Xana Va Ta Zwisa Kuyini?
1. Hikuyini a ntiro wa kuxumayela wu nga ha karatako, niku hi xihi a xigelo xa kuva hi simama a ku wu maha?
1 Kota lezi a siku ga Jehova gi tshinelako hi kuhatlisa, ku na ni xilaveko xa xihatla xa ku vuna vanhu vanwani va tsanza-vahlayi lezaku va kuma a wutivi ga lisine xungetano hi Nungungulu ni kungo gakwe hi vanhu. (Joh. 17:3; 2 Ped. 3:9, 10) Lezo zi nga ha karata ka zikhati zo kari hi kota ya lezi a votala va nga khataliko kutani hi lezi va nga ha hi tseketselako hi kota ya ntiro wa hina wa kuxumayela. (2 Ped. 3:3, 4) Hambulezo, hi na ni xigelo xo tiya xa ku kholwa lezaku lomu xipanzeni xa hina ka ha hi ni vanhu lava va to vumela a mahungu yo saseka loku va mazwa. Xana a vanhu lavo va ta ma zwisa kuyini loku ku nga hi na munhu wo xumayela? — Rom. 10:14, 15.
2. Xana a xikombiso xa Paule xi hi tiyisa hlana hi ndlela muni?
2 Loku Hi Yimisana Ni Kukanetwa: Hi kota ya lava va lavako kuzwa a mahungu ya Mufumo, a hi faneli ku mbhela ntamu. A doropa legi mupostoli Paule a nga ranga hi gona a ku xumayela a mahungu yo saseka le Europa kuve Filipi. A xikhati lexi yena na Silasi va nga lumbetwa kubiha, hi wumbiri gabye va lo biwa hi tinhonga va khotselwa paxweni. (Miti. 16:16-24) Kanilezi a xikarato lexo a xi mu tlhelelisangi nzhako Paule hi kuchava. A xikhati lexi a ngaya Tesalonika, a doropa legi a nga gi enzela hi kulanzela pfhumbeni gakwe ga wurumiwa, i lo “tiya-hlana ka Nungungulu.” (1 Tes. 2:2) Xana a xikombiso xa Paule a xi tlhamuseli a xigelo xa kuva “hi nga rereki”? — Gal. 6:9.
3. Zini lezi zi nga ha cicisako a maalakanyo ya vokari lava a kale va nga kala va nga tsakeli?
3 A vanyingi va nga kari va ala kuzwa hi malembe va cica a maalakanyo yabye. A zikarato zi yelanako ni timali, mababyi, kufa ka xiro xa ngango, kutani mibiko ya kuhumelela ka zilo zo tshisa tikweni zi nga ha vanga a kucica loko. (1 Kor. 7:31) A vokari lava a vapswali vabye va nga hi vakaneti va kulile va tlhela va lava kuzwa. A kusimama ka hina a ku xumayela ku nyika vanhu lavo a lungelo ga ku ‘vitana a vito ga Jehova’ na ka ha hi ni xikhati. — Rom. 10:13, Tradução do Novo Mundo.
4. Xini lexi xi hi kucako a ku simama wutirelini na ‘hi nga tsiki’?
4 ‘A Hi Tsiki’: A liranzo la hina ka Nungungulu ni muakelane li ta hi kuca a ku simama ntirweni wa kuxumayela ni ku maha vapizani na ‘hi nga tsiki,’ a ku fana ni lezi a vapostoli va zi mahileko ka zana ga malembe go sangula. (Miti. 5:42) A votala inyamutlha ‘va na ni mahika, va rila hi kota ya manyalataniso lawa ma mahiwako’ zalezi. (Ezek. 9:4) A hi kona kutsumba ni kuhumula lezi a vanhu lavo va zi kumako a xikhati lexi va zwako a mahungu yo saseka! Hambu loku a vanhu vo tala va ala kuzwa, hina hi na ni xitiyisekiso xa lezaku Jehova wa tsaka nguvu hi kutikarata ka hina. — Maheb. 13:15, 16.