A ku timisela kuxaniseka zi yisa ka wukustumunyu gi nene — A timhaka leti ti susilwe ka Anuário das Testemunhas de Jeová de 2013
Phajina 124, nzimana 1 — Mianmar (Birmânia)
Anzhako ka xikhati, le Mongpaw, ku nga xidoropana xi nga kusuhani ni mbhingano wa China, a xidlemo xa vaBaptista xi nga zangarile nguvu xi lo hisa Salawu ya Mufumo. A xikhati lexi a ximaho xabye xo biha xi nga tsanzeka ku chavisa Timboni ta xipanze lexo, a xidlemo lexo xi lo hisa a muti wa phayona go hlawuleka xi tlhela xi sangula ku chavisela vamakabye va xinuna ni va xisati mitini yabye. A vamakabye va lo yisa mhaka leyo ka hosi ya xipanze lexo, kanilezi yi wa yima ni vaBaptista. Hi kugumesa, a mufumo wu lo nghenela mhaka leyo zonake wu vumelela vamakabye lezaku va aka Salawu yiswa ya Mufumo — na ku nga hi ka wutshamu legi va nga akile kona kale le magumo ka xidoropana, kanilezi laha tlhelweni ga tsinza ga xidoropana!
Phajina 128, tinzimana 1 ni 2
A xikhati lexi a 23 wa vanana va Timboni le Khampat, ku nga doropa gi nga le ka mbhingano wa Birmânia ni Índia va nga ala ku bayethela mujeke wa tiko, a murangeli wa xisati wa xikola lexo i lo va hlongola laha xikoleni. Zonake a murangeli loye wa xisati i lo vitanisa madota mambiri ya bandla lezaku ma ta yima mahlweni ka ntlawa wa tihosana to kari, a ku patsa ni mulamuli wa laha doropeni ni nduna ya masochwa. Paul Khai Khan Thang, a ginwe ga madota lawo, i ngalo: “Kota lezi hi nga kari hi tlhamusela a xigelo xa Mitsalo xa xiyimo xa hina, a tihosana to kari ti lo kombisa ku zangara. Zonake hi lo va komba a phepha ga nayo wa wuhosi gi wulako lezaku a Timboni ta Jehova ta vumelelwa a kuva ‘ti yima ti ku hwi hi xichawo a xikhati lexi ku mahiwako tinkhozo ta mujeke.’ A tihosana leto ti lo vumala ni xo wula. Anzhako ka lezo, a nduna ya masochwa yi lo laya a murangeli wa xikola lezaku a vitanisa zigonzani lezi a nga zi hlongolile lezaku zi ta simama ku gonza. A murangeli loye i lo tlhela a avela maphepha lawo ya nayo ka vagonzisi vontlhe va xikola.”
Inyamutlha, a tihosana ta hombe ta mufumo wa le Mianmar ta xi tiva khwatsi a xiyimo xa Timboni ta Jehova xa ku nga ti ngheniseli ka politika. Hi ku yima ma tiyile ka matshinya ya milayo ya Biblia, a malanza ya Jehova ma nyika wukustumunyu gi nene, khwatsi hi lezi Jesu a nga wula. — Luka 21:13