Timotiya Wa Ku Sungula
5 U nga bongeli* wanuna wamukulu.+ Kambe vulavula na yena ingaku i papayi wa wena, u vulavula ni madjaha ku fana ni vamakwenu va wena va xinuna, 2 u vulavula ni vavasati vavakulu ku fana ni vamamani va wena, u hlonipha tintombhi ku fana ni vamakwenu va wena va xisati.
3 Hlonipha vavasati lava nga feliwa hi vavanuna hikakunene.*+ 4 Kambe loko vana kumbe vatukulu va wansati lweyi a nga feliwa hi nuna va li kona, a va rhange va djondza ku kombisa swaku va tinyiketelile ka Xikwembu ka mindjangu ya vona+ naswona va fanele va tama va hlayisa vapsali va vona ni vavhovho va vona,+ hikusa leswo swa yamukeleka ka Xikwembu.+ 5 Se wansati lweyi a nga feliwa hi nuna, lweyi hikakunene a kalaka a nga na wa ku mu hlayisa naswona a nga wusiwanini, wa xi tshemba Xikwembu+ naswona a tshamela ku kombela ni ku khongela wusiku ni nhlikanhi.+ 6 Kambe lweyi a hanyelaka ku titsakisa* ntsena, a file hambi a ha hanya. 7 Kutani tama u va nyika minawu leyi leswaku va nga vi ni xa ku soliwa hi xona. 8 Phela loko munhu a nga ma hlayisi maxaka ya yena, ngopfungopfu va ndjangu wa yena, a yala lipfumelo naswona a bihe ngopfu ku tlula munhu lweyi a kalaka a nga na lipfumelo.+
9 A wansati wa ku feliwa hi nuna a ta tsaliwa ka buku ntsena loko a ni 60 wa malembe ku ya henhla, loko a ve nsati wa nuna mun’we, 10 a dume hi ku yendla mintirho yayinene,+ a va wundle kahle vana va yena,+ a a rhandza ku yamukela vapfhumba,+ a hlambise minenge ya vakwetsimi,+ a a pfuna lava a va hlupheka+ ni ku tinyiketela ku yendla mintirho hinkwayu yayinene.
11 Kambe vavasati lava nga feliwa hi vavanuna na va ha li vatsongo u nga va tsali ka buku, hikusa nkama va nga ta sungula ku navela swa masangu va ta lava ku chada se ntirho lowu va wu yendlelaka Kreste wu ta kavanyeteka. 12 Va ta yavanyisiwa hikusa va tshike xitshembiso lexi va nga tshama va xi yendla. 13 Naswona va djondza wulolo, va tlhela va rhendzelekela ka miminti ya van’wani. A vo tiyendla malolo ntsena kambe va tlhela va hleva ni ku tipeta ka timhaka ta van’wani,+ va vulavula hi minchumu leyi va kalaka va nga fanelanga va vulavula hi yona. 14 Hi mhaka leyo, ni navela swaku vavasati lava nga feliwa hi vavanuna na va ha li vatsongo va tekiwa,+ va psala vana,+ va hlayisa ndjangu, va nga nyiki nala xa ku hi sola hi xona. 15 Phela van’wani se va djikisiwile va landzela Sathana. 16 Loko ku ni wansati lweyi a nga mupfumeli, a nga ni maxaka lama nga feliwa hi vanuna va wona, a a ma pfuni leswaku ku nga tikiseliwi bandla. Se bandla li ta pfuna vavasati lava nga feliwa hi vavanuna naswona va pfumalaka wa ku va hlayisa hikakunene.+
17 Madoda ma fanele ma hloniphiwa hintamu+ hileswi ma rhangelaka hi ndlela yayinene,+ ngopfungopfu lawa ma tirhaka hi matimba ku vulavuleni ni le ku djondziseni.+ 18 Hikusa tsalwa li li: “U nga pfali nomo wa homu loko yi hula trigu,”*+ naswona: “Lweyi a tirhaka a faneliwa hi muholo wa yena.”+ 19 Loko doda li mangaleliwa na ku nga na vafakazi vambirhi kumbe vanharhu,+ u nga tshuki u pfumela. 20 Laya+ vanhu lava hanyaka hi xidjoho+ phambheni ka timboni hinkwatu, leswaku ni lavan’wani va ta chava. 21 Ni ku byela leswi phambheni ka Xikwembu, ka Kreste Yesu ni le ka tintsumi leti nga langiwa: Yingisa minawu leyi hi ku swi kambisisa kahle swilo hinkwaswu, u nga vi na xikheto loko u yendla xiboho.+
22 U nga hantliseli ku tlhateka munhu mavoko;*+ naswona u nga tipatsi ka swidjoho swa van’wani; tshama na u tengile.
23 U nga ha phuzi mati ntsena* kambe phuza ni vhinyu yayitsongo hi mhaka ya ndzeni ka wena ni hileswi u tshamelaka ku vabya.
24 A swidjoho swa vanhu van’wani swi tekela ku voneka kutani va hantla va yavanyisiwa, kambe swa van’wani swi voneka hi ku famba ka nkama.+ 25 Swa fana ni mintirho yayinene, ya tiviwa,+ hambiloko yi nga tekeli ku voniwa a yi nga ta tshama na yi fihlekile.+