Timhaka ta mabhuku ma tako ka Cibhukwana ca Mutlhangano

6-12 KA MAIO

TITSHOMBA TI NGA KA MHAKA YA NUNGUNGULU | 2 VA LE KORINTE 4-6

“A hi mbheli ntamu”

(2 Va Le Korinte 4:16) Hikwalaho a hi rereki, hambu loku a munhu wa hina wa lahandle a hlakala, a munhu wa hina wa lomu ndzeni i mahiwa wa muswa siku ni siku.

w04 15/8 25 ¶16-17

A hi rereki hambu loku hi karele

A ku khatalela a lihanyo la hina la moya zva lisima nguvhu. Loku hi hi ni kuzwanana ku nene na Jehovha Nungungulu, hi nga karala nyama, kanilezvi hi nga ta tshuka hi karala ku mu khozela. Jehovha “wa nyika ntamu ka lava va rerekileko, a tiyiseta lava va nga hava ntamu.” (Isaya 40:28, 29) Mupostoli Pawule, loyi a nga wona kutatiseka ka magezu lawo laha ka yena wutsumbu, i tsalile lezvi: “A hi rereki, hambu loku a munhu wa hina wa lahandle a hlakala, a munhu wa hina wa lomu ndzeni i mahiwa wa muswa siku ni siku.” — 2 Va Le Korinte 4:16.

Wona lezvaku i te “siku ni siku”. Lezvo zvi wula ku hi fanele ku londzowota a malulamiselo ya Jehovha siku ni siku. A makabye wo kari wa cisati a tirileko hi kutsumbeka hi 43 wa malembe kota murumiwa i wa tshuka a karala a tlhela ava ni gome. Hambulezvo, i wa nga rereki. I ngalo: “Ndzi wa tolovela ku vindzuka ku vhuka kasi ndzi kuma cikhati ca ku khongela ka Jehovha ni ku lera Mhaka yakwe na ndzi nga se sangula ku maha zvin’wani. A ku maha lezvo siku ni siku zvi ndzi vhunile ku timisela kala nyamutlha.” Kunene hi nga tsumba lezvaku Jehovha i ta hi nyika a ntamu wakwe loku, siku ni siku, hi khongela kakwe hi tlhela hi ehleketa hi matshamela yakwe ya ma nene ni zvitsumbiso zvakwe.

(2 Va Le Korinte 4:17) Hakuva hambu lezvi a kuxaniseka ku nga ka cikhatana ni lezvi ku vevukako, ku hi pswalela kungangamela ka hombe nguvhu ku nga hiko na kuringaniswa, ku nga kungangamela ka pindzukelwa;

it-1724-725

Kutimisela

Zva lisima kambe ku hi nga tshuki hi rivala a kutsumba ka hina ka ku hanya kala kupindzuka na hi nga hi na ciwonho. Hambu loku hi dawa hi valala va hina a kutsumba loko a ku fuvi. (Rom 5:4, 5; 1Te 1:3; Kuv 2:10) A tixanisa leti hi kumanako nato zvezvi ti nga tava ta nchumu loku hi ti fananisa ni kutatiseka ka kutsumba loko ka hombe. (Rom 8:18-25) Loku hi ku fananisa ni wutomi ga pindzukelwa, ni kwihi kuxaniseka, hambu loku ku bayisisa kuyini zvezvi, ‘ka cikhatana niku ka vevuka’. (2Ko 4:16-18) A ku alakanya lezvaku a mindzhingo ya cikhatanyana ni ku veka kupima ka kutsumba ka hina ka wuKristu zvi nga hi vhuna ku hi nga rereki hi tsika ku tsumbeka ka Jehovha Nungungulu.

Kela titshomba ta moya

(2 Va Le Korinte 4:7) Kanilezvi, a tshomba leyi hi nga nayo yi lomu ka zvibya zva wumba kasi zvi woneka lezvaku hi amukele ntamu wa hombe wo hundza wa munhu — wu nga ntamu wa Nungungulu, na wu nga hi wa hina.

w12 1/2 28-29

“Maha Jehovha a tsaka”

David Splane wa Hubye yi Fumako i wulawulile hi mhaka leyo ya lomu ka Mitsalo. (2 Va Le Korinte 4:7) Cini a tshomba leyo? Xana wutivi kutani wutlhari? A mukaneli i no hlamula aku: “Ahihi. A tshomba leyi mupostoli Pawule a nga wulawula hi yona i ‘ntiro lowu’ wa ku ‘tivekisa lisine’.” (2 Va Le Korinte 4:1, 2, 5) Makabye Splane i alakanyisile a zvigondzani lezvaku a ntlhanu wa tihweti leti va nga mbheta na va gondza ti wo va longisela kasi ku maha ntiro wo hlawuleka wo chumayela. A ntiro lowo va wa fanele ku wu nyika nguvhu lisima.

A mukaneli i tlhamusele lezvaku a “zvibya zva wumba” mimiri ya hina ya nyama. I kombile kuhambana ku nga kona cikari ka zvibya zva wumba ni zvibya zva ouro. A zvibya zva ouro a zvi tirisiwi nguvhu. Kanilezvi a zvibya zva wumba zvi mahelwe ku tira. Loku ho veka tshomba lomu ka cibya ca ouro, kuzvilava hi wa ta veka kupima ka zvontlhe zva zvimbiri, a cibya leco ni tshomba leyi yi nga lomo. Makabye Splane i te: “N’wina zvigondzani a mu lavi ku ti kokela wudzundzo. Kota varumiwa, mu lava ku kongomisa vanhu ka Jehovha. N’wina mu zvibya zva wumba.”

(2 Va Le Korinte 6:13) Makunu kasi mu hi tlhelisela, n’winawu vhululani timbilu ta n’wina tontlhe — ndzi wulawula na n’wina kota vana va mina.

w09 15/11 21 ¶7

Simamani ku engetela a lirandzo la n’wina la wumakabye

Hina ke? Hi nga ‘vhululisa kuyini timbilu ta hina’ loku hi kombisa lirandzo la wumakabye? A vanhu va tanga yin’we kutani va tako hi ka wutshamu gin’we zva va olovela ku wumba wunghana. A vanhu va tsakisiwako hi zvilo zvo fana vonawu va tolovela ku mbheta cikhati co tala na va hi zvin’we. Kanilezvi loku a zvilo lezvi hina ni maKristu yo kari hi zvi randzako zvi hi hambanisa ni van’wani, hi fanele ku “vhulula timbilu” ta hina. Zvi ngava wutlhari a ku ti wutisa lezvi: ‘Xana zva kala a ku ndzi tira kuchumayeleni kutani ku ti hungata ni vamakabye lava va kalako va nga hi vanghana va mina? Lomu Salawini ya Mufumo, ndza potsa ku bhula ni lava va ha hiko vaswa laha bandleni na ndziku ndza ha lava ku va wona ku va ringanelwa hi kuva vanghana va mina ke? Ndza losa vontlhe laha bandleni a vaswa ni va hombe?’

13-19 KA MAIO

TITSHOMBA TI NGA KA MHAKA YA NUNGUNGULU | 2 VA LE KORINTE 7-10

“Ntiro wa hina wa ku vhunetela”

(2 Va Le Korinte 8:1-3) Makunu vamakabye, lezvi hi lava lezvaku mu tiva a tipswalo leti Nungungulu a ti kombisileko ka mabandla ya le Makedhoniya. ² Hambu lezvi va nga hi ciringweni ca kuxaniseka ka hombe va wa tsaka nguvhu, ni lomu wusiwaneni ga hombe va no komba lezvaku va ganyile hi ka moya hi ku nyika na va tsakile. ³ Ndza va kustumunyela lezvaku va nyikele lezvi va nga hi nazvo, ina, va nyikele ni zvo hundza lezvi va nga hi nazvo.

w98 1/11 25 ¶1

“Nungungulu i randza loyi a nyikako na a tsakile”

A kuranga, mupostoli Pawule i wulawulile hi va le Makedhoniya, lava va nga nyika cikombiso ci nene ka ntiro wa ku vhunetela. Pawule i tsalile lezvi: “Hambu lezvi va nga hi ciringweni ca kuxaniseka ka hombe va wa tsaka nguvhu, ni lomu wusiwaneni ga hombe va no komba lezvaku va ganyile hi ka moya hi ku nyika na va tsakile.” A vaMakedhoniya va wa nga rindzeli ku kuciwa. A ku hambana ni lezvo, Pawule i te “hi kuzvirandza kabye, va no hi khongotela nguvhu kasi vonawu vava ni thomo ga ku humesa hlengo”. A kuhana ka vaMakedhoniya ku woneka khwatsi loku hi alakanya lezvaku vona wutsumbu va wa hi “wusiwaneni ga hombe”. — 2 Va Le Korinte 8:2-4.

Kela titshomba ta moya

(2 Va Le Korinte 10:17) “Kanilezvi loyi a ti dzundzako, i wa ti dzundze hi Jehovha.”

g99 8/7 20-21

Xana zvi bihile ku ti dzundza?

Lomu ka Mitsalo ya ciGreki ya wuKristu, a gezu kau·khaʹo·mai, gi hundzuluselwako ku “ku ti kulisa, ku tsaka, ku ti dzundza”, ga tirisiwa hi ndlela ya yi nene ni ya hava. Hi cikombiso, Pawule i li hi nga ‘tsaka na hi kari hi rindzela ku nyikiwa cikhundla co tlakuka hi Nungungulu’. I tlhela a hi kuca aku: “Loyi a ti dzundzako, i wa ti dzundze hi Jehovha.” (Va Le Roma 5:2; 2 Va Le Korinte 10:17) Lezvo zvi wula ku tizwa matshandza hi Jehovha kota Nungungulu wa hina, lezvi zvi hi mahako hi tsakela vito gakwe ni wudhumo gakwe.

20-26 KA MAIO

TITSHOMBA TI NGA KA MHAKA YA NUNGUNGULU | 2 VA LE KORINTE 11-13

“Pawule i wa hi ni ‘muzwa nyameni’”

(2 Va Le Korinte 12:7) hi lezvi ntsena ndzi amukeleko a kuvhululelwa ka hombe ko kota loku. Kanilezvi kasi ndzi nga ti tlakusi ku hundza mpimo, ndzi no nyikwa muzwa nyameni, ku nga ngilozi ya Sathani, yi tshamako hi ku ndzi tshakatela kasi ndzi nga ti tlakusi ku hundza mpimo.

w08 15/6 3-4

Jehovha i mu nyikile ntamu Pawule

A nandza gin’wani gi kombele Jehovha lezvaku a gi susela “muzwa nyameni”, ci nga hi cikarato co bayisa. Mupostoli Pawule i khongotele Nungungulu makhati manharu lezvaku a mu tlhatlhisa ka ndzhingo lowo. Kani ci wa hi cini, a cikarato leco co fana ni muzwa wu tlhavetelako na ci mu mbhetele litsako Pawule ntirweni wa Jehovha. Pawule i fananisile cikarato leco ni ku tshamela ku bungutelwa. Kanilezvi, Jehovha i te: “A tipswalo ta mina ka wena ti enele, hakuva a ntamu wa mina wu maha wa hombe nguvhu a cikhati leci wena u rerekileko.” Jehovha a nga susangi muzwa lowo a nga hi nawo nyameni. Pawule i wa fanele ku wu timisela. Hambulezvo, i te: “Loku ndzi rerekile, hi kona ndzi nga ni ntamu.” (2 Kor. 12:7-10) I wa lava ku wula kuyini?

(2 Va Le Korinte 12:8, 9) Ndzi khongotele Hosi makhati manharu lezvaku yi susa a muzwa lowo ka mina. ⁹ Kanilezvi yi no ndzi hlamula yiku: “A tipswalo ta mina ka wena ti enele, hakuva a ntamu wa mina wu maha wa hombe nguvhu a cikhati leci wena u rerekileko.” Hikwalaho, ndzi ta ti dzundza na ndzi tsakile nguvhu gomeni ga mina kasi a ntamu wa Kristu wu tshama hehla ka mina kota tenda.

w06 15/12 24 ¶17-18

Jehovha wa va nyika “moya wo basa lava va mu kombelako”

Kasi ku hlamula mikhongelo ya Pawule, Nungungulu i te: “A tipswalo ta mina ka wena ti enele, hakuva a ntamu wa mina wu maha wa hombe nguvhu a cikhati leci wena u rerekileko.” Pawule aku: “Hikwalaho, ndzi ta ti dzundza na ndzi tsakile nguvhu gomeni ga mina kasi a ntamu wa Kristu wu tshama hehla ka mina kota tenda.” (2 Va Le Korinte 12:9; Lisimu 147:5) Hi ndlela leyo, Pawule i wonile ntamu wa Nungungulu hi ku tirisa Kristu na wu mu vhikela a ku khwatsi i tenda. Inyamutlha, Jehovha i hlamula mikhongelo ya hina hi ndlela yo fana. Wa vhikela malandza yakwe a ku khwatsi ku gwimba tenda hehla kabye.

Lisine ku a tenda a gi vhali vhula lezvaku yi ngani kutani ku nyimisa moya lezvaku wu nga habi, kanilezvi ga hi vhikela ka zvilo lezvo. Hi kufanana, a “ntamu wa Kristu” a wu vhali mindzhingo kutani tixanisa lezvaku zvi nga hi weli. Hambulezvo, wa hi vhikela hi tlhelo ga moya ka zvikarato zva tiko legi ni kuvhukela ka murangeli wa gona, Sathani. (Kuvhululelwa 7:9, 15, 16) Hikwalaho, hambu loku u lwisana ni cikarato co kala ci nga vhumeli ku ‘suka’, u nga tiyiseka lezvaku Jehovha wa ku wona a kulwa ka wena niku wa hlamula “loku azwa gezu ga wena”. (Isaya 30:19; 2 Va Le Korinte 1:3, 4) Pawule i tsalile lezvi: “Nungungulu i tsumbekile, a nga ta mu tsika mu ringiwa a ku hundza a ntamu wa n’wina; kanilezvi loku mu welwa hi ndzhingo, i ta mu vhululela ndlela ya kupona, kasi mu zvi kota ku wu timisela.” — 1 Va Le Korinte 10:13; Va Le Filipi 4:6, 7.

Kela titshomba ta moya

(2 Va Le Korinte 12:2-4) Ndza tiva munhu a nga zvin’we na Kristu, loyi ka 14 wa malembe ma hundzileko a tekilweko a yisiwa ka tilo ga wunharu — kani i wa hi mirini, kutani i wa hi handle ka miri, a ndzi zvi tivi; Nungungulu wa zvi tiva. ³ Ina, ndza mu tiva munhu loye — kani i wa hi mirini, kutani i wa hi handle ka miri, a ndzi zvi tivi; Nungungulu wa zvi tiva — ⁴ loyi a tekilweko a yisiwa paradhiseni a tlhela azwa magezu ma nga wulekiko ne ma nga faneliko ku wuliwa hi munhu.

w18.12 8 ¶10-12

Zviwutiso zva vagondzi

A “tilo ga wunharu” legi gi kumbukiwako ka 2 Va Le Korinte 12:2 kuzvilava Mufumo wa wuMesiya mandleni ya Jesu Kristu ni lava va 144 000, va nga “matilo maswa”. — 2 Ped. 3:13.

A Mufumo lowo i “tilo ga wunharu” hi lezvi wu nga mufumo wa hombe nguvhu ni wo tlakuka.

A ‘paradhise’ legi Pawule a nga ‘tekiwa a yisiwa’ ka gona hi muwoniso kuzvilava ku wuliwa 1) a Paradhise legi gi tako misaveni, 2) paradhise ga moya legi gi tova kona ka cikhati leco, gi tova ga hombe nguvhu ku hundza legi gi nga kona zvezvi, 3) ‘paradhise ga Nungungulu’ ga le tilweni gi to fambisana ni misava yiswa.

(2 Va Le Korinte 13:12) Losanani hi kupswopswana ko basa.

it-2177

Kupswopswa

A “kupswopswana ko basa”. Cikari ka maKristu yo sangula ku wa hi ni “kupswopswana ko basa” (Rom 16:16; 1Ko 16:20; 2Ko 13:12; 1Te 5:26) kutani “kupswopswana ka lirandzo” (1Pe 5:14), loku kuzvilava ku nga mahiwa hi vanhu va ciro ca wubeleki co fana. A malosanela lawo ya maKristu yo sangula kuzvilava ma fana ni lawa ya vaHebheru va kale va nga losana hi ku pswopswana. Hambu lezvi a Mitsalo yi kalako yi nga nyiki mitlhamuselo, a “kupswopswana ko basa” kutani “kupswopswana ka lirandzo” kuzvilava ku wa kombisa a lirandzo ni wumun’we gi nga hi kona lomu bandleni ga wuKristu. — Joh 13:34, 35.

27 KA MAIO–2 KA JUNHO

TITSHOMBA TI NGA KA MHAKA YA NUNGUNGULU | VA LE GALATIYA 1-3

Kela titshomba ta moya

(Va Le Galatiya 3:1) Zvipumbu ndzin’wina vaGalatiya! Mu tlhamuselwe zviku dlunya lezvaku Jesu Kristu i belelwe mhandzeni, makunu himani a nga mu kanganyisa?

it-1880

Papilo ga Va Le Galatiya

A kuva Pawule a te “zvipumbu ndzin’wina vaGalatiya” a zvi wuli lezvaku i wo wulawula hi lixaka lin’we la vanhu, leli li nga wumbiwa ntsena hi vaGálico va nga hi le norte wa Galatiya. (Gal 3:1) Kanilezvi, Pawule i wo kawuka vokari lomu mabandleni ya Galatiya lava va nga vhumela ku hambukisiwa hi vaJudha vo kari va nga hi kona cikari kabye, lava va nga zama ku ti maha vo lulama hi kuya hi nayo wa Mosi wutshan’wini ga ‘kululama ka kukholwa’ loku ku tako hi ka civhumelwano ciswa. (2:15–3:14; 4:9, 10) A “mabandla ya le Galatiya” (1:2) lawa Pawule a nga ma tsalela papilo ma wa wumbiwa hi vaJudha ni vanhu vo kala va nga hi vaJudha; ka lava vo kala va nga hi vaJudha a vokari va wa hi vaproselita va mahileko wukwera ni vamatiko vo kala va nga mahangi wukwera, niku handle ko kanakana a vokari va wa hi vaCelta. (Mit 13:14, 43; 16:1; Gal 5:2) A papilo gi waya ka vona vontlhe hakuva a cipandze leci va nga hanya ka cona ci wa vitaniwa ku i Galatiya. A mongo wa mhaka hi ku Pawule i wa tsalela a vanhu lava a nga tivana khwatsi navo le sul ka provhinsya leyo ya Roma, na ku nga hi vanhu vo kala ni ku va tiva lava va nga hanya le norte, lomu zvi wonekisako ku khwatsi a nga zangi a fambele kona.