Timhaka ta mabhuku ma tako ka Cibhukwana ca Mutlhangano
© 2024 Watch Tower Bible and Tract Society of Pennsylvania
2-8 KA SETEMBRO
TITSHOMBA TI NGA KA MHAKA YA NUNGUNGULU TISIMU 79-81
Kombisa lirandzo hi vito go basa ga Jehovha
Murindzeli 02.17 paj. 10 par. 5
A ndzhiho ‘cinyikiwo co mbhelela’ ci tako hi ka Dhadhani
5 Hi nga kombisa kuyini lezvaku ha gi randza a vito ga Jehovha? Hi nga kombisa hi mahanyela ya hina. Jehovha i lava lezvaku hi basa. (Lera 1 Pedro 1:15, 16.) Lezvo zvi wula kuva hi khozela yena yece hi tlhela hi mu ingisa hi mbilu yontlhe. Hambu loku hi xanisiwa, hi maha zvontlhe hi zvi kotako kasi ku hanya hi ndlela leyi Jehovha a hi gondzisako. Hi ku hanya hi milayo ya Jehovha, hi neha wudzundzo ka vito gakwe. (Mat. 5:14-16) Hi komba lezvaku a milayo yakwe yi nene niku Sathani muhembi. A hi mbhelelangi, hikwalaho hi ta maha zvihoxo. Kanilezvi loku hi hoxisa, ha ti sola hi tlhela hi ti karatela ku tsika ku maha zvilo lezvo zvi chakisako vito ga Jehovha.— Lis. 79:9.
Mavhesi ya Bhibhiliya ma tlhamuselweko n.° 3 par. 4-5
Va Le Roma 10:13 — ‘Kombela vitweni ga Hosi’
Lomu ka Bhibhiliya a magezu ku ‘kombela [kutani ku khongela] vitweni ga Hosi’ ma wula zvo hundza ku tiva a vito ga Nungungulu basi ni ku gi tirisa wukhozelini. (Lis. 116:12-14) A magezu lawa ma patsa ku tsumba Nungungulu ni ku rindzela yena lezvaku a hi vhuna. — Lis. 20:7; 99:6.
A vito ga Nungungulu gi wa hi ga lisima ka Jesu Kristu. A magezu yo sangula ka mukhongelo wakwe wa cikombiso mave lawa: “Papayi wa hina wa le tilweni, a vito ga wena a gi basisiwe.” (Mat. 6:9) A cin’wani kambe, Jesu i kombile lezvaku loku hi lava ku hanya kala kupindzuka hi fanele ku tiva, ku ingisa ni ku randza a N’winyi wa vito lego. — Joh. 17:3, 6, 26.
Titshomba ta moya
Perspicaz vhol. 2 paj. 145
Josefa
A vito Josefa gi kuma nduma. Hi kota ya lezvi a papayi wabye a nga randza nguvhu Josefa a ku hundza a vamakabye vakwe, zva zwisiseka a ku ka zvikhati zvin’wani a vito gakwe gi tirisilwe kasi ku wula a tixaka tontlhe ta Izrayeli (Lis. 80:1) kutani tixaka leti ti nga hi ka mufumo wa le n’walungu. (Lis. 78:67; Amo. 5:6, 15; 6:6) A vito ga Josefa kambe gi kona ka zviphrofeto zva Bhibhiliya. Ka muwoniso wo kari wa Ezekiyeli, a tshomba ya Josefa zvipandze zvimbiri (Eze 47:13), a yin’we ya tinyangwa ta dhoropa “Jehovha i kona laha” yi na ni vito ga Josefa (Eze. 48:32, 35) niku xungetano hi kutlhanganisiwa ka vanhu va Jehovha, ku wulawuliwa hi Josefa kota hosana ya cipandze co kari ca tiko ga Judha a tlhela ava hosana ya cipandze leci cin’wani. (Eze 37:15-26) A ciphrofeto ca Obhadhiya ci wa komba ku “a yindlu ya ka Josefa” yi wa ta patseka ka ku lovisiwa ka “yindlu ya Esawu” (Oba. 18) niku Zakariya i kombile lezvaku Jehovha i wa ta ponisa a “yindlu ya ka Josefa”. (Zak. 10:6) Wutshan’wini ga Efrayime, Josefa i kumeka ka lista ya tixaka ta Izrayeli wa moya. — Kuv. 7:8.
A kuva Josefa a xaxametilwe ka Kuvhululelwa 7:8 zvi komba lezvaku lezvi Jakobe a zvi phrofetileko na a hi kusuhani ni kufa zvi wa ta tatiseka ka Izrayeli wa moya. Hikwalaho, a Muvhuni wa Jakobe, Jehovha Nungungulu, i nyikele Jesu Kristu kota Murisi wa Munene a nyikeleko wutomi gakwe hi kota ya “tiyivhu”. (Joh. 10:11-16) Kristu Jesu kambe i ribye ga lisima ga laha khoneni ga ciseketelo laha ku nga zimekiwa kona a tempeleni ya Nungungulu yi wumbiwako hi vaIzrayeli va moya. (Efe. 2:20-22; 1 Ped. 2:4-6) Niku a Murisi loye tlhelo ribye i zvin’we na Nungungulu wa Ntamu wontlhe. — Joh. 1:1-3; Miti. 7:56; Mah. 10:12; fananisa na Gen. 49:24, 25.
9-15 KA SETEMBRO
TITSHOMBA TI NGA KA MHAKA YA NUNGUNGULU TISIMU 82-84
Tsaka hi malungelo lawa u nga nawo
Sentinela n.° 62016 paj. 8 par. 2-3
Lezvi hi gondzako ka zvinyanyani zva le tilweni
Lava va nga hanya Jerusalema va wa ti tiva khwatsi a timbewulwani. Ti wa maha zvisaka zva tona lomu ka makhona ya tiyindlu. A lembe gontlhe, a timbewulwani to kari ti wa aka zvisaka zva tona lomu tempeleni ya Solomoni. Kuzvilava ti wa wona tempele kota wutshamu ga ginene ni go hlayiseka kasi ku wundlela kona a mavhinyani ya tona.
A Lisimu 84, li tsalilweko hi mun’we wa vana va Kora, li wulawula hi zvisaka zva mbewulwani lomu tempeleni. A vana va Kora va wa hi ni thomo ga ku tira lomu tempeleni hi vhiki gin’we basi ndzeni ka 6 wa tihweti. Kanilezvi, a mutsali wa Lisimu leli i wa navela ku fana ni mbewulwani, leyi yi nga hanya ndlwini ya Jehovha. I tsalile lezvi: ‘Ti randzekisa kuyini a tiyindlu ta wena, Jehovha wa tiyimpi! A muhefemulo wa mina wa xuva, ina, wa navela a zviluvelo zva Jehovha; . . . Hakuva a manjingiri i ti kumele a yindlu, ni mbewulwani yi ni cisaka lomu yi nga vekako kona mavhinyani ya yona, ma nga wona maalati ya wena, Jehovha wa tiyimpi, Hosi ya mina ni Nungungulu wa mina.’ (Lis. 84:1-3) Xana hinawu hi nako kuxuva loko ka hombe ka ku contlhe cikhati hi tlhangana ni vanhu va Nungungulu na hi hi zvin’we ni vana va hina? — Lis. 26:8, 12.
Sentinela 15/07/08 paj. 30 par. 3-4
Vana ni mawonela yo ringaniselau tlhela u tsaka
A kukhosahala ni mababyi zvi nga hi maha hi nga zvi koti ku maha zvotala ntirweni wa Jehovha. Loku u hi papayi kutani mamani wa vanana va vatsongwani, kuzvilava u tizwa na u nga vhuneki khwatsi hi cigondzo ca wena wutsumbu kutani hi mitlhangano ya bandla hakuva a kutala ka cikhati ca wena ni ntamu zvi mbhela na u khatalela vana va wena. Kanilezvi, xana a ku veka kupima ka lezvi u zvi tsandzekako ku maha, ka zvikhati zvin’wani zvi nga ku vhalela a ku wona lezvi u nga zvi kotako ku maha?
Ka malembe yo tala ma hundzileko, a muLevhi wo kari i no wula kuxuva kakwe ku nga kala ku nga koteki a ku ku tatisa. Ndzeni ka lembe i wa hi ni thomo ga ku tira mavhiki mambiri lomu tempeleni. Hambulezvo, i no wula lezvaku i wa xuva ku contlhe cikhati a hanya kusuhani ni alati. (Lis. 84:1-3) Zvini zvi nga vhuna a wanuna loye wo tsumbeka lezvaku a tsaka hi lezvi a nga zvi kota ku maha? I no zwisisa lezvaku hambu hi ku tshama siku gin’we basi tempeleni ya Jehovha gi wa hi thomo ga hombe nguvhu. (Lis. 84:4, 5, 10) Hi ndlela yo fana, wutshan’wini ga ku veka kupima ka lezvi hi kalako hi nga zvi koti ku maha, hi fanele ku zama ku zwisisa niku zvi nyika lisima lezvi hi zvi kotako ku maha.
Murindzeli 01.20 paj. 17 par. 12
Jehovha a Nungungulu wa wena wa ku nyika lisima!
12 Loku u kari u babya, tiyiseka lezvaku Jehovha wa zvi tiva lezvi zvi to humelela wutomini ga wena. Khongela u mu kombela civhuno kasi u zvi kota a ku gondza kuva ni mawonela ma nene hi lezvi zvi to ku humelela. Gondza Bhibhiliya kasi u kuma a magezu yo chavelela lawa Jehovha a ma wulileko. Veka kupima ka mavhesi lawa ma kombako a lisima leli Jehovha a nyikako a malandza yakwe. A cikhati u mahako lezvo, u ta zvi wona lezvaku Jehovha mu nene ka vontlhe lava va mu tirelako hi kutsumbeka. — Lis. 84:11.
Titshomba ta moya
Perspicaz vhol. 2 paj. 350
N’wanana wo felwe hi papayi
Kota lezvi ka ku zvi wa olova lezvaku ku nga cheliwi kota hi vanana vo felwa hi papayi, vo kala vavhikeli, Jehovha i tirisile a magezu ‘n’wanana wo kala papayi’ kasi ku tlhamusela a kululama ka tiko ga Izrayeli kutani kuhambuka kabye ka kululama. A cikhati leci a tiko ga Izrayeli gi nga hanya khwatsi hi tlhelo ga moya, a n’wanana wo kala papayi i wa khatalelwa. A cikhati leci lomu tikweni va nga tsika kululama, a n’wanana wo kala papayi i wa nga cheliwi kota niku lezvo zvi wa humelela nguvhu ka vaIzrayeli. (Lis. 82:3; 94:6; Isa. 1:17, 23; Jer. 7:5-7; 22:3; Eze. 22:7; Zak. 7:9-11; Mala. 3:5) A ciruko ca Jehovha ci wa wela lava va nga xanisa a n’wanana wo felwa hi papayi. (Deut. 27:19; Isa. 10:1, 2) Jehovha wutsumbu i ti tlhamusela kota Mutlhatlhisi (Mav. 23:10, 11), Muvhuni (Lis. 10:14), ni Papayi (Lis. 68:5) wa n’wana loye. Hi yena a lamulako hi kota ya vona (Deut. 10:17, 18), a va kombisa wuxinji (Hos. 14:3), a va tlhatlhisa (Lis. 146:9), a tlhela a maha ku va simama ku hanya. — Jer. 49:11.
A cin’we ca zvikombiso zvi tivekisako a maKristu ya lisine lirandzo leli va kombisako lava va felweko hi nuna kutani vapswali. Mupizani Jakobe i tsalile, aku: “A kukhozela loku ku basileko ni ku nga solekiko mahlweni ka Nungungulu tlhelo Papayi wa hina, hi loku: Ku vhuna a zvisiwana ni vavasati vo felwa hi vanuna kuxanisekeni kabye, ni ku tshama hi nga hi na noda ya zva tiko.” — Jak. 1:27.
16-22 KA SETEMBRO
TITSHOMBA TI NGA KA MHAKA YA NUNGUNGULU TISIMU 85-87
A mukhongelo wa hi vhuna ku timisela
Murindzeli 01/05/12 paj. 30 par. 10
Xana wa kombisa a kungangamela ka Jehovha ke?
10 A cin’wani ci to hi vhuna a ku kombisa kungangamela ka Nungungulu ku “simamisa . . . kukhongeleni.” (Rom. 12:12) Hi fanele ku khongela ka Jehovha lezvaku a hi vhuna ku mu tirela kota lezvi a zvi lavisako zvona. Kasi hi zvi kota, hi fanele ku kombela lezvaku a hi nyika moya wa ku basa, a engetela kukholwa ka hina, a hi nyika ntamu wa kulwa ni zviringo, ni wutlhari ga ku tirisa khwatsi a mhaka ya lisine. (2 Tim. 2:15; Mat. 6:13; Luka 11:13; 17:5) Khwatsi hi lezvi a n’wanana a khegelako ka raru wakwe, hinawu hi fanele ku khegela ka Jehovha, a Dhadhani wa hina wa le tilweni. Loku hi mu kombela lezvaku a hi vhuna ku mu tirela khwatsi, hi fanele ku tiyiseka lezvaku i ta maha lezvo futsi. Hi nga tshuki hi alakanya lezvaku hi cikhunguvanyiso kakwe. Wutshan’wini ga lezvo, a hi mu dhumiseni mikhongelweni ya hina, hi mu bonga, hi kombela ku rangelwa hi yena nguvhunguvhu a cikhati leci hi kumanako ni mindzhingo, hi tlhela hi kombela lezvaku a hi vhuna ku mu tirela hi ndlela leyi yi dhumisako a vito gakwe go basa. — Lis. 86:12; Jak. 1:5-7.
Murindzeli 05.23 paj. 13 par. 17-18
Jehovha i hlamulisa kuyini a mikhongelo ya hina?
17 Lera Lisimu 86:6, 7. Dhavhidha, a mutsali wa tisimu, i wa tiyiseka lezvaku Jehovha i ingisele a tlhela a hlamula mikhongelo yakwe. Wenawu u ngava ni kutsumba ko fana. A zvikombiso hi bhulileko hi zvona ka ndzima leyi zvi hi tiyisekisa lezvaku Jehovha a nga hi nyika a wutlhari ni ntamu zvi lavekako kasi hi zvi kota a kutimisela. A nga hi vhuna hi ku tirisa vamakabye va hina kutani vanhu va nga mu khozeliko.
18 Hambu loku Jehovha a nga hlamuli a mikhongelo ya hina contlhe cikhati hi ndlela leyi hi nga yi rindzele, ha zvi tiva ku i ta hlamula. I ta hi nyika lezvi zvi lavekako hi cikhati leci hakunene zvi lavekako hi cona. Hikwalaho, simama ku khongela u tlhela u kholwa ku Jehovha i ta ku kuzwa. Tiyiseka lezvaku i ta ku khatalela zvezvi niku misaveni yiswa leyi yi tako, i ta ‘xurisa zvontlhe lezvi zvi hanyako’. — Lis. 145:16.
Titshomba ta moya
Perspicaz vhol. 1 paj. 556 par. 6
Mbilu
Tira hi “mbilu yi mbheleleko”. A mbilu ya civiri kasi yi tira khwatsi yi fanele ku ngha yi hi yona yontlhe, kanilezvi a mbilu yo fananisa yi nga avanyeka. Dhavhidha i khongele, aku: “Maha mbilu ya mina yi chava vito ga wena”, kutani ku, ndzi nyike mbilu yi nga avanyekangiko. Lezvo zvi komba ku a mbilu ya munhu yi nga avanyeka ka lezvi a ti zwisako zvona ni lezvi a zvi chavako. (Lis. 86:11) A munhu loye a ngava ni “timbilu timbiri”, a hola hi tlhelo ga moya. (Lis. 119:113; Kuv. 3:16) A munhu a ngava ni “timbilu timbiri” kambe hi ku zama ku tirela tihosi timbiri kutani hi ku wula zvilo zvo kanganyisa na a ehleketa zvin’wani. (1 Kro. 12:33; Lis. 12:2) Jesu i gi kawukile nguvhu a wukanganyisi ga tshamela lego. — Mat. 15:7, 8.
23-29 KA SETEMBRO
TITSHOMBA TI NGA KA MHAKA YA NUNGUNGULU TISIMU 88-89
A Mufumo wa Jehovha hi wona wa wunene nguvhu
Murindzeli 06.17 paj. 22 par. 5
Seketela a wuhosi ga Jehovha!
5 Ehleketa hi cigelo cin’wani ca kuva Jehovha a hi ni fanelo ya ku fuma. I tirisa khwatsi a wuhosi gakwe hakuva i fuma hi kululama ko mbhelela. I hi byela lezvi: ‘Hi mina Jehovha ndzi mahako wuxinji, ni kulamula ni nongameto laha misaveni; hakuva ndza xalaliswa hi zvakunghahi.’ (Jer. 9:24) Jehovha a nga na cilaveko ca ku vhuniwa hi milayo ya vanhu kasi ku tiva lezvi zvi lulamileko. Hi yena a bohako ku a zvo lulama hi lezvi. Niku hi kululama kakwe ko mbhelela, Jehovha i va vekele milayo a vanhu. A muyimbeleli wa tisimu i te: ‘A kululama ni nongameto zviseketelo zva citshamu ca wena ca wuhosi.’ Hikwalaho, ni wihi nayo kutani tshinya ga nayo, kutani ciboho ci tako hi ka Jehovha ci lulamile. (Lis. 89:14; 119:128) Sathani i wula lezvaku Jehovha a hi Hosi ya yi nene. Kanilezvi loyi a tsandzekako ku neha kurula laha misaveni hi yena.
Murindzeli 06.17 paj. 23 par. 10-11
Seketela a wuhosi ga Jehovha!
10 Jehovha a nga fumi hi ndlela ya xapi. Lava va mu ingisako va tsaka va tlhela va ti wona na va tlhatlhekile. (2 Kor. 3:17) Dhavhidha i wulile lezvi ha Jehovha: ‘A wukulu ni kungangamela zvi le mahlweni kakwe; a ntamu ni kutsaka zvi le wutshan’wini gakwe.’ (1 Kro. 16:7, 27) Muyimbeleli Etani i tsalile lezvi: ‘Gi katekile a tiko legi gi tivako a guwa ga litsako. Gi famba kuwonekeleni ka nghohe ya wena, Jehovha. Masiku wontlhe va tsaka vitweni ga wena, va kuliswa kululameni ka wena.’ — Lis. 89:15, 16.
11 A ku ehleketa nguvhu hi wunene ga Jehovha zvi hi maha hi tiyiseka khwatsi lezvaku a mafumela yakwe hi wona ya ma nene. Hi ta fana ni muyimbeleli wa tisimu loyi a nga byela Nungungulu aku: ‘A ku tshama siku gin’we ndlwini ya wena zvi sasekile ku hundza ku tshama khume ga mazana lahandle.’ (Lis. 84:10) Jehovha hi yena a nga hi wumba ni ku hi vanga, hikwalaho wa zvi tiva khwatsi lezvi zvi to hi tsakisa. Hi kota ya wuhana gakwe, i hi nyika zvo hundza lezvi zvi lavekako. Ni cihi leci Jehovha a hi kombelako ku maha, i mahela ku vhuna hina. Hambu loku ku laveka lezvaku hi ti tsona zvokari, contlhe cikhati hi ta tsaka nguvhu loku hi mu ingisa. — Lera Isaya 48:17.
Murindzeli 15/10/14 paj. 10 par. 13
Ngha uva ni kukholwa ko tiya ka Mufumo
14 Ehleketa hi lezvi Jehovha a tsumbisileko Hosi Dhavhidha wa le Izrayeli wa kale hi ku tirisa a civhumelwano ca Dhavhidha. (Lera 2 Samueli 7:12, 16.) Jehovha i mahile civhumelwano leci na Dhavhidha cikhatini ca kufuma kakwe le Jerusalema, a mu tsumbisa lezvaku Messia i wa tava pswalo wakwe. (Luka 1:30-33) Hi ndlela leyo, Jehovha i loya mahlweni a nyika mahungu yo kongoma xungetano hi pswalo lowu a tlhela a komba lezvaku a Mufumo wa wuMesiya wu wa ta ‘lumba’ ciga-tshomba ca Dhavhidha. (Ezek. 21:25-27) Hi laha ka Jesu, a wuhosi ga Dhavhidha gi “ta tiya kala kupindzuka.” Kunene, a pswalo wa Dhavhidha wu “ta simamisa kala kupindzuka, ni citshamu cakwe ca wuhosi ci ta simamisa . . . khwatsi i gambo.” (Lis. 89:34-37) A kufuma ka Messia ku nga ta tshuka ku thapelwa hi wubihi, niku a zvimaho zva mufumo wakwe zvi ta tshama kala kupindzuka!
Titshomba ta moya
Sentinela 01/01/93 paj. 32 par. 3-4
“Kustumunyu a tsumbekileko le matilweni”
A cikhati leci a vaIzrayeli va nga wona hweti va wa alakanya zvilo zvo tsakisa nguvhu. Nungungulu i wa tsumbisile lezvaku a wuhosi ga lixaka la Dhavhidha gi wa nga ta gumesa. Yena i te: ‘A citshamu cakwe ca wuhosi [a pswalo wa Dhavhidha] ci ta tiya kala kupindzuka khwatsi hi hweti, a kustumunyu wa le tilweni i tsumbekile.’ (Lis. 89:35-37) A citsumbiso leci ci tatisekile ka Jesu, a “N’wana Dhavhidha”. (Luka 18:38) Andzhako ka kufa kakwe, Jesu i no vhuxiwa kota civangwa ca moya a tlakukela tilweni. (Miti. 2:34-36) Hi kufamba ka cikhati, i no yimisiwa kota Hosi ya Mufumo wa Nungungulu le tilweni. (Kuv. 12:10) A Mufumo lowo zvezvi wa fuma niku wu ta ‘ku tsondzoma kala kupinzuka’. (Dan. 2:44) Hi ndlela leyo, Jesu loyi a nga fiko wa lixaka la wuhosi la Dhavhidha, i ta simama kuva kona contlhe cikhati leci a hweti, a “kustumunyu a tsumbekileko le matilweni”, yi tova kona.
Hikwalaho, contlhe cikhati leci u to wona hweti le tilweni na yi woninga, alakanya a citsumbiso leci Jehovha a ci mahileko ka Dhavhidha u tlhela u bonga hi lezvi a Mufumo wa Nungungulu makunu wu sangulileko ku fuma ni lezvi wu to fuma kala kupindzuka kasi ku dhumisiwa Nungungulu ni ku a vanhu va kuma makatekwa ya kala kupindzuka. — Kuv. 11:15.
30 KA SETEMBRO – 6 KA OUTUBRO
TITSHOMBA TI NGA KA MHAKA YA NUNGUNGULU TISIMU 90-91
Kasi u engetela wutomi ga wena, tsumba Jehovha
Murindzeli n.° 32019 paj. 5 par. 3-5
Ku hlotiwa tindlela ta ku a vanhu va hanya wutomi go leha
A titlhari to tala ta siyensya ti wula lezvaku hambu lezvi ku nga ni mimuri yo tala ya ku vhikela vanhu lezvaku va nga khosahali, a vanhu a va nge zvi koti ku hanya a wutomi go leha ga ku hundza legi hi hanyako inyamutlha. Kusukela ka zana ga malembe ga wu 19, a malembe ya ku hanya ka vanhu ma sangulile ku engeteleka. Kanilezvi lezvi zvi koteka hi kota ya basiselelo, mimuri ya ku vhikela mababyi, ni yin’wani ya ku tira a mababyi yo tala. A titlhari to kari ti kholwa lezvaku a masiku ya kuhanya ma ya chikela ka ntsengo lowu a vanhu a feleko ku hanya.
Kwalomu ka 3500 wa malembe ma hundzileko Mosi, a mutsali wa Bhibhiliya, i tsalile lezvi: ‘A masiku ya kuhanya ka hina ma ringana 70 wa malembe, ni lava va nga ni ntamu va nga chikela ka 80 wa malembe, kanilezvi a ntamu wa wona ngwa kubayiseka ni kukarateka, hakuva ma hundza hi cihatla, hina hi n’walala.’ (Lis. 90:10) Hambu lezvi a vanhu va zamako ku engetela masiku ya kuhanya, a wutomi ga ha simama giva hi ndlela leyi Mosi a yi wulileko.
Kanilezvi a zvihari zvo kari ni tisinya to kari to kota muwu ti nga hanya malembe yo tala nguvhu. Loku hi fananisa malembe lawa hi hanyako ni lawa ya tisinya leti kutani ya zvilo zvin’wani zvi hanyako, hi nga ha ti wutisa ku: ‘A wutomi ga kona hi galegi ga 70 kutani 80 wa malembe basi?’
Murindzeli n.° 12019 paj. 5, kwadru
A vito ga Nungungulu hi mani?
A ciwutiso leci ci karata votala. Kuzvilava wenawu ca ku karata. Hi nga zvi wulisa lezvi: Loku ku hi ku a zvilo zvontlhe le tilweni ni laha misaveni zvi vangilwe hi wokari, maku himani a nga vanga Nungungulu?
Hi tolovelo a titlhari ta siyensya ta vhumela lezvaku zvontlhe hi zvi wonako zvive ni masangulo. Mhakeni leyi ya tshinya, a vhesi go sangula ga Bhibhiliya gi li: ‘A kusanguleni Nungungulu i no vanga tilo ni misava.’ — Gen. 1:1.
A zvi koteki ku a tilo ni misava zvi no ti vanga hi zvoce; zvi wa nga ta ku halahala zviva kona. A ku na nchumu wa ku wu nga ku halahala wuva kona. Loku ku hi lezvaku na ku nga se vangiwa zvilo zvontlhe ku wa nga hi na nchumu, phela inyamutlha ku wa nga tava ni misava ni tilo ni zvontlhe zvi nga kona. Hambu lezvi zvi hi karatelako ku zvi zwisisa khwatsi, kale ni kale ne na ku nga se vangiwa zvilo zvontlhe hi zvi wonako nyamutlha, ku ni wokari a nga wonekiko loyi a nga vanga zvilo zvontlhe hi zvi wonako. Jehovha Nungungulu, a nga moya wu nga wonekiko, hi yena Musangulisi wa Zvilo, loyi a nga ni ntamu wa hombe ni wutlhari ga hombe. — Joh. 4:24.
A Bhibhiliya gi wula lezvi xungetano hi Nungungulu: ‘Hi mahlweni a zvitsunga na zvi nga se ku huma, Na u nga se ku vanga misava ni tiko, kusukela kupindzukeni kala kupindzuka wena u hi Nungungulu.’ (Lis. 90:2) Hikwalaho, Nungungulu a nga vangiwangi hi munhu, niku contlhe cikhati ive kona niku i ta simama ava kona. Maku, hi yena kwale “kusanguleni” a nga vanga lezvi hi zvi wonako nyamutlha. — Kuv. 4:11.
Murindzeli 06.22 paj. 18 par. 16-17
Lezvi a lirandzo li hi vhunisako zvona ku hlula kuchava
16 Sathani wa zvi tiva lezvaku ha khatala hi wutomi ga hina. I wula lezvaku hi nga tsika zvontlhe hi nga nazvo — hambu a wunghana ga hina na Jehovha — hi ku fela ku hanya. (Joba 2:4, 5) A ngo ku ti kalavela! Kanilezvi kota lezvi Sathani ku nga yena “loyi a nga ni ntamu wa ku daya,” i zama ku londzowota a kuchava ka hina ka ku chava kufa kasi ku hi maha hi fularela Jehovha. (Mah. 2:14, 15) Ka zvikhati zvo kari lava va kucetelwako hi Sathani va hi chavisela va ku va ta hi daya loku hi nga tsiki kukholwa ka hina. Ka zvikhati zvin’wani, kuzvilava Sathani a nga londzowota a zviyimo zvo chavisa zva matirelwa ya mababyi kasi ku hi tsikisa ku tirela Jehovha. A vadhokodhela kutani maxaka ma nga kholwiko ma nga hi kucetela ku vhumela ku cheliwa nkhata, lezvi zvi nga wa ta tshova a nayo wa Nungungulu. Kutani a wokari a nga hi maha hi vhumela a matirelwa man’wani ma nga yelaniko ni matshinya ya milayo ya Mitsalo.
17 Hambu lezvi hi nga zvi laviko kufa, ha zvi tiva lezvaku Jehovha a nga ta nyima ku hi randza hambu loku hifa. (Lera Va Le Roma 8:37-39.) Loku a vanghana va Jehovha vafa, i simama ku va alakanya a ku khwatsi hi loku va ha hanya. (Luka 20:37, 38) I zvi xuva nguvhu ku va vhuxa. (Joba 14:15) Jehovha i hakhele ntsengo wo tlakuka nguvhu kasi hi “kuma wutomi ga pindzukelwa”. (Joh. 3:16) Ha zvi tiva ku Jehovha wa hi randza nguvhu niku wa khatala hi hina. Hikwalaho, wutshan’wini ga ku fularela Jehovha a cikhati leci hi babyako kutani loku va hi dzukisela va ku hi tafa, hi tsutsumela kakwe kasi hi kuma kuchavelelwa, wutlhari ni ntamu. Hi zvalezvo futsi Valérie ni nuna wakwe va mahileko. — Lis. 41:3.
Titshomba ta moya
Sentinela n.° 52017 paj. 5
Xana u na ni ngilozi yi ku vhikelako?
A Bhibhiliya a gi gondzisi lezvaku a munhu ni munhu i na ni ngilozi yi mu vhikelako. Ka khati go kari Jesu i wulile lezvi: “Mu nga tshuki mu kanyisa a mun’we wa lava vatsongwani, [vapizani va Kristu] hakuva ndza wula ka n’wina ndziku: A tingilozi tabye ti nga le tilweni contlhe cikhati ta wonana ni Papayi wa mina a nga le tilweni.” (Mat. 18:10) Zvini lezvi Jesu a nga lava ku wula hi magezu lawa? I wa lava ku wula lezvaku a tingilozi ta khatala hi vanhu na ku nga hi ku khwatsi a munhu ni munhu i na ni ngilozi yi mu vhikelako. Hikwalaho, a maKristu ya lisine a ma veki wutomi gabye mhangweni na ma ti byela lezvaku a tingilozi ti ta ma vhikela.
Xana lezvo zvi wula lezvaku a tingilozi a ti vhuni vanhu? Ahihi. (Lis. 91:11) A vokari va tiyiseka lezvaku Nungungulu i tirisile tingilozi kasi ku va vhikela ni ku va rangela. Kenneth, a kumbukilweko kusanguleni ka ndzima leyi, mun’we wa lava va zvi wonisako lezvo. Niku hambu lezvi ka ku a hi nge wuli hi ku tiya, zva koteka ku na a wula lisine. A Vakustumunyu va Jehovha a kutala ka zvikhati va wona zvikombiso zva civhuno ca tingilozi ntirweni wabye wa kuchumayela. Hambulezvo, kota lezvi ka ku a zvi koteki ku wona tingilozi, a hi nge zvi tivi ku Nungungulu i ti tirisa kala kwihi kasi ku vhuna munhu ni munhu ka zviyimo zvo hambanahambana. Hikwalaho, a zvi bihangi a ku bonga Nungungulu wa Ntamu Wontlhe hi ni cihi civhuno a hi nyikako. — Kol. 3:15; Jak. 1:17, 18.
7-13 KA OUTUBRO
TITSHOMBA TI NGA KA MHAKA YA NUNGUNGULU TISIMU 92-95
A ku tirela Jehovha hi gona wutomi ga ginene!
Murindzeli 04.18 paj. 28 par. 5
Vaswa, ma ti vekela mixuvo ya moya ke?
5 A cigelo ca lisima nguvhu ka zvontlhe ca kuva u ti vekela mixuvo ya moya ku bonga Jehovha hi lirandzo lakwe ni lezvi a hi mahelako. A mutsali wo kari wa Tisimu i te: ‘Zvi sasekile ku khanela Jehovha, . . . hakuva wena Jehovha wa ndzi tsakisa hi mitiro ya wena, ndzi ta huwelela hi litsako hi kota ya mitiro ya mandla ya wena.’ (Lis. 92:1, 4) Ehleketa hi zvontlhe lezvi Jehovha a ku nyikako: a wutomi, a kukholwa, a Bhibhiliya, a bandla, ni kutsumba ka ku hanya kala kupindzuka Paradhiseni. Loku u ti vekela mixuvo ya moya, u komba Jehovha lezvaku wa mu bonga hi zvontlhe lezvo. Lezvo zvi ku maha u tshinela nguvhu ka yena.
Murindzeli 11.18 paj. 23 par. 8
U nga pimanyisi kupima ka tiko legi
8 A ku fana ni mupswali wa mu nene, Jehovha i lava ku a vana vakwe vava ni wutomi go tsakisa hi laha zvi kotekako hi kona. (Isa. 48:17, 18) Hikwalaho, i hi gondzisa matshinya ya milayo xungetano hi mahanyela ma nene ni lezvi hi faneleko ku hanyisa zvona ni van’wani. I hi kuca lezvaku hi gondza ku wona zvilo hi mawonela yakwe hi tlhela hi hanya hi zvona. Lezvo a zvi hi mahi tikhumbi. Wutshan’wini ga lezvo, zvi hi maha hi tlhariha zvi tlhela zvi hi vhuna ku maha zviboho zva zvi nene. (Lis. 92:5; Mav. 2:1-5; Isa. 55:9) Hi nga simama hiva ni mawonela ya hina, hambulezvo hi ta maha zviboho zvi to hi nyika litsako. (Lis. 1:2, 3) Loku hiva ni kupima ka Jehovha, hi vhuneka hi tindlela to tala!
Murindzeli 01.20 paj. 19 par. 18
Jehovha a Nungungulu wa wena wa ku nyika lisima!
18 Laha hi khosahalako, a hi tiyisekeni lezvaku Jehovha i simama ava ni mitiro hi faneleko ku yi maha. (Lis. 92:12-15) Jesu i hi gondzisile lezvaku hambu loku lezvi hi mahako hi zvi wonisa ku khwatsi zvitsongwani, Jehovha wa zvi nyika lisima zvontlhe hi nga zvi mahako ntirweni wakwe. (Luka 21:2-4) Hikwalaho veka kupima ka lezvi u zvi kotako ku maha. Hi cikombiso, u nga bhula ni van’wani xungetano hi Jehovha, u khongelela a vamakabye va wena u tlhela u kuca van’wani lezvaku va simama va tiyile kukholweni. Jehovha i ku wona kota mutiri wakwe na ku nga hi lezvi u zvi kotako ku maha, kanilezvi hi kota ya kutiyimisela ka wena ka ku lava ku mu ingisa. — 1 Kor. 3:5-9.
Titshomba ta moya
Achegue-se paj. 176 par. 18
“Hi nga wona a . . . kueta ka wutlhari” ga Nungungulu!
18 Wona lezvi mupostoli Pawule a gi tlhamuselisileko zvona a wutlhari go hlamalisa ga Jehovha, i te: “Hi nga wona a kutala ka makatekwa, ni kueta ka wutlhari ni wutivi ga Nungungulu! A kulamula kakwe ku etile nguvhu, ni tindlela takwe a ti na ku tiviwa hi munhu!” (Rom. 11:33) Hi ku sangula a vhesi hi magezu “Hi nga wona”, Pawule i wo komba lezvaku mhakeni leyi i wa hlamalisiwa nguvhu. A gezu ga ciGreki legi a gi hlawulileko kasi ku wula kueta gi yelana kutsongwani ni gezu gi wulako “nkele wo eta wo kala magumo”. Hi ndlela leyo hi nga zvi kota ku alakanyela khwatsi a kueta ka wutlhari ga Nungungulu. A cikhati leci hi ehleketako hi wutlhari ga Jehovha zvi mahisa ku khwatsi ho hlomela lomu nkeleni wo eta nguvhu wa ku a zvi koteki ku alakanyela a magumo wa wona. Mayiwako loku hi wo tiva lezvi a wutlhari lego gi nga etisa zvona! (Lis. 92:5) Xana lezvo a zvi hi mahi hi ti wona hi hi vatsongwani nguvhu?
14-20 KA OUTUBRO
TITSHOMBA TI NGA KA MHAKA YA NUNGUNGULU TISIMU 96-99
‘Huwelela a mahungu ya manene’!
Sentinela 01/03/11 paj. 6 par. 1-2
Zvini a mahungu ya manene?
A MAKRISTU ma chumayela a ‘mahungu ya manene ya mufumo’ hi ku bhulela van’wani a mahungu lawo, va tlhamusela lezvaku a Mufumo wa Nungungulu hi wona wu to fuma misava yontlhe hi kululama cikhatini ci tako. Hambulezvo, a magezu “mahungu ya manene” ma tirisiwa hi tindlela tin’wani lomu ka Bhibhiliya. Hi cikombiso, ku wulawuliwa hi ‘mahungu ya manene ya kuhanyisa’ (Lis. 96:2); ‘mahungu ya manene ya Nungungulu’ (Rom. 15:16); ni ‘mahungu ya manene xungetano hi Jesu Kristu’. — Mar. 1:1.
Hi ndlela yo songa, a mahungu ya manene ma patsa a lisine lontlhe li gondzisilweko hi Jesu li tlhela li tsaliwa hi vapizani vakwe. Na a nga se tlhela tilweni, Jesu i va byelile lezvi a valandzeli vakwe: “Fambani mu va maha vapizani a vanhu va matiko wontlhe, mu va bhabhatisa hi vito ga Papayi ni ga N’wana ni ga moya wo basa, mu va gondzisa a ku ingisa zvontlhe lezvi ndzi mu layileko. Ndzi na n’wina masiku wontlhe kala kugumeseni ka tiko.” (Mat. 28:19, 20) Hikwalaho, a ntiro wa maKristu ya lisine a hi ku byela van’wani a mahungu ya Mufumo basi; va fanele ku tlhela va maha vapizani.
Murindzeli 01/09/12 paj. 16 par. 1
Zvini zvi to maheka ka Siku ga Kulamula?
Kota lezvi hi zvi wonako ka mufota lowu laha cineneni, a vanhu vo tala va alakanya lezvaku ka Siku ga Kulamula a vanhu va tibhiliyoni va ta yiswa citshan’wini ca wuhosi ca Nungungulu kasi ku ya lamulwa maringano ni mitiro yabye ya kale — a vokari va ta chachazelwa hi ku ya hanya tilweni, a van’wani vaswa tilweni. Kanilezvi, a Bhibhiliya gi komba lezvaku a kungo ga Siku ga Kulamula ku tlhatlhisa vanhu ka wubihi legi va mahelwako. (Lis. 96:13) Nungungulu i yimisile Jesu kota Mulamuli loyi a to tlhelisela kululama cikari ka vanhu. — Lera Isaya 11:1-5; Mitiro 17:31.
Murindzeli 01/09/12 paj. 17 par. 18-19
Kurula ndzeni ka 1000 wa malembe — ni ndzhako ka lezvo!
18 A kuzwanana loko ka ku nene ku lo tsemariswa a cikhati leci a vanhu va nga hluwukela wuhosi ga Jehovha hi ku kucetelwa hi Sathani. Hambulezvo, hi 1914, a Mufumo wa wuMesiya wu lo sangula ku tira kasi wu tlhelisela a kuzwanana loko. (Efe. 1:9, 10) Kufumeni ka 1000 wa Malembe, ku ta tatiseka zvilo zvo hlamalisa lezvi “zvi nga woniwiko” cikhatini leci. Zvonake ku ta chikela “magumo,” ku nga kugumesa ka Kufuma ka Kristu ka 1000 wa Malembe. Zvini zvi to maheka hi kulandzela ke? Hambu lezvi Jesu a nyikilweko “a ntamu wontlhe a tilweni ni laha misaveni,” a nga na makangwa. A nga naveli ku wutla cikhundla ca Jehovha. I “tlhelisela a mufumo ka Nungungulu Dhadhani” hi matsenya. I ta tirisa a cikhundla cakwe co hlawuleka ni ntamu lowo a nyikilweko kasi “a dumiswa Nungungulu Dhadhani.” — Mat. 28:18; Filp. 2:9-11.
19 Cikhatini leco, a vanhu laha misaveni va ta ngha va mbhelele. Va ta landzela a cikombiso ca Jesu, va ti koramisa va tlhela va vhumela a wuhosi ga Jehovha hi matsenya. Va tava ni lungelo ga ku kombisa lezvaku va xuva ku maha lezvo hi ku hlula a ciringo co gumesa. (Kuv. 20:7-10) Andzhako ka lezvo, a vahluwuki vontlhe — vanhu ni madhimoni — va ta loviselwa magumo. Handle ko kanakana, leco ci tava cikhati co tsakisa nguvhu! A ngango wontlhe wuakweni gontlhe wu ta dhumisa Jehovha hi kutsaka, loyi a tova “zvontlhe ka vontlhe.” — Lera Lisimu 99:1-3.
Titshomba ta moya
Perspicaz vhol. 1 paj. 427
Lisimu
A magezu “lisimu liswa” a ma kumeki basi lomu ka Tisimu kanilezvi ma kumeka kambe lomu ka mitsalo ya Isaya ni ya mupostoli Johani. (Lis. 33:3; 40:3; 96:1; 98:1; 144:9; 149:1; Isa. 42:10; Kuv. 5:9; 14:3) Loku ku hlolisisilwe a mongo wa lomu a kutala ka zvikhati a magezu “lisimu liswa” ma kumekako kona ku woneka lezvaku ma wa yimbelelwa hi kota ya cimaho ciswa Mufun’weni wa Jehovha wa wuako gontlhe. Kota lezvi va huweleleko hi litsako ka Lisimu 96:10: ‘Jehovha wa fuma’. A zvimaho zviswa zva ku andzisa Mufumo wakwe ni lezvi zvi wulako zvona ka matilo ni misava, zvi wonekisa ku khwatsi hi zvalezvo ku wulawuliwako hi zvona ka ‘lisimu leli la liswa’. — Lis. 96:11-13; 98:9; Isa. 42:10, 13.
21-27 KA OUTUBRO
TITSHOMBA TI NGA KA MHAKA YA NUNGUNGULU TISIMU 100-102
Kombisa kubonga hi lirandzo li nga mbheliko la Jehovha
Murindzeli 03.23 paj. 12 par. 18-19
U nga ti longiselisa kuyini kasi u bhabhatiswa?
18 A ku randza Jehovha i tshamela ga lisima nguvhu, a tshamela ga hombe legi u nga nago. (Lera Mavingu 3:3-6.) A lirandzo la wena la hombe hi Nungungulu li nga ku vhuna ku hlula zvikarato. A kutala ka zvikhati a Bhibhiliya gi wulawula hi lirandzo la lisine leli Jehovha a nga nalo hi malandza yakwe. Lezvi Jehovha a nga ni lirandzo la lisine a nga ta tshuka a chokola malandza yakwe kutani ku nyima ku ma randza. (Lis. 100:5) U mahilwe hi mufananiso wa Nungungulu. (Gen. 1:26) U nga kombisisa kuyini lirandzo la tshamela legi?
19 Randza ku bonga. (1 Tes. 5:18) Siku ni siku, ti wutise lezvi: ‘Jehovha i zvi kombisa kuyini ku wa ndzi randza?’ Hi kulandzela bonga Jehovha ka mikhongelo ya wena, u kumbuka zvilo zvo kongoma lezvi a ku maheleko. Tiva lezvaku Jehovha i ku mahela zvilo zva zvinene hakuva wa ku randza, a ku fana ni lezvi mupostoli Pawule a zvi polileko xungetano hi Jehovha. (Lera Va Le Galatiya 2:20.) Ti wutise lezvi: ‘Kota lezvi Jehovha a ndzi randzako, a ku minawu ndza zvi lava ku mu tlhelisela a lirandzo leli a ndzi kombisako?’ A ku randza Jehovha zvi ta ku vhuna ku simama u hlula zviringo u tlhela u timisela loku u xanisiwa. Zvi ta ku kuca ku namarela ka longoloko wa wena wa moya, hi ndlela leyo u kombisa lirandzo la wena hi Jehovha siku ni siku.
Murindzeli 02.23 paj. 17 par. 10
“Hlayisani a kupima ka n’wina, mu ti wonela”!
10 A timhango to kari hi faneleko ku ti potsa ti patsa ku hlakana hi lirandzo, kunwa nguvhu, kuga nguvhu, ku wulawula zvilo zvi bayisako van’wani, ku sixtira zvilo zva tihanyi, pornografia ni zvin’wani zvo fana ni lezvo. (Lis. 101:3) A nala wa hina Sathani, contlhe cikhati i hlota tindlela ta ku wonha a wunghana ga hina na Jehovha. (1 Ped. 5:8) Loku hi nga ti woneli, Sathani a nga byala timbilwini ta hina a mbewu ya matshoho, kukanganyisa, wunavenave, livengo, matshandza ni civiti. (Gal. 5:19-21) Kusanguleni, a zvilo lezvo zvi nga wonekisa ku khwatsi a hi cikarato ca hombe. Kanilezvi, loku hi nga tekeli ku maha cokari kasi ku zvi tsuwula, zvi ta simama ku kula a ku fana ni byanyi go daya nguvhu zvi tlhela zvi hi vangela zvikarato. — Jak. 1:14, 15.
Murindzeli 01/07/11 paj. 16 par. 7-8
Xana u ta ingisa a zvitlharihiso zva Jehovha zvo dlunyateka?
7 Zvi wula yini a ku nga hlengeli ni vagondzisi va mawunwa ke? A hi faneli ku va amukela mitini ya hina kutani ku va losa. A ku hundza lezvo, ha ala a ku gondza mabhuku yabye, ku hlalela milongoloko yabye ka televhizawu, ku wona a mapajina yabye ka internet kutani ku tsala mawonela ya hina ka mapajina lawo. Hikuyini hi tseramako hi ndlela leyo? Lirandzo. Hi randza a “Nungungulu wa lisine,” hikwalaho a hi naveli a tigondzo to gombonyeka leti ti kanetako a Mhaka yakwe ya lisine. (Lis. 31:5; Joh. 17:17) Ahandle ka lezvo, hi randza a hlengeletano ya Jehovha, leyi yi hi gondzisako a lisine lo tsakisa nguvhu — xungetano hi vito ga Jehovha ni tlhamuselo wa gona, kungo ga Nungungulu hi misava, ciyimo ca vafileko, ni citsumbiso ca lezvaku a vafileko va ta vhuka. Wa ha zvi alakanya lezvi u nga ti zwisa zvona a cikhati leci u nga gondza a lisine lelo? Makunu ke, hikuyini u nga wa ta vhumela a ku wonhiwa hi munhu a wulawulako zva hava hi hlengeletano leyi yi ku gondzisileko a lisine lelo? — Joh. 6:66-69.
8 Hambu loku a vagondzisi va mawunwa vo wula yini, hi nga ta va landzela! Hi wa ta yela yini ka tihlowo leto to woma kasi lezvo hi to ya khohliswa ni ku bhinyiwa timbilu ntsena? Wutshan’wini ga lezvo, a hi ti yimiseleni a ku simama na hi tsumbekile ka Jehovha ni ka hlengeletano yakwe leyi yi nga ni malembe yo tala na yi hi tima tora hi mati yo basa ni yo titimela ya lisine la Mhaka ya Nungungulu. — Isa. 55:1-3; Mat. 24:45-47.
Titshomba ta moya
Perspicaz vhol. 1 paj. 624
Gumba (Pelicano)
Loku a gumba gi xure, a kutala ka zvikhati gi haha giya ka wutshamu ga le kule gi ya tshama goce gi ku xukununu gi tumbeta hloko lomu ka tipapa, gi nga ti henyi laha ka ku loku u zvi wonela kule u nga tshuka u ku i ribye go basa. A cinyanyani leci ci mbheta tihora to tala na ci tshamisile lezvo, lezvi zvi yelanako khwatsi ni ciyimo leci a muyimbeleli wa tisimu a nga hi ka cona a cikhati leci a nga tlhamusela a kukarateka kakwe, hi ku tsala lezvi: ‘Ndzi fanana ni gumba ciwuleni’. (Lis. 102:6) Laha a gezu ‘ciwula’ a gi wuli ciwula hi kukongoma, kanilezvi gi wula wutshamu ga le kule ni lomu ku tshamako vanhu kutani nkova. Ka tinguva to kari, a magumba ma tshama lomu mikoveni ya le n’walungu wa Jordhani. Ku na ni tixaka tinharu ta magumba ti kumekako le Izrayeli. Leli li tolovelekileko nguvhu hi leli va nge i pelicano-branco oriental (gumba go basa); a pelicano-dálmata (gumba ga matlhakatlhaka) ni pelicano-cinzento (gumba ga wukhuma) ma kala ku ma woniwa.
A magumba ma randza ku tshama lomu ka matshamu ya ciwula, lomu ma kalako ma nga colopetelwi hi vanhu. Ma maha zvisaka kwaseyo ma tlhela ma wundla mavhinyani ya wona ma suka andzhako ka loku ma phasile tinjhanjhi. Hi kota ya lezvi a cinyanyani leci ci randzako matshamu ya zviwula, lomu ka Bhibhiliya ci tirisiwa kota cikombiso ca kuhluliwa ka hombe. Kasi ku fananisa a kuhluliwa loku ku ngata ka Edhomi, Isaya i phrofetile lezvaku a gumba gi wa ta tshama tikweni lego. (Isa. 34:11) Zefaniya i phrofetile lezvaku a magumba ma wa ta tshama lomu ka tihloko ta mapilari ya le Ninivha, lezvi zvi nga komba lezvaku Ninivha i wa ta hahluliwa hi kumbhelela niku ku wa nga ta ha tshama vanhu. — Zef. 2:13, 14.
28 KA OUTUBRO–3 KA NOVEMBRO
TITSHOMBA TI NGA KA MHAKA YA NUNGUNGULU TISIMU 103-104
“Wa alakanya lezvaku hina hi ntshuri”
Murindzeli 07.23 paj. 21 par. 5
Olova u pimanyisa Jehovha
5 A kutikoramisa ni kuzwela wusiwana ka Jehovha zvi mu kuca ku ava munhu wo olova. Hi cikombiso, Jehovha i kombile zvi ku dlunya ku munhu wo ti koramisa a cikhati leci a nga lava ku lovisa a vanhu vo biha va Sodhoma. Na a tirisa tingilozi, Jehovha i no byela Loti, a munhu wo lulama kasi a tsutsuma a ya zvitsungeni. Loti i wa chava kuya seyo. Hikwalaho, i no kombela ku yena ni ngango wakwe va ya chavela Zoware, ku nga hi cidhoropana leci Jehovha a nga lava ku ci lovisa. Loku i wa no zvi lava, Jehovha na a kurumetile Loti lezvaku a landzela zvontlhe zvileletelo zvakwe. Kanilezvi Jehovha i no tsika Loti aya Zoware niku a nga ha lovisangi a cidhoropana leco. (Gen. 19:18-22) Hi ndzhako ka cikhati, na ku hundzile malembe yo tala, Jehovha i no va zwela wusiwana a vahanyi va Ninivha. I no rumela muphrofeti Jona kasi a ya huwelela ku a dhoropa ni vahanyi va gona vo biha va ta lovisiwa. Kanilezvi, a cikhati leci a vaNinivha va nga ti sola, Jehovha i no va zwela wusiwana a nga ha lovisi a dhoropa. — Jona 3:1, 10; 4:10, 11.
Murindzeli 09.23 paj. 6-7 par. 16-18
Tsumba Jehovha a ku khwatsi hi lezvi Samsoni a nga maha
16 Hambu lezvi Samsoni a nga tshovela mihandzu yo bava hi kota ya cihoxo cakwe, a nga nyimangi ku maha kurandza ka Nungungulu. Hambu loku ho maha cihoxo hi kawukiwa kutani ku luza malungelo, a hi faneli ku nyima ku tirela Jehovha. Alakanya ku Jehovha i longile ku hi tsetselela. (Lis. 103:8-10) Na ku nga khataliseki zvihoxo zva hina, Jehovha a nga simama a hi tirisa, a ku khwatsi hi lezvi a mahileko ka Samsoni.
17 Wona cikombiso ca muswa wokari waku hi Michael. Kota nandza go vhunetela tlhelo phayona ga cikhati contlhe, i wa tshama na a khomekile ntirweni wa Jehovha. Hambulezvo, a ya hava hi ku i mahile cihoxo ci nga mu maha a luza a malungelo yakwe lomu bandleni. I wula lezvi: “Kala laha ku nga maheka lezvi, ndzi wa khomekile nguvhu ntirweni wa Jehovha. Kanilezvi hi kucopeta ka tihlo ndzi no ti zwisa ku khwatsi a ci kona ndzi nga mahako ntirweni wa Jehovha. A ndzi tshukangi ndzi pimisa ku Jehovha i ta ndzi tsika, kanilezvi ndzi ti wutisile ku a wunghana ga mina na Jehovha ga ha ta tlhela gi fana ni kale kutani ku ndza ha ta tirela Jehovha hi kumbhelela a ku fana ni kale ke.”
18 A ya ku tsakisa ku Michael a nga mbhelangi ntamu. I engeta aku: “Ndzi no veka kupima ka ku lulamisa a wunghana ga mina na Jehovha hi ku khongela, ku gondza Bhibhiliya ni ku ehleketa — zvontlhe lezvo na ndzi zvi maha hi kukhandzakanya.” Hi kufamba ka cikhati, Michael i no tlhela a kuma malungelo yakwe lomu bandleni. Zvezvi i tira kota dhota tlhelo phayona ga cikhati contlhe. I engeta aku: “A civhuno ni kutiyisiwa ndzi ku kumileko nguvhunguvhu ka madhota, zvi ndzi vhunile ku zwisisa ku Jehovha wa ha ndzi randza. Ndza zvi kota ku tlhela ndzi tirela bandla ni livhalo li basileko. A tshango legi gi ndzi kombile ku Jehovha i ta tsetselela ni wihi a ti solako hi mbilu yontlhe.” Hi nga tiyiseka lezvaku Jehovha hinawu i ta hi tirisa a tlhela a hi katekisa hambu loku hi mahile zvihoxo, ntsena loku hi maha zvontlhe hi zvi kotako kasi hi lulamisa tindlela ta hina ni ku simama hi mu tsumba. — Lis. 86:5; Mav. 28:13.
Murindzeli 05.23 paj. 26 par. 2
Phela u nga zvi kota ku tatisa mixuvo ya wena ya moya
2 Loku ku hi ku u na ni mixuvo yo kari zvi kalako zvi nga se koteka ku u yi tatisa, u nga mbheli ntamu. Hambu yova mixuvo ya yitsongwani, zvi lava cikhati ni kutikarata ka hombe kasi ku yi tatisa. A kuva wa ha simama ku lava ku tatisa mixuvo ya wena zvi komba ku wa gi nyika lisima a wunghana ga wena na Jehovha niku u lava ku mu mahela zvontlhe zvi nga ntan’wini wa wena. Jehovha wa ku nyika lisima a kutikarata ka wena. Hi lisine, a nga rindzeli zva hombe nguvhu ka wena a ku hundza lezvi u nga zvi kotako. (Lis. 103:14; Mika 6:8) Hikwalaho, loku u ti vekela mixuvo, tiyiseka lezvaku u ta zvi kota ku yi tatisa. Loku zvi tshamisile lezvo, zvini u nga mahako kasi ku yi tatisa? A hi bhuleni hi mawonela yo kari.
Titshomba ta moya
Achegue-se paj. 55 par. 18
Ntamu wa kuvanga — “Mumahi wa tilo ni misava”
18 Hi gondza yini ka lezvi Jehovha a wu tirisisako zvona a ntamu wakwe wa ku vanga? A kuhambanahambana ka zvivangwa ka hi hlamalisa. A mun’we wa vayimbeleli va tisimu i hlamalile, aku: ‘Jehovha, yi talisile kuyini a mitiro ya wena! . . . A misava yi tele hi zvivangwa zva wena.’ (Lis. 104:24) Lezvo lisine! A titlhari ta Biologia makunu ti polile a 1 000 000 ni ku hundza wa tixakaxaka ta zvivangwa zvi hanyako laha misaveni. Hambulezvo, ku na ni mawonela yo hambanahambana xungetano hi ku timiliyoni tingani ta zvivangwa ti nga vako kona. A munhu a nga ni wutlhari ga ku maha zvilo ka zvikhati zvin’wani a nga tshuka a tizwa a wutlhari gakwe na gi gumelwe. Kanilezvi a kuhambana na Jehovha, a ntamu wakwe wa ku tsamba ni ku vanga zvilo zvo hambanahambana a wu tshuki wu gumelwa.