Tikronika Ta Wumbirhi

21 Yehoxafati a gama a fa, a lahliwa lani vavhovho va yena va nga lahliwa kona ka Doropa la Davhida; se Yehorama n’wana wa yena a va hosi.+ 2 Vamakwavu va Yehorama, ku nga vana va Yehoxafati, a ku li Azariya, Yehiyele, Zakariya, Azariya, Mikayele na Xefatiya; hinkwavu lava a va li vana va Yehoxafati hosi ya Israyele. 3 Papayi wa vona a a va nyike minchumu ya yinyingi ya woru, ni prata ni minchumu ya lisima ku patsa ni madoropa lawa ma nga ni mimuru ya ku tiya aYuda;+ kambe mfumu a wu nyike Yehorama,+ hikusa a a li matevula.

4 Nkama Yehorama a nga sungula ku fuma a pfaleta papayi wa yena, a tiyise mfumu wa yena hi ku dlaya vamakwavu va yena hinkwavu+ hi xipada ku patsa ni varhangeli van’wani aIsrayele. 5 Yehorama a a ni 32 wa malembe nkama a nga va hosi funtshi a fume 8 wa malembe aYerusalema.+ 6 A tekelele mahanyelo ya tihosi ta Israyele,+ ku fana ni leswi nga yendliwa hi ndjangu wa Akabu hikusa a a teke n’wana wa Akabu swaku a va nsati wa yena+ nakambe a tame a djohela Yehovha. 7 Kambe Yehovha a a nga swi lavi ku helisa ndjangu wa Davhida hi mhaka ya ntwananu lowu a a wu yendlile na yena,+ hikusa a a mu tshembise swaku vana va yena a va ta fuma* Yerusalema hi nkama wa ku kala wu nga heli.+

8 Nkama Yehorama a a fuma, tiko la Edomu li djikele tiko la Yuda+ li gama li tivekela hosi.+ 9 Se Yehorama ni varhangeli va yena va masonchwa va tsemakanya va ya Edomu ni tinyolo* ta yena hinkwatu a gama a pfuka niwusiku a hlula Vaedomu lava a va tile va ta lwa na yena ni varhangeli va tinyolo ta nyimpi. 10 Kambe tiko la Edomu a li tshikanga ku djikela tiko la Yuda anze namuntlha. Ni tiko la Libina+ na lona li sungule ku djikela Yehorama hi nkama wolowo, hikusa a a tshike Yehovha Xikwembu xa vavhovho va yena.+ 11 A tlhele a yendla ni tindhawu ta ku tlakuka+ ka tintshava ta Yuda, swaku vanhu va Yerusalema va ta gandzela swikwembu swin’wani, a tlhela a yendla swaku vanhu va Yuda va tshika ku gandzela Xikwembu.

12 Hi wugamu a nyikiwa karta leli a li ta hi ka muprofeta Eliya+ leli a li ku: “Yehovha Xikwembu xa vhovho wa wena Davhida a li: ‘A wu tekelelanga leswi a swi yendliwa hi papayi wa wena Yehoxafati+ kumbe leswi a swi yendliwa hi Asa+ hosi ya Yuda. 13 Kambe u tekelele leswi nga yendliwa hi tihosi ta Israyele+ funtshi u yendle swaku vanhu va Yuda ni va Yerusalema va gandzela swikwembu swin’wani+ ku fana ni leswi nga yendliwa hi ndjangu wa Akabu;+ u tlhele u dlaya vamakwenu va wena,+ vandjangu wa papayi wa wena lava a va yampsa ku ku tlula. 14 Hi mhaka ya leswo, Yehovha a ta khatisa vanhu va wena, vana va wena, vasati va wena ni hinkwaswu leswi u nga na swona. 15 Kutani u ta va ni mavabyi ya manyingi ku patsa ni mavabyi ya marhumbu, anze marhumbu ya wena ma huma hi mhaka ya ku vabya, siku ni siku.’”

16 Se Yehovha a yendla+ swaku Vafilista+ ni Vaarabiya+ lava a va tshama kusuhi ni Vaetiyopiya va lwa na Yehorama. 17 Kutani va fika ka doropa la Yuda va li hlasela, va teka minchumu hinkwayu leyi a yi li kona ka yindlo ya hosi,+ ku patsa ni vasati va yona ni vana va yona; va yo siya Yehowazi*+ ntsena lweyi a a li xigumandzeni. 18 Loko leswi hinkwaswu se swi hundzile, Yehovha a tlhele a mu khatisa hi mavabyi ya marhumbu ya ku kala ma nga daheki.+ 19 Hi ku famba ka nkama na se ku hundze malembe mambirhi, marhumbu ya yena ma sungula ku huma hi mhaka ya mavabyi lawa a a li na wona, kutani a fa na a hlupheka hintamu hi mavabyi lawa; funtshi vanhu va yena a va mu hiselanga minchumu ya ku nun’hwela ku fana ni leswi va nga swi yendla ka vavhovho va yena.+ 20 A a ni 32 wa malembe nkama a nga va hosi funtshi a fume 8 wa malembe aYerusalema. A nga kona lweyi a nga rila nkama a nga fa. Se va gama va mu lahla ka Doropa la Davhida,+ kambe a va mu lahlanga lani ku nga lahliwa kona tihosi.+