Varoma

3 I ntxini lexi Muyuda a va tlulaka hi xona van’wani? Kumbe ku tsema nsuvu* swi pfuna yini ke? 2 A va tlula hi tindlela hinkwatu. Xaxikulu ka hinkwaswu, hileswi a nga nyikiwa marito ya ku kwetsima ya Xikwembu.+ 3 Se hi ta ku yini hi Vayuda van’wani lava kalaka va nga tshembekanga? Leswi va kalaka va nga na lipfumelo, swi lava ku vula swaku Xikwembu a xi tshembeki? 4 Nikutsongo! Hambiloko vanhu hinkwavu vo va vahembi,+ Xikwembu xi ta tshama xi li ni ntiyiso,+ hilaha swi nga tsaliwa hi kona: “Leswaku u ta voniwa na u lulamile loko u vulavula, u tlhela u hlula loko u yavanyisiwa.”+ 5 Kambe loko hi yendla swa ku biha, vanhu va swi vona swaku Xikwembu xi lulamile. Se ina ka, leswo swi lava ku vula swaku Xikwembu a xi lulamanga loko xi hi khatisa? (Ni vulavulisa leswi vanhu va pimisisaka swona.) 6 Nikatsongo! Loko Xikwembu a xi nga lulamanga, a xi ta yi thethisisa ku yini misava ke?+

7 Kambe loko mavunhwa ya mina ma swi kombisa kahle swaku Xikwembu xi ni ntiyiso ma tlhela ma yendla swaku xi dzunisiwa, hi mhaka muni mi ni thethisa ingi no va mudjohi? 8 Naswona hi mhaka muni hi nga vuli hi ku: “A hi yendleni swa ku biha swaku ku ta humelela swaswinene” hilaha van’wani va hi lumbetaka hi kona? Ndlela leyi vanhu volavo va yavanyisiwaka hi yona ya va fanela.+

9 Se ina ka, leswo swi lava ku vula swaku hina ha yampsa? Ihim! Hilaha hi nga tlhamusela hi kona, Vayuda hinkwavu ni Vagriki hinkwavu va le hansi ka xidjoho;+ 10 hilaha swi nga tsaliwa hi kona: “A ku na munhu ni mun’we wa ku lulama;+ 11 a ku na lweyi a twisisaka naswona a ku na lweyi a lavaka Xikwembu. 12 Vanhu hinkwavu va hume ndleleni, hinkwavu a va ha pfuni nchumu; a ku na munhu ni mun’we lweyi a yendlaka swaswinene.”+ 13 “Nkolo wa vona i sirha la ku pfuleka; va tirhise lirimi la vona swaku va hemba.”+ “Minomo ya vona yi ni vhenenu la tinyoka.”*+ 14 “Naswona nomo wa vona wu tale hi nhlambha ni marito ya ku tlhava.”+ 15 “Minenge ya vona yi tsutsumela ku halata ngati.”+ 16 “Minkama hinkwayu va yendlela van’wani swa ku biha ni ku va twisa ku vava 17 naswona a va yi tivi ndlela ya ku va ni ku rhula ni van’wani.”+ 18 “A va xi chavi Xikwembu.”+

19 Ha swi tiva swaku hinkwaswu leswi Nawu wu swi vulaka swi kongoma lava nga hansi ka wona, naswona swi yendleliwe ku pfala minomo ya vanhu hinkwavu ni leswaku misava hinkwayu yi khatisiwa hi Xikwembu hileswi yi nga ni nandzu ka xona.+ 20 Se a nga kona lweyi Xikwembu xi nga ta vulaka swaku a lulamile hileswi a landzelaka nawu,+ hikusa nawu wu yendla swaku hi xi tiva kahle xidjoho.+

21 Kambe swoswi Xikwembu xi kombise ku lulama ka xona+ na xi nga tirhisi Nawu, hilaha swi nga vuliwa hi kona hi Nawu ni Vaprofeta.+ 22 Hinkwavu lava nga ni lipfumelo va nga fikelela ku lulama ka Xikwembu loko va pfumela ka Yesu Kreste hikusa a ku na tiko la ku yampsa ku tlula lin’wani.*+ 23 Hinkwavu va djohile naswona a va swi koti ku kombisa wumunhu la ku hlamalisa la Xikwembu.+ 24 Xikwembu xi va vona na va lulamile hi mhaka ya nkutsulu lowu nga hakeliwa hi Kreste Yesu+ leswaku xi va ponisa. Leyi i nyiko+ leyi va nga nyikiwa hi Xikwembu hi mhaka ya timpsalu ta xona tatikulu.+ 25 Xikwembu xi mu nyikelile a va gandzelo swaku vanhu va va ni ku rhula ni Xikwembu+ hi ku va ni lipfumelo ka ngati ya yena.+ Xi yendle leswi leswaku xi kombisa ku lulama ka xona, hikusa hi ku lehisa mbilu ka xona a xi rivalela swidjoho leswi nga yendliwa ka nkama lowu nga hundza. 26 Kambe xi tlhela xi hi komba ku lulama ka xona+ namuntlha hi ku vula swaku va lulamile lava nga ni lipfumelo ka Yesu.+

27 Hi ni xivangelo xa ku tibuma? Nikutsongo. Hi nga tibuma hi ku yingisa Nawu?+ Nikutsongo. Kambe hi nga tibuma hi ku yingisa nawu lowu lavaka lipfumelo. 28 Hikusa ha swi tiva swaku munhu a vitaniwa wa ku lulama hi lipfumelo, ku nga li hi mintirho leyi fambisanaka ni nawu.+ 29 Xikwembu i xa Vayuda ntsena?+ Vanhu va matiko ke, a hi Xikwembu xa vona ke?+ Ina, na vona vamatiko i xa vona.+ 30 Leswi Xikwembu xi nga xin’we,+ xi ta vula swaku vanhu lava nga tsema nsuvu ni lava kalaka va nga tsemanga va lulamile+ hi mhaka ya lipfumelo la vona. 31 Se swi lava ku vula swaku hi dlaya Nawu hi mhaka ya lipfumelo la hina? Nikutsongo! Kambe ho wu seketela.+