“Loku Kingsley a zi kota, minawu nzi nga zi kota!”

HI KU phakatiwa katla, Kingsley i lo sangula kugonza kakwe ka Biblia — ku nga xiavelo xakwe xo sangula ka Xikola xa Wutireli ga Nungungulu lomu bandleni. I humesa khwatsi a magezu wontlhe, na a nga tluli ni silabha ginwe. Kanilezi hi nga nyima! Hikuyini a kalako a nga cuwuki a Biblia gakwe?

Kingsley, a hanyako Sri Lanka, xikhumu. A nga ingisi khwatsi niku i fambafamba hi xitulo xa maroda. Makunu, a wanuna loyi i gonzisile kuyini hi Jehova a tlhela a ringanelwa hi ku ti tsalela ka Xikola xa Wutireli ga Nungungulu? Khwatsi nzi ku hlawutela.

A siku go sangula nzi nga kuma Kingsley, nzi hlamele nguvu hi tora a nga hi nago ga ku lava lisine. I wa sina a gonzile Biblia ni Timboni to tala, niku a bhuku gakwe ga Conhecimento Que Conduz à Vida Eterna hi xiBraile gi wa hlakele.a I lo vumela xirambo xa mina xa ku vuxa xigonzo, kanilezi hi wa hi ni zikarato zimbiri.

Xo sangula, Kingsley i wa tshama ni vanhu vo tala mutini wa vakhosaheleko ni zilema. Hi kota ya guwa ni lezi Kingsley a nga kala a nga ingisi khwatsi, nzi wa fanele ku tlakusa nguvu gezu. Hi lisine, vontlhe laha kaya va wa zi kota kuzwa a xigonzo xa hina xa viki ni viki!

Xa wumbiri, Kingsley i wa lera ni ku zwisisa mahungu ma tsongwani ntsena ka xigonzo xinwe ni xinwani. Kasi a xigonzo xa hina xi bhinzula nguvu, Kingsley i wa vuxeta zi buva. I wa lera hi mahlweni a mahungu ya xigonzo a tlhela a phinda, a gonza mitsalo ka Biblia gakwe ga xiBraile, a guma longoloxa a mihlamulo ya ziwutiso yi tshama hlokweni yakwe. A mahela legi gi vunile nguvu. Xigonzweni xa hina, i wa tshama ka sango a khoza milenge yi hingakanyana, aba lahasi hi kutsaka a xikhati a tlhamuselako hi gezu go tlakuka lezi a zi gonzileko. Na zi nga seya kule, hi lo sangula ku gonza makhati mambiri hi viki, niku a xigonzo xinwe ni xinwani xi wa mbheta tihora timbiri!

MITLHANGANO NI MIHLAMULO

Kingsley i wa xuva nguvu kuya mitlhanganweni Salawini ya Mufumo, kanilezi zi wa nga olovi. A ku tshama ni ku suka ka xitulo xakwe xa maroda, ku nghena ni ku huma moveni ni lomu Salawini ya Mufumo, zontlhe lezo i wa nga zi koti ku maha ha yece; i wa lava xivuno. Hambulezo, a votala lomu bandleni va waya hi ku cicana kasi ku mu vuna, na va zi wona kota lungelo a ku maha lezo. Lomu mitlhanganweni, Kingsley i wa veka kuluna laha kusuhani ni ndleve yakwe, a ingisela khwatsi a tlhela a nyikela mihlamulo!

Anzhako ka ku gonza hi xikhati xo kari, Kingsley i lo boha ku ti tsalela ka Xikola xa Wutireli ga Nungungulu. Na ku kiyela maviki mambiri kasi ku maha xipanze xakwe xo sangula xa kugonza ka Biblia, nzi lo mu wutisa lezaku wa vuxeta ke. I lo hlamula hi kutiya aku: “Ina makabye, nzi vuxetile xipimo xa 30 wa makhati.” Nzi lo mu bonga hi kutikarata kakwe nzi guma nzi kombela ku muzwa na a lera. I lo vulula a Biblia gakwe, a tlhateka titiho ka maletela lawo ya xiBraile, a sangula ku lera. Kanilezi, nzi lo pola lezaku a titiho takwe ti wa nga fambafambi laha ka phepha lego kota lezi ti nga fanele ku maha. A kugonza kontlhe ka Biblia ku wa hi lomu hlokweni!

Na nzi kari nzi xililika mihloti, nzi lo kaye, nzi cuwukela na nzi nga kholwi. Nzi lo mu wutisa ku i zi kotisa kuyini ku alakanya zontlhe hi ku vuxeta 30 wa makhati basi. I lo hlamula aku: “Ahihi, nzi vuxetile 30 wa makhati hi siku.” Nzeni ka hweti ni ku hunza, Kingsley i wa tshama sangweni gakwe, a gonza mitsalo leyo hi kuphindaphinda kala yi tshama hlokweni.

Makunu, gi lo chikela a siku ga xiavelo xakwe Salawini ya Mufumo. A xikhati a nga mbheta xiavelo xakwe, a bandla gi loba mandla hi kutsaka, niku a votala va lo rila hi ku wona a kutiyimisela ka xigonzani lexi xa xiswa. A muhuweleli wo kari, loyi a nga nyimile ku veka tikanelo xikoleni hi kota ya tingana, i lo kombela ku tlhela a ti tsalela. Hikuyini? I te ngalo: “Loku Kingsley a zi kota, minawu nzi nga zi kota!”

Hi 6 ka Setembro wa 2008, anzako ka malembe manharu na a gonzile a Biblia, Kingsley i lo ti hendleleta ka Jehova a bapatizwa matini. Kota Mboni yi tsumbekileko kala kufeni hi 13 ka Maio wa 2014, Kingsley i wa tiyiseka lezaku misaveni ya paradise i ta simama ku maha ntiro wakwe wo tsumbeka hi ntamu wontlhe ni lihanyo lo mbhelela. (Isa. 35:5, 6) — Ma hlawutelwa hi Paul McManus.