CIGONDZO 16
Zvini lezvi Jesu a mahileko a cikhati leci a nga hi laha misaveni?
A vanhu vo tala va mu tiva Jesu. Kanilezvi a vokari vo tiva ntsena a matimu ya wun’wanana gakwe, a van’wani va tiva ku i wa hi muphrofeti wo tlhariha basi, kasi lezvo a van’wani vo tiva ntsena a matimu ya kufa kakwe. Hambulezvo, hi nga gondza zvotala hi yena hi ku kambisisa a wutomi gakwe a cikhati leci a nga hi laha misaveni. Ka cigondzo leci, hi ta kambisisa a zvilo zvo kari zva lisima lezvi Jesu a zvi mahileko ni lezvi a zvilo lezvo zvi nga ku vhunisako zvona.
1. Wu wa hi wihi a ntiro wa lisima nguvhu wa Jesu?
A ntiro wa lisima nguvhu wa Jesu ku wa hi ku “kanela mahungu ya manene ya Mufumo wa Nungungulu”. (Lera Luka 4:43.) Jesu i chumayele a mahungu ya manene yaku Nungungulu i ta yimisa mufumo lowu wu to mbheta a zvikarato zvontlhe zva vanhu.a Hi malembe manharu ni khihlanya, Jesu i tirile yi nga chayi na byela vanhu a mahungu lawo yo tiyisa. — Matewu 9:35.
2. Hikuyini Jesu a nga maha zvihlamaliso?
A Bhibhiliya gi wulawula hi “mitiro ya ntamu ni zvihlamaliso ni zviwoniso lezvi Nungungulu a zvi mahileko ha [Jesu]”. (Mitiro 2:22) Hi ntamu wa Nungungulu, Jesu i miyetile a bhubhutsa ga hombe, a gisa a vanhu vo tala, a hanyisa vanhu va nga babya ni ku vhuxa vafileko. (Matewu 8:23-27; 14:15-21; Marku 6:56; Luka 7:11-17) A zvihlamaliso zva Jesu zvi kombile kubaseni ku i wa rumilwe hi Nungungulu. Zvi kombile kambe ku Jehovha i na ni ntamu wa ku mbheta a zvikarato zva hina zvontlhe.
3. Hi nga gondza yini ka lezvi Jesu a nga hanyisa zvona?
Jesu i ingisile Jehovha ka zviyimo zvontlhe. (Lera Johani 8:29.) Jesu i mahile zvontlhe lezvi a Papayi wakwe a nga mu kombela ku maha. I mahile lezvo wutomini gakwe gontlhe laha misaveni, hambu lezvi a votala va nga zama ku mu tsikisa. I kombile ku zva koteka ku a munhu a simama ku tirela Nungungulu, hambu loku a kumana ni zvikarato. Hi ndlela leyo, Jesu i hi siyele “a cikombiso kasi [hi] landzela khwatsi a nkondzo wakwe”. — 1 Pedro 2:21.
GONDZA ZVI ETA
Hi ta wona lezvi Jesu a nga chumayelisa zvona a mahungu ya manene ni lezvi a nga mahisa zvona zvihlamaliso.
4. Jesu i chumayele mahungu ya manene
Jesu i fambile mipfhuka yo leha nguvhu lomu ka maruwa ya lithuri, na a chumayela a mahungu ya manene. Lerani Luka 8:1, mu gumesa mu bhula hi zviwutiso lezvi:
A ku Jesu i wo chumayela ntsena a vanhu lava va ngaya kakwe?
Kutikarata muni loku Jesu a ku mahileko kasi a kuma vanhu?
Nungungulu i wa sina a wulile ku Mesiya i wa ta chumayela mahungu yo saseka. Lerani Isaya 61:1, 2, mu gumesa mu bhula hi zviwutiso lezvi:
Jesu i ci tatisisile kuyini ciphrofeto leci?
U alakanya ku a vanhu nyamutlha va zvi lava kuzwa a mahungu lawa ya manene?
5. Jesu i gondzisile a zvigondzo zva lisima
Ahandle ka ku chumayela a mahungu ya manene basi, Jesu i gondzisile a zvigondzo zvi vhunako. Wona a zvikombiso zvitsongwani zva kanelo yakwe yo tiviwa nguvhu ya le citsungeni. Lerani Matewu 6:14, 34 ni 7:12, mu gumesa mu bhula hi zviwutiso lezvi:
Wusungukati muni legi Jesu a gi nyikileko ka mavhesi lawa?
U alakanya ku a wusungukati lego ga ha vhuna ni nyamutlha?
6. Jesu i mahile zvihlamaliso
Jehovha i mu nyikile ntamu Jesu wa ku maha zvihlamaliso zvo tala. Kasi ku wona cikombiso cin’we, lerani Marku 5:25-34 kutani bisani VHIDHIO, mu gumesa mu hlamula a zviwutiso zvi landzelako.
A wasati loyi a nga babya i wa kholwa yini?
Zvini zvi ku tsakisileko ka cihlamaliso leci?
Lerani Johani 5:36, mu gumesa mu bhula hi ciwutiso leci:
A zvihlamaliso zva Jesu zvi wa “kustumunya” kutani ku komba yini hi yena?
U wa zvi tiva?
A kutala ka lezvi hi zvi tivako hi Jesu zvi kumeka ka mune wa mabhuku ya Bhibhiliya ma vitaniwako ku tiIvhangeli, ku nga bhuku ga Matewu, na Marku, na Luka, na Johani. A bhuku gin’we ni gin’wani gi wula mahungu yo kari xungetano hi Jesu ma nga kumekiko ka gin’wani. Loku hi lera wontlhe a mabhuku lawa ya mune, hi ta gi tiva khwatsi a wutomi ga Jesu ga laha misaveni.
MATEWU
hi yena a nga sangula ku tsala bhuku gakwe ga tiIvhangeli. Gi wulawula hi tigondzo ta Jesu, nguvhunguvhu lezvi Jesu a zvi gondzisileko xungetano hi Mufumo wa Nungungulu.
MARKU
i tsalile a bhuku go koma ka wontlhe ka tiIvhangeli. Gi wulawula nguvhu hi zvimaho zvo tsakisa.
LUKA
i hi komba lezvi Jesu a nga wu wonisa zvona mukhongelo ni lezvi a nga va khomisa zvona vavasati.
JOHANI
i hi byela zvilo zvo tala lezvi Jesu a nga bhula ni vanghana vakwe ni van’wani vanhu. Lezvo zvi hi vhuna a ku wona ku Jesu i wa hi munhu wo tshamisa kuyini.
A VOKARI VE: “Jesu i wo tela ku ta fela vanhu laha misaveni.”
U alakanya ku Jesu i wa tela zvezvo basi laha misaveni?
LEZVI HI NGA GONDZA
Jesu i chumayele xungetano hi Mufumo wa Nungungulu, a maha zvihlamaliso a tlhela a ingisa Jehovha ka zvontlhe zviyimo.
Zviwutiso zva kuvhuxeta
Wu wa hi wihi a ntiro wa lisima nguvhu wa Jesu a cikhati leci a nga hi laha misaveni?
A zvihlamaliso lezvi Jesu a mahileko zvi komba yini?
Wusungukati muni legi Jesu a gondzisileko?
GONDZA ZVIN’WANI
Timhaka muni leti Jesu a nga wulawula nguvhu hi tona?
“Mufumo wa Nungungulu — Hikuyini wu nga wa lisima ka Jesu?” (A Murindzeli wa 1 ka Outubro wa 2014)
Wona ku hikuyini hi nga kholwako ku a zvihlamaliso zva Jesu hakunene zvi mahekile.
Gondza u wona lezvi a wanuna wo kari a nga cicisa zvona a mahanyela yakwe a cikhati leci a nga tiva lezvi Jesu a va randzisako zvona vanhu.
“Nzi wa ti hanyela ga mina ntsena” (A Murindzeli wa 1 ka Outubro wa 2014)
Wona a zvilo zva lisima lezvi Jesu a zvi mahileko zvi xaxametilweko hi kuya hi lezvi Jesu a nga zvi mahisa zvona.
a Ka cigondzo 31-33 hi ta gondza zvotala hi Mufumo wa Nungungulu.