Mahungu Ya Ku Tsakisa Ya Ku Tsaliwa Hi Luka

14 Siku lin’wani hi Savata, Yesu a a rhambiwile kaya ka murhangeli mun’wani wa Vafarisi swaku a ya dla swakudla, naswona lava a va li kona a va mu txuvukisisa kahle. 2 Kutani phambheni ka yena a ku ni wanuna lweyi a a ni mavabyi ya ku pfimba mavoko ni minenge. 3 Se Yesu a vutisa tintivi ta Nawu ni Vafarisi a ku: “Swa pfumeleliwa ku hanyisa munhu hi Savata kumbe a swi pfumeleliwi?”+ 4 Kambe va miyela va ku ntse. Kutani a khoma wanuna yelweyo, a mu hanyisa a gama a mu tshika a famba. 5 Se a va vutisa a ku: “I mani ka n’wina lweyi loko n’wana wa yena kumbe homu ya yena swo pela ka xihlovo hi siku la Savata,+ a nga kalaka a nga swi humesi hi xihantla?”+ 6 Kambe a va swi kotanga ku mu hlamula.

7 Nkama a nga vona swaku vanhu lava a va rhambiwile a va tilangela switshamu swa lisima swinene,*+ a va byela xifaniso, a ku: 8 “Loko munhu a ku rhamba ka fexta la muchadu, u nga yi u ya tshama ka xitshamu xa lisima.+ Swi nga ha yendleka ku rhambiwe mun’wani wa ku hlonipheka hintamu ku tlula wena. 9 Kutani lweyi a nga mi rhamba a ta ta ka wena a ku: ‘Nyisela lweyi swaku a tshama lani.’ Se hi ku dana, u ta suka u ya tshama ka xitshamu xa le ndzhaku. 10 Kambe loko va ku rhamba, tshama ka xitshamu xa le ndzhaku, leswaku loko ku ta lweyi a nga ku rhamba, a fika a ku: ‘Munghanu, tani u ta tshama halenu phambheni.’ Kutani varhambiwa lavan’wani va ta ku hlonipha.+ 11 Hikusa lweyi a titlakusaka a ta vekiwa hansi, kasi lweyi a tivekaka hansi a ta tlakusiwa.”+

12 Se Yesu a gama a byela lweyi a nga mu rhamba a ku: “Loko u hamba fexta, u nga rhambi vanghanu va wena, vamakwenu, maxaka ya wena kumbe vavhizinyu va wena va ku ganya. Hikusa na vona va nga tlhela va ku rhamba hi mhaka ya leswi na wena u nga va rhamba. 13 Kambe loko u hamba fexta, rhamba swisiwana, swilima, va ku khwita ni va ku fa matihlo;+ 14 kutani u ta tsaka, hikusa a va na swa ku ku tlhelisela swona swaku va ku khensa. Kambe Xikwembu xi ta ku hakela loko xi pfuxa+ va ku lulama.”

15 Loko murhambiwa mun’we a twa leswo, a ku: “Wa tsaka lweyi a dlaka* ka Mfumu wa Xikwembu.”

16 Yesu a ku: “Wanuna mun’wani a tshame a hamba fexta,+ a gama a rhamba vanhu va vanyingi. 17 Kutani hi nkama wa fexta a rhuma mutirhi wa yena swaku a ya vitana lava nga rhambiwa a ku: ‘Tanani hikusa swakudla se swi lunghile.’ 18 Kambe hinkwavu va sungula ku yala va vula swivangelo swa ku hambanahambana.+ Wa ku sungula a ku: ‘Ni xave nsimu se ni fanele ni ya yi vona; ni rivaleli a ni nga ta swi kota.’ 19 Mun’wani a ku: ‘Ni xave 10 wa tihomu, ni lava ku ya ti ringa swaku ti rimisa ku yini; ni rivaleli a ni nga ta swi kota.’+ 20 Kasi mun’wanyani a ku: ‘Na ha ku chada, se a ni nge swi koti ku ta.’ 21 Kutani mutirhi a tlhela a ya byela lweyi a tirhaka ka yena swilo leswo. Se n’winyi wa munti a kwata hintamu, a byela mutirhi wa yena a ku: ‘Hantlisa u ya ka switaratu ni ka swindlelani swa doropa, u ya vitana swisiwana, swilima, va ku fa matihlo ni va ku khwita.’ 22 Loko mutirhi a vuya a ku: ‘Hosi ya mina, ni swi yendlile leswi u nga ni rhuma swona, kambe ya ha li kona ndhawu.’ 23 Kutani a byela mutirhi a ku: ‘Famba ka tindlela ni ka swindlelani, u ya kombela lava u nga ta va kuma leswaku va ta, leswaku yindlo ya mina yi ta tala.+ 24 Hikusa na mi byela: A ku na munhu ni mun’we wa lava nga rhambiwa lweyi a nga ta nampsa swakudla swa fexta la mina.’”+

25 A ku ni xitshungu xaxikulu lexi a xi famba na Yesu, se a ndzuluka a ku: 26 “Loko munhu a lava ku ni landzela kambe a nga nyenyi papayi wa yena, mamani, nsati wa yena, vana va yena ni vamakwavu, hambi ku li ku nyenya wutomi la yena,+ a nge vi mudjondzisiwa wa mina.+ 27 Lweyi a kalaka a nga rhwali mhandzi ya yena ya nxaniso* a ni landzela a nge vi mudjondzisiwa wa mina.+ 28 Hi xikombiso, i mani ka n’wina lweyi loko a lava ku yaka prediyu* a kalaka a nga rhangi hi ku tshama hansi a kontela male, kuva a vona swaku ya ringana ku xava minchumu hinkwayu leyi a yi lavaka swaku a li heta? 29 Loko a nga yendli leswo, a nga ha sungula ku yaka kambe a nga swi koti ku heta, kutani lava mu vonaka va ta sungula ku mu hleka 30 va ku: ‘A ndota leyi yi sungule ku yaka kambe a yi swi kotanga ku heta.’ 31 Kumbe hi yihi hosi leyi loko yi ya lwa ni hosi yin’wani, yi kalaka yi nga rhangi hi ku bulisana ni van’wani kuva yi vona swaku yi ta swi kota ku lwa ni hosi leyi nga ni 20.000 wa masonchwa kuve yona yo va ni 10.000 wa masonchwa ke? 32 Loko yi vona leswaku a yi nge swi koti, yi rhuma vanhu ka hosi leyin’wani na ya ha li kule leswaku va ya kombela ku rhula. 33 Hi ku fana, lweyi a kalaka a nga swi siyi* swilo leswi a nga na swona, a nge vi mudjondzisiwa wa mina.+

34 “Phela munyu i wunene. Kambe loko munyu wu heleliwa hi ntamu wa wona, wu nga pfuxetisiwa ku yini ke?+ 35 A wa ha pfuni nchumu, hambi ku nonisa misava kumbe ku yendla xitrumi. Vanhu vo wu txukumeta. Lweyi a nga ni tindleve ta ku yingisa a a yingisi.”+