Ngha hi hlakulela tolovelo wa ku chikela hi xikhati

1. Xikombiso muni lexi Jehova a hi nyikako xungetano hi ku hlayisa xikhati?

¹ Jehova xontlhe xikhati i maha zilo hi xikhati. Hi xikombiso, i vuna malanza yakwe “xikhatini xa kuvumala.” (Maheb. 4:16) I tlhela a nyikela a zakuga za moya “hi xikhati xi faneleko.” (Mat. 24:45) Hikwalaho ha zi kota kuva ni kutiyiseka ka lezaku a siku ga zanga yakwe gi “nga ta tindeka.” (Hab. 2:3) Hi nga wona lezi hi vunekisako zona hi lezi Jehova a hlayisako a xikhati! (Tis. 70:5) Hambulezo, kota lezi hi nga vanhu va nga mbhelelangiko vo tshama na hi khomekile, a ku chikela hi xikhati zi ngava xikarato xa hombe ka hina. Hikuyini hi faneleko ku hlakulela a tolovelo wa ku chikela hi xikhati ke?

2. Hikuyini a ku chikela hi xikhati zi nehako wudzunzo ka Jehova?

² Masikwini lawa yo gumesa, lawa a vanhu vo tala va ti ranzako wutsumbu ni ku kala ku ti khoma a vanhu a va zi ranzi ku chikela hi xikhati. (2 Tim. 3:1-3) Hikwalaho loku a maKristu ma chikela hi xikhati ntirweni, ka ziavelo, ni mitlhanganweni, a vanwani va zi wona, niku lezo zi neha wudzunzo ka Jehova. (1 Ped. 2:12) Xana ha tolovela ku chikela hi xikhati ntirweni wa ku ti hanyisa, kanilezi hi celwa ka zilo za moya? A ku chikela hi xikhati mitlhanganweni ya wuKristu, a ku patsa ni ku yimbelela a lisimu lo sangula ni mukhongelo, zi kombisa a ku navela ka hina ka ku pimanyisa a Dadani wa hina wa le tilweni wa nongameto. — 1 Kor. 14:33, 40.

3. Hikuyini a ku chikela hi xikhati zi kombako vanwani xichawo?

³ A ku chikela hi xikhati zi tlhela zi kombisa xichawo hi vanwani. (Fil. 2:3, 4) Hi xikombiso, loku hi chikela hi xikhati ka mitlhangano ya wuKristu, a kupatsa ni mitlhangano ya ntiro wa simu, a zi colopeteli a maKristu-kulori. Hi tlhelo ginwani, loku hi tolovela ku celwa, lezo zi nyika vanwani maalakanyo ya lezaku hi wona xikhati xa hina kota xa lisima nguvu ku hunza xabye. A ku chikela hi xikhati zi komba kutsumbeka ni ku maha zilo hi ku chela kota — ku nga matshamela ma tsakelwako hi vontlhe.

4. Loku ku hi lezaku ha tolovela ku celwa, hi ta maha yini kasi ku cica?

⁴ Loku u tolovela a ku celwa, ehleketa hi lezi zi ku mahako u celwa. Ti longisele, hi ku maha longoloko wa lisine wu to ku maha u zi kota a ku maha mitiro ya wena yontlhe hi xikhati xa kona. (Mutsh. 3:1; Fil. 1:10) Kombela xivuno ka Jehova. (1 Joh. 5:14) A ku chikela hi xikhati yinwe ya tindlela ta ku komba ku nyika lisima a Milayo yimbiri ya hombe — ku nga ku ranza Nungungulu ni ku ranza muakelani. — Mat. 22:37-39.