Longisela Lava Va Ha Hiko Vaswa Lezaku Va Yimisana Ni Kukanetwa
1 A xikhati lexi a vanhu va sangulako ku gonza a Biblia ni ku ‘ranza ku hanya hi wutomi ga wukhozeli,’ va maha zipotiyelo za hombe za Satani. (2 Tim. 3:12) A kukanetwa ku nga hata hi ka vatiri-kulobye, zigonzani-kulobye, kutani vaakelani. Zi nga ha nonoha nguvu loku a maxaka ma kaneta lava va ha hiko vaswa na ma alakanya lezaku mo va vuna. — Mat. 10:21; Mar. 3:21.
2 A Kukanetwa Ku Profetilwe: Lava va ha hiko vaswa ngha va zwisisa lezaku a tixanisa ti fanele ku rinzelwa ni lezaku lezo xikombiso xa kuva vahi vapizani va lisine va Kristu. (Joh. 15:20) Ka zikhati zo kari, a kukanetwa ku nga ha humelela hi kota ya maalakanyo ya hava xungetano hi Timboni ta Jehova. Tiva lezaku a ku xaniswa hi kota ya kuva mulanzeli wa Jesu ni lezi u ingisako Nungungulu zi neha kutsaka ka hombe. (Miti. 5:27-29, 40, 41) Tiyisa lava va ha hiko vaswa lezaku Jehova wa va ranza ni ku va seketela. (Tis. 27:10; Mar. 10:29, 30) A xikhati lexi va simamako va tsumbeka vona va yima tlhelweni ga Jehova mhakeni ya wuhosi ga wuako gontlhe. — Mav. 27:11.
3 Lezi Zi Mahiwako Hi Wutivi Ga Lisine: Khanyisa ka zigonzani za wena za Biblia a lisima la ku simama ku kuma wutivi ga lisine na ku nga khataliseki a minzhingo leyi kuzilava va yimisanako nayo. Hi ku tirisa a kukaneta, Satani i zama ku valela lezi va zi gonzako lezaku zi nga zimi mitsu timbilwini tabye. (Mav. 4:23; Luka 8:13) Va fanele kuya mahlweni va kuma wutivi ga lisine ga Mhaka ya Nungungulu kasi va zima mitsu va tiya kukholweni. — Tis. 1:2, 3; Kol. 2:6, 7.
4 Ku Laveka Kutimisela: Ka xiyimo xihi ni xihi xo nonoha, a kutimisela ka lisima niku ka zi kota ku neha wuyelo gi nene. (Luka 21:16-19) A xikhati lexi lava va ha hiko vaswa va timiselako a kukanetwa, va vuneka vona wutsumbu zinwe ni vanwani. Va wona a wuzikoti ga Jehova ga ku katekisa nguvu lava va timiselako hi kutsumbeka. — Jak. 1:12.
5 Mupostoli Paule i lo tsaka hi ku wona a kukula ka vamakabye vakwe va le Tesalonika hi tlhelo ga moya. I lo bonga Nungungulu hi kota ya vona, lava a wunyingi ga vona a nga va vunile a ku nghena zineneni. (2 Tes. 1:3-5) Hinawu ha zi kota kuva ni litsako lelo ni kuxalala loku hi longisela a zigonzani za hina za Biblia lezaku zi yimisana ni kukanetwa zi tlhela zi timisela.