A Vakustumunyu va Jehovha va hohlola mingango kutani vo yi tiyisa?

Kota vaKustumunyu va Jehovha, hi ti karatela ku tiyisa mingango ya hina ni leyi ya vaakelani va hina. Hi kombisa cichavo ka Nungungulu kota yena Muvangi wa ngango. (Genesisi 2:21-24; Va Le Efesusi 3:14, 15) Lomu ka Bhibhiliya i hi gondzisa a matshinya ya milayo lawa ma vhunako a vanhu misaveni yontlhe a kuva ni wukati go tiya ni go tsakisa.

A Vakustumunyu va Jehovha va yi vhunisa kuyini a mingango a ku yiva ni kuzwanana?

Hi maha zvontlhe lezvi hi zvi kotako kasi hi landzela a wusungukati ga Bhibhiliya, hakuva ga hi vhuna a kuva vanuna, vasati ni vapswali va vanene. (Mavingu 31:10-31; Va Le Efesusi 5:22–6:4; 1 Timote 5:8) A wusungukati ga Bhibhiliya ga vhuna hambu a mingango leyi yi nga ni wukhongeli go hambana. (1 Pedro 3:1, 2) Zwana lezvi a vokari vo kala va nga hi Vakustumunyu va Jehovha va nga wula a cikhati leci a nuna kutani sati wabye a ngava Kustumunyu wa Jehovha:

• “Ka malembe ya hina ya 6 yo sangula hi wa tshamela ku holova basi ni ku khunguvanyisana. Kanilezvi andzhako ka loku Ivete a mahile Kustumunyu wa Jehovha, i nova munhu wa lirandzo ni wa lihlazva-mbilu. A kucica loku a ku mahileko ku ponisile a wukati ga hina.” — Clauir, wa le Brazil.

• “A cikhati leci a nuna wa mina Chansa a nga sangula a ku gondza a Bhibhiliya ni Vakustumunyu va Jehovha ndzi no mu vhukela, hakuva ndzi wa alakanya lezvaku va hohlola mingango. Kanilezvi zvezvi, ndza zvi wona lezvaku a Bhibhiliya gi vhunile a wukati ga hina.” — Agness, wa le Zâmbia.

Ntirweni wa hina wa kuchumayela hi komba vontlhe lezvaku a ku tirisa a wutlhari ga Bhibhiliya zvi nga va vhuna:

• ku hlawula khwatsi a munhu wa ku chadha naye

• ku hanyisana khwatsi ka lembe go sangula ga muchadho

• ku hanyisana khwatsi ni vapswali va hina

• matirisela ya mali

• ku nyima ku holova

• ku gondza ku tsetselela

• ku gondzisa vanana

Xana a ku cica wukhongeli zva vanga zvikarato wukatini?

Ka zvikhati zvo kari zva vanga. Hi cikombiso, hi 1998 a koponi ya ku hlola mahungu yi vitaniwako ku i Sofres yi kumile lezvaku ka 20 wa mingango laha ku nga ni mun’we a cicileko ava Kustumunyu wa Jehovha, nuna kutani sati, kuve ni zvikarato zva hombe a cikhati loyi wa mun’we a nga cica ava Kustumunyu.

Jesu i phrofetile lezvaku lava va hanyako hi tigondzo takwe ka zvikhati zvin’wani va wa ta xanisiwa laha ngangweni. (Matewu 10:32-36) Will Durant, a mutsali wa matimu, i wulile lezvaku Mufun’weni wa Roma “a maKristu ma wa lumbetiwa lezvaku ma hohlola a mingango”,a niku hi zvalezvo va lumbetiwako a Vakustumunyu vo kari va Jehovha nyamutlha. Xana lezvo zvi wula ku a nuna kutani sati loyi a nga Kustumunyu hi yena a vangisako a kungazwanani?

Na yi lamula a cilumbeto ca ku a Vakustumunyu va Jehovha va hohlola mingango, a Tribhunali ya le Europa ya ku lwela a tifanelo ta vanhu yi wulile lezvaku a zviro zva ngango lezvi zvi kalako zvi nga hi Vakustumunyu va Jehovha hi zvona a kutala ka zvikhati zvi vangisako woyonga hi ku ala “ku vhumela ni ku kombisa a cichavo a kutlhatlheka ka xaka gabye ka ku hanya hi wukhongeli gakwe”. A Tribhunali yi wulile lezvi kambe: “Lezvi zvi humelela ka mingango yontlhe leyi a nuna ni sati va hambeneko hi wukhongeli a ku patsa ni ya Vakustumunyu va Jehovha.”b Hambu loku va nyenyiwa hi kota ya wukhongeli gabye, a Vakustumunyu va Jehovha va ti karatela ku ingisa a wusungukati legi ga Bhibhiliya, gaku: “Mu nga tlheliseli munhu kubiha hi kubiha. . . . Loku zvi maheka, ni loku n’wina mu zvi kota, hanyani hi kurula ni vanhu vontlhe.” — Va Le Roma 12:17, 18.

Hikuyini a Vakustumunyu va Jehovha va kholwako lezvaku va fanele ku chadha ntsena ni munhu a nga Kustumunyu wa Jehovha?

A Vakustumunyu va ingisa cileletelo ca Bhibhiliya ca ku chadha “ntsena Hosini”, ku nga ku chadha ni munhu mu nga ni kukholwa kun’we. (1 Va Le Korinte 7:39) A cileletelo leci ca lomu ka Bhibhiliya niku ca vhuna. Hi cikombiso, a ndzima yi nga humesiwa hi 2010 ka Journal of Marriage and Family, yi wulile lezvaku “a nuna ni sati lava va nga ka wukhongeli gin’we va tlhela va kholwa zvalezvi zva zvin’we” va tala kuva ni wukati ga ginene.c

Kanilezvi a Vakustumunyu va Jehovha a va kuci a vamakabye vabye kukholweni lezvaku va hambana ni nuna kutani sati a nga hiko Kustumunyu. A Bhibhiliya gi ngalo: “Loku a hi kona makabye a nga ni sati a nga kholwiko, a nga tsiki sati wakwe loku a sati loye a zvi lava ku tshama naye; ni loku a wasati a hi ni nuna a nga kholwiko, a nga tsiki nuna wakwe loku a nuna loye a zvi lava ku tshama naye.” (1 Va Le Korinte 7:12, 13) A Vakustumunyu va Jehovha va ingisa cileletelo leci.