U Nga Tsiki A Ku Xumayela
1 Ka zikhati zo kari, hi nga ha wona lezaku a xipanze xa hina xontlhe xi tiriwa hi kuphindaphinda kanilezi va tsongwani lava va amukelako a mahungu. Hambulezo, ku na ni zigelo zo zwala zi hi susumetako a ku simama hi xumayela. — Mat. 28:19, 20.
2 Kasi Kuva Wukustumunyu: Jesu i wulile na ka ha hi mahlweni lezaku a kuxumayelwa ka Mufumo ku wa tava xipanze xa lisima xa xiwoniso xa “kugumesa ka tiko,” ni lezaku ku wa ta mahiwa kasi kuva “wukustumunyu ka matiko wontlhe.” (Mat. 24:3, 14) A xikhati lexi a vanhu va hi wonako na hi xumayela a mahungu yo saseka ya Mufumo, ku kari ku nyikelwa a wukustumunyu ga ntamu. Anzhako ka loku hi sukile ka wutshamu lego, a vanhu vo kari va nga ha sala va wulawula hi lienzo la hina hi tihora kutani hi masiku yo tala, hambu loku va nga amukelangi a mahungu. A ku tiva ku hikuyini hi xumayelako zi hi vuna a ku timisela. A xikhati lexi hi hlengelako kutatiseni ka xiprofeto xa Biblia hi ku nyika wukustumunyu ni ku tlharihisa vanhu, hi tsakisa Jehova. — 2 Tes. 1:6-9.
3 Ku Laveka Kutimisela: Kota lezi a vanhu va nga ni zilo zo tala zi va pengisako kupima ni zilo zo tala nguvu zi va gelako xikhati, ku laveka lezaku hi timisela a xikhati lexi hi ti karatelako ku hlakulela a kutsakela kabye. A wasati wo kari i wa enzelwa viki ni viki hi xikhati xi ringanako lembe mahlweni ka kuva a vumela lezaku a Timboni ti nghena mutini wakwe kasi ku bhulisana hi Biblia. Hi kugumesa, i lo tsakela nguvu lezi a nga zizwa laha ka kuza a vumela a xigonzo xa Biblia, a sangula kuta mitlhanganwini, niku lokuloku i wulile lezaku i xuva ku bapatizwa.
4 A matshamela ya tiko legi ma cica hi kuhatlisa, niku a vanhu wonawu va cica. A vo tala lava va alileko a mahungu ya hina ka xikhati xi hunzileko, zalezi va nga ha amukela a kutsumba ku humutako loku hi byelako vanwani. Hambu loku kova munhu munwe ntsena a amukelako a mahungu ya Mufumo, a kutimisela ka hina ku tava ku bhinzulile.
5 Misaveni yontlhe, a vanhu lava “va nga ni mahika, va rilako hi kota ya manyalataniso lawa ma mahiwako” vaya va engeteleka. (Ezek. 9:4) A mihanzu ya kuxumayela ka hina yi tiyisa lezaku lava va nga ni timbilu ti nene va kari va amukela a mahungu ya Mufumo. (Isa. 2:2, 3) Hikwalaho, ngha hi nga tsiki a ku xumayela, kanilezi ngha hi simama ku ‘neha a mahungu yo saseka ni yo tsakisa,’ hi liranzo ni hi kutimisela. — Isa. 52:7; Miti. 5:42.