Kani u muswa kani u wahombe, ngha uva xikombiso xi nene ka vanwani — A timhaka leti ti susiwa ka Anuário das Testemunhas de Jeová de 2015

Europa

Xikombiso xi nene xa raru

Phajina 71 nzimana 2, kala phajina 72 nzimana 5

Jemima, a hanyako Espanha, i gonzisilwe lisine na a ha hi nwanana. Kanilezi a xikhati a nga hi ni ntlhanu wa malembe ni mambiri, a wutomi gakwe gi lo wela rinzini. A mamani wakwe i lo boha ku tsika kuva Mboni ya Jehova a tlhela a tlhatlha wukati ni papai wakwe. Laha a nga hi ni 13 wa malembe, Jemima i lo nyima ku tlhangana ni Timboni a tlhela a ala ni xihi xivuno xa moya xa papai wakwe.

Laha Jemima a ngaya a kula, i lo ti nghenisa ka mitlawa ya politika ni ya ku vuna vanhu, na a lava lezaku a vanhu va nyalidede va mahelwa “kululama.” Hi kufamba ka xikhati, laha a nga mbhelelwa hi ntiro, papai wakwe Domingo i lo mu ramba lezaku a ya tira naye kota mupendi.

Ka siku go kari, na va tira zinwe, Domingo i lo byela Jemima lezaku i tsakela ku mu fambisela xigonzo xa Biblia. Kanilezi, Jemima i lo ala, aku loku a tshuka a zi lava i wa ta mu byela. Loku va kari va penda, Domingo i wa ingisela Biblia ni marevista ma thepilweko, kanilezi Jemima i wa hlawula ku ingisela wucenje ga pop hi maeskutadori.

Hi Novembro wa 2012, Domingo, loyi a nga chadile ga wumbiri, i lo rambiwa ka Xikola xa Biblia xa Mipatswa ya maKristu. Jemima i lo hlamala nguvu hi lezi papai wakwe a nga lava ku ya mbheta tihweti timbiri ka xikola xa Biblia a gumesa a tsika zontlhe kasi kuya ni kwihi lomu a nga wa ta rumelwa kona. Jemima i lo sangula ku wona lezi a lisine li nga zimisile zona timitsu mbilwini ya papai wakwe, a tlhela a lava ku tiva ku hikuyini.

Jemima i lo nyima ku ingisela wucenje gakwe zonake a sangula ku ingisela mabhuku lawa papai wakwe a nga ingisela. I lo sangula ku maha ziwutiso kambe. Ka siku go kari, Domingo i wa hi le hehla ka xikada na penda, Jemima aku: “Wa gi alakanya a siku legi nzi ngaku loku nzi ta zi lava ku gonza Biblia nzi ta ku byela? Makunu nza zi lava.”

Domingo i lo tsaka hi kuzwa lezo. Hi Janeiro wa 2013, va lo sangula ku gonza zinwe makhati mambiri hi viki. A xikola xi lo sangula hi Abril, niku Domingo i lo simama ku gonza naye na va wonana hi Internet. Jemima i loya ka longoloko wa kupasa ka papai wakwe, niku i lo xalala nguvu hi wona. Hi 14 ka Dezembro wa 2013, Jemima i lo bapatizwa.

Jemima i ngalo: “Jehova ive ni lihlaza-mbilu la hombe hi mina, niku nza zi tiva lezaku a nga tshukangi a nzi tsukulile. I nzi nyikile zilo zaku cima nzi wa nga se zi kuma tikweni — ku nga vanghana va lisine. A wumakabye ga misava yontlhe gi nzi maha nzi wona khwatsi a liranzo la Jehova.”

Oceânia

I nwanana nguvu kasi ku xumayela ke?

Maphajina 76, 77

Ka mixo yo kari, Teariki, wa ntlhanu wa malembe ni mambiri xihlaleni xa Tarawa, le Kiribati, i wa hi wutirelini ni papai wakwe Tueti, zonake va ya nghena ka muti wo kari va kuma ntlawa wa xipimo xa khume ga vavanuna ni vavasati va nga kwalomo ka 20 wa malembe. Anzhako ka loku papai wa Teariki a va bhulele a mahungu ya Mufumo, a munwe wabye i te ngalo ka Tueti: “Hi wona lezaku nwentlheni mu famba mu xumayela ni vanana va nwina. Mu va xanisela yini? Va ha hi vanana nguvu kasi ku xumayela xungetano hi Nungungulu.”

Tueti i lo va hlamula aku: “Mu lava ku wona lezaku a n’wana wa mina wa zi kota ku xumayela ke? Kuzilava nzi nga huma handle, mu sala muzwa lezi a nga nazo.” A ntlawa wu lo vumela wontlhe wuku, “Ina, ha zi lava ku muzwa.”

Anzhako ka loku Tueti a humile handle, Teariki i lo wutisa a ntlawa lowo aku, “Ma gi tiva a vito ga Nungungulu?”

A munwe wabye aku: “Ina, hi Jesu!” A munwani aku, “Hi Nungungulu.” Ni munwani kambe i te, “Hi Hosi.”

Teariki aku: “A hi woneni lezi a Biblia gi zi wulako. A hi gonzeni zinwe lomu ka Isaya 42:5.” Anzhako ka ku gonza mutsalo lowo, i lo va wutisa aku: “Wu wulawula hi mani a mutsalo lowu?”

A munwe wabye i lo hlamula aku, “Hi Nungungulu.” Teariki aku: “Hi zona, wu wulawula hi Nungungulu wa lisine. Loku hi gonza ka vesi 8, hi ta wona lezi Nungungulu a hi byelako. I ngalo: ‘Nzi Jehova, hi gona vito ga mina lego; nzi nga ta nyikela ka munwani a wukulu ga mina.’ Mu gi wonile a vito ga Nungungulu?”

Va lo hlamula vontlhe vaku, “Hi Jehova.”

Laha a nga wona lezaku vontlhe va ingisela, Teariki i lo va wutisa aku: “Ma zi tiva ku hikuyini zi nga za lisima ku tirisa a vito ga Nungungulu, gaku Jehova? A hi zi woneni ka Mitiro 2:21. Hi gonza lezi: ‘Ni wihi a ta nga khongela vitweni ga [Jehova] i ta hanyiswa.’ Hikuyini zi nga za lisima ku tirisa a vito ga Nungungulu?”

Munwe wa kona aku, “Kasi hi ta hanyiswa.”

A papai wa Teariki i lo wuya makunu. I lo wutisa ntlawa lowo aku: “Mu zi wonisa kuyini? A vanana va hina va zi kota ku xumayela? Hi nga fambafamba navo?” A ntlawa wu lo vumela wontlhe lezaku a vanana va zi kota nguvu ku xumayela niku zi nene a kuva va fambawu ntirweni wo xumayela. Tueti aku: “Nwinawu loku mo gonza a lisine la Biblia, mu nga gonzisa vanwani a ku fana na Teariki.”