Ndlela yo nyikela mabhuku ka xipanze ku wulawulwako tirimi to tala
1 Ka matshamu yo tala, a ntiro wa ku xumayela wuza wu chikelela ni vanhu va matiko manwani. A kutala kabye va lera hi kuhatlisa va tlhela va zwisisa khwatsi loku va gonzisiwa hi lirimi labye la mabeleko. Malulamiselo muni ma nga kona ya ku nyikela mabhuku ma seketelweko ka Biblia ka lava va tsakelako, hi lirimi leli va li zwisisako khwatsi ke?
2 Xikhati hi nga nyikelako mabhuku hi tirimi tinwani: Loku a mabandla mambiri kutani ku hunza ya tirimi to hambana ma tira ka xipanze xinwe, a tihubye ta madota ta xipanze lexo ti fanele a ku bhulisana ni vawoneleli va ntiro wa simu kasi va tiva mahela ga chukwana legi gi to vuna a lirimi la ntlawa wunwe ni wunwani lezaku wu nyika wukustumunyu hi kumbhelela. A xikhati lexi a vahuweleli va xumayelako hi muti ni muti, hi tolovelo va wa nga ta nyikela mabhuku hi lirimi la bandla ginwani kutani manwani. Hambulezo, loku a vahuweleli va nyikela wukustumunyu ga xitshuketi kutani ga laha kubaseni, va nga ha nyikela a mabhuku hi tirimi ta vanhu lavo. — Wona a Perguntas Respondidas ka Nosso Ministério do Reino wa Agosto wa 2003.
3 Hi veka mabhuku ya tirimi tinwani laha bandleni loku zi te yini? Hi nga maha yini loku ku hi ni vanhu vo tala va lirimi la matiko-wundle ka xipanze lexi ku nga hiko na bandla ga lirimi lelo? Ka ziyimo lezo, a mabandla ma nga ha veka a mabhuku-tshinya matsongwani ya lirimi lelo, yo kota a ziphephana ni mabroxura. A vahuweleli va nga ha nyikela a mabhuku lawo xontlhe xikhati va kumanako ni munhu a zi kotako ku lera a lirimi lelo.
4 Ndlela yo kombela mabhuku: Loku ku hi lezaku a bandla a gi na mabhuku hi lirimi leli a mutsakeli a li tivako ku lera, xana hi nga ma kumisa kuyini a mabhuku hi lirimi lelo? A muhuweleli i fanele ku wulawula ni nanza ga mabhuku kasi ku tiva lezaku hi wahi mabhuku ma nga kona hi lirimi lelo, kasi ku lawa ma lavekako ma kombeliwa ka xikombelo xa mabhuku ya bandla xi to lanzela.
5 Loku zi hi za xihatla, a muhuweleli a nga ha wutisa a xiro xa Kometi ya Ntiro ya Bandla lezaku xana a xikombelo xi nga ha ranga xi famba mahlweni ka lexi xa bandla ke. Loku xi vumelwa, a muwoneleli wa mabhuku kutani wokari a hlawulilweko hi yena a nga ha maha xikombelo xa xihatla hi ku rumela a e-mail ka hofisa ya ravi kutani ku fona. A mabhuku ma ta rumelwa hi khero ga bandla legi gi sinako gi tirisiwa kutani ginwani ga xikhatanyana, loku zi laveka. Loku a xikombelo xi lava lezaku a mabhuku lawo ma wuya nzeni ka siku ginwe kutani mambiri, a bandla gi ta hakhela mali yontlhe yi to tiriswa.
6 Ngha hi tirisa khwatsi a mabhuku ya wuKristu kasi ku vuna “vanhu vontlhe,” lezaku ‘vava ni kutiva ka lisine va tlhela va hanyiswa,’ na ku nga khataliseki lezaku va wulawula lirimi muni. — 1 Tim. 2:3, 4.