Timhaka ta mabhuku ma tako ka Cibhukwana ca Mutlhangano
© 2023 Watch Tower Bible and Tract Society of Pennsylvania
1-7 KA JANEIRO
TITSHOMBA TI NGA KA MHAKA YA NUNGUNGULU | JOBA 32–33
Chavelela lava va karatekileko
Perspicaz vhol. 1 paj. 799
Elihu
Elihu a nga vangi ni cihlawulela, a mu nyika wudzundzo go hundzeleta a munhu wo kari. I wa zvi tiva ku yena zvin’we na Joba va mahilwe hi wumba niku loyi wa Ntamu Wontlhe hi yena Muvangi wabye. Elihu i wa nga lavi ku chavisa Joba, kanilezvi i wulawulile naye kota munghana wa lisine, a mu vitana hi vito, a zvilo zvaku Elifaze, Bhildhadhe na Zofare a va zvi mahangi. — Joba 32:21, 22; 33:1, 6.
Murindzeli 15/06/14 paj. 25 par. 8-10
Xana wa wona lava va nga ni gome kota lezvi Jehovha a va wonisako zvona?
8 Kuzvilava zvi nga ha hi olovela nguvhu ku zwisisa a gome ga van’wani loku hi alakanya lezvaku a vokari cikari ka vamakabye va hina va mbhetiwa ntamu hi zvikarato— zvo kota mababyi, kuhanya ngangweni wu nga zwananiko timhakeni ta wukhongeli, kutani gome. Hinawu hi nga tshuka hiva ka ciyimo leco. Na va nga si nghena tikweni gi tsumbisilweko, a vaIsrayeli lava va nga hi zvisiwana tikweni ga Gibhite, va lo alakanyiswa lezvaku va wa nga faneli ku ‘nonohisa a timbilu tabye’ ka vamakabye vabye va vhumalako. Jehovha i wa rindzela lezvaku va wona zvisiwana kota vanhu va nga ni cilaveko ca ku vhuniwa. — Deut. 15:7, 11; Levi 25:35-38.
9 Wutshan’wini ga ku ti maha valamuli kutani ku kanakanela van’wani, hi fanele ku va kuchavelela lava va yimisanako ni zviyimo zvo bindza. (Joba 33:6, 7; Mat. 7:1) Kasi ku kombisa: Loku a mufambisi wa mota a bayisiwa ka mhango yokari zvonake va mu heleketa xipitali hi cihatla, xana a vadhokodhela va wa ta mbheta cikhati na va zama ku tiva lezvaku hi yena a nga vanga mhango leyo ke? Ahihi, va wa ta tekela ku mu khatalela. Hinawu, loku a mukholwa-kuloni a hi ni gome hi kota ya zvikarato, a co sangula hi faneleko ku ci maha ku mu nyika civhuno ca moya. — Lera 1 Va Le Tesalonika 5:14.
10 A vamakabye vo kari va nga ha wonekisa ku khwatsi va na ni gome. Kanilezvi loku hi nyima hi ehleketa hi zviyimo zvabye, hi nga ha pola lezvaku hi lisine a va nago. Ehleketa hi vamakabye va cisati lava va nga ni malembe na va lwisana ni Kukanetiwa mingangweni yabye. A vokari va nga ha wonekisa ku khwatsi va na ni gome, hambulezvo xana a va kombisi kukholwa ko tiya ni kutiya-hlana? Loku u wona mamani a wundlako vana yece na ata mitlhanganweni ni vana vakwe, xana a wu hlamaliswi hi kukholwa kakwe ni kutiyimisela kakwe? Ahati vaswa lava va khomelelako ka lisine hambu loku va kumana ni kucetelo wo biha cikoleni? Loku hi ehleketa khwatsi, ha zvi wona lezvaku a vanhu lavo, va nga ha wonekisako ku khwatsi va na ni gome, va ‘fumile kukholweni’ a ku fana ni lava va nga hiko ka zviyimo lezvo zvo nonoha. — Jak. 2:5.
Murindzeli 03.20 paj. 23 par. 17-18
Hi cihi cikhati ca ci nene ca ku wulawula?
17 A wanuna wa wumune loyi a nga endzela Joba hi Elihu, a xaka ga Abrahama. I wa ingisela a cikhati leci Joba ni vavanuna lava va vanharu va nga wulawula. Zvi te dlunya lezvaku i ingisele khwatsi hakuva i zvi kotile ku nyika a wusungukati ga gi nene kanilezvi go kongoma legi gi vhunileko Joba a ku cica a maalakanyo yakwe. (Joba 33:1, 6, 17) A ca lisima nguvhu ka Elihu ku wa hi ku dzundza Jehovha na ku nga hi yena wutsumbu kutani mun’wani munhu. (Joba 32:21, 22; 37:23, 24) Ka cikombiso ca Elihu, hi gondza lezvaku ku na ni cikhati ca ku miyela hi ingisela. (Jak. 1:19) Hi tlhela hi gondza lezvaku a cikhati hi nyikako a wusungukati, a nchumu wa lisima ka hina wu fanele kuva ku nyika wudzundzo ka Jehovha na ku nga hi ka hina wutsumbu.
18 Hi nga komba ku ha ci nyika lisima a cinyikiwo ca ku wulawula hi ku landzela a wusungukati ga Bhibhiliya xungetano hi cikhati ca ku wulawula ni lezvi hi faneleko ku wulawulisa zvona. Solomoni, a Hosi yo tlhariha, yi pimiselwe a ku tsala lezvi: “A mhaka yi wuliwako hi cikhati yi lavekako hi cona, yi fanana ni maçã ya ouro lomu ka cibya ca prata.” (Mav. 25:11, NM) Loku hi ingisela khwatsi lezvi a van’wani va wulako hi tlhela hi ranga hi ku ehleketa na hi nga se wulawula, a magezu ya hina ma nga fana ni maçã ya ouro — mava ya lisima ni yo saseka. Kani hi wulawula kutsongwani kutani hi wulawula nguvhu, a magezu ya hina ma ta aka van’wani ma tlhela ma maha Jehovha a tizwa matshandza hi hina. (Mav. 23:15; Efe. 4:29) Leyi hi yona a ndlela ya yi nene ya ku kombisa hi yona a kubonga hi cinyikiwo leci ci tako hi ka Nungungulu!
Titshomba ta moya
Murindzeli 15/01/13 paj. 19 par. 10
Simama ku tshinela ka Jehovha
10 Hi ku fanana, a zvi bihangi a ku karatekela kucuwukeka ka hina. Kanilezvi a hi faneli ku kulula hi n’watseka na hi zama ku fuvisa mikonyi ya kukhosahala. A mikonyi leyo yi ngava cikombiso ca kubuvha, wudzundzo, ni wumbhuri ga le ndzeni. Hi cikombiso, a Bhibhiliya gi ngalo: “A hloko ya wuvhu cidlodlo ca wudzundzo, yi kumeka tindleleni ta kululama.” (Mav. 16:31) Lezvo, hi lezvi a hi wonisako zvona Jehovha, niku hinawu hi fanele ku ti karatela ku ti wonisa lezvo. (Lera 1 Pedro 3:3, 4.) Hikwalaho, xana zvi wa tava wutlhari a ku veka mhangweni a wutomi ga wena hi ku mahiwa a operasawu kutani kunwa muri wo kari hi ku fela kusaseka ke? “A litsako la Jehovha” hi lona li nga cibuka ca wumbhuri ga lisine legi gi tako hi le ndzeni, kani hi ka tanga muni kani hi na ni lihanyo muni. (Neh. 8:10) Ntsena misaveni yiswa hi kona hi to kuma a lihanyo lo mbhelela ni wumbhuri go fana ni cihlangi. (Joba 33:25; Isa. 33:24) Na ha ha rindzela lezvo, a hi kombiseni wutlhari ni kukholwa, lezvi zvi to hi vhuna a ku tshama kusuhani na Jehovha na hi kari hi maha zvontlhe hi zvi kotako ka ciyimo leci hi nga ka cona nyamutlha. — 1 Tim. 4:8.
8-14 KA JANEIRO
TITSHOMBA TI NGA KA MHAKA YA NUNGUNGULU | JOBA 34-35
Loku u zvi wona na zvi nga lulamangi lezvi a vanhu va vanene va humelelwako hi zvilo zva kubiha
Murindzeli 01.19. paj. 8 par. 2
Nungungulu i tshamisile kuyini?
Contlhe cikhati Nungungulu i maha zva zvi nene. Hi lisine, “a kubiha ku le kule na Nungungulu, ni kugoha a ku kona ka Nyamintamu”. (Joba 34:10) A kulamula kakwe ku lulamile, a ku fana ni lezvi a nga wula mutsali wo kari wa tisimu laha a nga wulawula hi Jehovha, aku: “U ta lamula matiko hi nongameto.” (Lis. 67:4) Kota lezvi ku nga ku ‘Jehovha i cuwuka mbilu’, contlhe cikhati wa zvi kota ku tiva leyi yi nga lisine a tlhela a lamula khwatsi; a nge tshuki a fayeliselwa hi kuxengetela ka vanhu. (1 Sam. 16:7) A ku hundza lezvo, Nungungulu wa gi wona wubihi gontlhe ni wukanganyisi gi mahiwako laha misaveni, niku i tsumbisile ku zvezvanyana “a vakubiha va ta susiwa laha misaveni”. — Mav. 2:22.
Murindzeli 04.17 paj. 11 par. 5
Zvini zvi to ta fuvisiwa hi Mufumo wa Nungungulu?
5 Zvini lezvi Jehovha a to maha? Zvalezvi Jehovha i nyika vanhu vo biha a cikhati ca kuva va cica. (Isa. 55:7) Hambu lezvi a tiko legi gi to loviswa lokuloku, a kulamulwa ka vanhu lavo vo biha a ku se tiya. Kanilezvi zvini zvi to maheka hi lava va alako ku cica ni lava va to simama va yima ni tiko legi kala kuxanisekeni ka hombe? Jehovha i tsumbisa ku fuvisa a vanhu vontlhe vo biha laha misaveni. (Lera Lisimu 37:10.) Inyamutlha, a vanhu vo tala va gondza ku fihla a zvilo zvo biha lezvi va mahako, niku a kutala ka zvikhati a va tsayisiwi. (Joba 21:7, 9) Kanilezvi a Bhibhiliya ga hi alakanyisa giku: “A mahlo yakwe [Nungungulu] ma languta a tindlela ta vanhu, a wona wontlhe mafambela yabye. A ku na munyama, a ku na ndzhuti . . . , laha a vagohi va ta nga fihlala kona.” (Joba 34:21, 22) Hikwalaho, a ku na ndlela ya ku mu fihlala Jehovha. Wa zvi wona zvontlhe lezvi a vakubiha va zvi mahako. Andzhako ka Har–Magedhoni, hi ta cuwuka laha va nga tolovela ku kumeka kona, kanilezvi va nga tava kona. Va ta ngha va fuvile! — Lis. 37:12-15.
Murindzeli 05.21 paj. 7 par. 19-20
U nga tsiki nchumu wu ku vhalela ku landzela Jesu
19 A cikarato leci ci kona ni nyamutlha ke? Ina ci kona. A vanhu vo tala va hi nyenya hi lezvi hi kalako hi nga ti ngheniseli ka politika. Va lava ku hi wona na hi vhota. Kanilezvi, hina ha zvi tiva lezvaku loku hiza hi hlawula munhu kasi a hi fumela, a ka Jehovha zvi komba ku hi ala yena. (1 Sam. 8:4-7) A van’wani va nga zvi wonisa ku hi wa fanele ku aka zvikola, zvipitali, ni ku maha zvilo zvin’wani kasi ku vhuna tiko. Makunu, a va ma tsakeli a mahungu ya hina hi lezvi hi vekako kupima ntirweni wa ku chumayela mahungu ya ma nene, hi nga lweli ku lulamisa zvikarato lezvi zvi nga kona tikweni legi nyamutlha.
20 Hi nga maha yini kasi hi nga tsiki ku landzela Jesu hi kota ya lezvo? (Lera Matewu 7:21-23.) Wutomini ga hina, hi fanele ku rangisa ntiro lowu Jesu a hi layileko ku wu maha. (Mat. 28:19, 20) A hi faneli ku tshuka hi colopetelwa hi zvikarato zva politika ni zva wutomi ga tiko legi. Lisine ku ha va randza vanhu niku a hi tsaki hi ku va wona na va xaniseka. Kanilezvi, ha zvi tiva ku a ndlela ya yi nene ya ku vhuna vaakelani va hina ku va gondzisa kasi va tiva Mufumo wa Nungungulu ni ku va vhuna kuva vanghana va Jehovha.
Titshomba ta moya
Murindzeli 04.17 paj. 28 par. 3
Ngha a kutinyiketela ka wena ku mu nyika wudzundzo Jehovha!
3 A jaha go kari ga ku hi Elihu gi wa ingisela a mabhulo ya Joba ni vavanuna lavo va vanharu. A cikhati va nga mbheta ku bhula, Elihu i wutisile Joba xungetano hi Jehovha, aku: “Loku wena u lulamile, cini u mu nyikako ke? Kutani cini a ci amukelako canjeni ga wena ke?” (Joba 35:7) Xana Elihu yenawu i wo zama ku wula lezvaku a kutikarata ka hina kasi ku tirela Nungungulu a ku vhuni nchumu? Ahihi. Jehovha a nga kawukangi Elihu, a ku khwatsi hi lezvi a nga kawuka vavanuna lava van’wani. Lezvi Elihu a nga zvi wula zvi hambene ni lezvi zvi nga wuliwa hi vavanuna lavo. I wa wula lezvaku Jehovha a nga vhumali nchumu hambu loku hi nga mu khozeli. Jehovha i mbhelele. Ci hava hi nga ci mahako ci to mu maha a ganya kutani ku engetela ntamu wakwe. Hi lisine ni gihi tshamela ga gi nene kutani wutlhari hi nga nago gita hi ka Nungungulu, niku wa chela kota hi lezvi hi gi tirisisako zvona.
15-21 KA JANEIRO
TITSHOMBA TI NGA KA MHAKA YA NUNGUNGULU | JOBA 36-37
Hikuyini u nga tsumbako citsumbiso ca Nungungulu ca wutomi ga pindzukelwa?
Murindzeli 01/10/15 paj. 13 par. 1-2
Hi nga mu kuma Nungungulu hakunene?
NUNGUNGULU I KONA CONTLHE CIKHATI: A Bhibhiliya gi gondzisa lezvaku Nungungulu i kona “kusukela kupindzukeni kala kupindzuka.” (Lis. 90:2) Hi magezu man’wani, Nungungulu a nga na masangulo niku a nga na magumo. Hi mawonela ya munhu, “a tsengo wa malembe yakwe a wu na ku hlayiwa”. — Joba 36:26.
Lezvi u nga vhunekisako zvona: Nungungulu i tsumbisa ku ku nyika wutomi ga pindzukelwa loku u ti karatela ku mu tiva. (Joh. 17:3) Xana a citsumbiso leco ci wa tava ca lisine loku ku hi lezvaku Nungungulu wutsumbu a hi wa kala kupindzuka? Ntsena a “Hosi ya pindzukelwa” hi yona yi nga tatisako a citsumbiso leco. — 1 Tim. 1:17.
Murindzeli 05.20 paj. 22 par. 6
Wa bonga a zvinyikiwo lezvi Nungungulu a hi nyikileko?
6 Kota lezvi a misava yi nga tsawukana ni gambo hi pfhuka wa wu nene, zva koteka ku hiva ni mati laha misaveni. Kanilezvi loku yi wa no tshinela kutsininani basi le ka gambo, a mati wontlhe laha misaveni ma wa tapswha, a misava yi hisa nguvhu yi tlhela yi woma laha ka ku ku nga hanyi nchumu laha misaveni. Loku yi wa no engetela ku tsawukana kutsininani basi ni gambo, a mati wontlhe ma wa ta titimela ma woma ma maha ribye, a misava yi fenengetiwa hi gapongo ni gelo. Kanilezvi, kota lezvi Jehovha a vekileko misava ka pfhuka wa wu nene, zvi maha ku laha misaveni kuva ni mati ma hi nyika wutomi. Kasi hiva ni mati zvi mahisa lezvi: A gambo gi hisa mati lomu mabimbini ni laha misaveni mapswha hi ku hisa loku kasi maya maha marefu. Lembe ni lembe, a gambo gi pswhisa a mati ya ku ringana ku tata 500 000 wa mathangi ya 1 kilometro a kuleha, kuanama ni kueta. A mati lawo ma tshama laha ndengelengeni hi cipimo ca 10 wa masiku na ma nga sewa kota vhula kutani gapongo. Hi kugumesa, a mati ma tlhela ma ya lomu mabimbini kutani ka zvin’wani zvibuka zva mati; andzhako ka lezvo, ma tlhela ma phinda zva lezvi zva zvin’we. Jehovha i zvi mahisile lezvo kasi a misava yi tshama na yi hi ni mati contlhe cikhati; lezvo zvi komba ku Jehovha i na ni wutlhari ni ntamu. — Joba 36:27, 28; Mutsh. 1:7.
Murindzeli 10.22 paj. 28 par. 16
Simama ku tiyisa kutsumba ka wena kota muKristu
16 A kutsumba ka hina ka ku kuma wutomi ga pindzukelwa cinyikiwo ca lisima ci tako hi ka Nungungulu. Hi rindzela zvilo zvo tsakisa nguvhu, lezvi hi tiyisekako ku zvi ta maheka cikhatini ci tako. A kutsumba loko ko fana ni âncora, ka hi yimisa hi tiya kasi hi zvi kota ku lwisana ni zvikarato, hi timisela ku xanisiwa, hambu hi kufa loku zvi laveka. A kutsumba loko ko fana ni capacete, ka vhikela maalakanyo ya hina kasi hi zvi kota ku potsa ku maha zvilo zva kubiha, kanilezvi hi maha zva zvinene. A kutsumba ka hina ku seketelwako ka Bhibhiliya ku hi maha hiva ni wunghana ga hombe na Nungungulu ku tlhela ku hi komba ku wa hi randza nguvhu. Laha hi yako hi tiyisa nguvhu a kutsumba ka hina, ha vhuneka nguvhu.
Titshomba ta moya
Perspicaz vhol. 1 paj. 522
Mabhulo
Cikhatini ca kutsaliwa ka Bhibhiliya, a mahungu ni mawonela ma wa chikela ka munhu mun’we ni mun’wani hi tindlela to hambanahambana. A kutala ka zvikhati, a mahungu yo toloveleka ya lomu cipandzeni ni ya matiko man’wani ma wa byeliwa vanhu nghohe ni nghohe. (2 Sam. 3:17, 19; Joba 37:20) A vaendzi lava a kutala ka zvikhati va nga famba hi mitlawa, va wa hlawutela mahungu ya matshamu ya le kule a cikhati leci va nga nyima kasi va kuma zvakuga, mati ni zvilo zvin’wani lomu madhoropeni kutani lomu maparajeni. Hi kota ya lomu a tiko ga Palestina gi kumekelako kona ni Asia, ni Afrika, ni Europa a tikweni ga Palestina ku wa tsemakanya mitlawa ya vanhu na vaya ka matshamu ya le kule kutani ku wuya hi kona. Hi ndlela leyo, a vanhu va le Palestina va wa tekela ku kuma mahungu ya matiko man’wani ya zvimaho zva lisima. A mahungu ya lomu tikweni kutani ya matiko man’wani, ma wa kumiwa hi kukhandzakanya lomu merkadho ya dhoropa.
22-28 KA JANEIRO
TITSHOMBA TI NGA KA MHAKA YA NUNGUNGULU | JOBA 38-39
Wa ti nyika cikhati ca ku cuwukisela zvivangwa?
Murindzeli 08.21 paj. 9 par. 7
U ti yimisele ku rindzela Jehovha ke?
7 Loku a Bhibhiliya gi wulawula hi kuvangiwa ka misava, gi Jehovha i yimisile a ‘tipimo ta yona’ ni ‘zviseketelo zva yona’, a veka ‘ribye ga kona ga magumo’. (Joba 38:5, 6) I zile a ti nyika ni cikhati ca ku ehleketa hi mitiro yakwe. (Gen. 1:10, 12) U alakanya ku a tingilozi ti ti zwisile kuyini laha ti ngaya ti pola ku zvini lezvi Jehovha a nga kari a vanga? Handle ko kanakana ti tsakile nguvhu! Hi cigelo leco ka cikhati co kari ti nga “kanyuluka hi kutsaka”. (Joba 38:7) Hi gondza yini? Jehovha i tekile malembe yo tala nguvhu kasi a mbheta ku vanga zvilo. Kanilezvi, a cikhati leci a nga nyima a ku zvi cu zvontlhe lezvi a nga zvi vanga hi matsenya, zvi mu kucile ku aku: ‘Zvi sasekile nguvhu’. — Gen. 1:31.
Murindzeli 08.20 paj. 14 par. 2
A kuvhuka ka vafileko ku komba lirandzo, wutlhari ni lihlazva-mbilu la Nungungulu
2 Jehovha i no sangula hi ku vanga Jesu, a N’wana wakwe wa matewula. I no guma a tirisa N’wana loye kasi a vanga zvilo “zvontlhe”, a ku patsa ni tingilozi ta talela ga cima. (Kol. 1:16) Jesu i tsakile nguvhu hi ku tira ni Papayi wakwe. (Mav. 8:30) Laha ti nga wona Jehovha na Jesu na va vanga tilo ni misava, a tingilozi tonawu ti no tsaka. Ti zvi kombisisile kuyini? Ti no “kanyuluka hi kutsaka” tiba mandla, niku handle ko kanakana ti simamile tiba mandla hi ku tsaka siku ni siku legi Jehovha a nga kari a maha mitiro yakwe yo hlamalisa, nguvhunguvhu laha ti nga mu wona na a vanga munhu. (Joba 38:7; Mav. 8:31) A zvivangwa zvontlhe lezvo zvi komba lirandzo ni wutlhari ga Jehovha. — Lis. 104:24; Rom. 1:20.
Murindzeli 03.23 paj. 17 par. 8
Gondza zvotala hi Jehovha hi ku cuwukisela zvivangwa zvakwe
8 Jehovha wa tsumbeka. Jehovha i vhunile Joba lezvaku a engetela ku mu tsumba. (Joba 32:2; 40:6-8) A cikhati leci Nungungulu a nga wulawula na Joba, i kumbukile zvilo zvo hambanahambana xungetano hi zvivangwa zvakwe, zvo kota tinyeleti, marefu ni zvingwalangwandla. Jehovha i wulawulile hi zvihari kambe, zvo kota nyari ni haxi. (Joba 38:32-35; 39:9, 19, 20) Zvontlhe lezvo zvi kombile lezvaku Nungungulu i na ni ntamu, ni lirandzo ni wutlhari. A mabhulo lawo ma vhunile Joba lezvaku a mu tsumba nguvhu Jehovha a ku hundza kale. (Joba 42:1-6) Hi kufanana, loku hi hlola zvivangwa, hi alakanyisiwa lezvaku Jehovha i na ni wutlhari go kala gi nga gumelwi ni ntamu wa ku hundza lowu wa hina. A nga tlhela a zvi kota ku mbheta zvikarato zva hina zvontlhe niku i ta zvi mbheta futsi. Lezvo zvi nga hi vhuna ku hi mu tsumba nguvhu.
Titshomba ta moya
Perspicaz vol. 2 paj. 199
Munyiki wa nayo
Jehovha munyiki wa nayo. Jehovha hi yena ntsena munyiki wa lisine wa nayo wuakweni gontlhe. Munyiki wa milayo ya ntumbuluko ka zvivangwa zvi nga hanyiko (Joba 38:4-38; Lis. 104:5-19), ni ka zvihari. (Joba 39:1-30) A munhu yenawu, kota civangwa ca Jehovha, i le hasi ka milayo ya ntumbuluko ya Jehovha. Kota lezvi a nga vangiwa na a hi ni milayo ya mahanyela, na a pimisa, na a ehleketa ni kuva ni wumoya i lahasi ka milayo ya mahanyela ya Nungungulu. (Rom. 12:1; 1 Kor. 2:14-16) Ahandle ka lezvo, a nayo wa Jehovha wu rangela zvivangwa zva moya, a tingilozi. — Lis. 103:20; 2 Ped. 2:4, 11.
A milayo ya ntumbuluko ya Jehovha a yi kanyisiwi. (Jer. 33:20, 21) Wuakweni gontlhe gi wonekako, a milayo yakwe a yi tshuki yi cica niku yi tsumbekile. Ka matshamu lawa a titlhari ta siensia ti yi tivako milayo leyi va zvi kota ku tiva khwatsi lezvi a hweti, ni maplaneta, ni zvin’wani zvilo zva le tilweni zvi fambisako zvona. Ni wihi loyi a mahako nchumu wo hambana ni lowu wa milayo ya ntumbuluko i tekela kuzwa a tsayiselelo wa kona. Hi kufanana, a milayo ya Nungungulu ya mahanyela a yi ciciwi niku a yi nge kanganyisiwi kutani ku kanyisiwa ku nga kumeki tsayiselelo wa kona. A kutira ka yona ku tiyile a ku fana ni loku ka milayo Yakwe ya ntumbuluko, hambu lezvi a tsayiselelo kuzvilava wu kalako wu nga hi wa kwalaha ni kwalaha. “Nungungulu a nga kalavelwi. Hakuva leci a munhu a ci byalako, i ta tshovela caleco.” — Gal. 6:7; 1 Tim. 5:24.
29 KA JANEIRO–4 KA FEVEREIRO
TITSHOMBA TI NGA KA MHAKA YA NUNGUNGULU | JOBA 40-42
Zvigondzo hi zvi kumako ka lezvi zvi nga humelela Joba
Sentinela 15/10/10 paj. 3-4 par. 4-6
“Himani a ku tivileko a kupima ka Jehovha?”
4 Laha hi ehleketako hi mitiro ya Jehovha hi fanele ku potsa a ku byekelela ka ku lamula Nungungulu hi milayo ya vanhu. A kubyekelela loko ka kumbukiwa ka magezu ya Jehovha ma nga ka Lisimu 50:21, ma nge: ‘U alakanya lezvaku mina ndzi fana na wena.’ Zvi fana ni lezvi a tlhari yo kari ya Bhibhiliya yi wulileko kwalomu ka 175 wa malembe ma hundzileko, zvaku: “A vanhu va byekelela ku lamula Nungungulu va tlhela va zvi mahisa ku khwatsi yena i fanele ku nyima ni milayo leyi vona va yi wonako na yi hi yinene kasi va yi landzela.”
5 Hi fanele ku ti wonela kasi hi nga cici lezvi hi mu wonisako zvona Jehovha hi ndlela ya ku zvi yelana ni milayo ni mixuvo ya hina. Hikuyini lezvi zvi nga zva lisima? Laha hi gondzako Mitsalo, a mitiro yo kari ya Jehovha yi nga wonekisa ku khwatsi a yi tshamisekangi khwatsi hi kuya hi mawonela ya hina yo gumelwa ni yo kala kumbhelela. A vaIzrayeli va kale va pimanyisile a mapimisela lawa niku va chikelele a magumo ya hava xungetano hi kutirisana ka Jehovha zvin’we navo. Wona lezvi Jehovha a nga va byela: ‘N’wina muku: A ndlela ya Jehovha a yi lulamangi. Zwanani n’wina va yindlu ya ka Israyeli! A yi lulamangi a ndlela ya mina ke? A hi leti ta n’wina ti nga lulamangiko ke?’ — Ezek. 18:25.
6 A ndlela ya yinene ya ku potsa a ntlhamu wa ku lamula Jehovha hi kuya hi milayo ya hina ku zwisisa lezvaku ha gumelwa ka lezvi hi zvi wonisako zvona zvilo, niku a zvikhati zvin’wani ha phazama. Joba zvi lavile ku a gondza a cigondzo leco. A cikhati leci a nga xaniseka, i lwile ni kukarateka niku lezvo zvi mahile ku a veka nguvhu kupima ka yena wutsumbu. Joba a nga vekangi kupima ka timhaka ta lisima. Hikwalaho, hi ndlela ya lirandzo, Jehovha i mu vhunile ku cica a mawonela lawo. Hi ku mu maha a 70 wa zviwutiso ni kuhundza, Joba a nga zvi koti ku hlamula ni cin’we, Jehovha i no khanyisa a kugumelwa ka Joba ka ku zwisisa. Kanilezvi Joba i no ti koramisa a cica mawonela yakwe. — Lera Joba 42:1-6.
Murindzeli 06.17 paj. 18 par. 12
Veka kupima ka wuhosi ga Jehovha
12 Xana zvive xapi lezvi Jehovha a nga wulawulisa zvona na Joba andzhako ka zvikarato zvontlhe lezvi a nga kumene nazvo? Ahihi, hambu yena Joba a nga zvi wonisangi lezvo. I zwisisile wusungukati ga Jehovha a tlhela a gi nyika lisima. I zile a wula lezvi: ‘Ndza ti sola, ndzi hundzuluka, na ndzi hi tshurini ni le khumeni.’ (Joba 42:1-6) Na a nga se wulawula na Jehovha, a jaha go kari gaku hi Elihu gi wa rangile gi mu vhuna ku lulamisa maalakanyo yakwe. (Joba 32:5-10) Andzhako ka loku Joba a ingisile wusungukati ga lirandzo legi Jehovha a mu nyikileko a tlhela a cica mawonela yakwe, Jehovha i kombile van’wani lezvaku i wa xalaliswa hi kutsumbeka ka Joba.— Joba 42:7, 8.
Murindzeli 06.22 paj. 25 par. 17-18
‘Rindzela Jehovha’
17 Joba gin’we ntsena ga malandza ya Jehovha lawa ma simamileko ku tiya hlanha ni kuva ni ntamu a cikhati leci ma nga kumana ni zvikarato zva hombe. Ka papilo gakwe ka Mahebheru, mupostoli Pawule i kumbukile a van’wani vo tala a va vitana ku i “refu ga hombe ga vakustumunyu”. (Mah. 12:1) Vontlhe va kumene ni zvikarato zva hombe, kanilezvi wutomini gabye gontlhe va simamile va tsumbekile ka Jehovha. (Mah. 11:36-40) Xana a kutimisela kabye ni kutikarata zvi vile zva mahala? Ne ni kutsongwani! Hambu lezvi va nga kala ku wona a kutatiseka ka zvitsumbiso zvontlhe zva Nungungulu na va ha hanya, va simamile va rindzela Jehovha. Niku kota lezvi va nga tiyiseka lezvaku Jehovha wa va tsakela va wa hi ni kutsumba ka lezvaku va wa ta wona a kutatiseka ka zvitsumbiso zva Nungungulu. (Mah. 11:4, 5) A cikombiso cabye ci nga tiyisa a kutiyimisela ka hina ka ku simama hi rindzela Jehovha.
18 Nyamutlha, hi hanya ka tiko legi gi yaku gi biha nguvhu. (2 Tim. 3:13) Sathani wa ha simama ku ringa vanhu va Nungungulu. Hambu loku hi kumana ni zvikarato, ngha hi ti yimisela ku simama hi tirela Jehovha hi kutikarata na “hi tsumba Nungungulu a hanyako”. (1 Tim. 4:10) Alakanya ku lezvi Nungungulu a nyikileko Joba hi kugumesa zvi kombile lezvaku “Jehovha i na ni tipswalo ta hombe ni wuxinji”. (Jak. 5:11) Ngha hinawu hi ti yimisela ku simama hi tsumbekile ka Jehovha na hi tiyiseka lezvaku i ta “chachazela lava va mu hlotako hi mbilu yontlhe”. — Lera Mahebheru 11:6.
Titshomba ta moya
Perspicaz vhol-1831
Kutseketselwa
Joba i wa hi munhu wo lulama a nga simama a tsumbekile hambu lezvi a nga tseketselwa. Kanilezvi i vile ni mawonela ya hava niku i mahile cihoxo leci ci nga mu maha a kawukiwa. Elihu i wulile lezvi: “Himani a fananako na Joba, loyi a nwako tihlamba khwatsi i mati”? (Joba 34:7) Joba i wa karatekela nguvhu a ku a ti yimelela, wutshan’wini ga ku yimelela Nungungulu; a ti wula ku i lulamile nguvhu a ku hundza Nungungulu. (Joba 35:2; 36:24) A cikhati leci Joba a nga tseketselwa nguvhu hi “vanghana” vakwe va vanharu, i zvi wonisile ku khwatsi va wa tseketsela yena na ku nga hi Nungungulu. Lezvo zvi wa fana ni munhu a ti nyikelako kasi a tseketselwa ni ku rukatelwa zvi tlhela zvi mu xalalisa, a zvi vhumela a ku khwatsi hi loku anwa mati na a tsakile. Hi ndzhako ka cikhati, Nungungulu i tlhamusele Joba lezvaku a vatseketseli lavo hi lisine va wa wulawula mawunwa hi Nungungulu. (Joba 42:7) Hi ndlela yo fana, Jehovha i byelile muphrofeti Samuweli a cikhati leci a vaIzrayeli va nga londza hosi, aku: ‘A va tsiki wena, kanilezvi hi mina va ndzi tsikileko, va nga randzi lezvaku ndzi maha hosi yabye.’ (1 Sam. 8:7) Niku Jesu i byelile vapizani vakwe, aku: “Mu ta vengiwa hi matiko wontlhe [na ku nga hi hi kota ya n’wina, kanilezvi] hi kota ya vito ga mina.” (Mat. 24:9) A ku alakanya lezvo zvi vhuna muKristu a ku timisela hi ndlela ya yinene a kutseketselwa zvi tlhela zvi mu vhuna ku a ringanelwa hi ku amukela a nchachazelo wa kutimisela kakwe. — Luka 6:22, 23.
5-11 KA FEVEREIRO
TITSHOMBA TI NGA KA MHAKA YA NUNGUNGULU | TISIMU 1–4
Yima ni Mufumo wa Nungungulu
Murindzeli 09.21 paj. 15 par. 8
‘Ndzi ta tsekatsekisa a matiko wontlhe’
8 Zvini va mahako a vanhu loku vazwa mahungu lawo? A votala a va ma tsakeli. (Lera Lisimu 2:1-3.) A matiko lawo mo karateka. Va ala Hosi leyi yi yimisilweko hi Jehovha. A ka vona, a mahungu lawa hi chumayelako, a hi “ya ma nene”. Hi cigelo leco, a mifumo yo kari yi betela a ntiro wa kuchumayela! Hambu lezvi a kutala ka varangeli va mifumo leyo va ti byelako ku va tirela Nungungulu, a va zvi lavi ku mu tsika a fuma. A ku fana ni masikwini ya Jesu, a tihosi nyamutlha ti vhukela a Totilweko wa Jehovha hi ku xanisa malandza yakwe yo tsumbeka. — Miti. 4:25-28.
Murindzeli 04.16 paj. 29 par. 11
Simama ku nga ti ngheniseli ka maguwa ya tiko legi
11 Ku randza titshomba. Loku hi veka tihlo ka titshomba ta hina, hi ti veka mhangweni ya kuva hi nga yimi hi tiya loku hi ringiwa. Ruth wa le Malawi, i wonile Timboni to tala na ti maha lezvo a cikhati ti nga kumana ni kuxaniswa hi va 1970. I alakanya lezvi: “Va wa nga lavi ku tsika wutomi gabye ga mafehlefehle. A vokari va khomilwe zvin’we na hina kanilezvi hi kufamba ka cikhati va lo nghena ka partidho ya politika va tlhela kaya hakuva va wa nga lavi ku hanya hi kuxaniseka tivaleni leti hi nga hi ka tona.” A kuhambana ni lezvo, a kutala ka vanhu va Nungungulu va simama va nga ti ngheniseli ka politika hambu loku va hanya wusiwaneni kutani ku lahlekelwa hi zvontlhe va nga nazvo. — Mah. 10:34.
Titshomba ta moya
Perspicaz vhol-2689
Mungu
A mungu wu vhikela a timbewu, to kota a sevhadha ni trigo. Hambu lezvi lomu ka Bhibhiliya wu kumbukiwako hi ndlela yo fananisa, ku wuliwa a ntiro wa kuhula timbewu wu nga tolovelekile cikhatini ca kale. Andzhako ka kutshovela, a mungu lowu wu nga vhikela a timbewu wu wa nga ha vhuni nchumu hikwalaho, wu wa hi cikombiso ca cinene ca nchumu wo kala ku bindza, wu nga siziko nchumu, ni wu nga lavekiko, wu nga fanele ku hambanisiwa ni lezvi zvazvinene wu tlhela wu hoxiwa.
Co sangula, a kuhula ku wa maha timbewu ti suka laha ka mamani wa kona. Andzhako ka lezvo, a kutsutsuta timbewu ku wa maha ku a mungu wu haha hi moya a ku khwatsi lithuri. (Wona laha ka ku JOEIRAR.) Lezvo zvi tlhamusela khwatsi lezvi Jehovha Nungungulu a susisako zvona a vadhuki cikari ka vanhu vakwe ni lezvi a ti hambanisako zvona ni vanhu va kubiha ni matiko lawa ma mu vhukelako. (Joba 21:18; Lis. 1:4; 35:5; Isa. 17:13; 29:5; 41:15; Hos. 13:3) A Mufumo wa Nungungulu wu ta sila a valala va vona laha ka ku zvi olova a ku va nga havi kona kambe a ku khwatsi i mungu. — Dan. 2:35.
A kutala ka zvikhati a mungu wu wa wungeletelwa wu hisiwa, kasi wu nga ha kokiwe kambe hi moya wu tlhela wu wuya lomu ka timbewu. Hi kufanana, Johani mubhabhatisi i phrofetile a ku lovisiwa loku ku tako ka vakhongeli va mawunwa, aku: Jesu Kristu, a muhuli, i ta hlengeleta a trigo “kanilezvi, a mungu i ta wu hisa hi ndzilo wu nga timekiko”. — Mat. 3:7-12; Luka 3:17; wona laha ka ku DEBULHA; PALHA.
12-18 KA FEVEREIRO
TITSHOMBA TI NGA KA MHAKA YA NUNGUNGULU | TISIMU 5-7
Simama u tsumbeka na u ngayi hi lezvi a van’wani va mahako
Murindzeli 03.21 paj. 15 par. 7-8
Ndlela yo tiyisiwa hi Mitsalo
7 Ku ni munghana kutani xaka gi nga ku mahela zva hava, loyi u nga ha mu tsumbiko hi kota ya lezvo? Loku a hi kona, u ta vhuneka nguvhu hi matimu lawa hi lavako ku ma kambisisa zvezvi, ya lezvi Hosi Dhavhidha a nga mahelwa hi n’wana wakwe Absalome, loyi a nga jikela a papayi wakwe a zama ku mu wutlela wuhosi. — 2 Sam. 15:5-14, 31; 18:6-14.
8 (1) Ku khongela. Na u alakanya lezvi zvi nga maheka ka matimu lawa, byela Jehovha lezvi u ti zwisako zvona hi wubihi legi u mahelwako. (Lis. 6:6-9) Mu byele hi kukongoma futsi, u tlhela u mu kombela ku a ku vhuna ku wona matshinya ma to ku vhuna ku tiva co maha kasi u lwisana ni cikarato leco.
Murindzeli 07.20 paj. 8-9 par. 3-4
Tiyiseka lezvaku u li kumile lisine
3 A kukholwa ka hina a ku faneli ku seketelwa ntsena ka lirandzo leli a vanhu va Nungungulu va li kombisako. Hikuyini? Hi ku loku a kukholwa ka hina ku seketelwa ntsena ka lirandzo lelo zvi nga olova nguvhu a ku ku hi mbhelela. Hi cikombiso, hi nga tsika ku tirela Jehovha loku a makabye wo kari kuzvilava wa phayona kutani dhota, a maha ciwonho ca hombe. Kuzvilava hi nga tlhela hi tsika ku tirela Jehovha loku a makabye wo kari a hi khunguvanyisa kutani ku a maha muhluwuki a wula lezvaku lezvi hi zvi kholwako a hi lisine. Hikwalaho loku hi lava kuva ni kukholwa ko tiya hi fanele ku ku seketela ka wuxaka go tiya na Jehovha. Lezvi u ti zwisako zvona hi Jehovha ni vanhu vakwe zvi nga ku vhuna ku tiyisa kukholwa ka wena. Kanilezvi zva lisima kambe a ku u gondza Bhibhiliya, u zwisisa lezvi u zvi gondzako u tlhela u kambisisa kasi u tiyiseka lezvaku u gondza lisine xungetano hi Jehovha. — Rom. 12:2.
4 Jesu i wulile lezvaku a vokari va wa ta vhumela lisine ‘na va tsakile’, kanilezvi a kukholwa kabye ku wa ta mbhela ntamu loku va ringiwa. (Lera Matewu 13:3-6, 20, 21.) Kuzvilava va wa nga zvi tivi lezvaku a kuva mupizani wa Jesu zvi patsa zvikarato ni tixanisa. (Mat. 16:24) Kuzvilava va wa alakanya kambe lezvaku a kuva muKristu zvi wula ku va nga ta tshuka va xaniseka kutani ku Nungungulu i ta va susela zvikarato zvontlhe. Kanilezvi ka tiko legi go biha ku na ni zvikarato. A zviyimo zvi nga cica wutomini ga hina zvi hi maha hi luza litsako. — Lis. 6:6; Mutsh. 9:11.
Titshomba ta moya
Perspicaz vhol. 21004
Cilahla
Ka Va Le Roma 3:13, mupostoli Pawule i tshahile a magezu ya Lisimu 5:9 na a fananisa a mikolo ya vanhu vakubiha ni vo kanganyisa ni “cilahla ci vhululekileko”. A ku khwatsi hi lezvi a cilahla ci vhululekileko ci tatiwako hi vanhu va fileko ni kubola, a mikolo yabye yi vhululeka kasi ku wulawula timhaka ti dayako ni ku kanganyisa. — Ringanisa na Mat. 15:18-20.
19-25 KA FEVEREIRO
TITSHOMBA TI NGA KA MHAKA YA NUNGUNGULU | TISIMU 8-10
‘Ndzi ta ku dhumisa Jehovha’!
Murindzeli 08.21 paj. 3 par. 6
Maha zvontlhe u zvi kotako kasi u nga humi ngangweni wa Jehovha
6 Jehovha i hi longisele wutshamu ga gi nene kasi hi hanya ka gona. Na ka ha kiyela cikhati co leha nguvhu kasi Jehovha a vanga vanhu vo sangula, i no ranga hi ku longisela misava va ta tshama ka yona. (Joba 38:4-6; Jer. 10:12) Kota lezvi Jehovha a nga munhu wo hana ni wo khatala hi van’wani, i vangile zvilo zva talela ga cima kasi hi ti buza hi zvona. (Lis. 104:14, 15, 24) Laha a nga ti nyika cikhati a cuwuka lezvi a nga zvi vanga, i no guma a ‘wona lezvaku zvi sasekile’. (Gen. 1:10, 12, 31) A vanhu i no va nyika wudzundzo hi ku va nyika ntiro wa ku “fumela” zvilo zvo saseka lezvi a zvi vangileko laha misaveni. (Lis. 8:6) A kungo ga Jehovha ku a vanhu vo mbhelela va ti buza hi ku hlayisa a zvilo lezvo zvo saseka kala kupindzuka, niku lezvo i tsumbisa ku zvi ta maheka. Wa khandzakanya ku mu bonga Jehovha hi kota ya citsumbiso leci co tsakisa ke?
Murindzeli 05.20 paj. 23 par. 10
Wa bonga a zvinyikiwo lezvi Nungungulu a hi nyikileko?
10 A yin’we ya tindlela hi nga kombako hi yona lezvaku ha ci bonga a cinyikiwo ca Nungungulu ca ku wulawula, ku tlhamusela lezvi hi zvi kholwako hi Nungungulu ka lava va hi wutisako lezvaku hikuyini hi kalako hi nga vhumeli a gondzo yaku a zvilo zvi no tumbuluka ha zvoce. (Lis. 9:1; 1 Ped. 3:15) Lava va vhuvhumisako a gondzo leyo va wula lezvaku a misava ni zvilo zvi nga ka yona a zvi vangiwangi. Loku hi tirisa a Bhibhiliya ni timhaka to kari ti tlhamuselwako ka ndzima leyi, hi nga yimela a Papayi wa hina wa le tilweni hi tlhela hi tlhamusela lava va lavako ku tiva ku hikuyini hi tiyisekako lezvaku Jehovha hi yena Muvangi wa tilo ni misava. — Lis. 102:25; Isa. 40:25, 26.
Murindzeli 04.22 paj. 7 par. 13
U cikombiso ca cinene kuwulawuleni?
13 Yimbelela hi mbilu yontlhe. A cikhati hi yimbelelako a tisimu ta Mufumo, hi fanele ku ti karatela ku dhumisa Jehovha. A makabye wo kari waku hi Sara i ti wona na a nga zvi koti khwatsi a ku yimbelela. Hambulezvo, i zvi lava nguvhu a ku dhumisa Jehovha hi tisimu. Hikwalaho, a cikhati a longiselako mitlhangano, i vhuxeta ni tisimu ti to yimbeleliwa mitlhanganweni. A cikhati a vhuxetako, i zama ku wona ku lezvi a lisimu lelo li wulako zvi zwananisa kuyini ni lezvi zvi to gondziwa. I wula lezvi: “Lezvo zvi ndzi vhuna ku veka kupima ka lezvi a lisimu li wulako, na ku nga hi ka lezvi ndzi yimbelelisako zvona.”
Titshomba ta moya
Perspicaz vhol. 1 paj. 665
Litiho
Hi ndlela yo fananisa, ku wulawuliwa hi Nungungulu na a maha mitiro hi titiho, yo kota ku tsala a 10 wa milayo laha ka maribye (Ekso. 31:18; Deut. 9:10), ku maha zvihlamaliso (Ekso. 8:18, 19), ni ku vanga matilo (Lis. 8:3). A titiho ta Nungungulu leti ti vangileko zvilo, ku wuliwa a moya wakwe wa ku basa kutani ntamu wakwe lowu ku wulawuliwako hi wona ka Genesisi xungetano hi kuvanga, laha ku wuliwako lezvaku a moya wa Nungungulu (ruʹach, “moya”) wu wa tshama hehla ka mati. (Gen. 1:2) Hambulezvo, a Mitsalo ya ciGreki ya hi vhuna a ku zwisisa khwatsi a ku tirisiwa ka gezu litiho kutani titiho hi ndlela yo fananisa, hakuva a matimu ya bhuku ga Matewu ma hi tlhamusela ku Jesu i hlongolile a madhimoni hi ‘moya wo basa wa Nungungulu’. A bhuku ga Luka gi hi byela ku Jesu i wa hlongola a madhimoni hi “litiho la Nungungulu”. — Mat. 12:28; Luka 11:20.
26 KA FEVEREIRO–3 KA MARÇO
TITSHOMBA TI NGA KA MHAKA YA NUNGUNGULU | TISIMU 11-15
Ti wone na u hi misaveni yiswa yo rula ya Nungungulu
Sentinela 15/5/06 paj. 18 par. 2
Timhaka-tshinya ta bhuku go sangula ga Tisimu
11:3 — Zviseketelo muni zvi to lovisiwa? Zviseketelo zva vanhu ku nga nayo, cileletelo ni kululama. Loku a zvilo lezvi zvi nga tshamisekangi, ku vangeka a pfilupfilu ni ku a ku na kululama. Ka zviyimo lezvo, “loyi a lulamileko” i fanele ku tsumba Nungungulu hi mbilu yontlhe. — Lis. 11:4-7.
Sentinela 04.16 paj. 11
Zva koteka lezvaku ku nga havi ni tihanyi lomu tikweni?
A Bhibhiliya gi tsumbisa lezvaku zvezvanyana Nungungulu i ta fuvisa a tiko legi ga tihanyi. A tiko legi ga tihanyi gi rindzela “a siku ga kulamulwa ni ga kulobyiswa ka vanhu lava va nga chaviko Nungungulu”. (2 Ped. 3:5-7) A vanhu va tihanyi va nga ta ha xanisa a van’wani. Hikuyini hi nga tiyisekako lezvaku Nungungulu wa zvi lava ku maha co kari kasi ku fuvisa a tihanyi?
Nungungulu ‘wa venga a wakubiha ni loyi a randzako kuleva’. (Lis. 11:5) A Muvangi wa hina i randza kurula ni kululama. (Lis. 33:5; 37:28) Hikwalaho, a nga ta tsika a vanhu va tihanyi va simama kala kupindzuka.
Murindzeli 08.17 paj. 7 par. 15
U ta rindzela hi lihlazva-mbilu ke?
15 Hikuyini Dhavhidha a nga ti yimisele ku rindzela hi lihlazva-mbilu? A hlamulo hi wu kuma ka lisimu yaleyi ya yin’we a nga wutisa ka yona ku ‘Kala rini?’ I te: ‘Mina ndzi tsumbile a wuxinji ga wena, a mbilu ya mina ya nengela kuhanyisweni ka wena. Ndzi ta yimbelela hi Jehovha, hakuva i ndzi mahele makatekwa.’ (Lis. 13:5, 6) Dhavhidha i wa zvi tiva ku Jehovha wa mu randza niku i wa nga ta tsika ku mu mahela wuxinji. I ehleketile hi makhati lawa Jehovha a nga sina a mu vhunile, niku i wa rindzela a siku legi Jehovha a nga wa ta mbheta a zvikarato zvakwe. Dhavhidha i wa zvi tiva ku loku u rindzela makatekwa ya Jehovha, a wu rindzeli mahala.
Mufumo wa Nungungulu paj. 236 par. 16
A Mufumo wu maha a kurandza ka Nungungulu misaveni
16 Kuhlayiseka. Hi magumo, a mufananiso wo khumba nguvhu wu tlhamuselwako ka Isaya 11:6-9 wu ta tatiseka hi kumbhelela hi tlhelo ga civiri. A vavanuna, vavasati, ni vanana va nga ta chava nchumu kontlhe lomu va to famba kona misaveni. A ku na munhu ge hambu cihari ci to va karata. Ti alakanyele na u wona a misava yontlhe na yi hi muti wa wena, lomu u to zvi kota ku hlambela micongweni, mativeni, ni mabimbini; u tsemakanya zvitsunga; ni ku fambafamba makhwatini na u nga chavi nchumu. Ni loku a gambo gi pela, u nga ta karateka hi nchumu. A magezu ma nga ka Ezekieli 34:25 ma ta tatiseka, lezvaku zvi koteka ku a vanhu va Nungungulu va “aka hi kurula lomu ciwuleni, va etlela ni lomu makhwatini.”
Titshomba ta moya
Murindzeli 15/09/13 paj. 19 par. 12
U hundzulusilwe ke?
12 Leci ci nga tsakisiko hi lezvaku hi randzelwe hi vanhu va matshamela yo fana ni lawa ma nga xaxametwa hi Pawule. Kuzvilava va alakanya lezvaku a ku ti karatela ku landzela a milayo ni matshinya ya milayo zvi hundzelwe ni lezvaku a ku maha lezvo ku ti nonohisa. A vagondzisi vo tala ni vapswali va tsika vana ni zvigondzani zvabye va ti mahela kurandza. A ka vona, a ku na co lulama, a ku na co biha; kova lezvi u zvi wonisako zvona. Hambu votala lava va ti wulako ku vakhozeli va tizwa na va tlhatlhekile a ku maha lezvi va alakanyako aku zvi lulamile na va nga hi na cilaveko ca ku ingisa Nungungulu ni milayo yakwe. (Lis. 14:1) A mawonela lawo ma nga vanga mhango ya hombe ka maKristu ya lisine. Lava va nga tlharihangiko va ngava ni mawonela lawo xungetano hi zvilo zva moya. Va nga ha ti nonohisa a ku landzela lezvi a zvilo zvi mahiswako zvona laha bandleni hambu ku ngurangura hi kota ya nchumu wihi ni wihi va nga wu randziko. Zvin’wani zvikhati, va nga ala wusungukati ga Bhibhiliya xungetano hi mihlakano yabye, matirisela yabye Internet, ni ku landzelela zvigondzo zvo tlakuka.