Kwadru Ga Ziwutiso

◼ Loku a patswa wu xuva ku maha a muchado wa wona lomu Salawini ya Mufumo, hi tihi a timhaka leti wu faneleko ku bhulisana hi tona ni madota?

A michado leyi yi mahiwako hi ku vumelelana ni matshinya ya milayo ya Biblia yi neha wudzunzo ka Jehova. Nguvunguvu a michado leyi yi mahelwako laha Salawu ya Mufumo yi neha a wudzunzo lego hakuva a vaakelani va wona mitlhangano yi mahelwako laho kota xikombiso xi wonekako xa hlengeletano ya hina. Kasi a “zilo zontlhe zi mahiwa hi fanelo ni nayo,” zi na ni xigelo lezaku a madota ya kwalaho ma patseka loku a Salawu ya Mufumo yi kombeliwa kasi ku mahela muchado. — 1 Kor. 14:40.

A patswa lowu wu xuvako a ku mahela muchado wa wona lomu Salawini ya Mufumo wu fanele ku rumela a papilo ga xikombelo ka kometi ya ntiro ya bandla legi gi tlhanganako laha salawini leyo. A papilo gabye gi fanele ku rumelwa na ka ha hi ni xikhati xo enela niku va fanele ku komba a siku ni xikhati lexi va xuvako a ku tirisa a salawu. Va fanele ku tiva lezaku a madota ma nga ta cica a xikhati xa mitlhangano kasi ku siyela wutshamu a muchado. Tlhatakumbiri, a muswika ni muteki va fanele kuva ka xiyimo xi nene, na va hanya hi milayo yo lulama ya Jehova.

Kasi ku tiyiseka lezaku a muchado wu nyika wudzunzo a Nungungulu wa hina a dzunzekako, a patswa wu fanele ku bhulisana ni kometi ya ntiro xungetano hi malulamiselo ya muchado na va nga se dayelela. Hambu lezi a madota ma to kala ku kurumeta a patswa ka lezi ma zi ranzako, loku ku hi lezaku ka lulamiselwa a xilo xo kari xi kanakanisako, a patswa wu fanele ku lanzela a mawonela ya madota. Ntsena a wucenje legi gi hlawulilweko ka Melodias do Reino kutani gi kumekako lomu ka bhuku ga hina ga tisimu hi gona gi faneleko ku tiriswa. A kusasekiswa kwihi ni kwihi ka Salawu ya Mufumo kutani kucica ka mavekela ya zitulu zonawu zi fanele ku vumelelwa hi madota. Loku ku susiwa a mifoto kutani ku filimara, lezo a zi faneli ku susa a lisima la ximaho lexi. A madota ma nga ha vumelela lezaku ku vuxetiwa zo kari lomu Salawini ya Mufumo loku lezo zi nga kamanyeti a mitiro yinwani ya bandla. A ku na xirambo ni xinwe xi faneleko ku namekiwa laha ka kwadru ga zitiviso. Hambulezo, a madota ma nga ha maha a xitiviso xo koma nzeni ka Mutlhangano wa Ntiro kasi ku byela a bandla xungetano hi muchado lowu wu ta nga mahelwa laha Salawu ya Mufumo.

Hambu lezi ku nga hiko xileletelo lezaku a vakorteji vontlhe vahi vanhu va bapatizilweko, zi wa nga ta fanela a ku hlawula vanhu lava a mahanyela yabye ma lwisanako hi kukongoma ni matshinya ya milayo ya Biblia kutani lava a matshamela yabye ma nga wa ta vanga kukanakana ka lava va nga kona. A kanelo wa muchado wu fanele ku vekiwa hi dota gi yimisilweko, loku gi hi kona. A madota vagonzisi va buvileko va Mhaka ya Nungungulu, hikwalaho hi wona ma ringanelwako nguvu hi ku khanyisa a matshinya ya milayo ya Mitsalo lawa ma tirako ka ximaho lexi xa lisima. — 1 Tim. 3:2.

Kota lezi a muchado wu kombako xo kari kambe xungetano hi dota legi gi to veka kanelo, gonawu gi fanele ku tivisiwa na ka ha hi mahlweni hi malulamiselo ya muchado. Gona gi ta tlhangana ni patswa kasi gi tiva lezi wu hanyisileko zona xikhatini xa kugangisana ka wona; a patswa wu fanele ku wula lisine ni kuva wu tlhatlhekile mahlweni ka dota. Loku ku hi lezaku a muswika kutani a muteki i wa chadile, yena i fanele ku nyikela xitiyisekiso xa lezaku i tlhatlhekile hi kuya hi Mitsalo ni hi nayo a kuva a tekiwa kutani ku teka. (Mat. 19:9) Lezo zi wa ta patsa kuva a komba a dota a papilo gi tiyisekisako lezaku i tlhatlhile wukati.

Loku a patswa wu bhulisana hi kutlhatlheka wu tlhela wu tirisana khwatsi ni madota, a muchado wu tava ximaho xo tsakisa ka vontlhe. — Mav. 15:22; Maheb. 13:17.