Timhaka ta mabhuku ma tako ka Cibhukwana ca Mutlhangano
© 2025 Watch Tower Bible and Tract Society of Pennsylvania
2-8 KA MARÇO
TITSHOMBA TI NGA KA MHAKA YA NUNGUNGULU ISAYA 41-42
“U nga chavi”
Profecia de Isaías vhol. 2 paj. 21 par. 10
Ciphrofeto ci nga ni magezu ya kuchavelela ma ku khumbako
10 Jehovha i no cuwuka a wona lezvi zvi nga wa ta maheka lomu tikweni na ka ha kiyela cipimo ca 200 wa malembe. I no wona butho ga ntamu gi nga rangelwa hi Khurusi na gi famba hi kuhatlisa gi khozisa vontlhe valala. A vanhu va matiko wontlhe — a ku patsa ni lava va nga hanya ka zvihlale zva le kule nguvhu — va wo rurumela a cikhati leci a butho lego gi ngaya gi tshinela. Hi kota ya kuchava, va no patsana kasi valwa ni loyi Jehovha a nga mu vitanile hi le mutsuwuka-gambo kasi a ta maha kulamula kakwe. Va no zama ku tiyisana, vaku: “Tiya.”
Mavhesi ya Bhibhiliya ma tlhamuselweko, ndzima n.° 5 par. 4-7
Isaya 41:10 — “U nga chavi, hakuva ndzi na wena”
“Ndzi na wena”. Jehovha i ma nyika cigelo co zwala a malandza yakwe kasi ma nga chavi. I ma byela lezvaku a ma woce. Jehovha wa zvi wona zvontlhe lezvi a malandza yakwe ma yimisanako nazvo niku wazwa a mikhongelo ya wona. Hikwalaho, zviya hi ku khwatsi hi loku Nungungulu a hi kwalaha tlhelweni ga wona. — Lis. 34:15; 1 Ped. 3:12.
“Ndzi Nungungulu wa wena”. Jehovha wa tiyiseta malandza yakwe hi ku ma alakanyisa lezvaku hambu koba le’ci dhumako yena i ta simama kuva Nungungulu wa wona ni ku amukela a wukhozeli ga wona. Ma nga tiyiseka lezvaku ci hava ci nga tsandzekisako Nungungulu a ku ma lwela. — Lis. 118:6; Rom. 8:32; Mah. 13:6.
“Ndzi ta ku tiyisa, ina, ndzi ta ku vhuna, hakunene ndzi ta ku khoma hi canja ga mina ga cinene ga kululama”. Jehovha i phindaphinda a mhaka yaleyi ya yin’we na a tirisa tifraze tinharu to hambana kasi ku khanyisa lezvaku hakunene i ta vhuna malandza yakwe. Jehovha kambe i maha mufananiso kasi ku komba lezvi a mahako loku a vanhu vakwe va lava ku vhuniwa. Loku a wokari awa, i nawutula canja gakwe ga cinene kasi ku mu vhuxa. — Isa. 41:13.
Kasi ku tiyisa malandza yakwe, Jehovha i tirisa nguvhunguvhu a Mhaka yakwe, a Bhibhiliya. (Jox. 1:8; Mah. 4:12) Hi cikombiso, a Mhaka ya Nungungulu yi nyika wusungukati ga ginene gi vhunako ku yimisana ni zvikarato zvo kota wusiwana, mababyi kutani ku felwa hi munhu u mu randzako. (Mav. 2:6, 7) Ahandle ka lezvo, Nungungulu a nga tirisa moya wakwe wo basa kambe kutani ntamu wakwe kasi ku ma nyika ntamu lowu wu lavekako a malandza yakwe hi tlhelo ga kutizwa ni ga maalakanyo kasi ma timisela zvikarato. — Isa. 40:29; Luka 11:13.
Murindzeli 07.16 paj. 28 par. 4-5
“U nga chavi. Ndzi ta ku vhuna”
A magezu ya Jehova ma chavelela nguvu. Hi nga alakanyela lezi Jehova a hi tsumbisako. A vesi a gi wuli lezaku u longoloka na Jehova na u khomile woko gakwe. Loku u wo longoloka naye, Jehova i wo to khoma woko ga wena ga xibhabha hi legi gakwe ga xinene. Kanilezi, Jehova i nawuluta “canja [gakwe] ga xinene ga kululama” a khoma “canja ga wena ga xinene,” a ku khwatsi hi loku a ku humesa ka xikarato xo kari. Laha Jehova a khomako woko ga wena ga xinene, i tlhela a ku tiyisa aku: “U nga chavi, nzi ta ku vunetela.”
Wa wona Jehova kota Dadani tlhelo Munghana wa wena wa liranzo ke? Wa kholwa lezaku i ta ku vuna loku u kumana ni zikarato? Jehova i khatala nguvu hi wena niku i lava ku ku vuna. Loku u hi ni zikarato, Jehova i lava lezaku u tizwa na u tiyile. Hikuyini? Hakuva wa ku ranza nguvu. Hakunene, Jehova “kuvunetela ku nga kona kusuhani xikhatini xa zikarato.” — Lis. 46:1.
Titshomba ta moya
Sentinela 01/10/01 paj. 20 par. 3
Zvi wula yini kutsumbeka?
Jehovha i byelile munghana wakwe Abrahama, aku: “Ndzi citlhangu ca wena.” (Gen. 15:1; Isa. 41:8) A nga no halahala a wula lezvo. Jehovha i vhikele ni ku tlhatlhisa Abrahama ni va ngango wakwe ka Faro ni ka Abhimeleki. Ka khati gin’wani kambe, i no vhuna Abrahama a ku tlhatlhisa Loti ka mune wa tihosi ti nga kari ti mu hlengela. Ahandle ka lezvo, Jehovha i no maha lezvaku Abrahama na Sara va tlhela vava ni ntamu wa ku pswala; Abrahama na a hi ni 100 wa malembe, Sara na a hi ni 90 wa malembe, kasi zvi koteka ku hi laha kabye ku huma Pswalo lowu wu nga tsumbisilwe. Jehovha i wa bhula hi kukhandzakanya na Abrahama hi ku tirisa miwoniso, ni miloro, ni tingilozi. Hi lisine, Jehovha i kombisile kutsumbeka ka Abrahama a cikhati leci a nga ha hanya a tlhela a simama kutsumbeka kakwe hi malembe yo tala, andzhako ka kufa kakwe. Hi kufamba ka malembe, Jehovha i tatisile zvitsumbiso zvakwe ka pswalo wa Abrahama, a tiko ga Izrayeli, hambu lezvi va nga hi zvitlula-milayo. A wunghana ga Jehovha na Abrahama gi wa hi cikombiso ca ku cini a kutsumbeka ka lisine — ku nga lirandzo li kombisiwako hi mitiro. — Genesisi, cipimo 12 kala 25.
9-15 KA MARÇO
TITSHOMBA TI NGA KA MHAKA YA NUNGUNGULU ISAYA 43-44
Ciphrofeto ci tsalilweko na ka ha kiyela 200 wa malembe kasi ci tatiseka
Palavra de Deus paj. 124 par. 16-17
Zviphrofeto zvi tatisekileko
16 Hi 539 na ku nga seva Nguva ya Hina, ku no chikela magumo ya kufuma ka Bhabhuloni kota mufumo wa misava yontlhe a cikhati leci a mufumeli wa ntamu wa muPersia, wa ku hi Khurusi, a nga marxara na a hi zvin’we ni butho ga vaMedhi va ya dhumela dhoropa lego. Kanilezvi Khurusi i no kumana ni cikarato ca hombe. A dhoropa ga Bhabhuloni gi wa bhiyelwe hi mimuro ya hombe niku zvi wa wonekisa ku khwatsi a gi nge khoziswi. Ahandle ka lezvo, gi wa tsemakanyiwa hi congo wa hombe wa Eufrate lowu wonawu wu nga kari wu gi vhikela nguvhu.
17 A mutsali wa matimu wa muGreki wa ku hi Heródoto i tlhamusela lezvi Khurusi a nga ci hlulisa zvona a cikarato leco, i ngalo: “I no avanyisa masochwa yakwe, a yimisa ntlawa wokari laha a congo wa Eufrate wu nghenako hi kona lomu dhoropeni ga Bhabhuloni, a ntlawa wun’wani a wu yimisa laha wu humako hi kona, a ma byela lezvaku ma nghena lomu dhoropeni hi kwalahaya ka nonga neti a mati ma bohlanyana . . . hi kulandzela, i no jikisa mati ya Eufrate maya ka citivana [ca ku mahiwa hi munhu, ci nga kelilwe hi loyi a nga rangile a fumela Bhabhuloni] hi laha ka nonga wa kona. A mati ma no bohla, zvi olova ku tlhatuka congo. Zvalezvo, a vaPersia lava va nga yimisilwe timbhirini ta congo va no tekela ku nghena lomu dhoropeni a mati ya congo na mo va sendza hi lomu zviwunwini ntsena.”4
Perspicaz “Ciro” par. 6
Khurusi
Bhabhuloni a khoziswa. Makunu, Khurusi i no hloma kasi kulwa ni dhoropa ga ntamu ga Bhabhuloni. Niku a kusukela laho zviya mahlweni, i no veka kupima nguvhunguvhu ka ku tatisa a ciphrofeto ca Bhibhiliya. Ka ciphrofeto ca Isaya ci wulawulako hi kuaketwa ka Jesusalema ni tempeli, a mufumeli loyi wa muPersia i kumbukiwa hi vito kota loyi a yimisilweko hi Jehovha Nungungulu kasi ku hohlola Bhabhuloni ni ku tlhatlhisa vaJudha lava va nga hi wukhumbini seyo. (Isa. 44:26–45:7) Hambu lezvi a ciphrofeto leci ci nga tsaliwa na ku kiyela a 150 wa malembe ni kuhundza kasi Khurusi a sangula ku fuma, ni lezvi zvi wonekisako ku khwatsi a kulovisiwa ka Judha ku mahekile Khurusi na a nga se pswaliwa, Jehovha i wulile lezvaku Khurusi i wa tava “murisi” Wakwe kasi a vhuna vaJudha. (Isa. 44:28; fananisa na Rom. 4:17.) Kasi ku maha a ntiro lowu wu nga sina wu wulilwe, Khurusi i vitanilwe ku i “a totilweko” (lezvi hi ciHebheru zvi wulako ku ma·shí·ahh, Mesiya, hi ciGreki zvi wulako ku khri·stós, Kristu) wa Jehovha. (Isa. 45:1) A kuva Nungungulu a mu ‘vitana hi vito gakwe’ (Isa. 45:4) na ka ha kiyela malembe yo tala kasi Khurusi a pswaliwa, a zvi wuli ku Jehovha hi yena mabizweni wakwe, kanilezvi zvi wula ku Jehovha i wa sina a zvi tiva lezvaku ku wa tava ni wanuna a nga wa ta vitaniwa hi vito legi, niku Jehovha i wa nga ta mu vitana hi gona cihundleni, kanilezvi i wa ta mu vitana hi vito gakwe hi ku kongoma.
Perspicaz “Ciro” par. 16
Khurusi
Lezvi Khurusi a nga va khomisa zvona a vaJudha zvi wa hambene nguvhu ni lezvi va nga khomisiwa zvona hi tihosi leti tin’wani ti nga va fumele ti nga khozela zvifananiso. Khurusi i tlhelisile a zvibya zva lisima zva tempeli lezvi zvi nga tekilwe hi Nebhukadnezare wa wumbiri a famba nazvo Bhabhuloni, i va chusile lezvaku va tisa misedhare hi le Lebhanoni niku i vhumele ku a mali ya le ndlwini ya wuhosi yi tirisiwa kasi ku khatalela zvilaveko zva ntiro wa kuaka. (Ezra 1:7-11; 3:7; 6:3-5) Hi kuya hi lezvi zvi tsalilweko ka ribye ga redhonda ga Khurusi, ga ku mahiwa hi wumba, (MUFOTA, vhol. 1, paj. 332), a mufumeli wa Persia i wa landzela a zvileletelo zvi nga kombisa kukhatala ni zwela wusiwana hi vanhu va matiko lawa ma nga khozisilwe mufun’weni wakwe. A magezu ma tsalilweko laho ma wula lezvaku i te: “Ndzi tlhelisile ka madhoropa yo basa [ma sinako ma kumbukilwe] ya le tlhakuto wa Tigre, lawa a matshamu ya wona yo basa ku nga hundza cikhati co leha na ma hahlulilwe, a zvifananiso lezvi (zvi nga tala) ku tshama lomo, ndzi tlhela ndzi zvi mahela matshamu yo basa ma nga wa ta simama a kuva kona. Ahandle ka lezvo, ndzi (tlhelile) ndzi hlengeleta vontlhe vanhu (va nga) tshama lomo ndzi (va) tlhelisela mimiti yabye.” — Ancient Near Eastern Texts, paj. 316.
Titshomba ta moya
Murindzeli 02.24 paj. 30 par. 8
Zviwutiso zva vagondzi
A cikombiso ca wumbiri, ciphrofeto xungetano hi mukhozisi wo kari wa ku hi Khurusi, loyi a nga wa ta tlhatlhisa a vaJudha wukhumbini kasi va tlhela va ya aketa a tempeli ya Jehovha. (Isa. 44:26–45:4) Hosi Khurusi wa Persia i tatisile ciphrofeto leco. (Ezra 1:1-4) Hambu lezvi Khurusi a nga kala a nga khozeli a Nungungulu wa lisine, Jehovha i tirisile Khurusi kasi ku tatisa zviphrofeto na a nga mu vhaleli ku a tirisa a fanelo yakwe ya ku ti hlawulela loyi a faneleko ku mu khozela. — Mav. 21:1.
16-22 KA MARÇO
TITSHOMBA TI NGA KA MHAKA YA NUNGUNGULU ISAYA 45-47
“Hi mina Nungungulu, a ku na mun’wani wo fana na mina”
Murindzeli 06.20 paj. 5 par. 14
“A vito ga wena a gi basisiwe”
14 Sathani i maha zvontlhe a zvi kotako kasi ku Jehovha a nga tatisi a kungo gakwe. Kanilezvi, Sathani a nga zvi koti. A matimu ya Bhibhiliya ma komba lezvi Jehovha a mahako niku ma tiyisekisa lezvaku a ku na mun’wani a fanako na Jehovha Nungungulu. Hi lisine, a kungaingisi ka Sathani ni ka vontlhe lava va mu landzelako ku mu vangela a kubayisa ka hombe Jehovha. (Lis. 78:40) Hambulezvo, i lulamisa a mhaka leyi hi wutlhari, ni lihlazva-mbilu, ni kululama. I tlhela a kombisa a ntamu wakwe wa hombe hi tindlela to tala. A ca lisima ka zvontlhe, i kombisa lirandzo lakwe ka zvontlhe a zvi mahako. (1 Joh. 4:8) Jehovha i tira wusiku ni mumu kasi ku basisa vito gakwe.
Achegue-se paj. 42 par. 14
“Jehovha . . . i na ni ntamu wa hombe”
14 Kota lezvi hi to zvi wona, Nungungulu i tirisa ntamu wakwe kasi ku vanga, ku hahlula, ku vhikela ni ku aketa — hi kusonga, hi nga wula ku i wu tirisa kasi ku maha zvontlhe zvi yelanako ni makungo yakwe yo mbhelela. (Isa. 46:10) Ka zviyimo zvo kari, Jehovha i tirisa ntamu wakwe kasi ku kombisa matshamela ya lisima ya wumunhu gakwe ni milayo yakwe. A ca lisima ka zvontlhe, i tirisa ntamu wakwe kasi ku maha kurandza Kakwe — ku nga ku basisa vito gakwe hi ku tirisa Mufumo wa wuMesiya, hi ndlela leyo, a kombisa lezvaku a mafumela yakwe hi wona ya manene. Ci hava ci nga tsandzekisako a kungo gakwe.
Perspicaz “Exilados Retornam de Babilônia” par. 1
Lava va nga yisilwe wukhumbini Bhabhuloni va tlhela Jerusalema
Hi 607 na ku nga seva Nguva ya Hina, a tiko ga Judha legi a kale gi nga ganyile gi no mahiwa “ciwula, ku nga ha tshami munhu” a cikhati leci a vaJudha va nga khomiwa va yisiwa wukhumbini le Bhabhuloni, a misalela ya kona yi tsutsuma yiya Gibhite. (Jer. 9:11) Hambulezvo, a Nungungulu wa lirandzo i wa nga ta tsika vanhu vakwe wukhumbini kala kupindzuka. I phrofetile lezvaku va wa ta “tirela a hosi ya Bhabhuloni a 70 wa malembe” ni ku andzhako ka lezvo i wa ta tlhatlhisa a misalela ya vaJudha vo tsumbeka. (Jer. 25:11, 12; 29:10-14) Hambu a mufumo wa misava yontlhe wa Bhabhuloni lowu wu nga wonekisa ku khwatsi wu na ni ntamu nguvhu wu wa nga ta zvi kota ku tsandzekisa a kungo ga Nungungulu. A kuva a vaJudha va tlhatlhisilwe wukhumbini zvi komba lezvi a zviphrofeto zva Jehovha zvi tatisekisako zvona hi ndzhati ni cidokhwe.
Sentinela 15/05/99 paj. 14 par. 18-19
Ha tsaka hi lezvi Jehovha a hi kombako ndlela yakwe
18 A kufana ni kale, nyamutlha konawu zvi lava kutsumbeka kasi hi famba ndleleni ya Jehovha, ku nga ku ti yimisela ku tirela yena yece. Zvi lava ku hiva ni kutsumba, ku nga kukholwa ko tiya ka lezvaku a zvitsumbiso zva Jehovha zvi tsumbekile niku zvi ta tatiseka. Zvi lava ku ingisa, ku nga ku landzela milayo yakwe na hi nga jikajiki, ni ku simama hi hanya hi zvileletelo zvakwe zvo tlakuka. “Jehovha i lulamile; i randza mitiro yo lulama”. — Lis. 11:7.
19 Ahaza i noya a ya kombela civhuno ka vanungungulu va Siriya kasi a vhikelwa. A cikhati leci a vaIzrayeli va nga hi le Gibhite va wa rindzela ku a “muzindza wa tilo”, ku nga nungungulu wa cisati loyi a nga khozelwa nguvhu le Oriente Médio, i ta va nyika titshomba. Nyamutlha, a vanungungulu vo tala a hi zvifananiso zvo kongoma. Jesu i hi tlharihisile xungetano hi ku khozela “Titshomba”, wutshan’wini ga Jehovha. (Mat. 6:24) Mupostoli Pawule i wulawulile hi “makangwa, ku nga ku khozela zvifananiso”. (Kol. 3:5) I tlharihisile kambe lava “a nungungulu wabye [ku nga] khwiri”. (Filp. 3:19) Kunene, a mali ni titshomba zvilo lezvi a vanhu vo tala va zvi khozelako nguvhu nyamutlha. Hi lisine, a kutala ka vanhu, hambu lava va lumbako a wukhongeli go kari, va ‘veka kutsumba kabye ka titshomba ti mbhelako’. (1 Tim. 6:17) A votala va kulula va n’watseka kasi ku tirela vanungungulu lavo niku a vokari zva va fambela khwatsi — va hanya ka mimiti yo chandza, va tirisa zvibya zva manyunyu va tlhela vaga mafanjara. Hambulezvo, a hi vontlhe va ti buzako hi zvilo lezvo niku hambu lava va nga nazvo a va enelelwi. Phela a zvi nyiki kutsumba, zva cikhatanyana niku a zvi va vhuni ku tiyisa a wunghana gabye na Nungungulu. — Mat. 5:3.
Titshomba ta moya
Sentinela 01/01/11 paj. 14 par. 2-3
A ku Nungungulu i wa zvi tiva lezvaku Adhamu na Evha va wa ta wonha?
A Mitsalo yi tlhela yi komba lezvaku Jehovha hi “yena yece a tlharihileko”. (Rom. 16:27) A tingilozi ta Nungungulu ti wonile zvikombiso zvo tala zva wutlhari lego gi nga gumelwiko. Ti no ‘kanyuluka ti dhumisa’ a cikhati leci Jehovha a nga vanga zvilo laha misaveni. (Joba 38:4-7) Handle ko kanakana, a zvivangwa lezvo zva moya zvo tlhariha zvi cuwukele hi ku khatala nguvhu lezvi zvi nga maheka le Jardim ya Edheni. Hikwalaho, zvi wa nga ta zwisiseka a ku a Nungungulu wa wutlhari, andzhako ka ku vanga zvilo zvontlhe hi ndlela yo hlamalisa ni zvilo zvo tala zvo saseka laha misaveni na a cuwukelwa hi vana vakwe va le tilweni, a gumesile a vanga a zvivangwa zvimbiri zvo hambana ni zvin’wani na a zvi tiva ku zvi wa nga ta mu ingisa. Kunene, zvi wa nga ta zwisiseka a ku maha makungo lawo ma nga wa ta gumesa hi mhango.
Hambulezvo, a wokari a nga ha wutisa ku: ‘Zvi kotekisile kuyini ku a Nungungulu wa wutivi ga hombe a nga zvi tivi lezvi zvi to humelela?’ Kunene, a gin’we ga matshamela ya wutivi ga hombe ga Jehovha wutlhari gakwe ga ku ranga a tiva magumo ya zvilo “kusukela kusanguleni”. (Isa. 46:9, 10) Hambulezvo, a nga boheki a ku tirisa a wutlhari lego contlhe cikhati, a ku khwatsi hi lezvi a kalako a nga tirisi a ntamu wakwe wa hombe contlhe cikhati. Hi kufanana, Jehovha i tirisa a wutlhari gakwe ga ku tiva zvilo na zva ha hi mahlweni hi ku ringanisela; i gi tirisa loku lezvo zvi laveka futsi ni loku a ciyimo ci kurumeta.
23-29 KA MARÇO
TITSHOMBA TI NGA KA MHAKA YA NUNGUNGULU ISAYA 48-49
Vhuneka hi ku ingisela lezvi Jehovha a gondzisako
Perspicaz “Instrutor, Ensino” par. 2
Mugondzisi, Gondziselelo
Jehovha Nungungulu, a Muvangi, hi yena Mugondzisi wa hombe wa malandza yakwe. (1 Tih. 8:36; Lis. 27:11; 86:11; 119:102; Isa. 30:20; 54:13) A zvivangwa ha zvoce zvi gondzisa lezvaku ku na ni Nungungulu a nga ni wutivi ga hombe nguvhu niku zvi tlhela zvi va nyika mole a vanhu wa ku va kambisisa ni ku wona lezvaku kala masikwini ya hina a va tivi zvontlhe hi zvona. (Joba 12:7-9) A cin’wani kambe, hi ku tirisa kuvhululelwa ko hlawuleka, Jehovha i va gondzisa a vito gakwe, makungo yakwe, ni milayo yakwe. (Fananisa na Ekso. 4:12, 15; 24:12; 34:5-7.) A kuvhululelwa loko ku kumeka lomu ka Mhaka ya Nungungulu a Bhibhiliya, niku ku tira kota ciseketelo ka tigondzo ta lisine xungetano hi kurandza kakwe. (Rom. 15:4; 2 Tim. 3:14-17) A moya wa Nungungulu wu tira kambe kota mugondzisi. — Joh. 14:26.
Zviwutiso zva Bhibhiliya zvi hlamulilweko, ndzima n.° 44 par. 2-3
Zvini lezvi a Bhibhiliya gi wulako xungetano hi kutlhatlheka ka kutihlawulela? A ku Nungungulu hi yena a bohako lezvi zvi to hi humelela?
● Nungungulu i mahile vanhu hi mufananiso wakwe. (Gen. 1:26) A ku hambana ni zvihari lezvi a kutala ka zvikhati zvi mahako zvilo hi ku landza ntumbuluko wa zvona, hina hi tekelele a muvangi wa hina, hikwalaho, ha zvi kota ku kombisa matshamela yo kota lirandzo ni kululama; niku a ku fana naye, hi na hi kutlhatlheka ka ku hlawula.
● A kutala ka zvikhati hi nga ti hlawulela ku hi lava kuva ni wumandziko go tshamisa kuyini. A Bhibhiliya gi hi kuca ku ‘hlawula wutomi . . . hi ku ingisa gezu ga Nungumgulu’, lezvi zvi wulako ku hi fanele ku hlawula ku ingisa zvileletelo zvakwe. (Dhewu. 30:19, 20) Zvi wa nga ta zwisiseka niku yi wa tava xapi ya hombe a ku gi hi kuca ku maha lezvo loku ku wa hi ku a hi na kutlhatlhela ka ku ti hlawulela. Wutshan’wini ga ku hi kurumeta a ku maha lezvi a wulako, Nungungulu i hi khongotela hi lirandzo, aku: “Mayiwako loku a wo ingisa a zvileletelo zva mina! A kurula ka wena ku wa ta khulunga a ku fana ni congo”. — Isa. 48:18.
Liranzo la Nungungulu paj. 199 par. 8
“Ti akeni kukholweni ka nwina loku ku basileko”
8 Jehova laha i hi alakanyisa lezaku loku hi mu ingisa hi hina hi vunekako. I tsumbisa a michachazelo yimbiri loku hi ingisa. A wo ranga hi lezaku a kurula ka hina ku ta khulunga ku khwatsi i congo — ku tava ko renga, ko tala, ni ka simasima. A wa wumbiri hi lezaku a kululama ka hina ku ta fana ni mabyandlati ya bimbi. Loku u yima fungwini wa bimbi, u cuwukisela a mabyandlati na ma wumbulukela, a ginwe nzhako ka ginwani, handle ko kanakana u wona lezaku a ma mbheli. Wa zi tiva lezaku a mabyandlati ma ta simama kuta, ma ta phandluka fungwini lowo kala kupinzuka. Jehova i ngalo a kululama ka wena — ku nga tshamela ga wena ga ku maha za kululama — ku nga fanana nawo. Loku u simama ku ti karatela ku hanya hi kutsumbeka mahlweni kakwe, cima a nga ta ku tsika uwa! (Gonza Tisimu 55:22.) Xana a zitsumbiso lezo zi khumbako mbilu a zi aki a kukholwa ka wena ka Jehova ni ka milayo yakwe yo lulama?
Titshomba ta moya
Perspicaz “Tempo aceitável” par. 1-3
Cikhati ci amukelekako
Ka 2 Va Le Korinte 6:2, mupostoli Pawule i kumbuka cipandze ca ciphrofeto ca Isaya 49:8, ci nge: “Jehovha i ngalo: ‘Ndzi ku hlamulile hi cikhati ci faneleko, ndzi ku vhuna sikwini ga kuhanyisa; ndzi simamile ku ku hlayisa kasi ndzi ku nyikela uva civhumelwano ca tiko, kasi u aketa tiko ni ku va maha va teka a titshomba tabye leti ti wonhilweko’.” Zvi wonekisa ku khwatsi ka mongo wo sangula a magezu lawa ma waya ka Isaya kota muyimeli wa tiko ga Izrayeli. (Isa. 49:3) Ci wa hi ciphrofeto ci nga wulawula hi kutlheliselwa, ci tatisekileko hi khati go sangula a cikhati leci a vaIzrayeli va nga tlhatlhisiwa Bhabhuloni, laha a vaIzrayeli lava va nga hi tikhumbi va nga nyikiwa konvhite leyi: “Humani lahandle!” Va no tlhela tikweni gabye ga mabeleko niku va no aketa tiko lego gi nga hahlulilwe. — Isa. 49:9.
Hambulezvo, a magezu lawa ya ku “kasi ndzi ku nyikela uva civhumelwano ca tiko” ma nga ka vhesi 8 ga cipimo leci ni magezu ma rangileko ma wuliwa ka vhesi 6, ya ku a “nandza” ga Jehovha gi wa ta nyikelwa kota “kuwonekela ka matiko, kasi a kuhanyisa ka [Nungungulu] ku chikela ni le magemeta-musi ya misava”, ma komba lezvaku a ciphrofeto leco ca wuMesiya niku ci wa ta tatiseka ka Jesu Kristu kota “nandza” ga Nungungulu. (Fananisa Isa. 42:1-4, 6, 7 na Mat. 12:18-21.) Kota lezvi ka ku a “cikhati ci amukelekako” ci wa tava cikhati ca Jehovha ca ku “hlamula” ni ku “vhuna” a nandza gakwe, a magezu lawa ma tatisekile a cikhati leci Jesu a nga hi laha misaveni, a cikhati leci a nga “maha mikhongelo ya kukhongotela ni ku kombela, hi kurila ka hombe ni mihloti, ka Loyi a nga hi ni ntamu wa ku mu tlhatlhisa kufeni, niku i no zwiwa hi kota ya lezvi a nga chava Nungungulu”. (Mah. 5:7-9; fananisa na Joh. 12:27, 28; 17:1-5; Luka 22:41-44; 23:46.) Hi ndlela leyo, give “siku ga kuhanyisa” ka N’wana wa Nungungulu niku kuve ka cikhati leco a nga kombisa lezvaku i wa tsumbekile hi kumbhelela niku kota wuyelo ga kona i no “yikwa ntiro wa ku neha kuhanyiswa ka pindzukelwa ka vontlhe lava va mu ingisako”. — Mah. 5:9.
Ahandle ka lezvo, a magezu ya ciphrofeto leco, ma tshahilweko hi Pawule, ma komba lezvaku ci wa ha tava ni kutatiseka ka hombe ka maKristu lawa a nga ma kuca, aku: “Mu nga amukeli a tipswalo ta Nungungulu mahala”, lawa (andzhako ka ku tshaha Isaya 49:8) a nga ma byela, aku: “Makunu leci hi cona cikhati ci amukelekako khwatsi. Hakunene legi i siku ga kuhanyisa.” (2 Kor. 6:1, 2) A maKristu lawo ma wa mahile “Izrayeli wa Nungungulu” kusukela hi Pentekosta wa 33 Nguveni ya Hina zviya mahlweni (Gal. 6:16), kanilezvi ma wa fanele ku kombisa lezvaku ma ringanelwa hi tipswalo leti Nungungulu a nga ma kombisile, hi kona a “cikhati ci amukelekako” ci nga wa tava “siku ga kuhanyisa” hakunene ka wona.
6-12 KA ABRIL
TITSHOMBA TI NGA KA MHAKA YA NUNGUNGULU ISAYA 50-51
Ingisela loyi a gondzisilweko hi Nungungulu
A Mufumo wa Nungungulu wa fuma! paj. 182 par. 5
Ku gondzisa vachumayeli va Mufumo
5 Hi xikhati xi faneleko, Jehova i lo gonzisa N’wana wakwe xungetano hi wutireli legi a nga wa ta gi maha laha misaveni. Wona a xiprofeto lexi xi tlhamuselako a kutirisana ka Mugonzisi wa Hombe ni N’wana wakwe wa matewula. (Gonza Isaya 50:4, 5.) A xiprofeto xi ngalo Jehova i wa vuxa N’wana wakwe loku “gica ni mixo.” A mufananiso lowo wu hi alakanyisa a mugonzisi a vuxako a xigonzani xakwe ni mixo nguvu kasi ku xi gonzisa. A bhuku go kari gi tlhamuselako a Biblia, gi ngalo: “Ko khwatsi Jehova . . . i mu yisa xikoleni a ku fana ni lezi a xigonzani xi mahiwako, a tlhela a mu gonzisa a maxumayelela ni lezi a faneleko ku xumayela.” Le “xikoleni” xa le tilweni, Jehova i gonzisile N’wana wakwe ‘lezi a ta nga wulawula, ni lezi a ta nga kanela.’ (Joh. 12:49) Dadani i tlhelile a gonzisa a N’wana wakwe a magonzisela. Na a hi misaveni, Jesu i lo tirisa khwatsi a gonziselelo yakwe hi ku maha wutireli gakwe ni ku gonzisa a valanzeli vakwe a ku tatisa a wutireli gabye.
Ngona U Nzi Lanzela paj. 133 par. 13
“Ndza mu randza Papayi”
13 Xikhatini xa kuvakona kakwe na a nga seva munhu wa nyama, a N’wana i wa gonzile ka Dadani wakwe hi kuxuva ka hombe. A xiprofeto xi tsalilweko ka Isaya 50:4-6 xi komba lezaku Jehova i nyikile a N’wana wakwe a gonziselelo yo hlawuleka xungetano hi ntiro wakwe kota Messia. Hambu lezi a gonziselelo leyo yi nga patsa a ku gonza xungetano hi kuxaniseka ko kari loku ku nga wa ta mu wela kota A Totilweko wa Jehova, a N’wana i gonzile hi kuxuva ka hombe. Anzhako ka kuva Jesu a tile misaveni zonake a kula ava munhu wa hombe, yena i simamile a xuva a kuya ndlwini ya Dadani wakwe ni ku hlengela ka wukhozeli ni ka gonzo leyi Jehova a nga lava ku yi wona na yi vuvumiswa lomo. Hikwalaho a Biblia gi bika a kutsumbeka ka Jesu ka kuvakona tempeleni ni sinagogeni. (Luka 4:16; 19:47) Loku hi lava ku hlayisa a liranzo la hina na li hanya ni ku tiya ha Jehova, hi fanele ku pinyamela kuva kona mitlhanganwini ya wuKristu, laha hi khozelako kona Jehova hi tlhela hi etisa a wutivi ni ku mu tsakela.
Titshomba ta moya
Perspicaz “Pedreira” paj. 2
Mugodhi
Hi ku tirisa nomu wa muphrofeti Isaya, Jehovha i hi alakanyisa a mugodhi ni lezvi zvi mahiwako ka wona hi ndlela yo fananisa. (Isa. 51:1) Kota lezvi zvi kombisiwako ka vhesi gi landzelako, a “ribye” ku wa hi Abrahama, kota nyapandze wa tiko ga Izrayeli, niku a “mugodhi” ku wa hi Sara loyi a fananisiwako ni hlowo, a mamani wa Isaka, a kokwani wa Izrayeli. (Isa. 51:2) Kota lezvi a kupswaliwa ka Isaka ku kotekileko hi ntamu wa Nungungulu, ku tlhela ku maheka hi cihlamaliso, a mufananiso wa ku kela mugodhi wa ribye wu ngava ni tlhamuselo wo eta hi tlhelo ga moya. Hikwalaho, Dhewuteronome 32:18 i tlhamusela Jehovha kota ‘ribye legi gi nga papayi’ wa Izrayeli, “loyi a nga [mu] pswala” [a gezu galegi ga gin’we gi tirisilweko kasi ku wula Sara ka Isaya 51:2].
13-19 KA ABRIL
TITSHOMBA TI NGA KA MHAKA YA NUNGUNGULU ISAYA 52-53
Jesu i kombisile lirandzo la hombe
Sentinela 15/11/10 paj. 7 par. 2
Vaswa, alani ku kucetelwa hi vanghana va n’wina
2 A ku a vanghana va wena va ku kucetela nguvhu kasi ku maha zvilo zva kubiha? Loku zvi hi lezvo, hikuyini? A ku hi lezvi u lavako ku va ku tsakela? Lezvo ha zvoce a zvi bihangi. A vanhu va hombe vonawu va zvi lava ku tsakelwa hi van’wani. Kani muswa kani munhu wa hombe, i hava a ku tsakelako a kubayisa ka kuchepetiwa. Hambulezvo, kasi ku wula lisine, a ku tiya u yimela lezvi zvi nga zvinene a hi contlhe cikhati zvi nga mahako ku a van’wani va ku dzundza. Hambu Jesu zvi mu humelele lezvo. Kanilezvi contlhe cikhati i wa maha zvilo zva zvinene. Hambu lezvi a vokari va nga landzela a N’wana wa Nungungulu va tlhela va maha vapizani vakwe, a van’wani va wa mu chepeta ni ku a va “chelangi kota hi yena”. — Isa. 53:3.
Profecia de Isaías vhol. 2 paj. 205 par. 25
Jehovha i tlakusile a Nandza gakwe ga wuMesiya
25 A ku Mesiya i wa ti yimisele ku xaniseka ni kufa? Isaya i wula lezvi: “I no hlokisiwa, a vhumela ku xanisiwa, kanilezvi a nga vhululangi nomu wakwe. I no nehiwa a ku khwatsi i yivhana yi gulelwako kudaweni, a ku fana ni yivhu yi miyelako mahlweni ka vatsemi va woya ga yona, a nga vhululangi a nomu wakwe.” (Isaya 53:7) Ka wusiku go gumesa kasi a dawa, Jesu na a kombele a “12 wa mabutho ya tingilozi” kasi ma mu ponisa. Hambulezvo, i wulile lezvi: “Loku ndzo maha lezvo, yi ta tatisekisa kuyini a Mitsalo leyi yi nge zvi fanele ku mahekisa lezvi ke?” (Mat. 26:53, 54) Hikwalaho, “a Yivhana ya Nungungulu” a yi mahangi kani. (Joh. 1:29) A cikhati leci a vapristi lava va tihosana ni madhota va nga mu lumbeta ka Pilatu, Jesu “a nga mu hlamulangi ne ku wula nchumu”. (Mat. 27:11-14) I wa nga lavi ku wula nchumu ci wa nga ta tsandzekisa ku a kurandza ka Nungungulu hi yena ku tatiseka. Jesu i wa ti yimisele a kufa kota yivhu ya muphahlo, na a zvi tiva lezvaku a kufa kakwe ku wa ta tlhatlhisa vanhu vo ingisa ka ciwonho, ni ka mababyi, ni ka kufa.
Titshomba ta moya
Perspicaz “Utensílios” par. 2
Zvibya
A gezu kelí a kutala ka zvikhati gi wula a zvibya zvo hambanahambana zvi nga tirisiwa lomu ka wutshamu go basa. A zvibya lezvo zvi wa patsa tiparato, ni tijaro, ni mafoxola, ni mingelo, ni magarfo, ni zvibya zva ku woka hi zvona ndzilo, ni zvitimo, ni zvigere zva ku tsema hi zvona a titirisido, ni tibasiya, ni tikopo. (Ekso. 25:29, 30, 39; 27:3, 19; 37:16, 23; 38:3; 1 Tih. 7:40-50; 2 Kro. 4:11-22) Kota lezvi zvi nga tiriselwa ku maha mitiro yo basa, a zvibya lezvo zvi wa woniwa kota zvibya “zvo basa”. (1 Tih. 8:4) Hi cigelo leco, kota lezvi a vaJudha lava va nga huma hi Bhabhuloni hi 537 na ku nga seva Nguva ya Hina va ngava ni thomo ga ku rwala a zvibya zvo basa lezvi hosi Nebhukadnezare a nga tekile le Jerusalema va tlhela nazvo, va wa fanele ku tshama va basile hi tlhelo ga wukhozeli ni ga mahanyela. A cileletelo leci ci ngata kota ciphrofeto ci waya kabye, caku: “Sukani! Sukani! Humani lomo [Bhabhuloni]; mu nga henyi ne cilo cin’we co kala ku hlazveka! Humani cikari kakwe, mu ti basisa, n’wina lava mu rwalako a zvibya zva Jehovha.” (Isa. 52:11) Lezvo zvi wa nga nyimi basi laha ka ku va hlamba miri va basa kota lezvi a nayo wu nga laya. Zvi wa lava ku vava ni mbilu yi basileko. A cikhati leci mupostoli Pawule a nga tsalela Va Le Korinte, i tirisile a magezu ya Isaya 52:11 kasi ku komba lezvaku a maKristu wonawu ma fanele ku potsa ku ti nyenyezisa hi tlhelo ga nyama ni ga moya. — 2 Kor. 6:14-18; 7:1.
20-26 KA ABRIL
TITSHOMBA TI NGA KA MHAKA YA NUNGUNGULU ISAYA 54-55
I ntsengo muni u longileko ku hakhela?
Sentinela 15/09/09 paj. 21 par. 3
A gondziselelo ya Nungungulu yi na ni lisima la hombe
3 Kota lezvi Jehovha a nga munene, i ti yimisele ku gondzisa vanhu vo kala kumbhelela. Na a wulawula hi ndlela yo phrofeta xungetano hi maKristu ma totilweko, Isaya 54:13 i ngalo: “Vontlhe a vana va wena va ta gondzisiwa hi Jehovha, ni kurula ka vana va wena ku ta andza.” A tshinya ga magezu lawa ga tira kambe ka “tiyivhu tin’wani” ta Kristu. (Joh. 10:16) Lezvo zva dlunyateka ka ciphrofeto co kari ci tatisekako masikwini ya hina. Ka muwoniso wo kari, Isaya i wonile vanhu va matiko wontlhe na va khitikana vata wukhozelini ga lisine. I va tlhamusela na va byelana, vaku: “Tanani, a hi kandziheni hiya citsungeni ca Jehovha, a ndlwini ya Nungungulu wa Jakobe. I ta hi gondzisa a tindlela takwe; hina hi ta famba tisokweni takwe.” (Isa. 2:1-3) I thomo ga hombe a ku gondzisiwa hi Nungungulu!
Murindzeli 11.18 paj. 4-5 par. 6-7
“Xava lisine, u nga tshuki u li xavisa”
6 Lera Isaya 55:1-3. Lezvi Jehovha a nga wula ka mavhesi lawa zvi hi vhuna ku zwisisa ku zvi wula yini a ku xava lisine. Jehovha i fananisa magezu yakwe ya lisine ni mati, ni masi kutani leti, ni vhinyo. A ku fana ni lezvi a mati yo titimela ma timako tora ga munhu, a lisine leli hi gondzako la hi tangalisa. Niku a ku fana ni lezvi a leti yi mahako ku a n’wanana a kula khwatsi a tlhela a tiya, a lisine la Bhibhiliya li gi tiyisa nguvhu a wunghana ga hina na Jehovha. Jehovha i tlhela a fananisa magezu yakwe ni vhinyo. Hikuyini? A Bhibhiliya gi li a vhinyo yi tsakisa mbilu ya munhu. (Lis. 104:15) Hikwalaho, loku Jehovha a hi byela ku ‘xavani a vhinyo’, o hi byela ku loku hi landzela zvileletelo zvakwe, hi ta tsaka. (Lis. 19:8) Jehovha i tirisa mifananiso leyo kasi ku hi vhuna ku zwisisa lezvi hi vhunekisako zvona loku hi gondza lisine hi tlhela hi hanya hi lona. Zvezvi a hi bhuleni hi ntlhanu wa zvilo lezvi kuzvilava zvi lavileko ku hi zvi tsika kasi hi xava lisine.
ZVINI U ZVI TSIKILEKO KASI U XAVA LISINE?
7 Cikhati. Zvi lava cikhati kasi ku a munhu a ingisela mahungu ya Mufumo, a lera Bhibhiliya ni mabhuku ma seketelwako ka gona, a gondza Bhibhiliya ni Vakustumunyu va Jehovha, a longisela mitlhangano, ni kuya mitlhanganweni leyo. Kasi hi maha zvontlhe lezvo, hi fanele ku tirisa cikhati leci hi nga wa ta ci tirisela ku maha zvilo zvin’wani, zvo kala zvi nga hi zva lisima nguvhu. (Lera Va Le Efesusi 5:15, 16, ni tlhamuselo wa lahasi.) Zvi teka cikhati muni kasi ku gondza lisine-tshinya la Bhibhiliya? Lezvo zviya hi munhu ni munhu. A ku gondza xungetano hi wutlhari ga Jehovha, tindlela takwe, ni lezvi a zvi vangileko a zvi na magumo. (Rom. 11:33) A Murindzeli wo sangula ku humesiwa (hi ciNgiza) wu fananisile lisine ni “citsangi ca citsongwani”; wu guma wuku: “U nga kumi citsangi cin’we ca lisine basi uku zvi enele. Loku a citsangi cin’we ca lisine ci wo enela, Nungungulu i wa nga ta hi gondzisa zvilo zvin’wani zvo tala lomu ka Mhaka yakwe. Hikwalaho, lavetela cin’wani, u tlhela u lavetela cin’wani, u nga karali.” Maku hi nga ha ti wutisa lezvi: ‘Ndzi gondzile zvilo zvotala ku kota kwihi xungetano hi Jehovha?’ Hambu a cikhati hi to hanya kala kupindzuka, contlhe cikhati ku tava ni zvotala zvi to lava ku hi gondza xungetano hi Jehovha. Hambulezvo, zva lisima a ku hi tirisa cikhati ca hina kasi hi gondza zvotala hi laha hi zvi kotako hi kona. Wona cikombiso ca wokari a mahileko lezvo.
Beneficie-se paj. 14 par. 3-5
“Chelani kota ka lezvi mu ingiselisako zvona”
Ku na ni zvilo zvo tala zvi nga hi colopetelako ku hi demba khwatsi ndleve. Kuzvilava ku na ni zvilo zvo tala zvi hi karatako. Ahandle ka lezvo, a kupima ka hina ku nga colopetelwa hi guwa kutani loku a vanhu va ku tsangila-tsangila lahandle kutani lomu hi khomelako kona mutlhangano. Loku hi nga tizwi khwatsi kambe zvi nga tshuka zvi hi karatela a ku demba khwatsi ndleve; niku a kutala ka zvikhati, lava va nga ni zvivanana zvi lava ku va veka kupima ka mutlhangano ni ka vanana hi khati gin’we. Zvini zvi nga hi vhunako ku hi veka kupima ka mutlhangano?
A matihlo ma maha cipandze ca lisima kasi ku hi vhuna ku veka kupima. Tirisa matihlo ya wena kasi ma ku vhuna ku veka kupima hi ku cuwuka mukaneli. Loku a kumbuka mutsalo wa Bhibhiliya, vhulula a Bhibhiliya ga wena u landzela a cikhati leci a lerako hambu loku a mutsalo lowo u wu tiva khwatsi. Zama ku u nga hundzulusi hloko khati ni khati ku zwalako guwanyana. Loku u vhumela ku colopetelwa hi lezvi u zvi wonako, u ta luza zvotala ka lezvi zvi wuliwako laha ciluvelweni.
Loku a “a kukarateka” ku tshuka ku maha lezvaku zvi ku karatela ku veka kupima, khongela ka Jehovha u kombela lezvaku a ku nyika kurula ku lavekako kasi u zvi kota ku ingisela khwatsi. (Lis. 94:19; Filp. 4:6, 7) U nga maha lezvo khati ni khati zvi lavekako. (Mat. 7:7, 8) A mitlhangano ya bandla malulamiselo ya Jehovha. Tiyiseka lezvaku Jehovha i lava ku u vhuneka hi yona. — 1 Joh. 5:14, 15.
Titshomba ta moya
Murindzeli 01.19 paj. 6 par. 14-15
“U nga karateki, hakuva ndzi Nungungulu wa wena”
14 A mhaka yo sangula, hi lezvaku kota vapizani va Kristu, hi rindzela ku vengiwa. (Mat. 10:22) Jesu i phrofetile lezvaku a vapizani vakwe va wa ta xanisiwa nguvhu masikwini lawa yo gumesa. (Mat. 24:9; Joh. 15:20) A Mhaka ya wumbiri hi leyi: A ciphrofeto ca Isaya ci rangile ci hi tlharihisa lezvaku a valala va hina va wa nga ta hi venga basi; va wa ta tirisa matlhari yo hambanahambana kasi ku hi vhukela. A matlhari lawo, ma wa ta patsa ku sasekisela mawunwa yabye ma ku khwatsi lisine; va hi lumbeta ni ku hi xanisa hi xapi ya tshisela ga cima. (Mat. 5:11) Jehovha a nga ta vhalela valala va hina lezvaku va nga hi vhukeli hi matlhari lawo. (Efe. 6:12; Kuv. 12:17) Kanilezvi, a hi na cigelo ca ku chava. Hikuyini?
15 Wona mhaka ya wunharu hi faneleko ku yi alakanya: Jehovha i te a ku na “tlhari” gi tirisiwako kasi ku vhukela hina gi to “humelela”. A ku fana ni lezvi a khurisi go kari gi hi vhikelako ka cingulo, Jehovha yenawu wa hi vhikela “moya wa la’vo tshisa”. (Lera Isaya 25:4, 5.) A valala va hina va nga ta tshuka va zvi kota ku hi lovisa. — Isa. 65:17.
27 KA ABRIL-3 KA MAIO
TITSHOMBA TI NGA KA MHAKA YA NUNGUNGULU ISAYA 56-57
Ha tsaka hi lezvi Jehovha a nga Nungungulu wa hina
Profecia de Isaías vhol. 2 paj. 269 par. 14-16
Jehovha wa vhuxa moya wa lava vo ti koramisa
14 Kanilezvi a cikhati ca Nungungulu ca ku va kombisa lihlazva-mbilu ci wa ta mbhela. Na a wulawula hi cikhati leco, Jehovha, i ngalo: “Ndzi ta tivisa lezvi wena n’winyi u nge kululama, ni mitiro ya wena; zvona zvi nga ta ku vhuna nchumu. Laha u to rila u lava ku vhuniwa, a zvifananiso zva wena lezvi u zvi hlengeleteleko zvi nga ta ku tlhatlhisa. Zvontlhe zvi ta kukuletwa hi moya, zvi buvhetwa hi kuhefemula zviya kule”. (Isa. 57:12, 13a) Jehovha i wa ta paluxa a kululama ko fayelisela ka Judha. A mitiro yabye yo farisa yi wa nga ta siza nchumu. A zvilo ni zvifananiso lezvi va nga zvi ‘hlengeletele’ zvi wa nga ta va ponisa. Laha a khombo gi nga wa ta chikela, a vanungungulu lava va nga va tsumba va wa ta swiyeliwa hi moya.
15 A magezu ya Jehovha ma tatisekile hi 607 na ku nga seva Nguva ya Hina. Kuve ka cikhati leci Nebhukadnezare, a hosi ya Bhabhuloni, a nga hohlola Jerusalema, a hisa tempeli a tlhela a teka vaJudha vo tala a va maha tikhumbi. “Hizvalezvo, Judha i no khomiwa tikweni gakwe a yisiwa wukhumbini.” — 2 Tih. 25:1-21.
16 Hi kufanana, a zvifananiso zvo tala zvi tirisiwako hi wukhongeli ga mawun’wa zvi nga ta ponisa munhu sikwini ga zanga ya Jehovha. (Isa. 2:19-22; 2 Tes. 1:6-10) A wukhongeli gontlhe ga mawunwa zvin’we ni misalela ya “Bhabhuloni wa hombe” zvi ta swiyelwa zvi ku bhi. A civandza co fananisa co pswhuka zvin’we ni timhondzo ta cona ta 10 zvi ta phanga Bhabhuloni wa hombe zvi mu ‘maha cimbyiri niku zvi taga a nyama yakwe zvi tlhela zvi mu hisa ndzilweni aswa a ku bhi’. (Kuv. 17:3, 16, 17) A ho ku tsaka hi lezvi hi ingisileko a cileletelo leci caku: “Humani ka yena, n’wina vanhu va mina, loku mu nga lavi ku hlengela naye zviwonhweni zvakwe”. (Kuv. 18:4, 5) Ngha hi nga tshuki hi tlhela kakwe ni mitirweni yakwe!
Murindzeli 06.18 paj. 7 paj. 16
“A Mufumo wa mina a hi wa misava”
16 A vamakabye lavo va mahile khwatsi hi ku cica mahanyela yabye! A Bhibhiliya gi li a vanhu va fana ni bimbi legi gi vhindlukako gi tlhela gi ngavi ni ku rula. (Isa. 17:12; 57:20, 21; Kuv. 13:1) A timhaka ta politika ti vhuxa tiholova cikari ka vanhu, ti va maha va avana, ti tlhela ti va yisa ka tihanyi. Kanilezvi hina hi na ni kurula niku hi na ni wumun’we. Loku Jehovha a wona lezvi a vanhu va nga avanisa zvona tikweni legi, handle ko kanakana wa tsaka nguvhu hi ku wona vanhu vakwe na va bohene. — Lera Zefaniya 3:17.
Perspicaz “Terra” par. 21
Misava
A gezu misava ga tirisiwa kambe hi ndlela yo fananisa kasi ku wula a zvilo zvo tiya nguvhu ni zvo kala ku tsekatseka zva vanhu. Kanilezvi a zvilo zvo kala ku tiya ni zva ku tsekatseka zva vanhu zvi yimelwa hi tshamela ga bimbi. — Isa. 57:20; Jak. 1:6; Jud. 13; fananisa na Kuv. 12:16; 20:11; 21:1.
Perspicaz “Paz” par. 3
Kurula
Kuva ni kurula. Jehovha i Nungungulu wa kurula (1 Kor. 14:33; 2 Kor. 13:11; 1 Tes. 5:23; Mah. 13:20) ni Cibuka ca kurula (Mitse. 6:26; 1 Kro. 22:9; Lis. 4:8; 29:11; 147:14; Isa. 45:7; Rom. 15:33; 16:20), hakuva a kurula i handzu wa moya Wakwe wo basa. (Gal. 5:22) Hi cigelo leco, a kurula ka lisine ku ngo kumiwa ntsena hi lava va nga ni kurula na Nungungulu. Loku munhu a maha zvihoxo zva hombe zvi nga wonha a wunghana gakwe na Nungungulu zvi tlhela zvi mu vangela kukarateka. A mutsali wa Tisimu i te: “A marambu ya mina a ma ruli hi kota ya ciwonho ca mina.” (Lis. 38:3) Hikwalaho, lava va lavako kuva ni kurula va tlhela va ku hlota va fanele ku ‘fularela zvakubiha, va maha zvazvinene’. (Lis. 34:14) Loku ku nga hi na kululama a ku na kurula. (Lis. 72:3; 85:10; Isa. 32:17) Hi caleco ci mahako ku lava va kubiha va ngavi ni kurula. (Isa. 48:22; 57:21; fananisa na Isa. 59:2-8.) Hi tlhelo gin’wani, a kurula ku kumiwa hi lava va ti nyikeleko ka Jehovha hi mbilu yontlhe, va randzako a nayo Wakwe (Lis. 119:165) va tlhela va hanya hi milayo yakwe. — Isa. 48:18.
Titshomba ta moya
Sentinela 15/01/07 paj. 10 par. 3
Timhaka-tshinya ta bhuku ga Isaya — Cipandze 2
56:6 — Hi vamani “a valuveli”, niku va “namarela ka civhumelwano [ca Jehovha] hi ndlela muni? “A valuveli” “tiyivhu tin’wani” ta Jesu. (Joh. 10:16) Va “namarela” ka civhumelwano ciswa hi lezvi va ingisako a milayo ya civhumelwano leco, va seketela hi mbilu yontlhe a malulamiselo ma seketelwako ka cona, vaga zvakuga zvalezvi zva zvin’we zva moya ni maKristu ma totilweko ni ku ma seketela ntirweni wa ku chumayela Mufumo ni ku maha vapizani.
Sentinela 01/11/06 paj. 27 par. 1
Hi kombisa cichavo hi mitlhangano ya hina yo basa
JEHOVHA i tlhanganisa vanhu vakwe, ku nga maKristu ma totilweko ni vanghana vabye, kasi va mu khozela ‘citsungeni cakwe co basa’. I maha lezvaku va tsaka lomu ‘ndlwini yakwe ya mukhongelo’, a tempeli yakwe ya moya, yi nga “yindlu ya mukhongelo ya matiko wontlhe”. (Isa. 56:7; Mar. 11:17) A zvimaho lezvo zvi komba lezvaku a wukhozeli ga Jehovha gi basile, gi hlazvekile niku gi tlhakukile. A cikhati leci hi kombisako a cichavo leci ci faneleko hi mitlhangano ya hina kasi ku gondza ni ku khozela, hi kombisa lezvaku a zvilo zvo basa hi zvi wonisa lezvi Jehovha a zvi wonisako zvona.