Hanya Na U Alakanya A Siku Ga Jehova
1 “A siku ga hombe ga Jehova gi kusuhani, ga tshinela hi xihatla.” (Zef. 1:14) Zefania zinwe ni vaprofeti lava vanwani va 11, va vitanwako ku Vaprofeti va Tsongwani, va wa hanya na va alakanya a siku ga Jehova. A ku kambisisa a mitsalo yabye yi pimisilweko, leyi yi kumekako ka bhuku Viva Tendo em Mente o Dia de Jeová ka Xigonzo xa hina xa Bhuku xa Bandla zi ta hi vuna lezaku hi ti longiselela a siku lego go chavisa. — Zef. 2:2, 3.
2 Matshamela Yo Hlawuleka: Wutshanwini ga ku koka kupima ka mitlhamuselo ya vesi ni vesi ga mabhuku lawo ya 12 ya wuprofeti, a bhuku Dia de Jeová gi komba lezi a mitsalo leyo yi pimisilweko yi tirisako zona ka ziyimo za lisine lezi hi yimisanako nazo siku ni siku. Gi khanyisa ku hikuyini a ziboho za hina ni zimaho za hina zi faneleko ku komba ku ha alakanya lezaku a siku ga Jehova gi laha kusuhani. Gi wulawula nguvu hi timhaka ti yelanako ni wutomi ga ngango, kuzwanana ni makholwa-kulori, ndlela yo hlawula zihungato, wutireli ga hina, ni ziboho zi fambelanako ni ntiro wa kutihanyisa.
3 A xipanze 1 xa bhuku xi hi toloveta a vaprofeti lavo va 12 zinwe ni mitsalo yabye. Va wa hi vamani? Ziyimo muni zi nga kona inyamutlha zi fanako ni lezi zi nga hi kona masikwini yabye? A xipanze 2 xi wulawula nguvu hi Jehova ni matshamela yakwe. Kuzwisisa muni ko eta xungetano hi Jehova zinwe ni wumunhu gakwe hi nyikiwako hi vaprofeti lava? A xipanze 3 xi wulawula nguvu hi mahanyela ni kutirisana ka hina wutsumbu ni vanwani. Zilo muni hi nga mahako kasi hi tsakisa Nungungulu siku ni siku? A xipanze 4 xi tlhamusela lezi hi nga hanyisako zona na hi tsakile a xikhati lexi hi rinzelako a siku ga Jehova.
4 Ti Yimisele Zalezi Lezaku U Vuneka: Ti yimisele zalezi a ku maha zontlhe zi lavekako kasi u vuneka nguvu ka xigonzo xa bhuku Dia de Jeová, lexi xi ta nga sangula ka viki ga 4 ka Agosto wa 2008! Zi mahe kungo ga wena a kuva kona ka Xigonzo xa Bhuku xa Bandla viki ginwe ni ginwani. Longisela khwatsi a xigonzo xinwe ni xinwani, u hlolisisa a mitsalo kasi ku wona lezi yi zwananisako zona ni mhaka leyi yi gonziwako. Alakanyela lezi zi gonziwako, hi ku ti maha a ziwutiso lezi zi lanzelako, ‘Xana nzi nga ti tirisisa kuyini a timhaka leti le kaya, le xikoleni, le ntirweni, wutirelini ga mina, ni kutirisaneni ka mina ni vamakabye va mina va maKristu?’ Tana xigonzweni xa bhuku na u longile ku hlamula hi ndlela yi ta nga tiyisa a vamakabye. — Rom. 1:12.
5 Ngha a kukambisisa a bhuku Dia de Jeová ku hi longisela zalezi, lezaku hi ‘tiyela’ a ‘siku ga Jehova ga hombe, go chavisa nguvu.’ A siku lego gi laha kusuhani nguvu hakunene! — Joe. 2:11.