XIPANZE 2
U nga gonzisa kuyini zinene hi Nungungulu?
1, 2. Mufananiso muni wu kombako a kulaveka ka xikombiso kasi ku tsema timhaka hi wukhongeli?
HI NGA mu tivisa kuyini Nungungulu? Xana kulaveka ku kambisisa tontlhe tigonzo ta wukhongeli gi tsalangeneko? Lezo zi wa nga ta koteka. Hambu loku hi wa zi kota ku maha lezo, hi wa ta yi tivisa kuyini a gonzo yi lulamileko?
2 Hakunene, hi kota ya wontlhe maalakanyo yo hambana xungetano hi Nungungulu, hina hi lava a ndlela ya ku tiva aku hi lihi lisine, xikombiso lexi vanhu va zi kotako a ku xi vumela. Kasi ku fananisa: Hi nga alakanya a kukanetisana bazarini xungetano hi ku leha ka xipanze xa nguwo. Muxavisi i ngalo a nguwo yi na ni timetro tinharu, kanilezi muxavi i alakanya lezaku a yi chikeli lomo. Yi nga lamuliswa kuyini mhaka leyi? Hi ku pima a nguwo hi nhonga ya metro.
3. Hikuyini ku tsalilweko a Biblia?
3 Xana li kona lipimo, a xikombiso, kasi ku tsema timhaka hi wukhongeli? Ina, lona hi Biblia. Nungungulu i tsalisile a Biblia kasi vanhu matlhelweni wontlhe va zi kota ku gonza zinene ha yena. Ku gandlilwe tibiliyoni ta tikopiya. Gona gi hunzuluselwe, hi kumbhelela hambu hi zipanze, hi tirimi ti hunzako 2.100. Kusuhani ka vontlhe vanhu va zi kota ku gonza zinene hi Nungungulu hi tirimi tabye.
4. Mahungu muni ma nga kona lomu ka Biblia?
4 A Biblia xinyikiwo xa lisima xi tako hi ka Nungungulu. Gona gi hi tlhamusela zilo lezi zaku hi yinwani ndlela cima ngha hi nga zi tivangi. Gi wulawula hi lava va hanyako kufumeni ka moya. Gi komba maalakanyo ya Nungungulu, wumunhu gakwe ni khungo gakwe. Gi hlawutela lezi a nga tirisanisa zona ni vanhu hi ku hunza ka makume ya mazana ya malembe. Gi wulawula hi zilo lezi zi to maheka xikhatini xi tako. Niku gi komba aku hi nga kumisa kuyini a ndlela yi yako wutomini ga pinzukelwa.
Xigelo xa ku kholwa hi Biblia
5. Xikombiso muni xi kustumunyako aku a Biblia ga zwanana ni siyensiya?
5 Zi kona zigelo zinyingi zaku hina hi kholwa aku a Biblia hakunene i Mhaka ya Nungungulu. Xigelo xinwe hiku a Biblia ga zwanana ni siyensiya. Zikhatini za kale vanhu misaveni va wa alakanya lezaku a Misava yi tshamile hehla ka nchumu wo kari. Hi xikombiso, vanhu le Muhlwa-gambo wa Afrika va wa kholwa lezaku a Misava yi seketelwa hi nyoka yi ti tsonzeleleko, na yi ti tsonzelele 3.500 wa makhati hehla ka Misava ni 3.500 wa makhati hasi ka Misava. Kanilezi, hi ku zwanana ni siyensiya, ka hunza 3.500 wa malembe na mutsali wa Biblia a tsalile ku ngalo Nungungulu i “hayeka misava laha ndengelengeni.” — Joba 26:7.
6. Hi gihi wukustumunyu ga hombe nguvu gaku a Biblia gi ta hi ka Nungungulu?
6 A wukustumunyu ga hombe nguvu gaku a Biblia hakunene gi ta hi ka Nungungulu hiku gi wula hi kumbheleleko hi wumanziko na ga ha hi mahlweni. Hi ku hambana ni lezi zi wuliwako hi vanhu hi mahlweni, Nungungulu wa gi tiva wumanziko hakunene; zontlhe lezi a zi wulako za maheka xontlhe xikhati.
7. Hi zihi ziprofeto zokari za Biblia zi tatisekileko xikhatini xi hunzileko?
7 Mazana ya ziprofeto za Biblia ma tatisekile zikhatini za kale. Kota xikombiso, hi 700 wa malembe mahlweni, a Biblia gi wulile gi tiyisa aku Jesu i wa ta pswalwa mutini wa Betlehema, niku hi zona zi nga maheka. (Mika 5:2; Mateu 2:3-9) Ahandle ka zinwani ziprofeto xungetano hi Jesu, a Biblia kambe gi wulile hi le mahlweni giku yena i wa ta pswalwa hi nhwana niku hi kugumesa i wa ta tokometwa hi 30 wa zipanze za siliva. Ziprofeto lezo kambe zi tatisekile. Hi lisine, a ku na munhu ni munwe a nga wa ta zi kota ku wula zilo lezo hi le mahlweni! — Isaya 7:14; Zakaria 11:12, 13; Mateu 1:22, 23; 27:3-5.
8. Hi zihi ziprofeto zokari za Biblia zi tatisekako nyamutlha niku zi komba yini?
8 Ziprofeto zinyingi za Biblia za tatiseka xikhatini xa hina. Zokari hi lezi:
“A tiko gi ta vukela tiko [hi yimpi], ni mufumo wu ta vukela mufumo. Ku tava kona kutsekatseka ka hombe ka misava, ni ka matshamu ma tsalangeneko ku tava kona tindlala ni mitungu.” — Luka 21:10, 11.
Ku wa tava kona “kuenzeleka ka kuonha.” — Mateu 24:12.
“Masikwini yo gumesa . . . vanhu va ta ti ranza wutsumbu, a varanzi va mali, . . . a va nga ingisiko vapswali vabye, . . . lava va nga tiviko ku ti khoma, lava va lunya, lava va nga ranziko zinene, . . . va ti kukumukisako, lava va ranzako ku ti tsakisa ku hunza ku ranza Nungungulu.” — 2 Timote 3:1-5.
A ku kholwi lezaku zilo lezi za maheka makunu? A lisine ni kumbhelela ka ziprofeto za Biblia zi komba lezaku a Biblia a hi bhuku go toloveleka. Gona i Mhaka yi pupuxelweko ya Nungungulu! — 2 Timote 3:16.
Gi cicilwe a Biblia ke?
9, 10. Xini xi kombako aku Nungungulu a nga vumelangi lezaku vanhu va cica a Biblia?
9 Hi nga alakanya lezaku wena u nwinyi wa komponi niku u xaxametile zileletelo ka vatiri va wena. U wa ta maha yini loku nala wo kari a cicile lezi u tsalileko? A wu nga ta lulamisa lezi zi cicilweko? Hi ndlela leyo, Nungungulu a nga vumeli lezaku vanhu va cica zinene za Mhaka yakwe, a Biblia.
10 Lava va ringileko ku cica a tigonzo ta Mhaka ya Nungungulu a va humelelangi. Loku hi fananisa a Biblia hi nga nago nyamutlha ni tikopiya ta kale ta Biblia, tona ta fanana. Lezi zi komba lezaku a Biblia a gi ciciwangi hi ku famba ka malembe.