Hi Hahlula Makhokhola
1 Hi mazanazana ya malembe, Satani i bhiyela a timbilu ni kupima ka vanhu vo tala hi ku tirisa a tigonzo ta mawunwa ni kukanganyisa. I hangalasa a tigonzo ta mawunwa to kota a Vanharu-munwe, kungafi ka muhefemulo, ni kuswa tilweni. I kucetela vanhu lezaku va kanakana a kuvakona ka Muvangi ni kungakholwi lezaku a Biblia gi pimisilwe hi Nungungulu. A kutitlakusa hi kota ya lixaka kutani tiko i zinwani zi bhiyelako vanhu lezaku va nga woni a kuwonekela ka zinene. (2 Kor. 4:4) Xana hi nga ma hahlulisa kuyini a makhokhola lawo ya tigonzo? — 2 Kor. 10:4, 5.
2 Lezi Va Ti Zwisako Zona: A tigonzo ta xikholwa leti a munhu a khomelelako ka tona hi xikhati xo leha ti tala ku khumba nguvu a kutizwa kakwe. A vo kari va khomelele ka tigonzo ta mawunwa kusukela wunwananeni. Kasi ku vuna a vanhu lavo, hi fanele ku wulawula hi ndlela yi kombisako xichawo ka mawonela yabye. — 1 Ped. 3:15.
3 Hi nga kombisa xichawo ka vanhu lavo hi ku va nyika xikhati xa kuva va tlhamusela lezi va zi kholwako niku hikuyini va kholwako ka zona. (Jak. 1:19) Kuzilava va khomelele ka gonzo ya lezaku a muhefemulo a wufi hakuva va felwe hi varanzekako vabye niku va xuva nguvu a ku va wona kambe. Kutani va nga ngha va maha mibuzo yo alakanya a masiku yo hlawuleka hakuva va tsakela kuva ni xikhati xo kari xa ku tshama zinwe ni ngango wabye. A ku ingisela a magezu yabye zi ta hi nyika wutlhari go zwisisa a kutizwa kabye zi tlhela zi hi vuna a ku nyika hlamulo wu ta nga neha wuyelo gi nene. — Mav. 16:23.
4 Pimanyisa Jesu: Jesu i hi nyikile a xikombiso xi nene nguvu a xikhati lexi a nga hlamula a ziwutiso za mugonzisi wo kari wa nayo. Jesu a nga mu nyikangi a mihlamulo yo kongoma, hakuva kuzilava a wanuna loye ngha a yi alile hi kota ya tigonzo leti a nga khomelele ka tona. Wutshanwini ga lezo, Jesu i lo kumbuka Mitsalo, a mu kombela lezaku a wula a mawonela yakwe a tlhela a mu vuna ku ehleketa hi ku tirisa a mufananiso. — Luka 10:25-37.
5 A tigonzo ta wukhongeli ga mawunwa leti ti chachareleko timbilwini ta vanhu a ti fanani ne ni kutsongwani ni zinene za Mhaka ya Nungungulu. (Maheb. 4:12) Loku hi tlhamusela a zinene hi lihlaza-mbilu, na hi khumba mbilu, hi ta zi kota a ku vuna vanhu lezaku va tsika a mawunwa, va kholwa a zinene lezi zi zi kotako a ku va tlhatlhisa. — Joh. 8:32.