Hikuyini a Vakustumunyu va Jehovha va kalako va nga mahi mibuzo ya ku alakanya masiku ya kupswaliwa?
Hina Vakustumunyu va Jehovha a hi mahi a mibuzo ya ku alakanya a masiku ya kupswaliwa hakuva hi kholwa lezvaku a mibuzo leyo a yi mu tsakisi Nungungulu. Hambu lezvi a Bhibhiliya gi kalako gi nga hi na nayo wo kongoma wu betelako a ku maha mubuzo wa ku alakanya a masiku ya kupswaliwa, ga hi vhuna a ku alakanyela hi lezvi zvi mahekako ka mibuzo leyo ni ku zwisisa lezvi Nungungulu a yi wonisako zvona. Wona a mune wa zvilo zvi yelanako ni mibuzo ni matshinya ya Bhibhiliya ma tirako ka mhaka yin’we ni yin’wani.
A mibuzo ya ku alakanya a masiku ya kupswaliwa yi sangulele ka wuhedheni. A bhuku go kari gi wulawulako hi mhaka leyi gi wula lezvaku a mibuzo leyi yi sangulile hakuva a vanhu va wa kholwa lezvaku a siku legi a munhu a tlhanganisako malembe, “a mimoya ya kubiha yi wa zvi kota ku mu mahela zvakubiha loyi a tlhanganisako malembe” niku “a kuvakona ka vanghana ku mu losa na va mu xuvela litsako zvi wa vhuna ku vhikela loyi a tlhanganisako malembe”. A bhuku The Lore of Birthdays (A mukhuwo wo alakanya a masiku ya kubelekwa) gi wula lezvaku a siku ga wena ga kupswaliwa gi wa “laveka kasi ku tiva a wumandziko ga wena” na ku tirisiwa “wungoma ga ku hlahluva hi tinyeleti”. A bhuku legi gi tlhela gi wula lezvaku “hi kuya hi tsheketo, a mavhela ya siku u tlhanganisako malembe ma na ni moya wo hlawuleka lowu wu nyikako makatekwa”.
Kanilezvi a Bhibhiliya ga betela a ku tirisa masalamuso, kuvhumba, wudhimoni kutani zvin’wani “zvilo zvo kota lezvo”. (Dhewuteronome 18:14; Va Le Galatiya 5:19-21) A cin’we ca zvigelo zvi mahileko Nungungulu a vhukela a dhoropa ga kale ga Bhabhuloni hi ku a vanhu va kona va wa hlahluva hi tinyeleti, ku nga lixaka lo kari la ku vhumba. (Isaya 47:11-15) A Vakustumunyu va Jehovha a va tshami hi ku lavetela lomu a mukhuwo wun’we ni wun’wani wu nga sangulela kona, kanilezvi loku a Bhibhiliya gi nyika zvileletelo zvo dlunyateka, zvo kota lezvi zvi wulawulako hi wudhimoni, a hi zvibi hi makatla.
A maKristu yo sangula ma wa nga mahi mibuzo ya ku alakanya masiku ya kupswaliwa. A bhuku Enciclopédia Delta Universal gi wula lezvaku a maKristu yo sangula “ma wa wona a ku maha mibuzo ya ku alakanya masiku ya kupswaliwa kota mukhuwo wa wuhedheni”. A Bhibhiliya gi komba lezvaku a vapostoli ni van’wani vanhu va gondzisilweko hi kukongoma hi Jesu va vekile a cikombiso leci a maKristu wontlhe ma faneleko ku ci landzela. — 2 Va Le Tesalonika 3:6.
A cimaho cin’we leci a maKristu ma faneleko ku ci alakanya kufa ka Jesu na ku nga hi kupswaliwa kakwe. (Luka 22:17-20) Lezvo a zvi hi hlamalisi hakuva a Bhibhiliya gi wula lezvaku a “siku ga kufa gi hundza a siku ga kupswaliwa”. (Mutshawuteli 7:1) Laha Jesu a ngafa, i wa ti mahele vito ginene ka Nungungulu, a maha lezvaku a siku ga kufa kakwe giva ga lisima nguvhu a ku hundza siku ga kupswaliwa kakwe. — Mahebheru 1:4.
A Bhibhiliya a gi kumbuki a nandza ga Nungungulu gi nga maha mubuzo wa ku tlhanganisa malembe ya kupswaliwa. A hi lezvaku a vatsali va Bhibhiliya va no rivakelwa ku tsala a mhaka leyo, hakuva ku kumbukiwa a mibuzo yimbiri ya ku tlhanganisa malembe ya vanhu va nga kala va nga tireli Nungungulu. Kanilezvi a mibuzo leyo ya yimbiri a yi kumbukiwi hi zva zvinene. — Genesisi 40:20-22; Marku 6:21-29.
A vana va Vakustumunyu va Jehovha va tizwa na va luza zvokari hi lezvi va nga mahiko mibuzo ya ku tlhanganisa malembe ya kupswaliwa?
A ku fana ni vapswali vontlhe va vanene, a Vakustumunyu va Jehovha va kombisa a lirandzo ka vana vabye na ku nga hi hi siku gin’we ka lembe, kanilezvi a lembe gontlhe. Va zvi randza kambe a ku va nyika maprezenti a vana vabye ni ku va mahela mibuzo. Va zama ku pimanyisa cikombiso co mbhelela ca Nungungulu, loyi hi kuzvirandza, a va nyikako zvilo zva zvinene a vana vakwe. (Matewu 7:11) Hikwalaho, a vana va Vakustumunyu va Jehovha a va alakanyi lezvaku zvi kona va luzako. Wona lezvi va wulako:
“Zva tsakisa nguvhu a ku kuma prezenti na u nga yi rindzelangi.” —Tammy, 12 wa malembe.
“A ndzi kumi maprezenti ka siku legi ndzi tlhanganisako malembe kanilezvi a vapswali va mina va ndzi xavela maprezenti ka masiku man’wani. Zva ndzi tsakisa ku zvi mahisa lezvo hakuva va ndzi nyika na ndzi nga zvi rindzelangi.” — Gregory, 11 wa malembe.
“U alakanya ku a festa ya 10 minuto, ni zvibholwana zvitsongwani ni lisimu i festa leyo?Tana laha kaya u ta wona ku cini a festa!” — Eric, 6 wa malembe.