Varoma
10 Vamakwerhu, leswi ni swi khongelelaka ni leswi naveliwaka hi mbilu ya mina, hi leswaku va ponisiwa.+ 2 Ni nga va fakazela swaku va xi rhandza Xikwembu+ kambe a va swi yendli hi ku ya hi wutivi la ntiyiso. 3 Leswi va kalaka va nga swi tivi kahle leswi Xikwembu xi swi lavaka swaku munhu a va wa ku lulama,+ va tiyendlela minawu ya vona+ leyi nga ta va yendla va ku lulama. Hi mhaka leyo, a va yi yingisanga minawu ya Xikwembu ya ku lulama.+ 4 Hikusa Kreste i magamu ya Nawu,+ leswaku mun’wani ni mun’wani lweyi a pfumelaka ka yena a ta voniwa na a lulamile.+
5 Hikusa Moxe a tsalile hi ta munhu lweyi a nga lulama hi ku ya hi Nawu a ku: “Lweyi a yendlaka swilo leswi a ta hanya hi mhaka ya swona.”+ 6 Kambe loko swi ta ka ku lulama loku kumiwaka hi mhaka ya lipfumelo, Rito la Xikwembu li li: “U nga vuli ka mbilu ya wena+ u ku: ‘I mani lweyi a nga ta khwela a ya tilweni?’+ swaku a ta vuya na Kreste, 7 kumbe: ‘I mani lweyi a nga ta ya ka xikhele xa ku yenta?’+ swaku a ya humesa Kreste ka vafi.” 8 Kambe tsalwa li li yini? Li li: “Rito li le kusuhi na wena, li ka nomo ni le ka mbilu ya wena,”+ ku nga “rito” la lipfumelo leli hi li chumayelaka. 9 Hikusa loko u vula hi nomo wa wena ka vanhu swaku Yesu i Hosi,+ u tlhela u pfumela ka mbilu ya wena swaku Xikwembu xi mu pfuxile ka lava nga fa, u ta ponisiwa. 10 Hikusa leswaku munhu a vuliwa wa ku lulama a fanele a pfumela mbilwini, kambe leswaku a ponisiwa a fanele a swi vula hi nomo+ wa yena lomu ka vanhu.
11 Hikusa tsalwa li li: “A nga kona lweyi a pfumelaka ka yena a nga ta danisiwa.”+ 12 A ku na ku hambana xikarhi ka Muyuda ni Mugriki.+ Hinkwavu va ni Hosi yin’we, leyi katekisaka hinkwavu lava yi kombelaka. 13 Hikusa “lweyi a vitanaka vito la Yehovha* a ta ponisiwa.”+ 14 Kambe va ta mu vitanisa ku yini na va nga pfumelanga ka yena? Naswona va ta pfumelisa ku yini ka lweyi va kalaka va nga twanga nchumu hi ta yena? Va ta swi twisa ku yini na ku nga na lweyi a chumayelaka? 15 Hi ku fana, va ta chumayelisa ku yini na va nga rhumiwanga?+ Swi hilaha swi nga tsalisiwa xiswona loko va ku: “Yi saseke ndjhani minenge ya lava chumayelaka mahungu ya ku tsakisa ya swilo swaswinene!”+
16 Kambe van’wani a va ma yingisanga mahungu ya ku tsakisa. Hikusa Esaya a te: “Yehovha,* i mani lweyi a nga va ni lipfumelo ka swilo leswi a nga swi twa ka hina?”+ 17 Phela munhu a rhanga hi ku twa se hi kona a pfumelaka.+ Rito li twiwa loko munhu a vulavule hi Kreste. 18 Kambe na vutisa: Vayisrayele vo kala va nga li twanga? Va li twile hikusa Matsalwa ma li: “Rito la vona li twakale misaveni hinkwayu ni rungula la vona li fike hinkwaku amisaveni.”+ 19 Kambe na vutisa: Vayisrayele vo kala va nga swi twisisanga ke?+ Xa ku sungula, Moxe a li: “Ni ta tirhisa vamatiko swaku ni mi yendla mi va ni wukwele; ni ta tirhisa tiko la ku kala li nga twisisi swaku ni mi khatisa.”+ 20 Esaya a vule marito ya Xikwembu na a nga chavi nchumu a ku: “Ni kumiwe hi vanhu lava kalaka va nga ni lavi;+ ni tiviwe hi vanhu lava a va nga vutisi hi mina.”+ 21 Kambe a vula leswi hi Vayisrayele: “Ni tlakuse mavoko ya mina siku hinkwalu ni tlakusela vanhu va ku kala va nga yingisi ni va ku woma tinhloko.”+