Jehova

Xana Jehova lomu ka “Testamenta ga Kale” hi Jesu lomu ka “Testamenta ga Giswa”?

Mat. 4:10: “Jesu aku ngalo kakwe: Suka Satani; hakuva ku tsalilwe ku ngalo: Wena u ta khozela Hosi [Jehova, NM] Nungungulu wa wena, hi yena yece u to mu tirela.” (Zi te dlunya lezaku Jesu i wa nga wuli ku yena wutsumbu i wa fanele ku khozelwa.)

Joh. 8:54: “Jesu i lo hlamula [vaJuda], aku: Loku nzi ti dzunza, a wudzunzo ga mina a hi nchumu, kanilezi hi Dadani a nzi dzunzisako, loyi ha yena mu nge ngalo, i Nungungulu wa nwina.” (Hi kudlunyatekileko, a Mitsalo ya xiHeberu yi tivekisa Jehova kota Nungungulu loyi a vaJuda va nga wula lezaku hi yena va mu khozelako. Jesu a nga wulangi lezaku yena wutsumbu i wa hi Jehova, kanilezi i te Jehova i Dadani wakwe. Jesu laha i zi dlunyatisile nguvu lezaku yena ni Dadani wakwe vanhu va hambeneko.)

Tis. 110:1: “Jehova i te ngalo ka hosi ya mina [hosi ya Davida]: Tshama hi le reveni ga mina ga xinene, kala nzi veka a valala va wena a kuva xikegetelo xa mikonzo ya wena.” (Ka Mateu 22:41-45, Jesu i tlhamusele lezaku yena wutsumbu i wa hi “Hosi” ya Davida, yi nga leyi yi kumbukiwako ka lisimu leli. Hikwalaho, Jesu a hi Jehova kanilezi hi loyi a magezu ya Jehova ma nga kongomiswa ka yena laha.)

Fil. 2:9-11: “Hi kota ya lezo Nungungulu i lo mu tlakusa nguvu [Jesu Kristu], a mu nyika vito gi nga hehla ka mavito wontlhe; lezaku hi vito ga Jesu a madzolo ya vontlhe lava va nga le tilweni, ni laha misaveni, ni lahasi ka misava, ma ta mu khizamela, kasi a tirimi tontlhe ti fela ku wulela lezaku Jesu Kristu i Hosi, a dumiswa Nungungulu Dadani.” (Wona lezaku Jesu Kristu laha i kombiswa na a hambene na Nungungulu a Dadani niku i lahasi Kakwe.)

Xana a munhu a nga mu ranzisa kuyini Jehova kuveni i fanele ku Mu chava?

A Biblia gi hi byela lezaku hi fanele ku ranza Jehova (Luka 10:27) ni ku mu chava. (1 Ped. 2:17; Mav. 1:7; 2:1-5; 16:6) A ku chava Nungungulu loku ku faneleko ku ta hi maha hi ti wonela nguvu a ku maha nchumu wu mu khunguvanyisako. A liranzo la hina ha Jehova li ta hi kuca a ku lava ku maha zilo zi mu xalalisako, hi kombisa a kubonga ka hina a liranzo ni wuxinji gakwe ga hombe lezi zi kombiswako hi tindlela ta tsanza-vahlayi.

Mifananiso: Hi kufaneleko, a n’wana wa chava ku khunguvanyisa a raru wakwe, kanilezi kota ndlela ya ku bonga zontlhe lezi a raru wakwe a mu mahelako, a n’wana i fanele ku tizwa na a susumeteka ku kombisa a liranzo la lisine ka raru wakwe. A muhlambeli a nga wula lezaku wa gi ranza a bimbi, kanilezi a kuchava loku ku faneleko ku mu maha a tiva lezaku ku na ni zilo zo kari a nga faneliko ku zi maha. Hi kufanana, a liranzo la hina hi Nungungulu li fanele ku longoloka ni kuchava ku faneleko ka ku nga mahi ne ni xinwe xi nga wa ta mu khunguvanyisa.

Timboni ta Jehova

Hi tihi a tigonzo ta Timboni ta Jehova leti ti ti hambanyisako ni wukhongeli ginwani?

(1) A Biblia: A Timboni ta Jehova ti kholwa lezaku a Biblia gontlhe i Mhaka ya Nungungulu yi pimisilweko, niku wutshanwini ga ku namarela ka tigonzo ti seketelwako ka mikhuwo ya vanhu, tona ti wona a Biblia kota xitiro xo tsumbeka xo pima a tigonzo tabye tontlhe.

(2) Nungungulu: Ti khozela Jehova kota Nungungulu munwe wa lisine ti tlhela ti bhulela vanwani na ti tlhatlhekile xungetano hi yena zinwe ni makungo yakwe ka vanhu. A munwe ni munwani a kustumunyako ha Jehova kubaseni i tolovela ku wuliwa lezaku i lumba ntlawa lowo wa wunwe — “Timboni ta Jehova.”

(3) Jesu Kristu: Ti kholwa lezaku Jesu Kristu a hi xipanze xa Vanharu-munwe, kanilezi kota lezi a Biblia gi wulako, Jesu i N’wana wa Nungungulu, matewula ya zivangwa za Nungungulu. Ti kholwa lezaku i vile kona na a nga seva munhu wa nyama ni lezaku a wutomi gakwe gi lo ruriswa le tilweni gi yiswa khwirini ga nhwana Maria. Ti kholwa kambe lezaku a wutomi gakwe go mbhelela gi mahilweko muphahlo gi vulula ndlela ya lezaku lava va kholwako va hanyiswa kasi va kuma wutomi ga pinzukelwa; ni lezaku kusukela 1914, Nungungulu i lo mu nyika ntamu wa hombe wa ku fuma misaveni yontlhe.

(4) Mufumo wa Nungungulu: Ti kholwa lezaku a Mufumo wa Nungungulu hi wona ntsena wu nga kutsumba ka vanhu; mufumo wa lisine; lokuloku wu ta lovisa a mafambisela lawa ya kubiha ya zilo zinwe ni mifumo yontlhe ya vanhu, niku wu ta pswala mafambisela maswa lomu a kululama ku to tshama kona.

(5) Wutomi ga le tilweni: Ti kholwa lezaku a 144.000 wa maKristu ma totilweko hi moya ma ta fuma zinwe na Kristu kota tihosi Mufunweni wa le tilweni. A ti kholwi lezaku a tilo i nchachazelo wa vanhu vontlhe va va “nene.”

(6) Misava: Ti kholwa lezaku a kungo go sangula ga Nungungulu xungetano hi misava gi ta tatiseka; a misava yi ta akiwa hi kumbhelela hi vakhozeli va Jehova niku va ta ti buza hi wutomi ga pinzukelwa kota vanhu vo mbhelela; ni lezaku hambu a vafileko va ta vuxiwa kasi vonawu vava ni lungelo ga ku ti buza hi makatekwa lawa.

(7) Kufa: Ti kholwa lezaku a vafileko a va tivi nchumu; a vazwi kubayisa ge hambu kunanziha wutshanwini go kari ga zivangwa za moya; a va ka wutshamu go kari ahandle ka kuva maalakanyweni ya Nungungulu. Hikwalaho, a kutsumba ko tlhela va hanya xikhatini xa ha tako ku koteka ntsena hi ku vuxiwa hi ka vafileko.

(8) Masiku yo gumesa: Ti kholwa lezaku kusukela 1914, hi hanya masikwini ya kugumesa ka mafambisela lawa ya kubiha ya zilo; a vokari va wonileko a zimaho za 1914 va ta tlhela va wona a kuloviswa ka tiko legi ga kubiha gi ku bhi; a varanzi va kululama va ta pona va nghena misaveni yi basisilweko.

(9) Kutihambanyisa ni tiko: Ti ti karata hi mbilu yontlhe lezaku ti ngavi ta tiko, kota lezi Jesu a nga wula ku ngalo a valanzeli vakwe va wa nga tava va tiko. Ti kombisa a liranzo la lisine la wuKristu ka vaakelani vabye, kanilezi a ti ti ngheniseli ka wupolitika kutani ka tiyimpi ta tiko. Ti hlayisa a mingango ya tona kanilezi ti potsa a moya wa tiko wa ku hlongolisela titshomba ni ku ti lavela ndhuma zinwe ni ku ti karatela a kutitsakisa ko hunza mpimo.

(10) Ti tirisa a wusungukati ga Biblia: Ti kholwa lezaku za lisima a ku tirisa a wusungukati ga Biblia wutomini ga siku ni siku zalezi — laha mutini, xikoleni, kumaheni ka mabhinzu, ni bandleni. Na ku nga khataliseki lezi a munhu a nga hanyisa zona kale, wa zi kota kuva Mboni ya Jehova loku a fularela a mitiro leyi yi koniwako hi Mhaka ya Nungungulu a tlhela a tirisa wusungukati ga yona gi pimisilweko hi Nungungulu. Kanilezi anzhako ka lezo, loku a wokari a tshamela ku maha wubhayi, wurembi, ku etlela ni munhu wa xiro xa wubeleki xo fana, ku delela mimuri ya kulahlisa mapimo, wudakwa, ku hemba, kutani ku yiva, i ta susiwa hlengeletanweni.

(A xaxameto lowu laha hehla wu komba hi ndlela yo komisa a tigonzo to kari to dlunyateka ta Timboni ta Jehova kanilezi a hi leti ntsena ti ti hambanyisako ni mitlawa yinwani. A xiseketelo xa Mitsalo xa tigonzo leti laha hehla xi nga kumiwa ka Xaxameto Wa Timhaka ta bhuku Raciocínios.)

Xana a Timboni ta Jehova wukhongeli ga le América?

Vaseketeli va Mufumo wa Nungungulu, a hi vaseketeli va mafambisela ya wupolitika, ya mabhinzu, kutani ya wuhlengeli ga vanhu ya tiko go kari misaveni leyi.

Lisine lezaku a Timboni ta Jehova ta nguva leyi ti sangulele le Estados Unidos. Lezi a tsinza ga tona ga misava yontlhe gi kumekako seyo zi mahile lezaku zi koteka ku gandla ni ku rumela a mabhuku ma seketelwako ka Biblia matshanwini yo tala ya misava. Kanilezi a Timboni a ti ranzi tiko go kari ku hunza ginwani; ta kumeka matikweni wontlhe, niku ti na ni tihofisa matshanwini yo tala ya misava kasi ku wonelela a ntiro wa tona matikweni lawo.

Ehleketa hi mhaka leyi: Jesu kota muJuda i pswalelwe Palestina, kanilezi a wuKristu a hi wukhongeli ga le Palestina, a hi zona ke? A wutshamu legi Jesu a nga pswalelwa ka gona kota munhu wa nyama a hi gona gi nga ga lisima. Lezi Jesu a nga zi gonzisa zi wata hi ka Dadani wakwe, Jehova Nungungulu, loyi a tirisanako ni vanhu va matiko wontlhe na a nga hlawuli. — Joh. 14:10; Miti. 10:34, 35.

A mali ya ku seketela a ntiro wa Timboni ta Jehova yita hi kwihi ke?

Hi ka minyikelo ya kuziranza, khwatsi hi lezi a maKristu yo sangula ma nga maha. (2 Kor. 8:12; 9:7) A ku tshuki ku mahiwa mihlengo mitlhanganweni ya tona; a ti kombeli mali ka vanhu. A minyikelo yontlhe yi mahiwako hi vanhu lava va zi tsakelako yi tiriselwa ku vuvumisa a ntiro wa misava yontlhe wa kugonzisa a Biblia wu mahiwako hi Timboni.

A Timboni a ti hakhelwi hi ku famba hi muti ni muti kutani hi ku nyikela mabhuku ma seketelwako ka Biblia. A ku ranza Nungungulu ni vaakelani hi zona zi ti mahako ti bhulela vanwani a malulamiselo ya Nungungulu ya liranzo lawa a ma maheleko vanhu.

A Sociedade Torre de Vigia de Bíblias e Tratados de Pensilvânia, EUA, yi nga hlengeletano ya nayo ya wukhongeli yi tiriswako hi Timboni ta Jehova, yi yimisilwe hi 1884 hi ku vumelelani ni Nayo Wa Tihlengeletano Ti Nga Hiko Ta Mabhinzu Ta Wuhlengeli Ga Pensilvânia, ta le Estados Unidos. Hikwalaho, hi nayo, a Hlengeletano leyi a yi ngevi ya mabhinzu, niku a hi ya mabhinzu, ge hambu vanhu ku bhinzula hi yona. A bhuku ga milayo ya matirela ya Hlengeletano leyi gi ngalo: “A [Hlengeletano] a yi lavi lezaku a ziro za yona, varangeli kutani vawoneleli va yona va bhinzula kutani ku kuma mali halahala kutani hi ndlela yinwani.”