Xana Wa Tirisa A Bhuku Raciocínios?
1. Xana mupostoli Paule na Jesu va gonzisisile kuyini vanwani?
1 Mupostoli Paule i wa ti karatela a ku ‘wulawulisana ni vanhu hi timhaka ta Mitsalo.’ (Miti. 17:2, 3; 18:19) Hi ku maha lezo, i lo pimanyisa Jesu, loyi hi kukhanzakanya a nga tshaha Mitsalo ni ku tirisa mifananiso kasi ku vuna a vaingiseli vakwe lezaku va zwisisa a kuranza ka Nungungulu. (Mat. 12:1-12) A bhuku Raciocínios à Base das Escrituras gi mahelwe ku hi vuna a ku maha lezo.
2. Hi nga gi tirisisa kuyini a bhuku Raciocínios lezaku hi longisela a zingheniso zi vangako kutsakela?
2 Longisela A Zingheniso Zi Vangako Kutsakela: A Raciocínios à Base das Escrituras gi na ni zingheniso zi vangako kutsakela lomu ka maphajina 9-15. A ku gonza ni ku tirisa zingheniso zo hambanahambana, nguvunguvu loku mu tlhanganyisa a xipanze xa nwina hi kukhanzakanya, zi ta maha a wutireli ga wena gi tsakisa ni ku ku vuna a kuva ni wuzikoti go hambanahambana ni kuhumelela kusanguleni ka mabhulo. A zingheniso zi nga ha leriwa hi kukongoma lomu bhukwini a xikhati lexi u nyikako a wukustumunyu hi telefone kutani loku u wulawula ni munhu hi interfone lomu ka tiyindlu ti wonelelwako nguvu.
3. Zini zi kumekako lomu ka maphajina 16-24 ya bhuku Raciocínios lezi zi to hi vuna wutirelini?
3 Ndlela Yo Hlamula Lava Va Tsemako Bhulo: Hikuyini u nga alakanyeliko a vatsemi va bhulo lava u nga ha kumanako navo sinwini hi ku mbheta xikhatanyana na u vuxeta a maphajina 16-21 na u nga se sangula ku xumayela kasi ku kuma a mahlamulela ma nene? Xana a vahanyi va miti yo kari va nga hava vaBuda, vaHindu, vaJuda, kutani vaMwinyi? Loku zi hi tano, a mahungu ma nga ka maphajina 21-24 ma nga ha vuna.
4. Hi nga gi tirisisa kuyini a bhuku Raciocínios a xikhati lexi ku vuxiwako a xiwutiso kutani mhaka leyi yi vangako kukanetisana?
4 Ndlela Yo Hlamula Ziwutiso: A bhuku Raciocínios ga zi kota a ku hi vuna kambe a xikhati lexi ku vuxiwako xiwutiso kutani mhaka yo kari yi vangako kukanetisana. A ndlela ya chukwana ku byela munhu loye lezaku u wa tsakela a ku mu komba a nchumu wo kari wo tsakisa u nga nawo xungetano hi mhaka leyo zonake u humesa a bhuku ga wena ga Raciocínios. Kota lezi a timhaka ti longoloxilweko hi ku lanzela a xaxameto wa maletela, vulula ka hloko ya mhaka-tshinya leyi u alakanyako lezaku yi tava ni mahungu lawa u ma lavako. Zonake cuwuka hi kuhatlisa a ziwutiso zi tsalilweko hi muvala wa ntima nguvu. Loku u nga tekeli a ku zi wona lezi u zi lavako, vulula ka xaxameto wa magezu magumo ka bhuku. Loku u ma kumile a mahungu lawo, ma gonze hi kukongoma lomu ka bhuku. Loku mu kari mu bhulisana hi mutsalo wo kari, u nga kuma lezi u zi lavako ka phajina 445 hasi ka “Textos amiúde mal aplicados” (Mitsalo Leyi Yi Talako Ku Tirisiwa Hi Ndlela Ya Hava).
5. Hi wahi a matirisela manwani ya bhuku Raciocínios lawa ma vunako?
5 Matirisela Manwani: A vo kari va famba ni bhuku Raciocínios ntirweni kutani xikoleni kasi gi va vuna a ku hlamula ziwutiso zo kota lexi, ‘Hikuyini mu nga mahiko a mibuzo yo alakanya masiku yo hlawuleka?’ A vanhu vaswa va vuniwa hi mahungu ma nga hasi ka zihlokwana za mhaka “Criação” ni “Evolução” kulongiseleni ka mitiro ya le xikoleni. Xana u ta ya vuxela a wo kari a babyako kutani a felweko? A mahungu ma nga hasi ka “Encorajamento” ma nga ha ku vuna a ku mu chavelela hi ku tirisa Mitsalo. A bhuku Raciocínios gi na ni mahungu ma vunako kambe ka lava va longiselako a tikanelo ni ku fambisa a mitlhangano ya ntiro wa simu.
6. Hi gihi a kungo ga hina a xikhati lexi hi xumayelako?
6 A xikhati lexi hi xumayelako, a kungo ga hina a hi ku hlula a bhulo; ge hambu ku nyika mahungu ntsena. Hi lava ku wulawulisana ni vanhu hi wutlhari hi ku tirisa Mitsalo. Laha hi tirisako khwatsi a bhuku Raciocínios, hi komba lezaku ha khatalela nguvu a kugonzisa ka hina. — 1 Tim. 4:16.