Ti Kholwa Yini a Timboni ta Jehova ke?

“Ha zi ranza a kuzwa ha wena lezi u zi alakanyako; hakuva hi kukumbuka a lihunzu lolu, ha zi tiva lezaku la kanetiwa matlhelweni wontlhe.” (Mitiro 28:22) Varangeli lavo va muti wa Roma wa zana go sangula ga malembe va nyikile xiwonelo xi nene. Vona va wa ranza ku zizwa hi ka xibuka, na ku nga hi hi ka vasoli va le handle ka mhaka ntsena.

Ku khwatsi hi lezo, zikhati zinyingi, nyamutlha, ku wulawulwa za hava hi Timboni ta Jehova. Ku wa tava xihoxo ku rinzela ku tiva lisine hi tona hi ka zibuka zi wumbileko maalakanyo ya hava. Zinghaho, ha tsaka hi ku ku tlhamusela zinwe za lezi zi nga kukholwa ka hina ka hombe.

Biblia, Jesu Kristu na Nungungulu

Hina hi kholwa lezaku “yontlhelele mitsalo yi pimisilweko vanhu hi Nungungulu ya vuna”. (2 Timote 3:16) Niku, hambu lezi vanwani va wulileko lezaku hina hakunene a hi makristu, lezo a hi lisine. Hina hi nyika hi kumbheleleko wukustumunyu ga mupostoli Pedro xungetano hi Jesu Kristu: “A ku na vito ginwani lahasi ka tilo, legi gi nyikilweko xikari ka vanhu, legi hi nga hanyiswako ha gona.” — Mitiro 4:12.

A ka zontlhe lezo, kota lezi Jesu a nga ku ngalo yena i “N’wana wa Nungungulu” niku ‘Dadani a nga nzi ruma’, a Timboni ta Jehova ti kholwa lezaku Nungungulu ngwa hombe ku hunza Jesu. (Johani 10:36; 6:57) Jesu wutsumbu i tivisisile: “Dadani ngwa hombe a ku hunza mina.” (Johani 14:28; 8:28) Zinghaho, a hi kholwi lezaku Jesu i fanana na Dadani, kota lezi yi wulako a gonzo ya Vanharu-munwe. Ahandle ka lezo, hina hi kholwa lezaku yena i vangilwe hi Nungungulu niku Jesu i lahasi ka Nungungulu. — Va Le Kolosi 1:15; 1 Va Le Korinte 11:3.

Hi lirimi la Xitshwa, a vito ga Nungungulu hi Jehova. A Biblia gi ngalo: “Hi wena wece u nga ni vito ga Jehova, loyi a Hunzeleleko Kutlakuka misaveni yontlhe.” (Tisimu 83:18) Maringano ni mhaka leyi, Jesu i tshingisile nguvu a vito ga Nungungulu, hi ku gonzisa valanzeli vakwe a ku khongela: “Dadani wa hina wa le tilweni, a vito ga wena a gi hlawuliwe.” Niku yena wutsumbu i khongele ka Nungungulu: “Nzi wonekelisile a vito ga wena ka vanhu lava u va tekileko tikweni u nzi nyika vona.” — Mateu 6:9; Johani 17:6.

A Timboni ta Jehova ti kholwa lezaku ti fanele ku pimanyisa Jesu kuwonekeliseni ka vito ni makungo ya Nungungulu ka vanwani. Hi kota ya lezo, hi tekile a vito ga ku Timboni ta Jehova hakuva hi pimanyisa Jesu, “a kustumunyu a tsumbekileko”. (Kuvululelwa 1:5; 3:14) Hi kufaneleko, Isaya 43:10 i ngalo ka vanhu lava va yimelako Nungungulu: “Nwina mu timboni ta mina, ku wula Jehova; mu nanza ga mina legi nzi gi hlawuleko.”

Mufumo wa Nungungulu

Jesu i gonzisile valanzeli vakwe a ku khongela: “A wute mufumo wa wena”. Yena i mahile lezaku a Mufumo lowo wuva hloko ya mhaka ya hombe ya gonzo yakwe. (Mateu 6:10; Luka 4:43) A Timboni ta Jehova ti kholwa lezaku a Mufumo i wukosi ga lisine gi nga le tilweni, lowu wu to fuma misava, niku Jesu Kristu hi yena a yimisilweko kuva Hosi ya wona leyi yi nga wonekiko. “A wuhosi gi vekilwe makatleni yakwe”, ku wula Biblia. “A kufuma kakwe ku ta enzeleka, ni kurula ku nga ta kuva na magumo.” — Isaya 9:6, 7.

A ka zontlhe lezo, Jesu Kristu a nga ta fuma yece wukosini ga Nungungulu. Yena i tava ni vafumeli kuloni vanyingi le tilweni. “Loku hi timisela”, ku tsalile mupostoli Paule, “hi ta fuma zinwe naye”. (2 Timote 2:12) A Biblia gi komba lezaku a ntsengo wa vanhu lava va vuxwako hi ka vafileko kasi ku fuma na Kristu le tilweni wu gumesa ka “144,000, lava va xabyilweko misaveni”. — Kuvululelwa 14:1, 3.

Hakunene, ni wihi mufumo wu fela kuva ni vafumelwi. A Timboni ta Jehova ti kholwa lezaku, ahandle ka vafumeli lavo va le tilweni, tibilioni ta vanwani vanhu ti ta kuma wutomi ga pinzukelwa. Hi ku gumesa, a misava, leyi yi to ngha yi hunzulusilwe yiva paradise yo saseka, yi ta tala hi vafumelwi lava va faneleko va Mufumo wa Nungungulu, vontlhe na va ti veka hasi ka wufumeli ga Kristu ni vafumeli kuloni vakwe. Zinghaho, a Timboni ta Jehova ti kholwa hi kutiyileko lezaku a misava cima yi nga ta hahlulwa, niku a xitsumbiso xa Biblia xi ta tatiseka: “A valulamileko va taga tshomba ya tiko, va aka ka gona kala kupinzuka.” — Tisimu 37:29; 104:5.

Kanilezi, wu ta tisa kuyini a Mufumo wa Nungungulu? Hi ku vontlhe vanhu va ti veka hasi ka wukosi ga Nungungulu hi ku ranza ke? Hi ku hambana ni lezo, a Biblia gi komba hi kutiyileko lezaku a kuta ka Mufumo ku ta lava a ntiro wa Nungungulu lomu timhakeni ta misava: “Nungungulu wa le tilweni i ta vuxa a mufumo wu to kala wu nga lobyiswi, ni wuhosi ga wona . . . wu ta panza wu lovisa yontlhe mifumo leyi, wona wu ku tsonzoma kala kupinzuka.” — Danieli 2:44.

Wu tata rini Mufumo wa Nungungulu? Hi ku seketelwa hi ziprofeto za Biblia zi tatisekako nyamutlha, a Timboni ta Jehova ti kholwa lezaku wona wu tata zalezi. Hina ha ku ramba a ku hlola ziprofeto zo kari lezi hi mahlweni zi wulako hi matshamela ya ‘masiku yo gumesa’ ya mafambisela lawa ya zilo ya kubiha. Zona zi tsalilwe lomu ka Mateu 24:3-14; Luka 21:7-13, 25-31 na 2 Timote 3:1-5.

Kota lezi hi ‘ranzako Hosi Nungungulu wa hina hi mbilu ya hina yontlhe, muhefemulo, kupima ni ntamu, ni wakelene wa hina kota lezi hi ti ranzako hina’, hina a hi phakani hi kota ya tiko, muhlowo ni wuhlengeli. (Marku 12:30, 31) Hina hi tiviwa hi kuanzileko hi kota ya liranzo leli li kombiswako xikari ka vamakabye va hina va wukristu, va kumekako matikweni wontlhe. (Johani 13:35; 1 Johani 3:10-12) Zinghaho, hina a hi mahi xipanze timhakeni ta wupolitika ta matiko lawo. Hi zama ku kota vapizani vo sangula va Jesu, lava a nga ku ngalo ha vona: “A hi va tiko, kota lezi mina nzi nga hiko wa tiko.” (Johani 17:16) Hina hi kholwa lezaku ku tsawukana ni tiko zi wula ku potsa hanyela ga hava gi tolovelekileko nguvu nyamutlha, zinwe ni kuhemba, kuyiva, wurembi, wubhayi, kuetlelana ka wanuna ni wanuna, kutirisa ka hava ka nkhata, kukhozela zifananiso ni zilo zinwani za kunghahi, zi kanetiwako lomu ka Biblia. — 1 Va Le Korinte 6:9-11; Va Le Efesusi 5:3-5; Mitiro 15:28, 29.

Kurinzela ka Xikhati Xitako

A Timboni ta Jehova ti kholwa lezaku a wutomi ga hina ga xikhati lexi lomu tikweni legi a hi zontlhe zi nga kona. Hina hi kholwa lezaku Jehova i rumele Kristu misaveni kasi ku ta halata nkhata wakwe wu hanyisako kota nzhiho, lezaku vanhu va zi kota kuva ni xiyimo xi lulamileko mahlweni ka Nungungulu ni ku amukela wutomi ga pinzukelwa mafambiselweni maswa ya zilo. Kota lezi ku wulileko mupostoli wo kari wa Jesu: ‘Makunu hi hlayelwe kululama hi kota ya nkhata wakwe.’ (Va Le Roma 5:9; Mateu 20:28) A Timboni ta Jehova ti bonga Nungungulu ni N’wana wakwe hi kuetileko hi kota ya kulongiselwa ka nzhiho lowu wu mahako lezaku a wutomi ga xikhati xitako gi koteka.

A Timboni ta Jehova ti na ni kutiya ko mbhelela hi wutomi ga xikhati xitako, gi seketelwako kuvukeni hi ka vafileko, hasi ka Mufumo wa Nungungulu. Kota lezi a Biblia gi gonzisako, hina hi kholwa lezaku a kuva kona ka munhu hakunene ku gumesa laha yena a fako. Hi kholwa lezaku ‘ku mbhela makungo yakwe hi gwalego siku’. (Tisimu 146:3, 4; Ezekieli 18:4; Mutshawuteli 9:5) Ina, a wutomi ga xikhati xitako ga vafileko gi seketelwa kualakanyweni kabye hi Nungungulu kuvuxweni ka vafileko. — Johani 5:28, 29.

Hambu lezo, a Timboni ta Jehova ti kholwa lezaku vanyingi va hanyako makunu va ta pona laha Mufumo wa Nungungulu wu ta nga mbheta yontlhe mifumo ya xikhati lexi niku, kota lezi Noa ni ngango wakwe va nga pona Ntalweni, vona va ta hanya kasi ku tsakela wutomi ga pinzukelwa misaveni yi basisilweko. (Mateu 24:36-39; 2 Pedro 3:5-7, 13) Kanilezi, hina hi kholwa lezaku a kupona ku yelana ni ku munhu a tatisa lezi Jehova a zi lavako, kota lezi a Biblia gi wulako: “A tiko ga hunza, . . . kanilezi loyi a mahako kuranza ka Nungungulu i ta tshama kala kupinzuka.” — 1 Johani 2:17; Tisimu 37:11; Kuvululelwa 7:9, 13-15; 21:1-5.

Zi te dlunya lezaku a zi koteki ku wulawula laha hi kontlhe kukholwa ka Timboni ta Jehova, kanilezi hina ha ku ramba ku kuma manwani mahungu.

A handle ka xinwani xikombiso, yontlhe mitsalo yi susilwe ka A Biblia Go Basa.

[Magezu yo koka kupima ka phajina 4]

Hina hi tekile a vito ga ku Timboni ta Jehova hakuva hi pimanyisa Jesu.