A Vakustumunyu va Jehovha va ma wonisa kuyini a marilo?
Lezvi hi ma wonisako zvona marilo ni lezvi hi ma mahisako zvona zvi seketelwa ka tigondzo ta Bhibhiliya, ti patsako leti ti landzelako:
A zvi bihangi ku rila loku hi felwa hi munhu hi mu randzako. A vapizani va Jesu va rilile a cikhati va nga felwa hi vanhu va nga va randza. (Johani 11:33-35, 38; Mitiro 8:2; 9:39) Hikwalaho, a hi teki marilo kota cikhati co hlakana. (Mutshawuteli 3:1, 4; 7:1-4) Kanilezvi hi ci wona na ci hi cikhati ca ku kombisa kuzwela wusiwana. — Va le Roma 12:15.
A vafileko a va tivi nchumu. Kani hi va lixaka muni, kani hi va mudhawuko muni, ha potsa zvihena ni mikhuwo yi seketelwako ka gondzo yaku a vafileko va tiva nchumu niku va nga vhuna vahanyako. (Mutshawuteli 9:5, 6, 10) A mikhuwo leyo yi patsa ku pileka ni cirumbi, mibuzo ya ku tlhanganisa malembe ya kufa kutani mhamba, ku phahla tinguluve, ku wulawula ni vafileko, ku kombela ku vhuniwa hi vafileko ni ku basisiwa civendze ca wunoni. Hi potsa a zvihena zvontlhe lezvi ni mikhuwo leyi hi kota ya lezvi hi ingisako a cileletelo ca Bhibhiliya caku: “Humani cikari kabye, mu ti hambanisa navo, . . . mu nga henyi cilo co nyenyeza.” — 2 Va Le Korinte 6:17.
A vafileko va na ni kutsumba. A Bhibhiliya gi gondzisa lezvaku ku tava ni kuvhuka ka vafileko niku kata cikhati laha a kufa ku to kala ku nga havi kona. (Mitiro 24:15; Kuvhululelwa 21:4) A ku khwatsi hi lezvi a kutsumba loku ku nga vhuna ku nga vhuna maKristu yo sangula, ka hi vhuna hinawu a ku nga bayiseki zvo hundza mpimo ni ku maha mikhuwo yi koniwako hi Bhibhiliya. — 1 Tesalonika 4:13.
A Bhibhiliya gi hi kuca ku ti koramisa. (Mavingu 11:2) A hi alakanyi ku a marilo cikhati ca ku a munhu a komba ku “i nazvo”. (1 Johani 2:16) A hi mahi marilo yo dhura hi ku fela ku lava ku koka kupima ka vanhu. Ne a hi xavi a tikaxawu to dhura nguvhu kutani ku boha tinguwo to chandza nguvhu kasi ku komba lava va nga kona.
A hi faneli kurumeta van’wani a ku vhumela lezvi hi kholwako xungetano hi marilo. Mhakeni leyi, hi landzela a tshinya legi ga nayo: “A mun’we ni mun’wani wa hina i ta ti hlamulela mahlweni ka Nungungulu.” (Va Le Roma 14:12) Hambulezvo, loku hi nyikiwa cikhati, hi zama ku tlhamusela a kukholwa ka hina “hi kurula ni cichavo ca hombe.” — 1 Pedro 3:15.
Ma mahisiwa kuyini a marilo ya Vakustumunyu va Jehovha?
Wutshamu: Loku a ngango wu boha ku maha a mutlhangano wa marilo, u nga hlawula ku wu mahaSalawini ya Mufumo, ka wutshamu ga ku mahela ka gona marilo, ka muti wo kari, laha va kremarako kona kutani simitera.
Lezvi zvi mahekako: Ku vekiwa kanelo ya ku chavelela lava va felweko yi tlhamuselako lezvi a Bhibhiliya gi wulako xungetano hi kufa ni kutsumba ka kuvhuka ka vafileko. (Johani 11:25; Va Le Roma 5:12; 2 Pedro 3:13) Kwalaho ku nga kumbukiwa a matshamela ya manene ya loyi a fileko, kuzvilava hi ku komba lezvi hi nga gondzako ka cikombiso ca kukholwa kakwe. — 2 Samuweli 1:17-27.
Ku nga yimbelelwa lisimu li seketelwako ka Bhibhiliya. (Va Le Kolosi 3:16) A mutlhangano lowu wu gumesa hi mukhongelo wu chavelelako. — Va Le Filipi 4:6, 7.
Xitiki kutani mihlengo: A hi mahisi xitiki hi mitiro ya hina ya wukhongeli, a ku patsa ni marilo. A hi mahisi mihlengo kambe ka mitlhangano ya hina. — Matewu 10:8.
Hi vamani va vhumelelwako kuva kona?: Hambu lava va nga hiko Vakustumunyu va Jehovha vonawu va ngava kona ka mutlhangano wa marilo wu mahiwako Salawini ya Mufumo. A kufana ni mitlhangano ya hina leyi yin’wani, ka marilo konawu, ni wihi munhu a nga famba.
A Vakustumunyu va Jehovha va famba ka marilo ya wukhongeli gin’wani ke?
A Kustumunyu mun’we ni mun’wani i ti mahela ciboho ha yece ci seketelwako ka livhalo lakwe li gondzisilweko hi Bhibhiliya. (1 Timote 1:19) Kanilezvi, a hi patseki ka zvimaho zva wukhongeli zvi nga yelaniko ni lezvi a Bhibhiliya gi zvi gondzisako. — 2 Va Le Korinte 6:14-17.