Mahungu Ya Ku Tsakisa Ya Ku Tsaliwa Hi Matewu

15 Kutani ku ta Vafarisi ni vatsali+ lava taka hi Yerusalema, va tshinela ka Yesu va ku: 2 “Hi mhaka muni vadjondzisiwa va wena va nga landzeli swihena swa vavhovho? Hi xikombiso, a va hlambi mavoko* loko va lava ku dla swakudla.”+

3 A va hlamula a ku: “Hi mhaka muni mi tlula nawu wa Xikwembu hi mhaka ya swihena swa n’wina?+ 4 Hi xikombiso, Xikwembu xi te: ‘Hlonipha papayi wa wena ni mamani wa wena,’+ xi tlhela xi ku: ‘Lweyi a rhukaka papayi wa yena kumbe mamani wa yena a a dlayiwi.’+ 5 Kambe n’wina mi li: ‘Lweyi a byelaka papayi wa yena kumbe mamani wa yena a ku: “A ni nge ku pfuni hikusa hinkwaswu leswi ni nga na swona se ni swi nyike Xikwembu swaku swi va munyikelo,”+ 6 a nga ha boheki ku hlonipha papayi wa yena nikutsongo.’ Hi ku yendla leswo, mi yendle rito la Xikwembu li nga pfuni nchumu hi mhaka ya swihena swa n’wina.+ 7 Vakanganyisi ndzin’wina! Muprofeta Esaya a a hlaya n’wina nkama a nga ku:+ 8 ‘Vanhu lava va ni hlonipha hi nomo ntsena, kambe a swi humi mbilwini. 9 Va tikarhata mahala hi ku ni gandzela, hikusa leswi va swi djondzisaka i minawu ya vanhu ntsena.’”+ 10 Se Yesu a vitana xitshungu xi ta kusuhi na yena, kutani a ku: “Yingisani mi tlhela mi twisisa leswi ni swi vulaka:+ 11 Leswi chakisaka munhu a hi leswi nghenaka ka nomo wa yena; kambe hi leswi humaka hi ka nomo wa yena.”+

12 Se vadjondzisiwa va ta, va ku: “Indjhe wa swi tiva swaku leswi u nga swi vula swi va kwatisile Vafarisi?”+ 13 A va hlamula a ku: “Nsinya lowu kalaka wu nga byaliwanga hi Papayi wa mina wa le matilweni wu ta tsuvuliwa. 14 Va tshikeni. I vakongomisi lava nga fa matihlo. Phela loko munhu lweyi a nga fa matihlo a kongomisa munhu lweyi a nga fa matihlo, hinkwavu va vambirhi va ta wela xikheleni.”+ 15 Pedru a mu hlamula a ku: “Hi tlhamuseli kahle xifaniso lexi.” 16 Kutani a ku: “Kasi na n’wina a mi se swi twisisa?+ 17 A mi swi tivi swaku lexi munhu a xi dlaka, xi nghena hi nomo, xi ya ka marhumbu xi gama xi tlhela xi huma? 18 Kasi leswi humaka hi ka nomo swi ta hi le mbilwini, se leswo hi swona swi chakisaka munhu.+ 19 Hi xikombiso, mimpimiso ya ku biha,+ ku dlaya hi maxivomu, ku mbuyeta, wuntunga la swa masangu,* ku yiva, wumboni la mavunhwa ni ku rhuketela, swi ta hi ka mbilu. 20 Leswo hi swona leswi chakisaka munhu; kambe ku dla swakudla na u nga hlambanga mavoko* a swi chakisi munhu.”

21 Nkama Yesu a nga suka kolanu, a ye ka madoropa ya Tiru na Sidoni.+ 22 Kutani ku ta wansati wa Mufenisiya lweyi a taka hi le ka lin’we la madoropa lawa, a huwelela a ku: “N’wana wa Davhida, ni tweli wusiwana Hosi ya mina. Ntombhi ya mina yi hlupheka hintamu hileswi yi nga ni dimoni.”+ 23 Kambe Yesu a nga mu hlamulanga nchumu. Kutani vadjondzisiwa va yena va ku: “Mu hlongoli hikusa a hi tinga tindleve.” 24 A va hlamula a ku: “Xikwembu a xi ni rhumanga ka vanhu hinkwavu kambe xi ni rhume ntsena ka tinyempfu leti nga lahleka ta yindlo ya Israyele.”+ 25 Kambe wansati a fika a khizama a ku: “Hosi, ni pfuni!” 26 Yesu a mu hlamula a ku: “A hi swinene ku teka pawu la vana u li nyika swimbyanyani.” 27 Wansati a ku: “Ina Hosi; phela hambi swimbyanyani swi dla matlhantlha lama waka hi ka meza wa n’winyi wa swona.”+ 28 Kutani Yesu a mu hlamula a ku: “Wansati, lipfumelo la wena i likulu; a swi yendleki hilaha u navelaka hi kona.” Se ntombhi ya yena yi hanya hi nkama wolowo.

29 Nkama Yesu a nga suka kolanu, a fike kusuhi ni Lwandle la Galileya,+ kutani a ya ka ntshava a fika a tshama kona. 30 Se xitshungu xaxikulu xi mu tshinelela na xi ni vanhu lava khwitaka, swilima, va ku fa matihlo, timbheveve ni van’wani va ku tala va ku vabya; va fika va va veka minengeni ya yena se a va hanyisa.+ 31 Loko xitshungu xi vona timbheveve ti vulavula, lava ku limala va hanyisiwa, lava khwitaka va famba ni va ku fa matihlo va vona, xi hlamala, kutani xi dzunisa Xikwembu xa Israyele.+

32 Kambe Yesu a vitana vadjondzisiwa va yena a ku: “Ni xi twela wusiwana xitshungu lexi,+ hikusa se xi tshame na mina masiku manharhu naswona a xi na swakudla; kutani a ni lavi ku xi tlhelisela makaya na xi twa ndlala, hikusa xi nga djiyela ndleleni.”+ 33 Kambe vadjondzisiwa va ku: “Hi ta ma kuma kwini mapawu ya ku xurhisa xitshungu hinkwaxu lexi lani nhoveni?”+ 34 Se Yesu a va vutisa a ku: “Mi ni mapawu mangaki?” Va ku: “Hi ni 7 wa mapawu ni swihlampfani.” 35 Kutani, loko se a byele xitshungu swaku xi tshama hansi, 36 a teka 7 wa mapawu ni tihlampfi, a khensa, a gama a swi khemelela a nyika vadjondzisiwa, se vadjondzisiwa va phakela xitshungu.+ 37 Hinkwavu va dla va xurha, naswona va hlengeletela leswi nga sala, swi tata 7 wa mindzhava yayikulu.+ 38 Ku dle 4.000 wa vavanuna, na ku nga kontiwi vavasati ni vana. 39 Hi wugamu, loko se a tlhelise xitshungu, a nghena ka boti a ya ka tiko leli vitaniwaka Magadala.+