Vaheberu

7 Hikusa Melkisedeki hosi ya le Salema lweyi a nga muprista wa Xikwembu Xa Ku Tlakuka, a tlhangane na Abrahamu na a vuya hi ku dlayeni ka tihosi, se a katekisa Abrahamu,+ 2 kutani Abrahamu a mu nyika* wukhume* la hinkwaswu leswi a nga swi kuma. Vito la yena loko li tlhamuseliwa, xa ku sungula li vula: “Hosi Ya Ku Lulama”; xa wumbirhi i hosi ya Salema, leswi vulaka: “Hosi Ya Ku Rhula.” 3 Leswi a a nga na vapsali, ni leswi ku kalaka ku nga tiviwi nchumu hi ta vavhovho va yena, ni leswi ku kalaka ku nga tsaliwanga leswaku a psaliwe siku muni kumbe a fe siku muni, a fana ni N’wana wa Xikwembu naswona a tama a va muprista hi masiku ni masiku.+

4 Hi nga vonani ku kula ka Melkisedeki, lweyi vhovho* Abrahamu a nga mu nyika swa wukhume la minchumu yayinene leyi a nga yi teka nkama a nga hlula nyimpini.+ 5 Phela hi ku ya hi Nawu, vana va Levhi+ lava nga vaprista a va fanele va yamukela swa wukhume leswi a swi ta humesiwa hi vanhu,+ ku nga vamakwavu, hambileswi a va li vatukulu* va Abrahamu. 6 Kambe munhu lweyi, lweyi a a nga li wa lixaka la Valevhi, a yamukele swa wukhume leswi nga humesiwa hi Abrahamu a tlhela a katekisa lweyi Xikwembu a xi mu tshembisile.+ 7 Vanhu hinkwavu va nga pfumela swaku munhu lweyi a katekisaka i mukulu ka lweyi a katekisiwaka. 8 Valevhi va yamukele swa wukhume kambe a va li vanhu lava faka, kambe wanuna lwemun’wani lweyi a nga yamukela swa wukhume, hi lweyi Matsalwa ma vulaka swaku wa hanya.+ 9 Naswona ku nga vuliwa swaku hambi Levhi lweyi a nga yamukela swa wukhume, a hakele swa wukhume hi ku tirhisa Abrahamu, 10 hikusa a wa ha li phakati* ka vhovho wa yena nkama Melkisedeki a nga tlhangana na Abrahamu.+

11 Loko swi ku vaprista va Valevhi+ a va ta swi kota ku yendla leswaku vanhu va hetiseka,* (hikusa wuprista a ku li xiyenge xa Nawu lowu nga nyikiwa vanhu), hi mhaka muni a ka ha ta laveka muprista mun’wani wa ku fana na Melkisedeki+ ku nga li wa ku fana na Aroni? 12 Hikusa leswi ntirho wa wuprista wu txintxiwaka, swa fanela swaku na wona Nawu wu txintxiwa.+ 13 Hikusa wanuna lweyi ku vuliwaka swilo leswi hi yena a a li wa lixaka lin’wani, leli ka lona ku kalaka ku nga na munhu lweyi a nga tshama a tirha ka altari.+ 14 Hikusa swi tiviwa kahle leswaku Hosi ya hina yi hume ka lixaka la Yuda,+ kambe Moxe a nga zanga a vula nchumu hi vaprista lava humaka ka lixaka lolelo.

15 Naswona leswi swi tikombe kahle nkama ku nga humelela muprista mun’wani+ wa ku fana na Melkisedeki,+ 16 lweyi a nga muprista ku nga li hi mhaka ya lixaka leli a humaka ka lona hi ku ya hi Nawu, kambe hi mhaka ya leswi a nga ni matimba lawa ma mu nyikaka wutomi la ku kala li nga helisiwi.+ 17 Hikusa ka tsalwa lin’wani ku vuliwa leswi hi yena: “U muprista hi nkama wa ku kala wu nga heli ku fana na Melkisedeki.”+

18 Kutani minawu ya khale yi helisiwile hikusa a yi na ntamu naswona a ya ha tirhi.+ 19 Hikusa Nawu a wu yendlanga nchumu ni xin’we xi va xa ku hetiseka,*+ kambe ntshembo wa ku yampsa+ lowu Xikwembu xi nga hi nyika wona wu yendle swaku swilo swi hetiseka* naswona hi kota ku tshinela ka Xikwembu hi ku tirhisa wona.+ 20 Naswona muprista lweyi, a nga humelelanga na ku nge se fungiwa 21 (hikusa vhela ku ni vanhu lava nga va vaprista na va nga funganga kambe lweyi a ve muprista hi mhaka ya ku funga loku nga yendliwa na ku kombetela ka yena hi Lweyi a nga vula leswi: “Yehovha a fungile naswona a nge txintxi:* ‘U muprista hi nkama wa ku kala wu nga heli”),+ 22 Yesu i xitiyisekisu xa ntwananu wa ku yampsa.+ 23 Vaprista va vanyingi va boheke ku txintxana+ hikusa lifu li yendle swaku va nga tami va yendla ntirho wa vona, 24 kambe leswi a hanyaka hi masiku ni masiku,+ a nga txintxiwi hi munhu ka ntirho wa yena wa wuprista. 25 Kutani wa swi kota ni ku va ponisa hi ku helela lava tshinelaka ka Xikwembu hi ku tirhisa yena, hikusa wa hanya hi masiku ni masiku leswaku a va kombelela.+

26 Phela swa fanela ku va ni muprista wamukulu wa ku tshamisa xileswo, wa ku tshembeka, a kalaka a nga na nandzu, a kalaka a nga chakanga,+ a nga hambana ni vadjohi naswona a nga tlakuka ku tlula matilo.+ 27 A hambanile ni vaprista lavayani vavakulu; a nga boheki ku humesa magandzelo siku ni siku,+ a rhanga hi ya swidjoho swa yena a gamesa hi ya swidjoho swa vanhu,+ hikusa leswi a swi yendle kan’we ntsena swi helela kolanu nkama a nga tinyikela.+ 28 Nawu wu langa vadjohi swaku va va vaprista vavakulu,+ kambe rito la ku funga+ leli nga yendliwa na se Nawu wu li kona, li veka N’wana lweyi a nga yendliwa wa ku hetiseka*+ hi nkama wa ku kala wu nga heli.