A Vakustumunyu va Jehovha va yi kuma kwihi a mali ya ku maha a mitiro yabye?

A ntiro wa hina misaveni yontlhe wu seketelwa nguvhunguvhu hi mali leyi hina Vakustumunyu va Jehovha hi humesako hi kuzvirandza.a Ka matshamu lawa hi tlhanganako kona kasi ku khozela Nungungulu, ku na ni makaxa ya ku mahela kona a minyikelo niku ku na ni tindlela tin’wani ta ku maha hi tona a minyikelo ti kumekako ka saite laha ka cipandze “Donativos”. Ka cipandze leco u nga hlawula ku maha munyikelo wa ku seketela a ntiro wa misava yontlhe, zvilaveko zva bandla kutani zvontlhe zva zvimbiri.

A Vakustumunyu va Jehovha a va kurumetiwi a ku humesa a zvawukhume kutani ku susa a mali yo kari yi gemilweko laha ka muholo wabye va maha hi yona munyikelo. (2 Va Le Korinte 9:7) Ka mitlhangano ya hina, a ku mahiwi mihlengo ne ku hakhela kasi ku nghena. Lava va rangelako a va teki mali kasi ku bhabhatisa, ku rangela marilo, michadho kutani mitiro yin’wani ya wukhozeli ga hina. A hi kumi mali hi ku xavisa zvakuga, ku bela tijogo ta ku ganya mali, mibuzo ya ku lava mali, ku famba hi kombela mali kutani tindlela tin’wani ta ku fana ni leto. A mavito ya lava va mahako munyikelo a ma tshuki ma byeliwa vanhu van’wani. (Matewu 6:2-4) A tisaite ta hina ni mabhuku a zvi na mapublisidhadhe kasi hi ganya mali hi zvona.

Ka mitlhangano ya mabandla wontlhe ya Vakustumunyu va Jehovha, leyi yi ingiselwako hi ni wihi munhu, hweti ni hweti ku mahiwa mubiko wa timali. Lezvi a mali yi tirisiswako zvona zva kambisisiwa hi kukhandzakanya kasi ku wona ku a minyikelo ya hina ya tirisiwa khwatsi ke. — 2 Va Le Korinte 8:20, 21.

Tindlela ta ku maha munyikelo

• Makaxa ya minyikelo: U nga chela a minyikelo ya wena hi ku peta mali kutani xeke lomu ka makaxa ya minyikelo ma nga ka Salawu ya Mufumo, ka Salawu ya mitlhangano ya hombe kutani ka matshamu man’wani lomu ku mahiwako a mitlhangano ya hina.

• Minyikelo yi mahiwako hi internet: Ka matiko yo tala, u nga nghena ka saite ka cipandze “Munyikelo wa ku seketela a ntiro wa Vakustumunyu va Jehovha” kasi ku maha minyikelo hi ku tirisa kartawu ga bhanko, ku transferira zviya ka konta ya hlengeletano ni tindlela tin’wani ta ku maha munyikelo hi michini.b A Vakustumunyu vo kari va hlawula ku ‘khweketa zvokari’ hi ku tirisa a tindlela ti kumbukilweko laha hehla kasi hweti ni hweti ku tsemiwa mali ka tikonta tabye ta bhanko yiya ka hlengeletano. — 1 Va Le Korinte 16:2.

  

• Minyikelo yi mahelweko makungo: A tindlela to kari ta ku maha hi tona a munyikelo ti lava ku u ranga hi ku maha makungo kutani ku wutisa lava va gondzileko milayo. A ku maha lezvo zvi nga ku vhuna ku u hungulelwa a mikhupo yo kari tikweni ga n’wina. A vanhu vo tala va vhunekile hi ku tiva a tindlela ta ku maha minyikelo na va ha hanya kutani minyikelo yi sangulako ku tira loku u file. Kasi ku kuma a mahungu yo engeteleka kombela a ravi ga Vakustumunyu va Jehovha ga lomu tikweni ga wena loku u lava ku maha munyikelo hi tindlela leti:

  • tikonta ta bhanko

  • mali ya maseguro kutani mali ya reforma

  • tiyindlu

  • ações ni mali ya ku lombisiwa hi majuro

  • phepha ga maavelela ya tshomba (testamento) ni mali yin’wani

Kasi u kuma mahungu man’wani ya tindlela ta ku maha minyikelo ka tiko ga n’wina, nghena ka saite ya hina ka cipandze “Munyikelo wa ku seketela a ntiro wa Vakustumunyu va Jehovha”.