Timhaka ta mabhuku ma tako ka Cibhukwana ca Mutlhangano
© 2025 Watch Tower Bible and Tract Society of Pennsylvania
5-11 KA JANEIRO
TITSHOMBA TI NGA KA MHAKA YA NUNGUNGULU ISAYA 17-20
“Ciavelo ca lava va hi wutlelako zva hina”
Murindzeli 06.18 paj. 7 par. 16
“A Mufumo wa mina a hi wa misava”
16 A vamakabye lavo va mahile khwatsi hi ku cica mahanyela yabye! A Bhibhiliya gi li a vanhu va fana ni bimbi legi gi vhindlukako gi tlhela gi ngavi ni ku rula. (Isa. 17:12; 57:20, 21; Rev. 13:1) A timhaka ta politika ti vhuxa tiholova cikari ka vanhu, ti va maha va avana, ti tlhela ti va yisa ka tihanyi. Kanilezvi hina hi na ni kurula niku hi na ni wumun’we. Loku Jehovha a wona lezvi a vanhu va nga avanisa zvona tikweni legi, handle ko kanakana wa tsaka nguvhu hi ku wona vanhu vakwe na va bohene. — Lera Zefaniya 3:17.
Murindzeli 04.16 paj. 28 par. 4
Simama ku nga ti ngheniseli ka maguwa ya tiko legi
4 Kuzvilava lomu hi hanyako kona a hi kurumetwi ku ti patsa ni mitlawa ya politika niku ha zvi kota ku khozela na hi tlhatlhekile. Hambulezvo, laha a tiko ga Satani gi yako gi tshinela kugumeseni, zvi taya zvi karata nguvu a ku nga ti ngheniseli ka politika. A tiko gi tele hi vanhu “va nga tsumbekiko, va cikanikani,” hikwalaho a zvi kanakanisi lezvaku gi taya gi hambana nguvhu. (2 Tim. 3:3, 4) Ka matiko yo kari, a vamakabye va hina va sina va kumana ni zvikarato zva ku nga ti ngheniseli ka zvilo zva tiko na va nga zvi rinzelangi hi kota ya kucica ka citshuketi ka politika ya gona. Wa zvi wona ku hikuyini zvi nga zva lisima ku tiyisa a ciboho ca hina zvezvi ca ku nga ti ngheniseli ka zvilo zva tiko? Loku hi rindzela kala ku chikela zvikarato zva kona, hi nga tshuka hi nga zvi koti ku yima hi tiya. Makunu hi nga ti longiselisa kuyini lezvaku hi nga ti ngheniseli ka maguwa ya tiko legi ke? A hi woneni mune wa zvilo zva tshinya zvi to hi vuna ku hlula yimpi leyo.
Profecia de Isaías I paj. 198 par. 20
Wusungukati ga Jehovha ka matiko
20 Give gihi a wuyelo ga kona? Isaya i wulile lezvi: “Laha gi phumako, ku na ni kuchava; gi gica na ma nga ha hi kona. Leci ciavelo ca lava va hi wutlelako zva hina ni nchachazelo wa lava va hi phangako.” (Isa. 17:14) A vanhu vo tala va phanga vanhu va Jehovha, va va khoma hi ndlela ya tihanyi va tlhela va nga va kombisi cichavo. Zvontlhe lezvo va va maha hi lezvi va kalako va nga mahi cipandze, kutani hi lezvi va kalako va nga zvi lavi ku maha cipandze ca wukhongeli ga tiko legi. A maKristu ya lisine ma woniwa kota vanhu vo matha hi lava va tshamelako ku va solasola ni valala vabye. Kanilezvi a vanhu va Jehovha va tsumba lezvaku a mixo leyi a tixanisa ta vona ti to mbhela hi yona yi laha kusuhani. — 2 Tes. 1:6-9; 1 Ped. 5:6-11.
Titshomba ta moya
Sentinela 01/12/06 paj. 11 par. 1
Timhaka-tshinya ta bhuku ga Isaya — I
20:2-5 — A ku hakunene Isaya i fambile na a hi cimbyiri hi malembe manharu? Kuzvilava Isaya i no tlhatlha ntsena a tinguwu ta le hehla, a famba “na a nga bohangi tinguwo to enela”. — 1 Sam. 19:24, nota.
12-18 KA JANEIRO
TITSHOMBA TI NGA KA MHAKA YA NUNGUNGULU ISAYA 21-23
Lezvi hi gondzako ka kuwa ka Xebna
Murindzeli 03.18 paj. 23-24 par. 7-9
Jehovha i hi laya hi ku hi randza
7 Kasi ku zwisisa lisima la kulaya, a hi wulawuleni hi vanhu vambiri va kawukilweko hi Jehovha. A wo sangula hi Xebna, a nga muIzrayeli a hanyileko cikhatini ca Hosi Hezekiya. A wa wumbiri hi Graham, a nga makabye wa masikwini ya hina. Xebna i wa hi ‘muhlayisi wa yindlu ya wukosi’, leyi kuzvilava yi nga hi ya Hosi Hezekiya, niku i wa hi hosana. (Isa. 22:15) Kanilezvi Xebna i sangulile kuva ni matshandza, a lava ku komba van’wani lezvaku wa lisima. I zile a ti mahela cilahla co dhura a tlhela a famba hi “tikareta . . . to saseka”. — Isa. 22:16-18.
8 Kota lezvi Xebna a nga zama ku ti lavela wudzundzo, Nungungulu i tekile ntiro wakwe a nyika Eliyakimu. (Isa. 22:19-21) Lezvo zvi mahekile a cikhati leci Senakeribhe, a Hosi ya le Asiriya, a nga vhukela a tiko ga Jerusalema. Hi ndzhako ka cikhati Senakeribhe i rumele ntlawa wa tinduna ni butho ga hombe ga masochwa kasi ku ya chavisela vaJudha ni ku maha lezvaku Hosi Hezekiya a ti nyikela ha yece. (2 Tih. 18:17-25) Hezekiya i rumele Eliyakimu ni vavanuna van’wani va vambiri kasi va ya tlhangana ni tinduna leto. A mun’we wa vavanuna lavo hi Xebna, loyi makunu a nga hi matsalani. Zvi wonekisa ku khwatsi Xebna i wa gondzile kuva munhu wo ti koramisa wutshan’wini ga ku swireka kutani ku ti tsetsatsetsa. I vhumele ku amukela a ntiro wa lahasana. A hi woneni zvilo zvinharu hi zvi gondzako ka lezvi zvi humeleleko Xebna.
9 Co sangula, a kuva Xebna a luzile ntiro wakwe zvi hi alakanyisa lezvaku “a matshandza ma rangela kulova”. (Mavingu 16:18) Loku hi hi ni malungelo yo hlawuleka lomu bandleni, a van’wani va nga ha alakanya lezvaku hi va lisima. Loku lezvo zvi maheka, xana hi ta simama hi ti koramisa? Hi ta alakanya lezvaku gontlhe wutlhari ni zvilo zva zvi nene lezvi hi mahako hi zvi maha hi ku vhuniwa hi Jehovha ke? (1 Kor. 4:7) Mupostoli Pawule i tlharihisile aku: ‘Ndza laya mun’we ni mun’wani a nga cikari ka n’wina, lezvaku a nga dzuki a ti alakanyela hi ku hundza fanelo.’ — Rom. 12:3.
Murindzeli 03.18 paj. 24 par. 10
Jehovha i hi laya hi ku hi randza
10 Ca wumbiri, a magezu ya ntamu lawa Jehovha a nga mu kawuka hi wona Xebna, kuzvilava ma komba ku i wa kholwa lezvaku a nga zvi kota ku cica. (Mav. 3:11, 12) Lava va luzileko malungelo yo hlawuleka va nga gondza cokari ka mhaka leyo. Wutshan’wini ga ku swireka kutani ku zangara, va nga simama va tirela Jehovha hi ntamu wabye wontlhe. Va nga hlawula ku wona kulayiwa loko kota cikombiso ca lirandzo la Jehovha. Alakanya lezvaku a Papayi wa hina i ta va chachazela lava va simamako ku ti koramisa. (Lera 1 Pedro 5:6, 7.) A kulaya ka Jehovha ka lirandzo ku nga hi vhuna loku hi ti koramisa ni ku olova a ku fana ni wumba.
Murindzeli 03.18 paj. 24 par. 11
Jehovha i hi laya hi ku hi randza
11 Ca wunharu, hi kuma cigondzo ca lisima nguvhu ka lezvi Jehovha a nga mu khomisa zvona Xebna. Hambu lezvi a ndlela leyi Jehovha a layako hi yona yi komba ku wa ci venga ciwonho, yi tlhela yi komba lezvaku wa va randza lava va wonhileko. I ti karatela ku wona zva zvi nene ka vanhu. Loku u hi mupswali kutani dhota, u ta pimanyisa a malayela ya Jehovha ke? — Jud. 22, 23.
Titshomba ta moya
Sentinela 01/12/06 paj. 11 par. 2
Timhaka-tshinya ta bhuku ga Isaya — I
21:1 — Hi kwihi lomu ku vitaniwako ku “ciwula ca bimbi”? Hi zvalezvo a nga vitanisiwa zvona Bhabhuloni hambu lezvi a nga kumeka kule ni bimbi. Gi wa vitanisiwa lezvo hi ku a mati ya congo wa Eufrate ni wa Tigre lembe ni lembe ma wa hlata ma tata cipandze leco contlhe, ma maha “bimbi” go kala ku eta ni ga madhaka.
19-25 KA JANEIRO
TITSHOMBA TI NGA KA MHAKA YA NUNGUNGULU ISAYA 24-27
“Loyi hi yena Nungungulu wa hina”!
Achegue-se paj. 15 par. 21
“Hi nga wonani! Loyi hi yena a Nungungulu wa hina!”
21 U tshuka u wona cin’wanana na ci xungeta papayi wa cona, ci byela vanghana va cona hi matshandza, ciku: “Loyi i papayi wa mina”. A vakhozeli va Jehovha va na ni zvigelo zvo zwala zva ku ti zwisa lezvo hi Jehovha. A Bhibhiliya gi prhofetile lezvaku ku wa tava ni cikhati leci a vanhu vo tsumbeka va nga wa ta wula lezvi: “Hi nga wonani! Loyi hi yena a Nungungulu wa hina!” (Isa. 25:8, 9) Laha u yako u ma zwisisa khwatsi matshamela ya Jehovha, u taya u zvi zwisisa lezvaku u na ni Papayi wa munene nguvhu a ku hundza lezvi u zvi alakanyako.
Murindzeli 12.24 paj. 6 par. 14
Cihlamaliso ca tipawa
14 A cikhati leci Jesu a nga hi byela ku hi khongelela “zvakuga zva siku legi”, i tlhelile a hi gondzisa ku khongelela lezvaku a kurandza ka Nungungulu ku mahiwa “le tilweni ni laha misaveni konawu”. (Mat. 6:9-11) U alakanya ku a misava yi ta tshamisa kuyini cikhatini leco? A Bhibhiliya gi komba lezvaku a kungo ga Nungungulu xungetano hi misava gi patsa zvakuga zva zvinene. Hi kuya hi Isaya 25:6-8, ku tava ni zvakuga zvo tala zva zvinene Mufun’weni wa Nungungulu. A Lisimu 72:16 li prhofetile lezvi: “A timbewu ti ta pfuna nguvhu laha misaveni; le hehla ka zvitsunga ti ta pfuna nguvhu.” Xana wa zvi donela mari a ku tirisa timbewu to kari kasi ku bhika zvakuga u zvi randzako kutani zvakuga zvaku a wu se tshuka uga? A cin’wani kambe, u ta ti buza hi mihandzu ya zvivhina lezvi u to byala. (Isa. 65:21, 22) Niku a vanhu vontlhe laha misaveni va ta ti buza hi zvilo lezvo zvo hlamalisa.
Murindzeli 01.25 paj. 28-29 par. 11-12
Lezvi hi vhunekisako zvona hi lirandzo la Jehovha
11 Hi nga alakanyela hi lezvi a wutomi gi to tshamisa zvona Paradhiseni laha misaveni. Hi nga ta karateka hi mababyi kutani kufa. (Isa. 25:8; 33:24) Jehovha i ta hi nyika zvontlhe zvilo zva zvinene hi zvi lavako. Zvini u tsakelako ku gondza hi zvona Paradhesini? Ku gondza hi zvihari, ku chaya kutani ku dhezenyera? A zvi kanakanisi lezvaku Paradhiseni ku ta laveka vadhezenyari, vaaki ni varimi. Niku ku ta tlhela ku laveka vanhu va ku byala ni ku longisela zvakuga, ku maha tiferamenta ni ku khatalela a jardhim. (Isa. 35:1; 65:21) A cikhati leci hi to hanya kala kupindzuka, hi tava ni cikhati co enela kasi ku maha zvilo lezvo zvontlhe ni zvin’wani zvotala.
12 Hi nga alakanyela a litsako hi tova nayo a cikhati leci hi to amukela lava va to vhuxiwa hi ka vafileko! (Miti. 24:15) Hi nga alakanyela kambe lezvi hi to tsakisa zvona hi ku gondza zvotala xungetano hi Jehovha laha hi to hlola khwatsi a zvivangwa zvakwe zvo tala. (Lis. 104:24; Isa. 11:9) A ca hombe ka zvontlhe, hi nga alakanyela lezvi zvi to tsakisisa zvona a ku khozela Jehovha na hi nga ha tizwi nandzu hi kota ya ciwonho! A ku u wa ta cicisa a makatekwa lawa ya cikhatini ci tako hi “ku ti buza hi litsako la cikhatanyana la ciwonho”? (Mah. 11:25) Ne ni kutsongwani! A makatekwa lawo ma hundza ni kwihi kutikarata hi nga ku mahako. Alakanya lezvi, a Paradhise ga laha misaveni a hi nchumu hi to wu rindzela kala kupindzuka. Gi tava kona futsi. Ne cin’we ca zvilo lezvi zvi nga wa ta koteka loku Jehovha i wa nga hi randzangi nguvhu laha ka kuza a hi nyika a N’wana wakwe kota cinyikiwo!
Titshomba ta moya
Murindzeli 15/12/15 paj. 15-17 par. 3-5
Wuhundzuluseli ga misava yiswa gi chukwatiselweko ga 2013
Hikuyini a zvipimo zvo tala zvalezvi zvi tsalilwe hi magezu yo sasekiselwa? A zvipandze zvo tala zva Bhibhiliya kusanguleni zvi tsalilwe hi magezu yo sasekiselwa. Ka tirimi ta hina nyamutlha, a kutala ka zvikhati a magezu yo sasekiselwa ma tiviwa hi kukotlana ka pfumawulo wa magezu, kuveni ka magezu yo sasekiselwa ya ciHebheru, a zvilo zva lisima zva ku komba lezvo ku wa hi ku fananisa ni ku hambanisa zvilo. A kunandziha ka pfumawulo wa magezu yo sasekiselwa ya ciHeberu a ku kumiwi hi ku kotlanisa magezu, kanilezvi ku kumiwa hi ku longoloxa maalakanyo hi ndlela yo zwala.
Ka Tradução do Novo Mundo ga kale a bhuku ga Joba ni ga Tisimu ma wa longoloxilwe hi mavesi kasi ku komba lezvaku kutsaliweni ka wona ma wa mahelwe ku yimbelelwa kutani ku tshahiwa. A tsalela lego gi dlunyatisa a kusaseka ka magezu lawo kasi ku khanyisa niku gi vhuna ku alakanya. Ka legi ga 2013, a bhuku ga Mavingu, Cizimba ca Solomoni, ni zvipimo zvo tala zva mabhuku ya zviprhofeto wonawu ma tshamile hi mavesi kasi ku komba lezvaku a zvipandze lezvo zvi wa tsalilwe hi ndlela yo sasekiselwa zvinwe ni ku khanyisa a kufana ni kuhambana. A cin’we ca zvikombiso ci ka Isaya 24:2, laha a linya yin’we ni yin’wani yi kombako kuhambana, niku a yin’we ni yin’wani yi ti seketela ka yin’wani kasi ku khanyisa lezvaku a nga kona a nga wa ta pona a kulamula ka Nungungulu. A ku wona zvipandze lezvo kota zvo sasekiselwa zvi komba a mugondzi lezvaku a mutsali wa Bhibhiliya ka cipanze leco a nga tsakiswangi hi ku phindaphinda magezu ntsena; i wo tirisa wulawulela go sasekiselwa kasi ku khanyisa a mahungu ya Nungungulu.
A hi cikhati contlhe zvi olovako ku hambanisa a matsalela yo toloveleka ya ciHebheru ni lawa yo sasekiselwa, hikwalaho ku na ni kuhambana cikari ka maBhibhiliya lawa ma hundzuluselwako mhakeni ya zvipandze lezvi zvi nga zvo sasekiselwa. A vahundzuluseli va tirisa kupima kabye kasi ku boha lezvaku mavhesi muni ma to tsaliwa hi ndlela yo sasekiselwa. A yo kari ma na ni magezu yo toloveleka ma tsalilweko hi ndlela yo sasekiselwa, laha ku nga tiriswa mawulawulela yo fananisa, kunandzihisela, ni kukotlanisa a pfumawulo wa magezu kasi ku khanyisa a mhaka.
26 KA JANEIRO–1 KA FEVEREIRO
TITSHOMBA TI NGA KA MHAKA YA NUNGUNGULU ISAYA 28-29
Dhumisa Jehovha hi nomu ni mbilu ya wena
Profecia de Isaías I paj. 299 par. 23
Isaya a phrofeta ‘zvilo zvo kala kutoloveleka’ zvi nga wa ta mahiwa hi Jehovha
23 A varangeli va wukhongeli va wa ti byela ku va wa tlharihile hi tlhelo ga moya kuveni va wa fularele Jehovha. Va wa gondzisa mawonela yabye yo soholoka xungetano hi zvazvinene ni zvakubiha, niku lezvo zvi wa komba ku va wa nga hi na kukholwa, va wa hi ni mahanyela yo kala kuhlazveka niku va wa maha vanhu va nga tsakelwi hi Nungungulu. Hi ku tirisa “zvilo zvo hlamalisa”, ku nga zvilo zvo kala kutoloveleka, Jehovha i wa ta va tsayisa hi kota ya wufarisi gabye. Jehovha i wulile lezvi: “A vanhu lava va tshinela ka mina hi nomu wabye, va ndzi dzundza hi minomu yabye, kanilezvi a timbilu tabye ti kule nguvhu na mina. Ni cichavo cabye hi mina ci seketelwa ka zvileletelo zva vanhu lezvi va gondzisilweko. Hikwalaho, ndza ha ta maha zvilo zvo hlamalisa ka vanhu lava, a zvilo zvo hlamalisa hehla ka zvilo zvo hlamalisa; a wutlhari ga titlhari tabye gi ta fuva, ni kuzwisisa ka vavanuna vabye va tlharihileko ku ta fihliwa.” (Isa. 29:13, 14) A wutlhari ga Judha ni kuzwisisa kakwe zvi wa ta lovisiwa a cikhati leci Jehovha a nga wa ta hundzulusa cikomu ci rima hi mbinyi, hi ku maha ku a wukhongeli gontlhe go hluwuka ga Judha gi swiyelwa gi ku bhi hi Mufumo wa Misava yontlhe wa Bhabhuloni. Ku mahekile zvilo zvo fana ka zana ga malembe go sangula, andzhako ka ku a varangeli va wukhongeli ga ciJudha lava va nga ti byela ku va tiva va nga hambukisa a tiko gontlhe. Niku a wukhongeli ga mawunwa ga masikwini ya hina gi ta humelelwa hi zvilo zvo fana. — Mat. 15:8, 9; Rom. 11:8.
Murindzeli 05.21 paj. 9 par. 7
Lava va randzako kululama a ci kona ci to va vhalela ku tirela Jehovha
7 Jesu i konile varangeli va wukhongeli va masiku yakwe hi lezvi va nga kala va nga gondzisi vanhu a ku mu khozela khwatsi Jehovha. Hi cikombiso, i konile vaFarisi va nga khatalela nguvhu lezvi va nga hlambisa zvona mandla, va nga hi na mhaka ni ku hlayisa vapswali vabye. (Mat. 15:1-11) Zva koteka ku a vapizani vakwe va hlamalile nguvhu hi lezvi a nga wula. Va zile va mu wutisa ku: “Wa zvi tiva ku a vaFarisi va khunguvanyekile hi kuzwa lezvi u nga wula?” Jesu i no va hlamula, aku: “Ni yihi sinya yi nga kala ku byaliwa hi Papayi wa mina wa le tilweni yi ta tsuwuliwa. Va tsikeni. Va komba van’wani ndlela kuveni vona zvikhumu. Makunu loku a cikhumu ci rangela cikhumu hi wumbiri ga zvona zvi ta wela kheleni.” (Mat. 15:12-14) Hambu lezvi a vaFarisi va nga zangara hi lezvi Jesu a nga wula, a nga tsikangi ku wula lisine.
Murindzeli 06.24 paj. 10 par. 8
Simama kuva mupfhumba wa Jehovha kala kupindzuka!
8 Lava va “wulawulako lisine mbilwini” yabye a va lavi ku ingisa Nungungulu loku va hi ni van’wani basi kuveni va tshova milayo ya Nungungulu loku va hi voce. (Isa. 29:13) Va venga a kukhohlisa. A munhu wa ku khohlisa a nga ha sangula ku kanakanela wutlhari ga zvileletelo zvo kari zva Nungungulu. (Jak. 1:5-8) A munhu loye a nga tshuka a nga ingisi a zvileletelo zva Nungungulu ka zvilo lezvi a zvi wonako na zvi nga hi zva lisima nguvhu. Andzhako ka lezvo, loku a nga woni a mawuyawuya ya kungaingisi kakwe, a nga sangula ku engetela ku tshova milayo ya Nungungulu, a wukhozeli gakwe giva go kanganyisa. (Mutsh. 8:11) Hambulezvo, hina hi lava ku tsumbeka zvilweni zvontlhe.
Titshomba ta moya
Perspicaz “Ariel” par. 1; Perspicaz “Ariel” n.° 3
Ariyeli
(Ariyeli) [Khumbari ga alati ga Nungungulu; kutani, nghala ya Nungungulu].
3. I vito ga cihundla gi tirisiwako kasi ku vitana Jerusalema ka Isaya 29:1, 2, 7. Le Jerusalema hi kona ku nga hi ni tempeli ya Nungungulu, leyi yi nga hi ni alati ga miphahlo mitsendzeleni. Hi kota ya lezvo, a dhoropa lego, hi lisine gi wa hi khumbari ga alati ga Jehovha. A dhoropa lego kambe gi wa fanele kuva tsindza ga wukhozeli go basa ga Jehovha. Kanilezvi, a magezu ma nga ka Isaya 29:1-4 ma na ni mongo wo chavisa niku ma phrofeta a kuloviswa ka Jerusalema hi vaBhabhuloni hi 607 na ku nga seva Nguva ya Hina, a cikhati leci a nga wa tava “khumbari ga alati” hi ndlela yo hambana: kota dhoropa gi khulungako nkhata wu halatilweko, gi lovisilweko hi ndzilo gi tlhela gi tala hi zvirumbi zvi delweko hi ndzilo. Lezvi zvi mahileko ku kuva ni khombo lego zvi tlhamuselwa ka mavhesi 9 kala 16. Hambulezvo, Isaya 29:7, 8 i komba ku a matiko lawa ma nga wa ta vanga a kuloviswa loko ka Jerusalema ma wa ta yi fula hi mudhoza.
2-8 KA FEVEREIRO
TITSHOMBA TI NGA KA MHAKA YA NUNGUNGULU ISAYA 30-32
Fihlala tipapeni ta Jehovha
Sentinela 15/11/01 paj. 16 par. 7
Jehovha wuchavelo ga hina
7 Kota lezvi Jehovha a nga wuchavelo ga hina, ha chavelelwa hi magezu lawa yaku: “I ta ku fenengeta hi timbavi takwe, u kuma wuchavelo lahasi ka tipapa takwe. A kutsumbeka kakwe ku tava citlhangu ca hombe ni khurisi gi vhikelako.” (Lis. 91:4) Jehovha wa hi vhikela, a ku khwatsi hi lezvi a cinyanyani khumbaretako a mavhinyani ya cona hi tipapa kasi ku ma vhikela. (Isa. 31:5) “I ta ku fenengeta hi timbavi takwe”. Hi kusonga, a “timbavi” ta cinyanyani tipapa ta cona. Hi ku tirisa tipapa, a cinyanyani ci khumbareta a mavhinyani ya cona, ci ma vhikela ka zvivandza. Kota lezvi hi nga mavhinyani yo kala ku vhuna nchumu, hi vhikelekile hasi ka timbavi to fananisa ta Jehovha, hakuva hi hlota wuchavelo hlengeletanweni yakwe ya lisine ya wuKristu. — Rute 2:12; Lis. 5:1, 11.
Murindzeli 01.24 paj. 24 par. 13
Jehovha i ta ku vhuna zvikhatini zva zvikarato
13 Lezvi hi faneleko ku maha. Lwana ni maalakanyo ya ku lava ku tshama wece. Loku hi ti hambanisa ni van’wani, hi nga veka kupima ka hina wutsumbu ni ka zvikarato lezvi hi kumanako nazvo. A maalakanyo ya tshamela lego ma nga khumba a zviboho lezvi hi zvi mahako. (Mav. 18:1) Lisine ku hontlheni ha ci lava cikhati ca ku tshama hoce, nguvhunguvhu loku hi kumana ni zviyimo zvo bayisa. Hambulezvo, loku hi ti hambanisa ni van’wani hi cikhati co leha, hi ta ngha na ho ala a civhuno ca vanhu lava Jehovha a va tirisako kasi va hi seketela. Hikwalaho, hambu loku ku hi cikhati co bayisa nguvhu, vhumela civhuno ca maxaka ya wena, vanghana ni ca madhota. Va wone kota ndlela leyi Jehovha a yi tirisako kasi ku ku vhuna. — Mav. 17:17; Isa. 32:1, 2.
Murindzeli 10.23 paj. 17 par. 19
‘I ta mu nyika ntamu’
19 U nga ku tiyisisa kuyini a kutsumba ka wena? Hi cikombiso, loku u hi ni kutsumba ka ku hanya laha misaveni kala kupindzuka, lera xungetano hi mitlhamuselo ya Bhibhiliya yi wulawulako hi Paradhise u tlhela u ehleketa hi yona. (Isa. 25:8; 32:16-18) Ehleketa hi lezvi a wutomi gi to tshamisa zvona misaveni yiswa. Te alakanyele na u hi seyo. Ehleketa hi loyi u to mu wona, lezvi u to zvizwa, ni lezvi u to ti zwisa zvona. Kasi ku ku vhuna ku ehleketa hi lezvi Paradhise gi to tshamisa zvona, wona mifota ka mabhuku ya hina kutani ku sixtira tivhidhio ta mimuzka to fana ni leyi yi nge Alakanyela a misava yiswa, Ma kwalaha nyongeni, ni Alakanyela cikhati ci tako. Loku hi ti nyika cikhati ca ku ehleketa hi kukhandzakanya hi kutsumba ka hina ka misava yiswa, a zvikarato zva hina zvi tava zva “cikhatana”. (2 Kor. 4:17) A kutsumba loku Jehovha a ku nyikileko ku nga ku vhuna ku timisela zvikarato.
Titshomba ta moya
Perspicaz “Pão” par. 2
Pawa
Wulawulela go fananisa. Lomu ka Bhibhiliya, a gezu “pawa” gi tirisiwa hi ndlela yo fananisa kasi ku wula zvilo zvo hambanahambana. Hi cikombiso, Joxuwa na Kalebhi va byelile vaIzrayeli va nga hlengeletene lezvaku a vahanyi va khanani “i pawa ka hina”, kuzvilava na va lava ku wula ku zvi wa olova ku va hlula niku lezvo zvi wa ta tiyisa vaIzrayeli zvi tlhela zvi va nyika ntamu. (Mitse. 14:9) A cirilo ca hombe leci kuzvilava ci nga vangiwa hi ku kala va nga ha tsakelwi hi Nungungulu, ci kumbukiwa ka Lisimu 80:5, nota, laha ku wuliwako lezvi hi Jehovha, a Murisi wa Izrayeli: “U va gisile a pawa [ya] mihloti”. Ku wuliwa kambe lezvaku Jehovha i wa ta nyika vanhu vakwe “a pawa ya hlomulo ni mati ya kuxaniseka”, kuzvilava na ku wuliwa a ciyimo leci a vanhu va nga wa tava ka cona a cikhati leci va nga wa ta randzelwa, ci nga wa ta toloveleka a kufana ni pawa ni mati. — Isa. 30:20.
9-15 KA FEVEREIRO
TITSHOMBA TI NGA KA MHAKA YA NUNGUNGULU ISAYA 33-35
“Hi yena a tiyisako a zvikhati zva wena”
Murindzeli 01.24 paj. 22 par. 7-8
Jehovha i ta ku vhuna zvikhatini zva zvikarato
7 Cikarato. Loku hi kumana ni zviyimo zvo karata, lezvi hi ti zwisako zvona, lezvi hi zvi pimisako ni mitiro ya hina zvi nga hambana ni lezvi hi nga tolovela ku maha. A ku khwatsi citimela lomu ka bhubhutsa ci yisiwako seno ni seno, a maalakanyo ya hinawu ma nga jujeka maya seno ni seno, hi nga tivi co maha. Ana, loyi hi mu kumbukileko kusanguleni, i wula lezvaku andzhako ka ku felwa hi nuna wakwe Luis i karatekile hi tindlela to tala a vhumala ni co maha. I wulile lezvi: “Loku a maalakanyo ya ku tizwa na ndzi hi ndzoce ma ndzi tela, ndzi wa sangula ku tizwa nandzu. Ndzi wa tlhela ndzi zangara nguvhu hi kota ya lezvi a fileko.” Ahandle ka lezvo, Ana i wa tizwa na a hi yece niku i wa karateka hi lezvi a nga fanele ku maha zviboho xungetano hi zvilo lezvi Luis a nga zvi khatalela. Ka zvikhati zvin’wani, i wa ti zwisa ku khwatsi a lomu ka bhubhutsa lomu bimbini. Jehovha i hi vhunisa kuyini loku a maalakanyo lawo ma sangula ku hi maha hi mbombomela?
8 Lezvi Jehovha a mahako. I hi tiyisekisa lezvaku i ta hi tiyisa. (Lera Isaya 33:6.) Loku ku hi ni bhubhutsa lomu bimbini, a citimela ci nga sangula ku tsekatseka hi ndlela ya mhango ciya seno ni seno. Kasi ku lwisana ni kutsekatseka loko, a zvitimela zvo tala zvi na ni zvilo lomu mareveni hi le hasi zvi zvi vhunako ku tiya. A zvilo lezvo zvi nga maha ku a citimela ci nga tsekatseki nguvhu. Hi ndlela leyo, a vanhu va nga lomu ka citimela va tizwa na va vhikelekile niku a lipfhumba labye li ta nandziha. Hambulezvo, a zvilo zvo tala zvi vhunako citimela kutiya zvi tira khwatsi loku ci kari ci famba. Hi kufanana, Jehovha i ta hi tiyisa laha hi simamako ku mu tirela hi kutsumba zvikhatini zva zvikarato.
Murindzeli 02.21 paj. 29 par. 10-11
Hi nga simamisa kuyini hi tsaka hambu loku hi kumana ni zvikarato?
10 Lezvi hi nga mahako: Ku kombela wutlhari ka Jehovha. Kasi hi timisela zvikarato na hi tsakile, a ku sangula hi fanele ku khongela ka Jehovha hi kombela ku a hi nyika wutlhari gi lavekako kasi hi maha zviboho zva zvi nene. (Lera Jakobe 1:5.) Zvini hi faneleko ku maha loku hi ti zwisa ku khwatsi Jehovha wa hlwela ku hlamula mukhongelo wa hina? Jakobe i te hi fanele ku simama hi “kombela ka Nungungulu.” Jehovha a nga swireki loku hi mu kombela wutlhari hi ku khandzakanya. A nga ta tshuka a hi kwatela hi lezvo. A Papayi wa hina wa le tilweni, i hi ‘nyika na a nga feleli’ loku hi mu kombela wutlhari ga ku lwisana ni zvikarato zva hina. (Lis. 25:12, 13) Jehovha wa zvi wona zvikarato hi kumanako nazvo, wa karateka loku a hi wona na hi xaniseka niku i zvi lava nguvhu a ku hi vhuna. Lezvo zvi hi nyika litsako! Makunu, Jehovha i hi nyikisa kuyini a wutlhari ga kona?
11 Jehovha i hi nyika wutlhari hi ku tirisa Bhibhiliya. (Mav. 2:6) Kasi hi kuma wutlhari lego, hi fanele ku gondza Bhibhiliya ni mabhuku ma humesiwako hi hlengeletano yakwe. Kanilezvi, a hi faneli ku gondza basi. Hi fanele ku tlhela hi tirisa wutlhari lego wutomini ga hina hi ku maha lezvi hi nga gondza. Jakobe i tsalile lezvi: “Mahani vamahi va mhaka, mu ngavi vazwi basi.” (Jak. 1:22) Loku hi tirisa wusungukati ga Nungungulu, hi hanyisana hi kurula ni van’wani, hiva vanhu vo olova, ni va wuxinji. (Jak. 3:17) A matshamela lawa ma hi vhuna ku timisela zvikarato na hi tsakile.
Profecia de Isaías I paj. 352-355 par. 21-22
“A ku na muaki ni mun’we a to: ‘Ndza babya’”
21 Hambulezvo, a ciphrofeto ca Isaya ca tatiseka masikweni ya hina. Zvezvi a vanhu va Jehovha va hanyisiwa hi tlhelo ga moya. Va tlhatlhiswa ka tigondzo ta mawunwa to kota leti ta ku a moya a wufi, gondzo ya ku Nungungulu vanharu kwalaha ka kun’we, ni gondzo ya kuswa tilweni. Va gondzisiwa kuva ni mahanyela ya manene niku va vhuniwa ku maha zviboho zva zvinene. Niku hi kota ya hakhelo ya kutlhatlhisa ya Jesu Kristu, va woniwa na va hi vo basa hi Nungungulu, ni kuva ni livhalo li basileko. (Kol. 1:13, 14; 1 Ped. 2:24; 1 Joh. 4:10) A kuhanyisiwa loko hi tlhelo ga moya ka vhuna kambe hi tlhelo ga miri. Hi cikombiso, lezvi a maKristu ma kalako ma nga mahi wubhayi ni ku dzaha, ma ti vhikela ka mababyi ma vangiwako hi kuhlengela masango ni ka tixaka to kari ta kankro. — 1 Kor. 6:18; 2 Kor. 7:1.
22 Ahandle ka lezvo, a magezu ya Isaya 33:24 ma ta tatiseka hi kumbhelela andzhako ka Armagedhoni, misaveni yiswa ya Nungungulu. Na va fumelwa hi Mufumo wa wuMesiya, hi khati go sangula, va ta hanyiswa hi kumbhelela hi tlhelo ga miri ni ga moya. (Kuv. 21:3, 4) Cikhatanyana ndzhako ka ku lovisiwa ka tiko ga Sathani, a zvihlamaliso lezvi Jesu a zvi mahileko a cikhati leci a nga hi laha misaveni zvi ta maheka misaveni yontlhe. A zvikhumu zvi ta wona, a zviwiri zvi ta ingisa ni zvilima zvi ta fambafamba! (Isa. 35:5, 6) Lezvo zvi ta maha ku zvi koteka ku vontlhe lava va to pona a kuxaniseka ka hombe va hlengela ntirweni wa hombe wa ku vhuxeta misava yiva paradhise.
Titshomba ta moya
Murindzeli 05.23 paj. 16 par. 8
Simama ku famba hi “Ndlela yi basileko”
8 A vokari va ngaku: ‘Lezvo zva hlamalisa nguvhu!’ Va tlhela va ti wutisa ku: ‘A ku lezvi zvi nga humelela vaJudha ka malembe lawo zva wula cokari ka hina nyamutlha?’ Ina, hakuva hi ndlela yo kari hi famba hi “Ndlela yi basileko”. Kani hi vatotilweko kutani hi va “tiyivhu tin’wani”, hi fanele ku simama hi famba hi “Ndlela yi basileko” hakuva yi yisa paradhesini ga moya ni ka makatekwa ya cikhatini ci tako ya Mufumo wa Nungungulu. (Joh. 10:16) Kusukela 1919 Nguveni ya Hina, a vanhu vo tala nguvhu — vavanuna, ni vavasati ni vanana — va kari va huma Bhabhuloni wa Hombe, ku nga wukhongeli gontlhe ga mawunwa, va sangula ku famba hi ndlela yo fananisa. Kuzvilava wenawu u cikari ka vanhu lavo. Hambu lezvi a vanhu va sangulileko ku famba hi ndlela leyo kwalomu ka 100 wa malembe ma hundzileko, ku ni lava va nga sangula ku hlahla a ndlela leyo ka malembe yo tala mahlweni ka lezvo.
16-22 KA FEVEREIRO
TITSHOMBA TI NGA KA MHAKA YA NUNGUNGULU ISAYA 36-37
“U nga chavi hi kota ya magezu lawa u ma zwileko”
Perspicaz “Ezequias” n.° 1 par. 3
Hezekiya
Senakeribhe a tsandzeka ku dhumela Jerusalema. Kota lezvi Hezekiya a nga zvi rindzela, Senakeribhe i no boha ku dhumela Jerusalema. A cikhati leci Senakeribhe ni butho gakwe va nga randzela a dhoropa gi nga vhikelwe khwatsi ga Lakixe, i no rumela masochwa yo kari ni tihosana ta masochwa kasi va ya londza khupo wa Jerusalema. A muwulawuleli wa ntlawa lowo ku wa hi Rabxake (lego gi wa nga hi vito gakwe, kanilezvi ci wa hi cikhundla cakwe ca wusochwa), a nga wulawula khwatsi ciHebheru. Hi gezu ga hombe, i wa poyilela Hezekiya ni ku rukatela Jehovha, na a ti byela ku Jehovha a nge ponisi Jerusalema ka hosi ya Asiriya, a ku khwatsi hi lezvi a vanungungulu va matiko man’wani va nga kala ku zvi kota ku ponisa matiko yabye ni vahanyi va kona. — 2 Tih. 18:13-35; 2 Kro. 32:9-15; Isa. 36:2-20.
Profecia de Isaías I paj. 386 par. 10
A Hosi ya kukholwa yi chachazelwa
10 Rabxake i no alakanyisa vaJudha lezvaku ka kulwa yimpi va wa hi vanana nguvhu. Hi matshandza, i no va byela lezvi: “Ndzi ta ku nyika a 2000 wa mahaxi loku u kuma a vanhu vo enela ku khilela a mahaxi lawo.” (Isa. 36:8) Kanilezvi, a ku wu wa hi wa lisima a ntsengo wa vakhileli va mahaxi va gondzisilweko khwatsi va Judha? Ne ni kutsongwani, hakuva a kuponisiwa ka Judha ku wa nga khegeli ka kuva ni masochwa ya ntamu. Mavingu 21:31 i wula lezvi: “A haxi gi longiselwa a siku ga kulwa, kanilezvi a kuhanyisa ku lumba Jehovha.” Rabxake i no wula lezvaku Jehovha i wa katekisa vaAsiriya a ku hundza vaJudha. I no engeta, aku: Loku zvi wa nga hi lezvo, a vaAsiriya na va nga zvi kotangi a ku nghena ka zvipandze zvo kari zva tiko ga Judha. — Isa. 36:9, 10.
Profecia de Isaías I paj. 388 par. 13-14
A Hosi ya kukholwa yi chachazelwa
13 Andzhako ka magezu yakwe yo tala, Rabxake i no wula magezu man’wani yo tshova mbilu. I no byela vaJudha lezvaku va wa nga faneli ku tsumba Hezekiya loku a va byela ku: “Jehovha i ta hi tlhatlhisa”. Rabxake i no alakanyisa vaJudha lezvaku a vanungungulu va Samariya a va zvi kotangi a ku vhikela a 10 wa tixaka lezvaku ti nga hluliwi hi vaAsiriya. Ahati a vanungungulu va matiko man’wani lawa ma nga khozisiwa hi vaAsiriya? Rabxake i no wutisa lezvi: “Va kwihi a vanungungulu va Hamate ni Arpadhe? Ahati a vanungungulu va Sefarvhayime, va kwihi? Va zvi kotile ku tlhatlhisa Samariya canjeni ga mina ke?” — Isa. 36:18-20.
14 Hi lisine, lezvi ka ku Rabxake i wa khozela vanungungulu va mawunwa, i wa nga zvi zwisisi lezvaku ku wa hi ni kuhambana ka hombe nguvhu cikari ka Samariya wa kudhuka ni Jerusalema loyi a nga fumelwa hi Hezekiya. A vanungungulu va mawunwa va Samariya va wa nga hi na ntamu wa ku ponisa a mufumo wa 10 wa tixaka. (2 Tih. 17:7, 17, 18) Kanilezvi, a Jerusalema, loyi a nga fumelwa hi Judha, i wa fularele vanungungulu va mawunwa a tllhela a simama ku khozela Jehovha. Hambulezvo, a vayimeli vanharu va Judha a va zamangi ku mu tlhamusela mhaka leyo Rabxake. “Va no miyela; a va mu hlamulangi nchumu hakuva a hosi yi wa layile, yiku: “Mu nga mu hlamuli nchumu”. (Isa. 36:21) Eliyakimu, na Xebna, na Jowa va no tlhela ka Hezekiya va ya mu byela zvontlhe lezvi Rabxake a nga wulile. — Isa. 36:22.
Titshomba ta moya
Perspicaz “Freio” par. 4
Matomu
Jehovha i wulile lezvi ka Senakeribhe, a hosi ya Asiriya: “Ndzi ta ku boha a mukhalo wa mina nhovhini ya wena ni matomu ya mina non’wini wa wena, ndzi ku tlhelisa hi ndlela leyi u ngata hi yona”. (2 Tih. 19:28; Is 37:29) Na ku nga hi kurandza kakwe, kanilezvi hi canja ga Jehovha, Senakeribhe i no kurumeteka ku tsika ku randzela Jerusalema, a tlhela Ninivha lomu hi ndzhako ka cikhati a nga ya dayelwa kona hi vana vakwe. (2 Tih. 19:32-37; Isa. 37:33-38) A kuva Jehovha a bohile matomu ka valala zvi komba ku hi yena a nga wa ta va wonelela hi kumbhelela a ku khwatsi cihari ci bohilweko matomu. — Isa. 30:28.
23 KA FEVEREIRO–1 KA MARÇO
TITSHOMBA TI NGA KA MHAKA YA NUNGUNGULU ISAYA 38-40
“I ta risa a ntlhambi wakwe a ku fana ni murisi”
Murindzeli 02.23 paj. 2-3 par. 3-4
Zvini lezvi hi gondzako lomu ka Bhibhiliya xungetano hi muvangi wa gona?
3 Lera Isaya 40:8. Ku hundza malembe yo tala a Mhaka ya Nungungulu na yi va nyika wusungukati ga ginene a vanhu vo tsumbeka. Lezvi ku nga ku ne phepha gin’we ga Mitsalo yo sangula a ga ha hi kona nyamutlha, hi lezvi a Mitsalo leyo yi tsalilweko kale nguvhu lomu ka maphepha lawa ma nga guma ma bhola hi kufamba ka cikhati, zvi kotekisa kuyini ku a Mitsalo ya ha vhuna vanhu kala nyamutlha? Jehovha i no maha zvontlhe zvi nga laveka kasi a vanhu va tshama hi ku kopiyara a Mitsalo yo basa. Hambu lezvi va nga hi vanhu vo kala ku mbhelela, va wa zama hi tindlela tontlhe kasi va nga mahi zvihoxo. Hi cikombiso, xungetano hi Mitsalo ya ciHebheru, a tlhari yo kari yi tsalile lezvi: “Hi nga wula na hi tiyile lezvaku a ku na bhuku gin’wani gi tsalilweko cikhatini ci nga hundza gi kopiyarilweko khwatsi a ku fana ni [Mitsalo ya ciHebheru].” Hikwalaho, hambu lezvi a Bhibhiliya gi nga ga kale, ni lezvi gi nga tsaliwa ka maphepha ma bholako hi kufamba ka cikhati ni lezvi gi nga kopiyarelwa hi vanhu vo kala ku mbhelela, hi nga tiyiseka lezvaku lezvi hi lerako lomu ka Bhibhiliya ga hina nyamutlha, hi zvalezvi zvi ngata hi ka N’winyi wa gona, Jehovha.
4 “A zvinyikiwo zvontlhe zvo saseka ni zvinyikiwo zvontlhe zvo mbhelela” zvita hi ka Jehovha. (Jak. 1:17) A Bhibhiliya cin’we ca zvinyikiwo zva zvinene nguvhu lezvi Jehovha a hi nyikileko. A cinyikiwo ci komba zvokari hi loyi a hi nyikako: Ci komba lezvaku wa hi tiva khwatsi niku wa zvi tiva lezvi zvi lavekako ka hina. Zvi tshamisile zvezvo ni ka loyi a nga hi nyika Bhibhiliya. Loku hi kambisisa a cinyikiwo leci, hi gondza zvotala xungetano hi Jehovha. Hi pola lezvaku wa hi tiva khwatsi ni lezvi zvi lavekako ka hina. Ka ndzima leyi, hi ta wona lezvi a Bhibhiliya gi hi vhunisako zvona ku tiva matshamela manharu ya Jehovha: Ku nga wutlhari gakwe, kululama kakwe ni lirandzo lakwe. A hi sanguleni hi ku wona lezvi a Bhibhiliya gi hi vhunisako zvona a ku wona wutlhari ga Jehovha.
Achegue-se paj. 68 par. 7
Ntamu wa ku vhikela — “Nungungulu wuchavelo ga hina”
7 Na a ti fananisa ni murisi, Jehovha i komba kuxuva kakwe ka hombe ka ku hi vhikela. (Eze. 34:11-16) Alakanya lezvi zvi wuliwako xungetano hi Jehovha ka Isaya 40:11, ku wulawulilweko hi yena ka Cipimo 2 ca bhuku legi, zvaku: “I ta risa a ntlhambi wakwe a ku fana ni murisi. I ta hlengeleta a tiyivhana hi woko gakwe, a ti wukarela laha cifuveni cakwe”. Zvi wa kotekisa kuyini ku a ciyivhana civa “cifuveni” ca murisi, laha ka cipetswa ca nguwu yakwe ya le hehla? Zvi nga maha na ku hi ku ci wa tshinela ka murisi, kuzvilava ci mu khwenetanyana nenge. Kanilezvi a Murisi hi yena a nga khizama, a tlakula ciyivhana a ci vekela khwatsanyana cifuveni cakwe. Handle ko kanakana, a mufananiso lowu wu zvi tlhamusela khwatsi lezvi a Murisi wa hina wa Hombe a zvi xuvisako zvona a ku hi vhikela ni ku hi wonelela!
Murindzeli 01.18 paj. 4-5 par. 4-6
“Wa nyika ntamu ka lava va rerekileko”
4 Lera Isaya 40:26. I hava a tshukileko a zvi kota ku hlaya tinyeleti tontlhe ti nga kona. A titlhari ta siyensya ti kholwa ku a tinyeleti leti ti wonekako laha misaveni ti kwalomo ka 400 wa tibhiliyoni. Hambulezvo, Jehovha wa tiva vito ga yin’we ni yin’we ya tona. Lezvo zvi hi gondzisa yini hi yena? Loku Jehovha a khatala hi tinyeleti ti kalako ti nga hi na wutomi, a ha ha wuli hi wena! Phela a wu mu tireli hi ku kurumetwa, kanilezvi u mu tirela hi ku mu randza. (Lis. 19:1, 3, 14) A Papayi wa hina wo randzeka wa ku tiva khwatsi. A Bhibhiliya gi li ‘hambu ni misisi ya hloko ya wena yi hlayilwe’ hi yena. (Mat. 10:30) Jehovha i lava lezvaku hi zvi tiva ku zvontlhe zvi humelelako wutomini ga hina wa zvi wona. (Lis. 37:18) Zvi te dlunya ku Jehovha wa zvi wona zvikarato zvontlhe lezvi u lwako nazvo, niku a nga ku nyika ntamu wa ku zvi timisela.
5 Lera Isaya 40:28. A ntamu wontlhe wuta hi ka Jehovha. Ehleketa hi ntamu lowu a nyikako gambo legi gi hi woningelako. David Bodanis, a nga mutsali wa timhaka ta siyensya, i wulile lezvaku segundo ni segundo, a gambo gi humesa ndzilo wo ringana ni lowu wu humesiwako hi tibhiliyoni ta mabhomba ya hombe loku ma buwusiwa hi khati gin’we. A mukambisisi mun’wani i mahile tikonta a kuma ku hi segundo yin’we basi, a gambo gi humesa gezi go ringana ku tirisiwa hi vanhu vontlhe va nga kona laha misaveni hi cipimo ca 200 000 wa malembe! Zvi te dlunya ku Jehovha, a nga yena a gi nyikako ntamu a gambo, a nga hi nyika ntamu na hinawu kasi hi timisela zvikarato zva hina.
6 Lera Isaya 40:29. A ku tirela Jehovha zvi hi nyika litsako la hombe. Jesu i byelile vapizani vakwe aku: “Rwalani a pingu wa mina.” A gumesa aku: “Mu ta kuma kuhumula mihefemulweni ya n’wina. Hakuva a pingu wa mina a wu tsandzi, ni nzhwalo wa mina wa hehuka.” (Mat. 11:28-30) Lelo lisine lo tiya! Ha tshuka hi suka kaya na hi karele hiya mutlhanganweni kutani kuchumayeleni. Kanilezvi hi ti zwisa kuyini laha kuwuyeni? Hi wuya na hi tangalile, na hi hi ni ntamu wa kulwa ni zvikarato zva hina. A pingu wa Jesu a wu bindzi futsi!
Titshomba ta moya
Profecia de Isaías I paj. 400 par. 7
“Chavelelani a vanhu va mina”
7 A kuaketwa ku vileko kona ka zana ga malembe ga wu 6 na ku nga seva Nguva ya Hina a hi kona koce ku tatisileko a ciphrofeto leci. Ci tatisekile kambe ka zana ga malembe go sangula Nguveni ya Hina. Johani Mubhabhatisi i wa hi gezu ga loyi a “huwelelako lomu ciwuleni” a tatisa ciphrofeto ca Isaya 40:3. (Luka 3:1-6) Hi ku pimiselwa, Johani i no wula lezvaku a magezu ya Isaya ma tatiseka ka yena wutsumbu. (Joh. 1:19-23) Hi 29 Nguveni ya Hina, Johani i no sangula ku longisela ndlela ya Jesu Kristu. Lezvi Johani a nga sangula ku huwelela na ka ha ni mahlweni, zvi longisele vanhu a ku rindzela Mesiya loyi a tsumbisilweko, kasi va mu ingisela ni ku mu landzela. (Luka 1:13-17, 76) Hi ku tirisa Jesu, Jehovha i wa ta rangela lava va ti solako a va yisa kutlhatlhisweni ka ku ku koteka ntsena hi Mufumo wa Nungungulu, ku nga kutlhatlhiswa ka ndzwalo wa ciwonho ni kufa. (Joh. 1:29; 8:32) A ciphrofeto ca Isaya ci vile ni ku tatiseka ka hombe a cikhati leci a misalela ya Izrayeli wa moya yi nga tlhatlhiswa ka Bhabhuloni wa Hombe, hi 1919, ni cikhati leci va nga vhuxeta wukhozeli ga lisine.