Timhaka ta mabhuku ma tako ka Cibhukwana ca Mutlhangano
7-13 KA DEZEMBRO
TITSHOMBA TI NGA KA MHAKA YA NUNGUNGULU | LEVI 10-11
“Randza nguvhu Jehovha a ku hundza maxaka ya wena”
(Levi 10:1, 2) A vana va Aroni, Nadhabhe, na Abhihu, loyi ni loyi i lo teka a cibya cakwe ca ku hisela libani, va lo woka a ndzilo ka zvona, va vekela a libani hehla ka zvona, zvonake va lo nyikela mahlweni ka Jehovha a ndzilo wu nga hiko wona, va maha lezvi a nga va leletelangiko. 2 Zvonake a ndzilo wu lo huma hi le mahlweni ka Jehovha, wu va hisa vafa mahlweni ka Jehovha.
it-2 371
Zvilo zvi nga yelaniko ni nayo
Libani ni ndzilo wu nga yelaniko ni nayo. Levi 10:1 i wula lezvaku a vana va Aroni, Nadhabhe na Abhihu va mahile muphahlo ka Jehovha hi ‘ndzilo wu nga leletelwangiko’ [wo kala ku toloveleka]. Jehovha i wa nga va leletelangi a ku maha lezvo, hikwalaho i no va daya hi ku tirisa ndzilo. (Le 10:2; Mitse 3:4; 26:61) Jehovha i wa sina a byelile Aroni ku: ‘U nganwi a vhinya ni byala, wena ni vana va wena, loku mu ta nghena lomu ka tabhernakeli ga mutlhangano, mu ngafa. Lowu i nayo wa kala kupindzuka, wa zvizukulwana zvontlhe. Kasi mu ta zvi kota ku hambanyisa lezvi zvi basileko ni lezvi zvi nga basangiko, ni lezvi zvi nga hlazvekangiko ni lezvi zvi hlazvekileko; ni lezvaku kasi ma zvi kota ku gondzisa a vanana va ka Izrayeli a milayo yontlhe ya Jehovha, leyi a leleteleko hi nomu wa Mosi.’ (Le 10:8-11) Zvi wonekisa ku khwatsi Nadhabhe na Abhihu va wa popilwe laha ka kuza va hambunyeta nayo, va maha muphahlo hi ndzilo wo kala wu nga leletelwangi. Kuzvilava a ndzilo lowo wu wa nga yelani ni nayo hi kota ya ciyimo, wutshamu, kutani lezvi va nga wu nyikelisa zvona, kutani ku va tirisile libani lo kala li nga hi lona leli li leletelweko lomu ka Eksodusi 30:34, 35. Kota lezvi va nga maha muphahlo lowo na va polilwe, Jehovha a nga va tsetselelangi.
(Levi 10:4, 5) Zvonake Mosi i lo vitana Mixayeli na Elizafane, a vana va Uziyeli, a raru tsongwani wa Aroni, aku ka vona: Tshinelani mu susa vanakuloni mahlweni ka wutshamu gi basileko, mu va yisa lahandle ka wugovelo. 5 Va lo tshinela, va va petsela lomu ka tinguwo tabye, va va yisa le handle ka wugovelo, kota lezvi Mosi a va layileko.
(Levi 10:6, 7) Mosi aku ka Aroni, na Eliazare, na Itamare, vana va Aroni: Mu nga fununguli tihloko ta n’wina, hambu ni ku handzula tinguwo ta n’wina, mu ngafa, mu neha a zanga hehla ka ntlhangano wontlhe. Kanilezvi a vamakabye va n’wina, a yindlu ya ka Izrayeli, hi vona va ta nga rila hi kota ya nhova leyi yi hisilweko hi Jehovha. 7 Kambe mu nga dzuki mu huma laha nyangweni ya tabhernakeli ga mutlhangano, mu ngafa; hakuva a mafura ya ku tota ka Jehovha ma le hehla ka n’wina. Zvonake va lo maha kota lezvi Mosi a va layileko.
w11 15/7 31 ¶16
Xana u nghenile kuhumuleni ka Nungungulu?
16 Aroni, a makabye wa Mosi, i yimisene ni cikarato co bindza xungetano hi majaha yakwe ya mambiri. Alakanya lezvi a ti zwisileko zvona a cikhati leci a majaha yakwe Nadabe na Abihu va nga nyikela a ndzilo wu nga hiko wona mahlweni ka Jehovha, zvonake a va daya. Lisine lezvaku lezvi a majaha lawa ma nga file, zvi wa nga ta ha koteka a ku a vapswali vabye va tlhangana nawo. Kanilezvi ku na ni zvo hundza lezvo. Jehovha i lo leletela Aroni ni vana vakwe lava vo tsumbeka aku: ‘Mu nga fununguli tihloko ta n’wina, hambu ni ku handzula tinguwo ta n’wina [mu rila], mu ngafa, mu neha a zanga hehla ka ntlhangano wontlhe’. (Levi 10:1-6) A mhaka yi la su dlunya. Hi fanele ku mu randza nguvu Jehovha a ku hundza zviro zva ngango wa hina lezvi zvi nga tsumbekiko.
Kela titshomba ta moya
(Levi 10:8-11) Jehovha i lo engeta a byela Aroni, aku: 9 U nganwi a vhinya ni byala, wena ni vana va wena, loku mu ta nghena lomu ka tabhernakeli ga mutlhangano, mu ngafa. Lowu i nayo wa kala kupindzuka, wa zvizukulwana zvontlhe. 10 Kasi mu ta zvi kota ku hambanyisa lezvi zvi basileko ni lezvi zvi nga basangiko, ni lezvi zvi nga hlazvekangiko ni lezvi zvi hlazvekileko; 11 ni lezvaku kasi ma zvi kota ku gondzisa a vanana va ka Izrayeli a milayo yontlhe ya Jehovha, leyi a leleteleko hi nomu wa Mosi.
Ngha hi basa mahanyeleni ya hina wontlhe
18 Kasi ku tshama hi basile, hi fanele ku hlola khwatsi Mitsalo hi tlhela hi maha lezvi Nungungulu a zvi lavako. Ehleketa hi vana va Aroni, Nadabe na Abihu, lava va fileko hi ku ‘nyikela ndzilo wu nga hiko wona’ kuzvilava na va popilwe. (Levi 10:1, 2) Wona lezvi Nungungulu a nga byela Aroni anzhako ka lezvo. (Lera Levi 10:8-11.) Xana a magezu lawa ma wula lezvaku a hi faneli kunwa ni wihi nchumu wu yelanako ni byala na hi lava kuya mitlhanganweni? Ehleketa hi timhaka leti: A hi lahasi ka Nayo. (Rom. 10:4) Ka matiko yo kari, a makholwa-kuloni ma tirisa byala hi kuringanisela a cikhati ma gako na ma lava kuya mitlhanganweni. Ka Pasika ku tirisilwe mune wa magombe ya vhinya. A cikhati leci a nga yimisa a Cilalelo ca Hosi, Jesu i byelile vapostoli vakwe lezvaku vanwa vhinya legi gi nga yimela a nkhata wakwe. (Mat. 26:27) A Bhibhiliya gi beletela a kunwa nguvu ni kupopiwa. (1 Kor. 6:10; 1 Tim. 3:8) Niku a maKristu yo tala ma nga tshuka a tivalo tabye ti ma kuca ku potsa byala hi kumbhelela loku ma lava ku maha ni lihi lixaka la ntiro wu basileko. Hambulezvo, a zviyimo zva hambana hi kuya hi tiko gin’we ni gin’wani, niku a ca lisima hi lezvaku a maKristu ma tiva ku “hambanyisa a kusaseka ni kubiha” kasi ma hlayisa kubasa loku ku tsakisako Nungungulu.
(Levi 11:8) Mu ngagi a nyama ya zvona, hambu ni ku khumba zvirumbi zva zvona; zvi yilile ka n’wina.
it-1 135 ¶4
Zvihari
A nayo lowu wu wa tira ntsena ka vaIzrayeli lava va nga hi hasi ka nayo wa Mosi hakuva a cileletelo ci tsalilweko ka Levi 11:8 ci ngalo: ‘Zvi yilile ka n’wina.’ Laha a nayo lowu wu nga vhaletiwa hi muphahlo wa kufa ka Jesu Kristu, a ku beletela loku ku wa nga ha tiri. Hambulezvo, a vanhu va wa ta simama ku hanya hi nayo wo fana ni lowo lowu Jehovha a nyikileko Nowa andzhako ka Ntalo. — Kol 2:13-17; Gen 9:3, 4.
14-20 KA DEZEMBRO
TITSHOMBA TI NGA KA MHAKA YA NUNGUNGULU | LEVI 12-13
“Lezvi hi gondzako ka milayo yi nga vekelwe lava va nga hi ni hlokonho”
(Levi 13:4, 5) Kanilezvi loku a hlonge ya munhu ku woniwa a sakaveti go basa, legi gi nga hatimiko hi ku etisa lomu ka hlonge, ni loku a woya ga wutshamu lego gi nga hundzukangi gi basa, zvonake a mupristi a mu vhalele tlhelweni loye a babyako ntlhanu wa masiku ni mambiri. 5 Hi siku ga wuntlhanu ni mambiri, a mupristi i ta mu hlola, zvonake loku a pima, a wona lezvaku a sakaveti gi yimile a gi andzangi lomu hlongeni, a mupristi i ta engeta a mu valela ga wumbiri ntlhanu wa masiku ni mambiri.
Gi hundzelwe kutani gi wula zvilo na zva hi kule ni ku tiveka?
• Ku hambanisa vanhu va babyako ni van’wani.
A Nayo wa Mosi wu wa lava lezvaku a vanhu va hlokonho va ti hambanisa ni vanhu van’wani. Kala cikhatini ca mitungu yi nga humelela ka malembe ya va 476 kala 1500 Mahlweni ka Nguva ya Hina hi kona a vadhokodhela va nga sangula ku tirisa tshinya lego ga nayo, legi ga ha simamako ku vhuna nguvhu. — Levi zvipimo 13 ni 14.
(Levi 13:45, 46) Loyi a nga ni ntungu lowu wa hlokonho i ta ambala a tinguwo ti handzulweko, na a nga fenengeti a hloko yakwe; a fenengete a cilevhu cakwe. Zvonake i ta tshama na huwelela, aku: A ndzi hlazvekangi, a ndzi hlazvekangi! 46 Ka wontlhe masiku ya kubabya kakwe, i tava loyi a nga hlazvekangiko. Wa yila; i ta tshama yece; a tenda gakwe gi tava le handle ka wugovelo.
wp16.4 9 ¶1
U wa zvi tiva?
Cikhatini ca kale, a vaJudha va wa chava a muhlowo wokari wa hlokonho wu nga tolovelekile nguvhu. A hlokonho leyo yi wa thapela ni ku takara nguvhunguvhu lomu ka misiha (terminações nervosas). A mababye lawa ma wa nga hi na muri niku ma wa thapela. Lezvi zvi wa maha ku loyi a nga nawo a kurumeteka ku tshama yece a tlhela a tivisa van’wani lezvaku i thapelwe hi hlokonho. — Levi 13:45, 46,
(Levi 13:52) Hi lezvo i ta hisa a nguwo leyo, hambu loku yi hi nguwo leyi yi swulilweko hi mawoya, kutani hi leyi yi lukilweko, hambu loku ku hi wihi ntiro wu mahilweko hi bhebhe, loku wu hi ni tshasi, i hlokonho leyi yo karata; yi fanele ku hiswa ndzilweni.
(Levi 13:57) Kasi loku zvi woneka kambe laha ka nguwo, hambu ka lezvi zvi swulilweko, hambu ka lezvi zvi lukilweko, hambu ni ka zvihi lezvi zvi mahilweko hi bhebhe, lezvoke i hlokonho yi humako; u ta hisa a zvilo lezvo zvi nga ni sakaveti.
it-2 690 ¶8
Hlokonho
Lomu ka tinguwo ni lomu ka tiyindlu. A hlokonho yi wa thapela kambe ni lomu ka tinguwo ta mawoya, ta wukene ni lomu ka lezvi zvi mahilweko hi bhebhe. A sakaveti lego ga hlokonho kuzvilava gi wa suka loku a nguwo ya kona yi hlazviwa. Niku ku wa hi ni malulamiselo ya ku hambanyisa a tinguwo leti ti nga ni hlokonho ni leti to kala ku thapelwa. Kanilezvi, loku a sakaveti lego ga wukuxe, kutani ga kupswhuka gi simama laha ka nguwo, ku wa hi hlokonho yo karata hikwalaho a nguwo leyo yi wa fanele ku hisiwa. (Le 13:47-59) Loku laha ka khurisi ga yindlu ku woneka a sakaveti ga wukuxe kutani ga kupswhuka, a mupristi i wa vhala yindlu leyo kasi ku nga ngeni munhu. Kuzvilava zvi wa lava ku va susa a maribye lawa ma thapelweko va tlhela va hala kontlhe lomu ndzeni ka yindlu leyo, va guma va teka a chaka lego va gi halileko va gi halata lahandle ka muti, laha ka wutshamu gi nga hlazvekangiko. Kanilezvi loku a sakaveti lego gi simama lomu ndlwini, a yindlu leyo yi wa woneka na yi nga hlazvekangi, hikwalaho yi wa fanele ku khungumuliwa niku zvontlhe lezvi zvi khungumulilweko zvi wa fanele ku hoxiwa ka wutshamu legi gi nga hlazvekangiko. Kanilezvi loku a sakaveti lego gi mbela ku wa mahiwa man’wani malulamiselo ya ku basisa yindlu leyo. (Le 14:33-57) Ku wuliwa lezvaku a hlokonho leyi yi nga thapela a tinguwo ni tiyindlu ku wa hi muhlowo wo kari wa kuxi kutani tshasi (thasi), hambulezvo a ku na citiyisekiso ca lezvo.
Kela titshomba ta moya
(Levi 12:2) Byela a vanana va ka Izrayeli, uku: Loku wasati a xura nyimba, a beleka mufana, i tava a nga hlazvekangi ntlhanu wa masiku ni mambiri, i tava a nga hlazvekangi kota masikwini ya tihweti takwe.
(Levi 12:5) Kanilezvi loku a belekile a nhanyana, i tava a nga hlazekangi mavhiki mambiri, kota masikwini ya tihweti takwe; zvonake i ta simamisa a tshama laha kaya 66 wa masiku, hi kota ya wungozva gakwe, na a kari a basiswa.
w04 15/5 23 ¶2
Timhaka-tshinya ta bhuku ga Levi
12:2, 5—Hikuyini a wasati a phulukileko a nga woniwa kota munhu “wo kala kubasa”? A zviro zva wubeleki zvi mahilwe kasi ku pswala vanhu va kumbhelela. Hikwalaho, kota wuyelo gi kumiwako hi kota ya ciwonho, a zviro zva wubeleki zvi thapelisa a wutomi gi nga mbelelangiko ka vanana lava va pswaliwako. A masiku yo kala ku ‘hlazweka’ yo kota masiku ya ku phuluka, masiku lawa a wasati a wonako masiku yakwe, loku wanuna a ti tsakamisa hi mbewu ya wubeleki, wontlhe wasiku lawa ma wa maha vaIzrayeli va alakanya ku va thapele ciwonho. (Levi 15:16-24; Tisimu 51:5; Va Le Roma 5:12) A milayo yi nga yelana ni lezvi a vaIzrayeli va nga fanele ku maha kasi va basa yi wa va vhuna ku tiva a cilavelo ca muphahlo wa ku tlhatlhisa kasi ku tsetselela zviwonho zva vanhu ni ku tlhela va mbelela. Hi ku maha lezvo, a nayo wu nova ‘mugondzisi loyi a nga va yisa ka Kristu’.—Va Le Galatiya 3:24.
(Levi 12:3) Hi siku ga wuntlhanu ni manharu, a n’wanana i ta mahiwa wukwera.
Gi hundzelwe kutani gi wula zvilo na zva hi kule ni ku tiveka?
• Cikhati ca ku nghenisiwa wukwera.
A Nayo wa Nungungulu wu wa wula lezvaku a n’wana wa mufana i wa fanele ku nghenisiwa wukwera ka siku legi a tlhanganyisako a 8 wa masiku na a pswalilwe. (Levi 12:3) Ka zvivanana zva ha hi ku pswaliwako, ku zwisisiwa lezvaku andzhako ka vhiki a miri wa zvona wa zvi kota ku hatlisa ku nyimisa nkhata loku zvi ti bayisa. Cikhatini ca kutsaliwa ka Bhibhiliya, laha a matirela ya mababyi ma nga kala ma nga se andza, a ku nghenisa wukwera andzhako ka vhiki ni ku hundza zvi wa vhikela.
21-27 KA DEZEMBRO
TITSHOMBA TI NGA KA MHAKA YA NUNGUNGULU | LEVI 14-15
“Kasi hi lumba a wukhozeli gi basileko hi fanele ku basa”
(Levi 15:13-15) Loku a basisilwe loye a nga hi ni ntungu wo huma wubovhu i ta hlaya ntlhanu wa masiku ni mambiri ya kubasiswa kakwe; zvonake i ta hlazva a tinguwo takwe, a hlamba lomu matini ma hlazvekileko, zvonake ti tava a hlazvekile. 14 Zvonake hi siku ga wuntlhanu ni manharu i ta lava a matuva mambiri, kutani mavinyani mambiri ya zvipomba, aya ti kombisa mahlweni ka Jehovha laha nyangweni ya tenda ga mutlhangano, aya ma nyikela ka mupristi. 15 A mupristi i ta ma nyikela, a gin’we gi ta maha ga muphahlelo wa kuwonha, a gin’wani gi ta maha muphahlelo wa kuhiswa; lezvo a mupristi i ta mu mahela a ndzhiho mahlweni ka Jehovha hi kota ya wubabyi gakwe.
it-1 305
Kuhlamba
Ku wa hi ni zvigelo zvo tala zvi nga maha ku a vaIzrayeli va hlamba. A munhu loyi a nga hanya ka hlokonho, ni munhu loyi a henyako zvilo lezvi zvi tirisilweko hi munhu a nga ni wubabyi ga ku “huma wubovhu”, ni wanuna loyi a humako a mbewu ya wubeleki, ni wasati loyi a ha hi ku mbetako ku wona masiku yakwe (menstruação), ni wihi loyi a nga hlengela masango i wa woniwa kota munhu a nga “basangiko” niku i wa fanele ku hlamba. (Le 14:8, 9; 15:4-27) Loku a munhu a tshama ni cirumbi ca munhu kutani ku ci khoma i wa woniwa kota munhu a nga “basangiko” niku i wa fanele ku basisiwa hi mati ya kubasisa. Loyi a nga ala ku landza a cileletelo leci i wa fanele ku ‘susiwa cikari ka bandla, hakuva i nyenyezisile a wutshamu ga kubasa ga Jehovha’. (Mitse 19:20) A ku hlamba yi wa hi ndlela yo kari ya ku yimela kubasa mahlweni ka Jehovha. (Lis 26:6; 73:13; Isa 1:16; Eze 16:9) A ku hlamba hi mhaka ya lisine ya Jehovha, yi fanekiselwako hi mati, zva zvi kota ku basisa munhu.—Efe 5:26.
(Levi 15:28-30) Zvonake loku a nkhata wakwe wu nyimile ku huma, yena i hlaya a ntlhanu wa masiku ni mambiri, zvonake i tava a hlazvekile. 29 Hi siku ga wuntlhanu ni manharu, i ta teka matuva mambiri, kutani mavhinyani mambiri ya zvipomba, a ma neha ka mupristi laha nyangweni ya tabhernekeli ga mutlhangano. 30 A mupristi i ta nyikela gin’we gi maha ga muphahlelo wa kuwonha, a gin’wani gi maha ga muphahlo wa kuhiswa; zvonake a mupristi i ta mu mahela a ndzhiho mahlweni ka Jehovha hi kota ya nkhata wakwe lowu wu nga mu nyenyezisile.
it-2 805 ¶4
Ku wona masiku
A wasati yenawu i wa woniwa na a nga basangi loku a ‘nkhata wakwe wu simama ku huma na ma hundzile masiku yakwe’, hakuva ka cikhati leco i wa nyenyezisa a zvilo lezvi a nga tshamela ni ku etlelela, a ku patsa ni vanhu lava va nga khoma zvilo lezvo. Makunu loku a nkhata wakwe wu nyimile ku huma, i wa fanele ku hlaya a ntlhanu wa masiku ni mambiri, zvonake i tava a hlazvekile. Hi siku ga wuntlhanu ni manharu, a wasati loye i wa fanele ku teka matuva mambiri, kutani mavhinyani mambiri ya zvipomba, a ma neha ka mupristi kasi a mu mahela hi wona ndzhiho mahlweni ka Jehovha, a gin’we kota muphahlelo wa kuwonha a gin’wani kota muphahlo wa kuhiswa.—Le 15:19-30; wona LIMPO, LIMPEZA.
(Levi 15:31) Mu ta hambanyisa kota lezvo a zivi zva vanana va ka Izrayeli, kasi va fela ku kala va ngafi hi kota ya zivi zvabye, zva ku nyenyezisa a tabhernakeli ga mina legi gi nga laha cikari kabye.
it-2 724
Wutshamu go basa
2. Tenda ga mutlhangano gi nga guma gi maha tempeli. Zvontlhe zvilo, a kupatsa ni wutshamu ga tabhernakeli, wutshamu ga tempeli zvi wa woniwa kota wutsamu go basa. (Ek 38:24; 2Kr 29:5; Mit 21:28) A zvibya tshinya zvi nga vekiwa lomu ka wutshamu ga tempeli ku wa hi alati ga ku mahela kona miphahlo ni cinamelo ca suku (bacia de cobre). Lezvo zvi wa hi zvibya zvo basa. Ntsena lava va nga basile hi kuya hi nayo hi vona va nga ngena ni ka wihi mutlhangano wu nga mahiwa lomu ka wutshamu ga tabhernakeli. Hi ku fanana, i hava a nga fanele ku nghena lomu ka wutshamu ga tempeli na a nga basangi. Hi cikombiso, a wasati a nga basangiko i wa nga faneli ku khoma ni cihi cilo ci basileko hambu ku nghena lomu ka wutshamu go basa. (Le 12:2-4) Zvi laha kubaseni ku hambu a vaIzrayeli lava va nga simama ku woniwa kota vanhu va nga basangiko va wa woniwa kota lava va nyenyezisako a tebhernakeli. (Le 15:31) Lava va nga neha zvihari kasi ku maha muphahlo wa ku basisiwa ka hlokonho va wa fanele ku nyima hi laha nyangweni ya tabhernakeli ga mutlhangano. (Le 14:11) A kuna munhu a nga basangiko a nga fanele ku kuma cipandze ca nyama ya muphahlo wa kurula wu nga mahiwa tabhernakeline kutani tempeleni hakuva loku a ga nyama layo i wa tafa.—Le 7:20, 21.
Kela titshomba ta moya
(Levi 14:14) A mupristi i ta teka a nkhata wa muphahlo wa minandzu, a tota a ndleve ya cinene ya loyi a basiswako, ni laha ka litiho la hombe la canja ga cinene, ni laha ka litiho la hombe la kondzo wakwe wa cinene.
(Levi 14:17) Kasike a mafura lawa ma salako lomu canjeni gakwe, a mupristi i ta ma tota laha ka ndIeve ya cinene ya loyi a basiswako, ni ka litiho la homba la canja ga cinene, ni ka litiho la hombe Ia kondzo wa cinene, hi le hehla ka nkhata wa muphahlo wa minandzu.
(Levi 14:25) Zvonake i ta tlhava a hambana ya muphahlelo wa minandzu, ni mupristi i ta teka a nkhata wa muphahlelo wa kona, a wu tota laha ka ndleve ya cinene ya loyi a to basiswa, ni laha ka litiho la hombe la canja ga cinene, ni laha ka litiho la hombe la kondzo wakwe wa cinene.
(Levi 14:28) Zvonake mupristi i ta tota hi mafura lawa ma nga lomu canjeni gakwe a ndleve ya cinene ya loyi a to basisiwa, ni litiho la hombe la canja ga cinene, ni litiho la hombe la kondzo wakwe wa cinene, kwalomu a nga tota a nkhata wa muphahlo wa minandzu.
it-3 150 ¶1
Ndleve
A cikhati leci ku nga yimisiwa a vapristi le Izrayeli, Jehovha i leletele Mosi lezvaku a teka cipandze ca nkhata wa hamba ya ku wumbela wupristi a wu tota magumo ya ndleve ya cinene ya Aroni ni ka vana vakwe, a tlhela a va tota kambe ni ka litiho la hombe la kondzo wa cinene ni ka litiho la hombe la mandla gabye ga cinene. Lezvo zvi komba ku lezvi va nga zvizwa, lezvi va nga maha ni ndlela leyi va nga famba hi yona va wa fanele ku chela kota hi zvontlhe lezvi zvi nga maheka laho. (Le 8:22-24) Hi ndlela yo fana, loku a munhu wa hlokonho a basisiwa, a nayo wu wa wula lezvaku a mupristi i wa fanele ku teka cipandze ca nkhata wa muphahlo wa minandzu zvin’we ni cipandze ca mafura lawa ma salako a ma tota laha ka ndIeve ya cinene ya loyi a basiswako ka hlokonho. (Le 14:14, 17, 25, 28) A cileletelo leci ca fana ni malulamiselo lawa ma nga mahiwa ka khumbi yi nga tsakela ku simama yi tshama ka n’winyi wa yona ni ku mu tirela hi cikhati contlhe. Ka ciyimo leci, a n’winyi wa khumbi i wa fanele ku teka a khumbi yakwe a yi neha laha kusuhani ni livati zvonake a yi bhoxa ndleve hi litlhawo. A marka leyi yo woneka khwatsi yi nga mahiwa laha ka ndleve, yi wa komba lezvaku a khumbi leyo ya zvi lava ku simama yi ingisa a n’winyi wa yona.—Ek 21:5, 6.
(Levi 14:43-45) Kanilezvi loku a sakaveti gi engeta kambe gi woneka lomu ndlwini, laha na maribye na ma susilwe, ni yindlu na yi halilwe, va engeta va tshula, 44 zvonake a mupristi i ta engeta aya, loku a hlolisisile a sakaveti a wona na gi endzelekile lomu ndlwini, lezvoke i hlokonho leyi yo karata yi nga lomu ndlwini; ni yindlu yi yilile. 45 Zvonake va ta khungumula a yindlu, ni maribye, ni mapulangu, ni ndzope, ni misava yontlhe ya yindlu, zvontlhe lezvo zvi ta yiswa lehandle ka muti, ka wutshamu legi gi nga hlazvekangiko.
g 1/06 14, kwadru
Kukuruka—munghana ni nala!
XANA A BHIBHILIYA GA WULAWULA HI KUKURUKA?
A Bhibhiliya gi wulawula hi ‘ntungu wa hlokonho lomu ndlwini’ na gi komba a yindlu ya kona. (Le 14:34-48) Zvi wonekisa ku khwatsi a ntungu lowu, wu vitaniwako kambe ku i ‘hlokonho yo karata’ wu wa tshamisile ku khwatsi i kuxi kutani lezvi zvi humako laha ka paredhi loku gi kurukile, kanilezvi a kuna leci ci hi tiyisekisako ku lezvo lisine. Kani lisine kutani a hi lisine, leci hi ci tivako hi ku a nayo wa Nungungulu wu waku a venyi va yindlu leyo va wa fanele ku susa maribye lawa ma thapelweko va tlhela va hala kontlhe lomu ndzeni ka yindlu leyo, va guma va teka a chaka lego va gi halileko va gi halata lahandle ka muti, ‘ka wutshamu gi nga hlazvekangiko’. Kanilezvi loku a sakaveti lego gi simama lomu ndlwini, a yindlu leyo yi wa woneka na yi nga hlazvekangi hikwalaho yi wa fanele ku khungumuliwa niku zvontlhe lezvi zvi khungumulilweko zvi wa fanele ku hoxiwa. A zvileletelo lezvo zvi wa komba lezvaku Jehovha wa va randza nguvhu a vanhu vakwe, a lirandzo ni kutikarata kakwe kasi va va ni lihanyo la linene!
28 KA DEZEMBRO–3 KA JANEIRO
TITSHOMBA TI NGA KA MHAKA YA NUNGUNGULU | LEVI 16-17
“Lezvi hi gondzako hi siku ga miphahlo ya ku tsetselelwa zviwonho”
(Levi 16:12) Zvonake i ta teka a njhalo lowu wu teleko hi makhala ya ndzilo ma humako hi lomu alatini mahlweni ka Jehovha, ni mandla mambiri ma teleko hi libani lo nuhela li kuyilweko; na yena i ta neha lezvi zvilo lomu ndzeni ka nguwo ya cisirelo.
Lezvi hi zvi gondzako ka bhuku ga Levi
4 Lera Levi 16:12, 13. Hi nga alakanyela lezvi zvi nga maheka hi siku ga ku maha muphahlo wa ku kombela ku tsetselelwa zviwonho: Ka siku lego a mupristi wa hombe i wa fanele ku nghena makhati manharu lomu tabhernakelini. Ka khati go sangula a nga nghena lomu ka Wutshamu go Basabasa i wa nghena na a khomile a cibya ci teleko hi libani lo nuhela hi woko gin’we, legi gin’wani a khoma cibya ca ouro co hisela ka cona libani ci teleko hi makhala ya ndzilo. I wa nyimanyana laha mahlweni ka kortina gi nga vhala a nyangwa ya Wutshamu go Basabasa. A gumesa a nghena lomu ka Wutshamu go Basabasa hi cichavo ca hombe a nyima mahlweni ka arke ga civhumelwano. Hi ndlela yo fananisa i wa nyima mahlweni ka Jehovha Nungungulu! Andzhako ka lezvo, i wa chela a libani yontlhe laha ka makhala ya ndzilo a kwartu yi tala hi masema yo nuhela. Hi cikhati cin’wani i wa tlhela a nghena lomu ka Wutshamu go Basabasa na a hi ni nkhata wa zvihari kasi ku maha hi wona miphahlo. Wona lezvaku i wa hisa libani na a nga se maha a minyikelo ya zviwonho.
(Levi 16:13) Yena i ta chela a libani laha makhaleni mahlweni ka Jehovha, kasi a refu ga musi wa libani gi fela ku fenengeta a citshamu ca wuxinji leci ci nga hehla ka Wumboni, kasi a ngafi.
Lezvi hi zvi gondzako ka bhuku ga Levi
5 Zvini hi zvi gondzako ka kutirisiwa ka libani hi siku ga ku maha muphahlo wa ku kombela ku tsetselelwa zviwonho? A Bhibhiliya gi hi byela lezvaku a mikhongelo yi amukelekako ya malandza yo tsumbeka ya Jehovha yi fana ni libani. (Lis. 141:2; Kuv. 5:8) Alakanya lezvaku a mupristi wa hombe i wa neha libani ka Jehovha na a kombisa a cichavo ca hombe nguvhu. Hi ku fanana, loku hi tshinela ka Jehovha hi mukhongelo, hi zvi maha hi cichavo ca hombe. A ho ku tsaka hi lezvi a Muvangi wa wuako gontlhe a hi vhumelelako hi tshinela kakwe a ku fana ni n’wanana a tshinelako ka papayi vakwe. (Jak. 4:8) I hi wona kota vanghana vakwe! (Lis. 25:14) Ha gi nyika nguvhu lisima a thomo legi hi nga nago laha ka ku hi wa nga ta tshuka hi maha nchumu ci mu zangarisako.
(Levi 16:14, 15) Zvonake i ta teka a nkhata wa nkuzi hi litiho lakwe a nwatsekela ha wona hehla ka citshamu ca wuxinji, hi le Mutsuwuka-gambo; a nwatsekela ha wona ntlhanu wa zvikhati ni zvimbiri hi litiho, mahlweni ka citshamu ca wuxinji. 15 Zvonake i ta tlhava a mhongo leyi yi lumbako a vanhu, a maha muphahlelo wa kuwonha, ni ku neha a nkhata wa yona lomu ndzeni ka nguwo ya cisirelo; na yena i ta maha hi nkhata lowu kota lezvi a mahileko hi nkhata wa nkuzi; a nwatsekela ha wona le hehla ka citshamu ca wuxinji ni mahlweni ka cona.
Lezvi hi zvi gondzako ka bhuku ga Levi
6 Alakanya lezvaku a mupristi wa hombe i wa hisa libani na a nga se nyikela a miphahlo. Hi ndlela leyo, i wa tiyiseka lezvaku i wa ta amukeleka ka Nungungulu loku makunu a nyikela a miphahlo. Hi gondza yini ka lezvo? Na a nga se nyikela a wutomi gakwe kota muphahlo, Jesu i wa fanele ku ranga hi ku maha ntiro wa lisima nguvhu wa ku hundza ni kutlhatlhisiwa ka vanhu. Ku wa hi yini? I wa fanele ku longisela ndlela ya ku Jehovha a amukela muphahlo wakwe hi ku hanya hi kutsumbeka. Hi ndlela leyo, Jesu i wa ta komba lezvaku a ku maha zvilo hi kuya hi lezvi Jehovha a zvi lavisako zvona hi yona ndlela ya yi nene ya ku hanya. I wa ta tlhela a komba zvi ku dlunya lezvaku a wuhosi ga Papayi wakwe hi gona ga gi nene niku a mafumela yakwe ma lulamile.
Kela titshomba ta moya
(Levi 16:10) Zvonake i ta teka a njhalo lowu wu teleko hi makhala ya ndzilo ma humako hi lomu alatini mahlweni ka Jehovha, ni mandla mambiri ma teleko hi libani lo nuhela li kuyilweko; na yena i ta neha lezvi zvilo lomu ndzeni ka nguwo ya cisirelo.
it-1 283 ¶3
Azazeli
Kota lezvi mupostoli Pawule a zvi tlhamuseleko, laha Jesu a nga nyikela a wutomi gakwe go mbelela hi kota ya zviwonho zva vanhu, kwalaho i no tekela ku maha muphahlo wa zviwonho hi khati gin’we zvi elela, lezvi a “nkhata wa tihomu ni wa timbuti” wu nga tsandzeka ku zvi maha. (Mah 10:4, 11, 12) Jesu i no tira kota yivhu ya ku tlhatlhisa, hi ku ‘rwala a kubayiseka ka hina’ ni ku ‘dawa hi kota ya zviwonho zva hina.’ (Isa 53:4, 5; Mat 8:17; 1Pe 2:24) Jesu i no “rwala” a zviwonho zva vontlhe lava va kholwako ka tsengo wa muphahlo wakwe. Yena i kombisile lezvi Jehovha a nga zvi lava, zva ku mbeta kubiha kontlhe. Hi kumaha lezvo, loku ku wulawuliwa hi yivhu “ya Azazeli” ku wuliwa a muphahlo wa Jesu Kristu.
(Levi 17:10, 11) Kani hi wihi munhu wa lixaka la ka Izrayeli, hambu loku a hi muluveli a akileko cikari kabye, a gako ni lihi lixaka la nkhata, ndzi ta mu cuwukisa hi mahlo ya makayi, ndzi mu susa ka va ka kabye. 11 Hakuva a muhefemulo wa nyama wu lomu nkhateni. Hikwalaho ndzi mu nyikile wona a ku maha ha wona a ndzhiho wa mihefemulo ya n’wina laha alatini, hakuva hi wona nkhata wu mahako ndzhiho hi kota ya muhefemulo wu nga ka wona.
Hikuyini hi faneleko ku basa?
10 Lera Levi 17:10. Jehovha i layile vaIzrayeli lezvaku va ngagi “ni lihi lixaka la nkhata.” A ku potsa nkhata—ku ngava wa cihari kutani wa munhu —cilaveko ka maKristu kambe. (Miti. 15:28, 29) Ma hi chavisa nguvhu a maalakanyo ya ku tshuka Nungungulu ‘a hi cuwukisa hi mahlo ya makayi’ ni ku hi susa bandleni gakwe. Ha mu randza niku hi lava ku mu ingisa. Hambu loku hi hi ka ciyimo ca kufa ni kuhanya, hi ti yimisele ku nga reriwi hi kukhongotela ni kukurumeta ka lava va nga mu tiviko Jehovha ni lava va nga laviko ku mu ingisa. Kunene, hi zvi rindzele ku tseketselwa hi ku ala nkhata, kanilezvi hi hlawula ku ingisa Nungungulu. (Juda 17, 18) Mawonela muni xungetano hi mhaka leyi ma to hi nyika ntamu lezvaku hi khomelela ka ciboho ca hina ca ku ngagi kutani ku vhumela ku cheliwa nkhata ke?—Deut. 12:23.