Nhlawutelo ya Yohani
9 Kutani ntsumi ya wu 5 yi chaya mhalamhala* ya yona.+ Se ni vona nyeleti leyi nga wa misaveni na yi sukela tilweni yi nyikiwa khiya la nomo wa xikhele xa ku yenta,+ 2 yi pfula nomo wa xikhele kutani ku huma ximusi xa ku fana ni ximusi lexi humaka hi ka xikhele xaxikulu xa ndzilu, se dlambu ni moya swi txintxa swi va swa ntima+ hi mhaka ya ximusi lexi humaka hi ka nomo wa xikhele. 3 Kutani ku huma mintete xikarhi ka ximusi yi ya misaveni,+ yi nyikiwa matimba ya ku fana ni ya swizavanani. 4 Yi byeliwa leswaku yi nga wonhi byanyi kumbe minsinya, kambe yi ya ka vanhu lava kalaka va nga na marka wa Xikwembu ka swimombo swa vona.+
5 Mintete leyi yi pfumeleliwe ku hlupha vanhu 5 wa tiwheti kambe yi nga va dlayi, naswona ku vava ka kona a ku fana ni loko munhu a lumiwa hi xizavanani.+ 6 Ka masiku wolawo, vanhu va ta lavetela lifu kambe a va nga ta li kuma, va ta navela ku fa kambe lifu li ta va baleka.
7 Mintete leyi a yi fana ni makavhalu lama nga lunghiseliwa ku ya nyimpini;+ tinhloko ta yona a ti ni minchumu ya ku fana ni tiharhi* ta woru, tinghohe* ta yona a ti fana ni tinghohe ta vanhu, 8 a yi ni misisi ya ku fana ni ya vavasati. Matinyu ya yona a ma fana ni ya tinghonyama,+ 9 a yi ni swa ku vhikela xifuva swa ku fana ni swa nsimbi. Guwa la timpapa ta yona a li fana ni guwa la tinyolo* leti ti kokiwaka hi makavhalu lama tsutsumaka ma ya nyimpini.+ 10 Yi ni mintxila leyi nga ni swa ku luma hi swona leswi nga ni vhenenu ku fana ni swizavanani; naswona yi nyikiwe matimba ya ku vavisa vanhu 5 wa tiwheti hi mintxila ya yona.+ 11 Mintete leyi yi ni hosi, ku nga ntsumi ya xikhele xa ku yenta.+ Vito la yona hi Xiheberu i Abadoni,* kasi hi Xigriki i Apoliyoni.*
12 Khombo la ku sungula se li hundzile. Kambe ka ha ta makhombo mambirhi.+
13 Kutani ntsumi ya wu 6+ yi chaya mhalamhala ya yona.+ Se ni twa rito lin’wani leli taka hi ka timhondzo ta altari la woru+ leli nga phambheni ka Xikwembu, 14 na li byela ntsumi ya wu 6 leyi nga khoma mhalamhala, li ku: “Chunsa 4 wa tintsumi leti nga bohiwa ka nambu wawukulu wa Ewufrata.”+ 15 Kutani ku chunsiwa 4 wa tintsumi leti a ti nyimele nkama, siku, wheti ni lembe, leswaku ti dlaya hafu yayitsongo* ya vanhu.
16 Numeru ya masonchwa lawa a ma li ka makavhalu a yi li 200.000.000;* numeru leyi ni yi twile hi tindleve ta mina. 17 Lava ni nga va vona na va li ka makavhalu ni makavhalu ya kona a swi tshamise xileswi: Lava a va li ka makavhalu a va yambale swa ku vhikela xifuva swa ku pshuka ku fana ni ndzilu, swa azuli ni swa amarelu naswona tinhloko ta makavhalu a ti fana ni tinhloko ta tinghonyama;+ ka minomo ya wona a ku huma ndzilu, ximusi ni xivavula.* 18 Ku dlayiwe munhu mun’we ka vanhu vanharhu* hi makhombo lawa ya manharhu, ku nga ndzilu, ximusi ni xivavula, leswi humaka hi ka minomo ya wona. 19 Matimba ya makavhalu lawa, ma le ka minomo ni ka mintxila ya wona; mintxila ya wona yi fana ni tinyoka, ma ni tinhloko naswona ma tirhisa mintxila swaku ma luma vanhu.
20 Kambe vanhu lavan’wani hinkwavu lava kalaka va nga dlayiwanga hi makhombo lawa, a va tisolanga ka mintirho leyi a va yi yendla hi mavoko ya vona; a va tshikanga ku gandzela madimoni, swikwembu swa woru, swa prata, swa kobre, swa ribye ni swa swigodo, leswi kalaka swi nga voni, swi kalaka swi nga twi swi tlhela swi nga fambi.+ 21 Naswona a va tshikanga ku dlaya, ku tirhisana ni madimoni, ku yendla wuntunga la swa masangu* ni ku yiva.