Wa gi wona a woko ga Nungungulu wutomini ga wena ke?

1, 2. Zini lezi a vokari va zi alakanyako hi Nungungulu?

A VANHU vo tala va alakanya lezaku Nungungulu a nga na mhaka ni lezi va mahako. Hi lisine, va alakanya lezaku Nungungulu a nga khatali hi lezi zi humelelako vanhu. Anzhako ka loku a tiko ga Filipinas gi hlaselwe hi xingulu xa hombe xa Haiyan hi Novembro wa 2013, a mwamangulu wa doropa go kari i te ngalo: “Kuzilava ku kona lomu Nungungulu a nga fambele kona.”

² A vanwani va hanyisa ku khwatsi Nungungulu a nga zi woni lezi va mahako. (Isa. 26:10, 11; 3 Joh. 11) Va fana ni vanhu lava Mupostoli Paule a nga wulawula hi vona aku: “Va [lo] ala ku mu tiva Nungungulu.” A vanhu lavo va wa “tele hi kungalulami kontlhe, ni kubiha, ni timbilu, ni matshoho.” — Rom. 1:28, 29.

3. a) Ziwutiso muni hi nga ti mahako xungetano hi Nungungulu? b) A Biblia gi wula yini loku gi wulawula hi “woko” ga Jehova?

³ Hina ke? A ku hambana ni lava va kumbukilweko le hehla, hina ha zi tiva lezaku Jehova wa zi wona zontlhe lezi hi mahako. Kanilezi, xana ha zi wona kambe lezaku wa hi khatalela ni ku hi vuna wutomini ga hina ke? Tlhatakumbiri, xana hi xikari ka lava Jesu a nga wula lezaku “va ta wona Nungungulu” ke? (Mat. 5:8) Kasi ku tiva ku lezo zi wula yini, a hi woneni zikombiso zi tsongwani za Biblia za vanhu va nga wona woko ga Nungungulu ni lava va nga kala ku gi wona. Hi kulanzela, hi ta wona lezi hi nga mahako kasi ku wona khwatsi a woko ga Jehova wutomini ga hina hi mahlo ya kukholwa. A xikhati lexi hi kambisisako timhaka leto, alakanya lezaku loku a Biblia gi wulawula hi “woko” ga Nungungulu gi wula a ntamu wakwe, lowu a wu tirisako kasi ku vuna malanza yakwe ni ku hlula valala vakwe. — Gonza Deuteronome 26:8.

A VA GI WONANGI A WOKO GA NUNGUNGULU

4. Hikuyini a valala va Israeli va nga kala ku wona woko ga Nungungulu?

⁴ Kusanguleni ka matimu ya Israeli, a vanhu vave ni lungelo ga ku wona ni kuzwa xungetano hi lezi Nungungulu a nga va seketelisa zona. Jehova i lo tlhatlhisa vanhu vakwe hi xihlamaliso le Gipite, a tlhela a hlula tihosi ni tihosi mahlweni kabye. (Jox. 9:3, 9, 10) Hambu lezi a tihosi to tala ta le mutsuwuka-gambo wa Jordani ti zwileko ni ku wona lezi Jehova a nga lwelisa zona a vanhu vakwe, ti “lo tsombana hi mbilu yinwe a kulwa na Joxua na Israeli.” (Jox. 9:1, 2) Hambu anzhako ka loku a tihosi leto ti sangulile kulwa ti wa ha hi ni zigelo zontlhe za ku wona a woko ga Nungungulu. Hi kulaya ka Jehova, “a gambo gi lo yima, ni hweti yi lo yima, kala a vanhu va ti photela ka valala vabye.” (Jox. 10:13) Kanilezi, Jehova i lo “nonohisa timbilu tabye a ku vukela Israeli.” (Jox. 11:20) A valala va Israeli va lo ala ku vumela lezaku Nungungulu i kari a va lwela, niku lezo zi lo va maha va hluliwa.

5. Zini lezi a Hosi yo biha Ahabi a nga ala ku zi kholwa?

⁵ Hi kufamba ka xikhati a hosi yo biha Ahabi yive ni malungelo yo tala ya ku wona a woko ga Nungungulu. Elija i lo mu byela lezi: “Cima ku nga tava kona a vula hambu nzhokati, loku ku nga hi gezu ga mina.” (1 Tih. 17:1) Zi wa te dlunya lezaku a magezu lawo ma wata hi ka Jehova, kanilezi Ahabi i lo ala ku zi kholwa. Hi nzhako ka xikhati, Ahabi i lo wona nzilo na wuta hi le tilweni a xikhati lexi Elija a nga khongelela lezaku wuta wu ta hisa a muphahlo wakwe. Hi kulanzela, Elija i lo komba lezaku Jehova i wa ta mbheta xihala lexo, hi ku byela Ahabi aku: “Famba, u nga ta valelwa hi vula.” (1 Tih. 18:22-45) Ahabi i lo zi wona zontlhe lezo na zi humelela, kanilezi i lo simama a ala ku vumela lezaku lexo xi wa hi xikombiso xa ntamu wa Nungungulu. A xikombiso lexi ni lezi zi hunzileko zi hi nyika xigonzo xa lisima: Hi fanele ku ti gonzisa ku wona a woko ga Jehova loku gi kari gi tira.

VA LO WONA A WOKO GA JEHOVA

6, 7. Zini lezi a vokari va zi wonileko xikhatini xa Joxua?

⁶ A ku hambana ni tihosi leto to biha, a vanwani va gi wonile a woko ga Nungungulu hambu lezi va nga hi ka xiyimo xinwe nato. Hi xikombiso, a ku hambana ni matiko yo tala lawa ma nga hloma yimpi kasi kulwa ni vaIsraeli xikhatini xa Joxua, a vaGibeoni va lo maha kurula na Israeli. Hikuyini? Va te: A “malanza ya wena mata . . . hi kota ya vito ga Jehova, Nungungulu wa wena, hakuva hina hi zwile wudumo ga yena, ni zontlhe lezi a zi mahileko.” (Jox. 9:3, 9, 10) Va lo kombisa wutlhari, va vumela lezaku a vaIsraeli va vuniwa hi Nungungulu.

⁷ Rahabi yenawu i gi wonile a woko ga Nungungulu ka zimaho za masikwini yakwe. Anzhako ka kuzwa lezi Jehova a nga tlhatlhisisa zona vanhu vakwe, i lo byela tihloli timbiri ta vaIsraeli aku: “Nza zi tiva lezaku Jehova i mu nyikile legi tiko.” Hambu lezi a ku maha lezo zi nga mu veka mhangweni, Rahabi i lo kombisa kukholwa ka lezaku Jehova i wa ta mu ponisa zinwe ni ngango wakwe. — Jox. 2:9-13; 4:23, 24.

8. Xana a vaIsraeli vo kari va gi wonisile kuyini a woko ga Nungungulu?

⁸ A ku hambana na Ahabi, a hosi yo biha ya Israeli, a vaIsraeli vo kari va nga wona a hlamulo wa Jehova a xikhati lexi Elija a nga kombela nzilo, va lo gi wona a woko ga Nungungulu mhakeni leyo. Laha va nga wona nzilo na wuta hi ka Jehova wu ta hisa a muphahlo, va lo kanyuluka vaku: “Jehova i Nungungulu [wa lisine]!” (1 Tih. 18:39) Ka vona zi wa dlunyatekile lezaku Jehova hakunene i Nungungulu wa lisine!

9. Hi nga mu wonisa kuyini Jehova ni woko gakwe nyamutlha?

⁹ A zikombiso za zi nene ni zo biha lezi hi zi wonileko zi hi vuna ku zwisisa lezaku a ku wona Nungungulu ni woko gakwe zi wula yini? Laha hi yako hi mu tiva khwatsi, hinawu hi nga wona a woko gakwe hakuva hiya hi wona a matshamela yakwe ni mitiro yakwe hi “mahlo ya timbilu” ta hina. (Efe. 1:18) Handle ko kanakana hi lava ku fana ni vanhu va kale ni va xikhatini xa hina lava va zi wonako ziku dlunya lezaku Jehova wa seketela a vanhu vakwe. Hambulezo, xana hi na ni xikombiso xo woneka xa lezaku Nungungulu i kona wutomini ga vanhu vakwe inyamutlha ke?

XIKOMBISO XA WOKO GA JEHOVA INYAMUTLHA

10. Xikombiso muni hi nga naxo xi kombako lezaku Jehova wa ha vuna vanhu inyamutlha? (Wona mufota kusanguleni ka nzima.)

¹⁰ Hi na ni xigelo xa hombe xa ku kholwa lezaku Jehova wa ha vuna vanhu ni nyamutlha. Ha tolovela kuzwa matshango ya vanhu va khongelileko va kombela xivuno xa moya zonake va xi kuma. (Tis. 53:2) Na a kari a xumayela hi muti ni muti ka xihlale xo kari xa xitsongwani le Filipinas, Allan i lo ya kuma wasati. Laha a nga mu wona, a wasati loye i lo sangula ku rila. Allan i ngalo: “Ka mixo yaleyo i khongele ka Jehova a kombela ku enzelwa hi Timboni takwe. I wa gonzile Biblia ni Timboni ta Jehova na a ha hi tangeni yo sangula ku ti tshotshota, kanilezi i lo hambanelana nato a xikhati lexi a nga chada a tlhela a rura aya ka xihlale xinwani. Nungungulu i lo hlamula a mukhongelo wakwe hi xihatla nguvu laha ka kuza a khumbeka hi ndlela yo woneka.” Na ku nga se hunza lembe, i lo hendleleta wutomi gakwe ka Jehova.

11, 12. a) Jehova i vunisa kuyini a malanza yakwe? b) Hlawutela tshango ga munhu a vunilweko hi Jehova.

¹¹ A malanza yo tala ya Nungungulu ma wonile zikombiso za xivuno xakwe a xikhati ma nga hlula a mikhuwo yo biha yo kota ku dzaha, ku delela a mimuri yo lahlisa mapimo, kutani ku hlalela zithombe za masango. A vokari va wula lezaku va zamile makhati yo tala a ku nyima ha voce kanilezi a va zi kotangi. Hambulezo, laha va nga kombela xivuno ka Jehova, i lo va nyika “ntamu lowu wa hombe” niku hi magumo va lo zi kota ku hlula a gome gabye. — 2 Kor. 4:7; Tis. 37:23, 24.

¹² Jehova i vuna malanza yakwe yo tala zikaratweni za wona. Hi xikombiso, Amy i lwisene ni zikarato a xikhati a nga nyikwa a xiavelo xa ku ya aka Salawu ya Mufumo ni muti wa varumiwa xihlaleni xo kari xa Pacifico. I ngalo: “Hi wa tshama ka xihotelana niku siku ni siku hi wa famba ka maruwa yo tala hi mati kasi kuya laha hi nga tira kona.” I wa fanele ku ti zwananisa kambe ni mikhuwo ya wutshamu lego, niku a kutala ka zikhati ku wa nga hi na magezi ge hambu mati. Amy i engeta aku: “Kasi ku engetela, nzi lo zangarela makabye wo kari nzi nga tira naye. Nzi loya kaya na nzi ti wonisa ku khwatsi a nzi vuni nchumu. Na nzi hi lomu munyameni kwarutwini ya mina le hotela, nzi lo chulula a mbilu ya mina ka Jehova nzi kombela xivuno.” A xikhati lexi a magezi ma nga wuya, Amy i lo khoma Murinzeli a nga hi ni nzima yi wulawulako hi longoloko wa kupasa ka xikola xa Gileadi leyi yi nga wulawula hi zontlhe lezi a nga kari a lwisana nazo: mikhuwo yiswa, ku xuva kaya, ni ku tirisana ni vanhu vo kala ku va tolovela. I ngalo: “Zi wo khwatsi Jehova o wulawula na mina ka wusiku lego. Zi lo nzi kuca ku simama xiavelweni xa mina.” — Tis. 44:25, 26; Isa. 41:10, 13.

13. Xitiyisekiso muni hi nga naxo xa lezaku Jehova wa seketela a vanhu vakwe ‘kuvikeleni ni kutiyiseni’ ka mahungu yo saseka ke?

¹³ A Timboni ta Jehova ti hlula tiyimpi to tala kasi ku ‘vikela ni ku tiyisa’ a mahungu yo saseka inyamutlha. Lexo xikombiso xinwani xa lezaku va kari va vuniwa hi woko ga ntamu ga Jehova. (Fil. 1:7) A mifumo yo kari yi zamile ku fuvisa a ntiro wa vanhu va Nungungulu. Kanilezi, loku hi cuwuka nzhako, hi wona lezaku hi wutsongwani ga kona a Timboni ta Jehova ti hlulile 268 wa makhati tihubyeni ta hombe, laha a 24 wa wona ku vileko ka Hubye ya Europa ya ku Lwela Tifanelo ta Vanhu kusukela ka lembe ga 2000. Lezo zi komba ziku dlunya lezaku a ku na munhu a zi kotako ku valela woko ga Nungungulu. — Isa. 54:17; gonza Isaya 59:1.

14. Hi gi wonisa kuyini a woko ga Nungungulu ntirweni wa kuxumayela ni ka wumunwe legi hi ti buzako hi gona ke?

¹⁴ A kuxumayelwa ka mahungu yo saseka misaveni yontlhe ku koteka ntsena hi ku vuniwa hi Nungungulu. (Mat. 24:14; Miti. 1:8) A wumunwe ni wumakabye ga misava yontlhe ga vanhu va Jehova nyamutlha — lezi a tiko gi nga zi kotiko ku zi pimanyisa — zonawu xikombiso xa woko gakwe ga ntamu. Handle ko kanakana ha zi wona ku hikuyini ku tekako ni vanhu va le handle vaku: “Hizinene Nungungulu i kona xikari ka nwina.” (1 Kor. 14:25) Hikwalaho, kota ntlawa hi na ni zikombiso zo tala za lezaku Nungungulu wa vuna vanhu vakwe nyamutlha. (Gonza Isaya 66:14.) Kanilezi, wena wutsumbu ke? Xana wa gi wona a woko ga Nungungulu wutomini ga wena ke?

WA GI WONA A WOKO GA JEHOVA WUTOMINI GA WENA KE?

15. Tlhamusela a ku hikuyini zi nga tshukako zi hi karatela ku wona a woko ga Jehova wutomini ga hina.

¹⁵ Zini zi nga hi mahako hi nga woni khwatsi a woko ga Jehova wutomini ga hina? Hi nga ha tlimbiwa hi zikarato za wutomi. Loku lezo zi humelela, hi nga ha rivala ku veka kupima ka lezi Jehova a sinako a hi vunisile zona. A xikhati lexi muprofeti Elija a ngazwa lezaku Muzinza Jezebeli i lava ku mu daya, i lo rivala lezi Jehova a nga sina a mu vunisile zona. A Biblia gi ngalo: I lo “kombela kufa.” (1 Tih. 19:1-4) A xikarato xa Elija xi tlhatlhisilwe kuyini? I wa fanele ku kombela Jehova lezaku a mu tiyisa. — 1 Tih. 19:14-18.

16. Hi nga maha yini kasi ku wona Nungungulu a ku fana na Joba?

¹⁶ Joba i lo colopetelwa nguvu hi zikarato zakwe laha ka kuza a nga ha woni zilo hi mawonela ya Jehova. (Joba 42:3-6) A ku fana na Joba, hinawu ku nga ha laveka lezaku hi ti karata nguvu kasi ku wona Nungungulu. Hi nga zi mahisa kuyini lezo? Na hi kari hi vuniwa hi Mitsalo, hi fanele ku ehleketa hi lezi zi hi humelelako wutomini ga hina. Laha hi yako hi wona lezi Jehova a hi vunisako zona, hi taya hi mu tiva khwatsi. Hi ndlela leyo, hi nga ha fana na Joba hiku: “A tindleve ta mina ti wa zwile ha wena, kanilezi makunu a mahlo ya mina ma ku wonile.”

17, 18. a) Hi nga zi wonisa kuyini lezaku Jehova wa hi vuna? b) Hlawutela tshango gi kombako lezi Jehova a hi vunisako zona nyamutlha.

¹⁷ Hi nga gi wonisa kuyini a woko ga Jehova? Wona zikombiso zo kari: Kuzilava a ndlela leyi u nga gonza hi yona lisine u yi wona kota xikombiso xa wurangeli ga Nungungulu. U tshuka uzwa xipanze mitlhanganweni ya wuKristu zonake uku: “Hi zalezo zi nga laveka ka mina”? Kutani u tshuka u wona hlamulo wa mukhongelo wa wena? Kuzilava u bohile ku engetela wutireli ga wena u tlhela u hlamala hi lezi Jehova a ku vunisileko zona ku cica lezi zi nga laveka kasi ku maha lezo. Kutani u tshuka u tsika ntiro hi zigelo za moya zonake u wona a lisine la xitsumbiso xa Nungungulu xaku; “Cima nzi nga ta ku tsika”? (Maheb. 13:5) Loku hi tlhariha hi tlhelo ga moya, hi nga wona lezi Jehova a hi vunisako zona hi tindlela to tala.

¹⁸ Sara wa le Kenia i tlhamusela a tshango legi: “Nzi lo khongela xungetano hi xigonzani xo kari nzi nga xi wonisa ku khwatsi a xi zi lavi ku gonza Biblia. Nzi lo wutisa Jehova lezaku nzi fanele ku nyima ku gonza naye ke? Neti nzi ngaku ‘Amen,’ a fone ya mina yi lo vitana. A xigonzani lexo xa Biblia xi lo nzi wutisa lezaku hi nga famba zinwe mitlhanganweni ke! A nzi no ku hlamula!” Loku u tlhariha, wenawu u nga wona tindlela leti Jehova a ku vunako hi tona wutomini ga wena. Rhonna, a nga makabye wa xisati a hanyako le Asia, i wula lezi: “Zi lava wutlhari go kari kasi ku wona wurangeli ga Jehova. Kanilezi loku uza u gi wona, za hlamalisa a ku wona lezi Jehova a khatalisako zona hi hina!”

19. Zini zinwani zi lavekako kasi hiva xikari ka lava va wonako Nungungulu?

¹⁹ Jesu i te ngalo: “Va katekile lava va kubasa timbilu, hakuva va ta wona Nungungulu.” (Mat. 5:8) Hi nga zi kotisa kuyini kuva ni ‘timbilu ti basileko’? Hi fanele kuva ni kubasa ka mbilu hi tlhela hi tsika a mahanyela wontlhe yo biha. A xikhati lexi hi hlakulelako a wumoya go tiya hi tlhela hi va ni mahanyela ma nene, hi ti peta ka xaxameto wa lava va wonako Nungungulu. Ka nzima yi lanzelako hi ta kambisisa lexi xi to hi vuna ku wona khwatsi a ntamu wa Jehova wutomini ga hina — ku nga kukholwa ka hina.