Ndlela yo khumba timbilu ta lava hi va gonzisako
1. A tigonzo ta Jesu ti wa khumbisa kuyini a timbilu ta vaingiseli vakwe?
1 Jesu Kristu i wa khumba timbilu ta vaingiseli vakwe. Ka khati ginwe hi wutsongwani ga kona, a timbilu ta vapizani vakwe ti lo ‘vura’ anzako ka kuva a va tlhamusele Mitsalo hi ndlela yo dlunyateka. (Luka 24:32) Kota lezi a munhu a faneleko ku ingisa Nungungulu na zi huma mbilwini, hi nga khumbisa kuyini a timbilu ta vontlhe lava hi va gonzisako kasi va cica a wutomi gabye ke? — Rom. 6:17.
2. A wutlhari ni kupimisisa zi vunisa kuyini ku khumba a timbilu ta vanhu?
2 Tirisa wutlhari ni kupimisisa: A kutala ka vanhu loku u va byela ntsena lezi zi nga zi nene ni lezi zi bihileko a zi va kuci ku cica nchumu. A xo tiya hi lezaku a ku vukela tigonzo ta wukhongeli gabye hi ku va tata tihloko hi mitsalo zi nga ha va maha va nga lavi ni kuzwa nchumu. Kasi ku kuca munhu, hi fanele ku ranga hi ku pola lezi zi mahako a kholwa ni ku maha zilo hi ndlela leyo. A ku maha ziwutiso zo lava mawonela hi wutlhari zi ta mu kuca ku humesa lezi zi fihleleko maalakanyweni yakwe. (Mav. 20:5) Anzhako ka lezo, hi kona hi nga hlawulako mahungu ka Mhaka ya Nungungulu lawa ma to khuma a mbilu yakwe. Hikwalaho, hi fanele ku kombisa kukhatala ni lihlaza-mbilu. (Mav. 25:15) Alakanya lezaku a vanhu va na ni makulela yo hambana hi tlhelo ga moya. Nyika xikhati xa ku a moya wa kubasa wa Jehova wu khumba a maalakanyo yabye ni mitiro yabye. — Mar. 4:26-29.
3. Hi nga va vunisa kuyini lava hi va gonzisako lezaku va hlakulela matshamela ma nene?
3 Va vune ku hlakulela matshamela ma nene: A zipanze za Biblia lezi zi kombako a wunene ni liranzo la Jehova zi nga vuna lava hi gonzako navo lezaku va hlakulela matshamela ma nene. Hi nga tirisa Mitsalo yo kota Tisimu 139:1-4 kutani Luka 12:6, 7 kasi ku mu komba lezi Nungungulu a khatalisako zona hi munwe ni munwani wa hina. Loku a vanhu va sangula ku bonga a wuxinji ga Jehova na zi huma mbilwini, a liranzo labye ni kutinyiketela kabye zi ta kula. (Rom. 5:6-8; 1 Joh. 4:19) Ahandle ka lezo, loku va gonza lezaku a mahanyela yabye ma khumba a wumunhu ga Jehova, va nga ha kuceka ku hanya hi ndlela yi to mu tsakisa ni ku mu nyika wudzunzo. — Tis. 78:40, 41; Mav. 23:15.
4. Hi nga kombisa kuyini xichawo hi kutlhatlheka ka munhu ka ku ti hlawulela a xikhati lexi hi gonzisako vanhu wutirelini?
4 Jehova a nga sinzisi munhu lezaku a ingisa milayo yakwe. Kanilezi, i khongotela vanhu hi ku va komba a wutlhari ga ku lanzela a wusungukati gakwe. (Isa. 48:17, 18) Hi pimanyisa Jehova loku hi gonzisa hi ndlela yi vunako vanhu lezaku va chikelela magumo ha voce. Loku a vanhu va wona ha voce a xilaveko xa ku cica zokari wutomini gabye, a wuyelo ga kona ga simasima. (Rom. 12:2) Lezo zi va tshineta nguvu ka Jehova, loyi a ‘hlolako timbilu.’ — Mav. 17:3.