa mikono a kuleha. A timhandze ta kona ta 20 ni zvikhato zva kona zva 20 zvi wa hi zva kobre. A tihuka ta timhandze ni masindza ya kona zvi wa hi zva prata. 12 Kanilezvi a makortina lawa ma nga hayekelwe tlhelweni ga mupela-gambo ma wa hi ni 50 wa mikono. Ku wa hi ni 10 wa timhandze ni 10 wa zvikhato. A tihuka ta timhandze ni masindza ya kona zvi wa hi zva prata. 13 A kuanama ka tlhelo ga mutsuwuka-gambo, gi cuwukeneko ni mutsuwuka-gambo, ku wa hi 50 wa mikono. 14 Ka tlhelo gin’we ga nyangwa ku wa hayekilwe a makortina ya 15 wa mikono, na ku hi ni timhandze tinharu, ni zvikhato zvinharu. 15 Ka tlhelo legi gin’wani ga nyangwa ya tsendzele konawu ku wa hayekelwe makortina ya 15 wa mikono, ni timhandze tinharu, ni zvikhato zvinharu. 16 A makortina wontlhe ma nga hayekelwe lomu matlhelweni ya tsendzele ma wa hi ya wukene* ga ginene gi lukilweko. 17 A zvikhato zva timhandze zvi wa hi zva kobre, a tihuka ta timhandze ni masindza ya kona zvi wa hi zva prata. Le hehla ka tona ti wa nameketilwe prata. Ka timhandze tontlhe ta tsendzele ku wa hi ni zvihariketo zva prata.+

18 A kortina ga laha nyangweni ya tsendzele gi wa mahilwe hi tihindza ta azuli, ni woya go pswhuka, ni tihindza to pswhuka, ni wukene* ga ginene gi lukilweko. A kortina lego gi wa hi ni 20 wa mikono a kuleha, ni ntlhanu wa mikono a kutlakuka. Gi wa tlakukile a ku fana ni makortina lawa ma nga hayekilwe tsendzeleni.+ 19 A timhandze ta gona ta mune, ni zvikhato zva kona zva mune zvi wa mahilwe hi kobre. A tihuka ta gona ni masindza ya kona zvi wa hi zva prata. Le hehla ka wona ma wa nameketilwe prata. 20 Zvontlhe a zvikhongwani zva tabhernakeli ni lezvi zvi nga randzele a tsendzele zvi wa hi zva kobre.+

21 Lowu i xaxameto wa zvilo lezvi zvi tirisilweko kasi ku aka a tabhernakeli, a tabhernakeli ga Wukustumunyu,+ lowu wu mahilweko hi ku landza cileletelo ca Mosi, na wu hi ntiro wa vaLevhi+ va nga rangelwa hi Itamare,+ a n’wana wa mupristi Aroni. 22 Bhezaleli,+ a n’wana wa Uri, a n’wana wa Hura, wa lixaka la ka Judha, i no maha zvontlhe lezvi Jehovha a nga leletele Mosi. 23 I no vhuniwa hi Oholiyabha,+ a n’wana wa Ahisamaka, wa lixaka la ka Dhani, a meseri ni mubhordhari tlhelo murungi hi tihindza ta azuli, ni woya go pswhuka, ni tihindza to pswhuka, ni wukene* ga ginene.

24 A ouro yontlhe yi tirisilweko kasi ku maha a ntiro wontlhe wa wutshamu go basa yi wa hi ouro ya munyikelo wa kundziwilitelwa,+ ku nga 29 wa titalenta* ni 730 wa maxekeli,* hi kuya hi xekeli ga wutshamu go basa.* 25 A prata yi nehilweko hi lava va tsalelweko cikari ka hlengeletano yi wa hi 100 wa titalenta ni 1775 wa maxekeli, hi kuya hi xekeli ga wutshamu go basa.* 26 A khihlanya ga xekeli legi gi nehilweko hi mun’we ni mun’wani wa lava va tsalelweko gi wa hi khihlanya ga xekeli hi kuya hi xekeli ga wutshamu go basa.* Ku tsalelwe a 603 550 wa vanhu va 20 wa malembe kuya hehla.+

27 Kasi ku betha a zvikhato zva wutshamu go basa ni zvikhato zva kortina ku tirisilwe a 100 wa titalenta; a 100 wa zvikhato zvi wa ringana 100 wa titalenta, talenta yin’we hi cikhato.+ 28 I no maha tihuka ta timhandze hi 1775 wa maxekeli, a nameketa prata le hehla ka tona, a ti tlhavinyeta.

29 A kobre ya munyikelo* yi wa hi 70 wa titalenta ni 2400 wa maxekeli. 30 Hi kobre leyo, i no maha a zvikhato zva nyangwa ya tenda ga mutlhangano, ni alati ga kobre, ni citlhata ca kobre, ni zvibya zvontlhe zva alati, 31 ni zvikhato lezvi zvi nga randzele a tsendzele, ni zvikhato zva laha nyangweni ya tsendzele, ni zvikhongwani zva tabhernakeli ni zvontlhe zvikhongwani zva tenda+ zvi nga randzele a tsendzele.

39 Va no maha tinguwo ti rungilweko khwatsi hi tihindza ta azuli, ni woya go pswhuka,+ ni tihindza to pswhuka, kasi ku tira hi tona lomu wutshan’wini go basa. Va no maha a tinguwo to basa ta Aroni,+ kota lezvi Jehovha a nga leletele Mosi.

2 I no maha a efodhe+ hi ouro, ni tihindza ta azuli, ni woya go pswhuka, ni tihindza to pswhuka, ni wukene* ga ginene gi lukilweko. 3 Va no betha a zvixapana zvo hlonga hi ouro, lezvi a nga zvi tsemelela zvi maha tifio kasi a ti luka ni tihindza ta azuli, ni woya go pswhuka, ni tihindza to pswhuka, ni wukene* ga ginene zvi tlhela zvi bhordhariwa. 4 Va no maha zvingotana zvi nga hundza hi lomu makatleni kasi zvi khoma a efodhe; zvi wa yi tlhanganisa hi lomu tichokeni ta yona ta timbiri ta le hehla. 5 A libhandi li lukilweko, leli li nga tshama laha ka efodhe kasi ku yi boha yi tiya wutshan’wini ga yona,+ lonawu li wa mahilwe hi zvilo zvalezvi zva zvin’we: Ouro, ni tihindza ta azuli, ni woya go pswhuka, ni tihindza to pswhuka, ni wukene* ga ginene gi lukilweko khwatsi, kota lezvi Jehovha a nga leletele Mosi.

6 Va no veketela a maribye ya onikisi lomu ka zvimanyiso zva ouro va gumesa va kehla a mavito ya vana va Izrayeli a ku khwatsi hi lezvi va kehlisako zvona a cifungo.+ 7 I no ma vekela lomu ka zvipandze zva efodhe zva lomu makatleni kota maribye ya cialakanyiso ka vana va Izrayeli,+ kota lezvi Jehovha a nga leletele Mosi. 8 Hi kulandzela, i no maha a phaketi ga laha cifuveni+ gi fana ni efodhe, wu nga ntiro wa mubhordhari, hi ouro, ni tihindza ta azuli, ni woya go pswhuka, ni tihindza to pswhuka, ni wukene* ga ginene gi lukilweko.+ 9 Gi wa hi kwadradho loku gi petsilwe. Va no maha a phaketi ga laha cifuveni ga ku loku gi petsilwe, gi wa hi ni palmo gin’we* a kuleha ni kuanama. 10 Va no folisa mune wa tilinya ta maribye laha ka gona. A linya yo sangula yi wa hi ya rubhi, ni topazi, ni esmeraldha. 11 A linya ya wumbiri yi wa hi ya turkeza, ni safira, ni jasperi. 12 A linya ya wunharu yi wa hi ya ribye ga léshem,* ni agata, ni ametista. 13 A linya ya wumune yi wa hi ya krizolite, ni onikisi, ni jadhe; ma wa tiyisilwe hi zvimanyiso zva ouro. 14 A maribye lawo ma wa ringana a mavito ya 12 wa vana va Izrayeli. A mavito lawo ma wa kehlilwe a ku fana ni cifungo, a vito gin’we ni gin’wani na gi yimela a lixaka lin’we ka leti ta 12.

15 Va no maha zvichinana zvi lukilweko zva phaketi ga laha cifuveni, zvo fana ni tingoti ta ouro ya yinene.+ 16 Va no maha a zvimanyiso zvimbiri zva ouro ni masindza mambiri ya ouro, va manya a masindza lawo ya mambiri lomu tichokeni timbiri ta phaketi ga laha cifuveni. 17 Andzhako ka lezvo, va no nghenisa a tingoti leto ta timbiri ta ouro lomu ka masindza mambiri lawa ma nga hi lomu tichokeni ta phaketi ga laha cifuveni. 18 Va no nghenisa a tingoti leto ta timbiri hi lomu ka zvimanyiso zvimbiri va zvi boha hi le phambeni ka zvipandze zvimbiri zva efodhe zva lomu makatleni. 19 Hi kulandzela, va no maha masindza mambiri ya ouro va ma vekela lomu tichokeni timbiri ta phaketi ga laha cifuveni hi lomu ndzeni, hi tlhelo legi gi cuwukeneko ni efodhe.+ 20 Hi kulandzela, va no maha masindza man’wani ya mambiri hi ouro va ma veka le mahlweni ka efodhe hi lahasi ka zvipandze zvimbiri zva lomu makatleni kusuhani ni laha zvi tlhanganako kona, hi le hehla ka libhandi li lukilweko la efodhe. 21 Hi kugumesa, va no bohelela a phaketi ga laha cifuveni hi lingoti la azuli hi lomu ka masindza ya gona liya lomu ka masindza ya efodhe kasi a phaketi ga laha cifuveni giva wutshan’wini ga gona laha ka efodhe, hi le hehla ka libhandi li lukilweko, kota lezvi Jehovha a nga leletele Mosi.

22 Hi kulandzela, i no maha a nghanju yo kala mawoko ya efodhe, yi lukilweko yontlhe hi tihindza ta azuli, wu nga ntiro wa muluki.+ 23 A bhoxo ga nghanju yo kala mawoko gi wa hi laha cikari na cikari a ku fana ni bhoxo ga cikatawu ca simbi. A bhoxo ga kona gontlhe gi wa bhordharilwe kasi gi nga handzuki. 24 Hi kulandzela, va no maha a maromã hi le hasi ka nghanju yo kala mawoko hi tihindza ta azuli, ni woya go pswhuka, ni tihindza to pswhuka ti lukilweko zvin’we. 25 Va no maha a vanyangende* hi ouro ya yinene va va vekela cikari ka maromã zvi rendzelekela kontlhe le hasi ka nghanju yo kala mawoko. 26 Va no vekela nyangende ku landzela a romã, ku gamela nyangende ku landzela a romã kambe, zvi rendzelekela lomu mbhirini yontlhe ya le hasi ka nghanju yo kala mawoko, leyi yi nga bohiwa kasi ku maha a ntiro wa wupristi, kota lezvi Jehovha a nga leletele Mosi.

27 Va no mahela Aroni ni vana vakwe a tinguwo to leha hi wukene* ga ginene, wu nga ntiro wa muluki,+ 28 ni turbhanti*+ hi wukene* ga ginene, ni zva ku fenengeta tihloko zva ku ti sasekisa hi zvona hi wukene ga ginene,+ ni zvimolowani*+ hi wukene ga ginene gi lukilweko, 29 ni bhandi hi wukene* ga ginene gi lukilweko, ni tihindza ta azuli, ni woya go pswhuka, ni tihindza to pswhuka ti rungelweko zvin’we, kota lezvi Jehovha a nga leletele Mosi.

30 Hi kugumesa, va no maha a cixapana co phatima hi ouro ya yinene, ci nga cikombiso co basa ca kutinyikela,* va guma va kehla laha ka cona, a ku khwatsi hi loku a munhu a kehla cifungo, va tsala magezu lawa: “A kubasa ku lumba Jehovha.”+ 31 Va no ci bohelela a lingoti li mahilweko hi tihindza ta azuli kasi va ci vekela laha ka turbhanti,* kota lezvi Jehovha a nga leletele Mosi.

32 Hi ndlela leyo, a ntiro wontlhe wa tabhernakeli, gi nga tenda ga mutlhangano, wu no mbhela. A vaIzrayeli va no maha zvontlhe lezvi Jehovha a nga leletele Mosi.+ Va no zvi mahisa zvalezvo.

33 Makunu va no neha a tabhernakeli+ ka Mosi, a tenda+ ni zvontlhe a zvibya zva gona: a zvihariketo zva gona,+ ni makwadru* ya gona,+ ni tivalelo ta gona,+ ni timhandze ta gona, ni zvikhato zva gona;+ 34 ni cifenengeto ca gona ca mabhebhe ma pendilweko ma pswhuka,+ ni cifenengeto ca gona ca mabhebhe ya macalo,* ni kortina ga ku hambanisa;+ 35 ni Arke ga Wukustumunyu, ni mipingu+ ya gona, ni tapa ya gona;+ 36 ni meza ni zvontlhe a zvibya zva yona,+ ni tipawa ta munyikelo; 37 ni nenge wa tikandiya wo mahiwa hi ouro ya yinene, ni tikandiya ta kona,+ ku nga tikandiya leti ti xaxametilweko, ni zvontlhe a zvibya zva wona,+ ni mafura ya tikandiya;+ 38 ni alati+ ga ouro, ni mafura ya ku tota,+ ni libani lo nuhela,+ ni kortina+ ga laha nyangweni ya tenda; 39 ni alati ga kobre,+ ni citlhata ca kona ca kobre, ni mipingu ya gona,+ ni zvontlhe a zvibya zva gona,+ ni basiya ni cikhatelo ca kona;+ 40 ni makortina ya laha tsendzeleni,* ni mapilari ni zvikhato zva kona,+ ni kortina+ ga laha nyangweni ya tsendzele, ni tingoti ta kona, ni zvikhongwani zva kona,+ ni zvontlhe a zvibya zva ntiro wa tabhernakeli, zva tenda ga mutlhangano; 41 ni tinguwo ti rungilweko khwatsi ta ku tira hi tona lomu wutshan’wini go basa, a tinguwo to basa ta mupristi Aroni+ ni tinguwo ta vana vakwe kasi va tira hi tona kota vapristi.

42 A vaIzrayeli va no maha a ntiro wontlhe lowu Jehovha a leleteleko Mosi lezvaku va wu maha.+ 43 A cikhati leci Mosi a nga hlola a ntiro wabye, i no wona lezvaku va wa mahisile zvalezvi Jehovha a nga va leletelisile zvona. Mosi i no va katekisa.

40 Makunu Jehovha i no byela Mosi, aku: 2 “Hi siku go sangula ka hweti yo sangula u ta yimisa a tabhernakeli, ku nga tenda ga mutlhangano.+ 3 Veka a Arke ga Wukustumunyu lomo,+ u bhiyela a Arke hi kortina.+ 4 U ta nghenisa a meza+ lomo u veketela zvilo zva yona hehla ka yona. U ta nghenisa ni nenge wa tikandiya+ u gumesa u lumeka tikandiya ta kona.+ 5 Andzhako ka lezvo, u ta veka a alati ga ouro+ mahlweni ka Arke ga Wukustumunyu kasi ku hisela ka gona a libani, u veka kortina ga laha nyangweni ya tabhernakeli wutshan’wini ga gona.+

6 “U ta veka a alati ga munyikelo wa kuhiswa+ mahlweni ka nyangwa ya tabhernakeli, ku nga tenda ga mutlhangano, 7 u veka a basiya cikari ka tenda ga mutlhangano ni alati, u chela mati ka yona.+ 8 Maha tsendzele*+ wu randzela a tabhernakeli u tlhela u vekela kortina+ ga laha nyangweni ya tsendzele. 9 Hi kulandzela, teka a mafura ya ku tota+ u tota a tabhernakeli ni zvontlhe zvi nga ka gona,+ u gi basisa ni zvontlhe zvibya zva gona kasi giva nchumu wu basileko. 10 U ta tota a alati ga munyikelo wa kuhiswa ni zvontlhe zvibya zva gona, u gi basisa kasi giva alati go basabasa.+ 11 Tota a basiya ni cikhatelo ca kona hi mafura, u zvi basisa.

12 “Andzhako ka lezvo, u ta tshineta Aroni ni vana vakwe laha nyangweni ya tenda ga mutlhangano, u va hlazva hi mati.+ 13 U ta mu bohisa a tinguwo to basa+ Aroni u tlhela u mu tota,+ u mu basisa kasi a ndzi tirela kota mupristi. 14 Andzhako ka lezvo, u ta tshineta a vana vakwe u va bohisa tinghanju to leha.+ 15 U ta va tota hi mafura, a ku fana ni lezvi u nga mu totisa zvona a papayi wabye,+ kasi va ndzi tirela kota vapristi. A kutotiwa kabye ku ta va maha va simama kuva vapristi kala kupindzuka zvizukulwaneni zvabye zvontlhe.”+

16 Mosi i no maha zvontlhe lezvi Jehovha a nga mu leletele.+ I no zvi mahisa zvalezvo.

17 Hi siku go sangula, ka hweti yo sangula, hi lembe ga wumbiri, a tabhernakeli gi no yimiswa.+ 18 A cikhati leci Mosi a nga yimisa a tabhernakeli, i no veka a zvikhato zva gona+ lahasi, a yimisa makwadru,*+ a tlhomeka tivalelo ta gona+ a gumesa a yimisa timhandze ta gona. 19 I no gwimba tenda+ le hehla ka tabhernakeli, a vekela cifenengeto+ ca tenda hi le hehla ka gona, kota lezvi Jehovha a nga leletele Mosi.

20 Andzhako ka lezvo, i no teka a Kustumunyu+ a yi chela lomu ka Arke.+ I no tlhomeka mipingu+ laha ka Arke, a vekela tapa+ hehla ka Arke.+ 21 I no neha Arke lomu tabhernakelini, a tlhela a vekela a kortina+ ga ku hambanisa laha wutshan’wini ga gona, gi bhiyela a Arke ga Wukustumunyu,+ kota lezvi Jehovha a nga leletele Mosi.

22 Hi kulandzela, i no veka a meza+ lomu ka tenda ga mutlhangano hi tlhelo ga n’walungu* ga tabhernakeli hi le handle ka kortina; 23 i no veketela tipawa ti tlhatekelana+ laha mezeni mahlweni ka Jehovha, kota lezvi Jehovha a nga leletele Mosi.

24 I no veka a nenge wa tikandiya+ lomu tendeni ga mutlhangano hi le phambeni ka meza hi tlhelo ga le dzongeni* ga tabhernakeli. 25 I no lumeka tikandiya+ mahlweni ka Jehovha, kota lezvi Jehovha a nga leletele Mosi.

26 Hi kulandzela, i no veka a alati ga ouro+ lomu tendeni ga mutlhangano mahlweni ka kortina, 27 kasi ku hisa a libani lo nuhela+ hehla ka gona,+ kota lezvi Jehovha a nga leletele Mosi.

28 Andzhako ka lezvo, i no vekela a kortina+ ga laha nyangweni ya tabhernakeli laha wutshan’wini ga gona.

29 I no veka a alati ga munyikelo wa kuhiswa+ laha nyangweni ya tabhernakeli, ku nga tenda ga mutlhangano, kasi a nyikela ka gona a munyikelo wa kuhiswa+ ni munyikelo wa tindzhoho, kota lezvi Jehovha a nga leletele Mosi.

30 Hi kulandzela, i no veka basiya cikari ka tenda ga mutlhangano ni alati a chela mati yo hlamba hi wona.+ 31 Mosi, na Aroni ni vana vakwe va no hlamba mandla ni mikondzo yabye lomu ka yona. 32 Ni cihi cikhati va ngaya tendeni ga mutlhangano kutani ku tshinela laha alatini, va wa hlamba,+ kota lezvi Jehovha a nga leletele Mosi.

33 Hi kugumesa, i no maha tsendzele*+ wu randzela a tabhernakeli a tlhela a vekela kortina ga laha nyangweni ya tsendzele.+

Hi ndlela leyo, Mosi i no mbheta a ntiro. 34 A refu gi no fenengeta a tenda ga mutlhangano, ni kungangamela ka Jehovha ku no tata tabhernakeli.+ 35 Mosi i wa nga zvi koti ku nghena lomu tendeni ga mutlhangano, hakuva a refu gi wa hi hehla ka gona, ni kungangamela ka Jehovha ku wa tatile a tabhernakeli.+

36 Loku a refu gi suka hehla ka tabhernakeli, a vaIzrayeli va wo suka laha va nga govile kona, ka zvontlhe zvigava zva liendzo labye.+ 37 Kanilezvi loku a refu gi nga suki, vonawu va wa nga suki kala ka siku legi a refu gi sukako hi gona.+ 38 Ni mumu a refu ga Jehovha gi wa hi hehla ka tabhernakeli, kanilezvi ni wusiku ku wa tshama ndzilo hehla ka gona, na zvi woniwa hi yontlhe yindlu ya ka Izrayeli ka zvontlhe zvigava zva liendzo labye.+