Tirisa A Biblia Hi Wutlhari

1. Hikuyini a Biblia gi nga ga lisima nguvu?

¹ A ku tirisa hi wutlhari a Mhaka yi pimisilweko ya Nungungulu zi hi vuna a ku huwelela ni ku gonzisa a zinene hi kudlunyatekileko hi tlhela hi paluxa a tigonzo ta mawunwa ni mikhuwo ya vanhu. — 2 Tim. 2:15; 1 Ped. 3:15.

2. Xini xi to hi vuna a ku kuma a mitsalo hi kuolova?

² Engetela A Wutivi Ga Wena Hi Biblia: A ku fana ni ku tirisa a xitiro xihi ni xihi, u kuma wutlhari ga ku xi tirisa loku u xi tiva khwatsi. A ku lera Biblia kusukela masangulweni ya gona kala magumo zi ku vuna a ku kuma a mongo wa hloko ya mhaka ya Biblia. Lezo kambe zi ku vuna a ku alakanya mitsalo ni ku yi kuma hi kuolova. Laha a kutiva ka wena Mitsalo ku engetelako, u ta wulawula hi kuchivirika nguvu na u hi ni kutiyiseka a xikhati lexi u kustumunyako ka vanwani hi xitshuketi ni le wutirelini ga simu. — 1 Tes. 1:5.

3, 4. (a) Hi tihi a tindlela to kari ta ku chukwatisa a kugitiva ka hina a Biblia? (b) Xana ku na ni tindlela tinwani u ti tirisako kasi ku chukwatisa a wutivi ga wena hi Biblia?

³ Zi mahe tolovelo wa wena a ku vulula a Biblia ni ku lanzela a timhaka leti ti gonziwako ka gona mitlhanganweni ya bandla. A xikhati lexi u mahako xigonzo xa wena wutsumbu ni ku longisela a mitlhangano ya bandla, lava a timhaka ta Mitsalo leti ti kumbukilweko u tlhela u alakanyela lezi u to ti tirisisa zona. A votala va wona lezaku a ku gonza a mitsalo lomu ka Biblia hi kukongoma wutshanwini ga ku yi gonza hi lomu ka komputadori kutani ka phepha zi maha lezaku zi olova a ku yi kuma loku yi laveka wutirelini. — Joh. 14:26.

⁴ A mingango yo kari yi ti vekela xikhati xa ku ti toloveta a ku tiva mitsalo ya Biblia hi hloko. Lezo zi nga mahiwa hi ku tirisa a ziphephana zi nga tsaliwa a mutsalo wa Biblia ka tlhelo ginwe ni timhaka ta wona ka ginwani tlhelo. Vona va mahana ziwutiso kasi ku wona a ku va zi kota a ku wula a timhaka ta mutsalo kutani ku alakanya lomu ti kumekako kona. A ku vuxeta a zingheniso za ntiro wa simu ni ku hlamula hi ku tirisa a Biblia lava va lavako ku tsema bhulo kutani va mahako xiwutiso zonawu zi chukwatisa a wuzikoti ga hina.

5. Hikuyini hi lavako a ku chukwatisa a wuzikoti ga hina ga ku tirisa a Biblia?

⁵ A ku na ginwani bhuku gi nga ga lisima nguvu a ku fana ni Biblia. Gona gi na ni mitsalo leyi yi nga yona yoce yi zi kotako ku maha vanhu va ‘tlhariha lezaku va hanyiswa.’ (2 Tim. 3:15) Kota lezi a kutala ka vanhu xipanzeni xa hina va nga ti tiviko a titshomba ti kumekako lomu ka Biblia, hi na ni xigelo xa xi nene xa kuva hi chukwatisa a wuzikoti ga hina ga ku va komba lezi hakunene a Biblia gi nga nazo. — Mav. 2:1-5.