Samuwele Wa Ku Sungula
1 A ku ni wanuna mun’wani wa Ramatayimi-Zofimi*+ lweyi a a tshama ka ndhawu ya tintshava ya Efrayimi.+ Vito la yena a ku li Elkana,+ n’wana wa Yerohamu, n’wana wa Elihu, n’wana wa Tohu, n’wana wa Zufi, wa ka Efrayimi. 2 A a li ni vasati vambirhi; mun’we a ku li Ana kasi lweyi mun’wanyani a ku li Penina. Penina a a li ni vana, kambe Ana a a nga na vana. 3 Lembe ni lembe Elkana a a ya Xilo a ya gandzela* Yehovha murhangeli wa tintsumi ni ku mu yendlela gandzelo.+ Se vana vambirhi va Eli, ku nga Hofini na Feniyasi+ a va li vaprista va Yehovha kolahayani.+
4 Siku lin’wani nkama Elkana a a nyikela gandzelo, a nyike nsati wa yena Penina ni vana va yena hinkwavu va madjaha ni va tintombhi a mapedasu* ya nyama,+ 5 kambe a nyika Ana pedasu lalinene la kona, hikusa Elkana a a mu rhandza hintamu Ana; kambe Yehovha a a yendle swaku a nga psali.* 6 Se Penina a a tshamela ku mu poyila swaku a mu kwatisa hi mhaka ya leswi Yehovha a a nga mu nyikanga vana. 7 A a yendla leswo malembe hinkwawu. Nkama hinkwawu loko Ana a ya ka tempele* ya Yehovha,+ Penina a a tshamela ku mu poyila a za a rila a tlhela a tsukula ni swakudla. 8 Kambe nuna wa yena Elkana a mu vutisa a ku: “U rilela yini Ana? Kasi a wu dli hi mhaka muni? U kwatisiwa hi yini?* A ni yampsi mina ku tlula 10 wa vana va madjaha?”
9 Nkama va nga gama ku dla ni ku phuza aXilo, Ana a suka a famba. Hi nkama wolowo, muprista Eli a a tshame ka xitulu ka nyanghwa wa tempele*+ ya Yehovha. 10 Mbilu ya Ana a yi vava ngopfu, se a sungula ku khongela ka Yehovha+ na a rila hintamu. 11 Kutani a tshembisa a ku: “Yehovha murhangeli wa tintsumi, vona swikarhatu swa mina mutirheli wa wena, ni khumbuki, u nga ni khohlwi, ni nyike n’wana wa djaha.+ Ni ta ku nyika yena wena Yehovha swaku a ku tirhela wutomi la yena hinkwalu naswona a ku nga ta hundza xisingwani* ka nhloko ya yena.”+
12 Se na a khongela nkama wa ku leha phambheni ka Yehovha, Eli a a txuvuka nomo wa yena. 13 Ana a a khongela hi ndzeni ka mbilu naswona a swo voneka ka nomo wa yena swaku a a vulavula kambe rito la yena a li nga twali. Se hi leswi swi nga yendla Eli a pimisa swaku a dakwile. 14 Eli a mu vutisa a ku: “U ta tshama u dakwile anze siku muni? Tshika ku phuza vhinyu.” 15 Kutani Ana a mu hlamula a ku: “A ni dakwanga hosi ya mina! No va wansati lweyi a nga karhateka hintamu; a ni phuzanga vhinyu kumbe byala lin’wani, no byela Yehovha leswi nga ka mbilu ya mina.+ 16 U nga pimisi swaku ni xiphunta, hikusa mina mutirheli wa wena ni le ku khongeleni ku ta fikela swoswi hi mhaka ya leswi ni karhatekaka ni tlhela ni vilela ngopfu.” 17 Eli a mu hlamula a ku: “Famba hi ku rhula, Xikwembu xa Israyele a xi ku nyike leswi u nga swi kombela.”+ 18 Ana a mu hlamula a ku: “Ni mutirheli wa wena. U nga karhali ku ni komba timpsalu.” Se Ana a famba a ya dla naswona a a nga ha karhatekanga.
19 Se va pfuka nimpundzu swinene va khongela ka Yehovha, loko va gamile va muka kaya ka vona aRama.+ Elkana a famba masangu ni nsati wa yena Ana, se Yehovha a mu khumbuka.+ 20 Na lembe li nga se hela,* Ana a va ni nyimba a psala* n’wana wa mufana a mu chula swaku i Samuwele,*+ hikusa a te: “Ni mu kombele ka Yehovha.”
21 Hi ku famba ka nkama Elkana a famba ni ndjangu wa yena hinkwawu va ya Xilo va ya yendlela Yehovha gandzelo+ la lembe ni lembe ni gandzelo la yena la xitshembiso. 22 Kambe Ana a nga yanga,+ hikusa a byele nuna wa yena a ku: “A nkama n’wana a nga ta lumuliwa,* ni ta famba na yena hi ku kahlula; se a ta humelela phambheni ka Yehovha a tshama ka tempele ya yena wutomi la yena hinkwalu.”+ 23 Elkana nuna wa yena a ku: “Yendla leswi u swi vonaka na swi li kahle. Tshama kaya anze u mu lumula. Yehovha a a yendle leswi u nga swi hlaya.” Kutani Ana a tshama kaya, a wundla n’wana wa yena anze a mu lumula.
24 A nkama a nga mu lumula, a mu teka a famba na yena Xilo. A fambe ni homu ya malembe manharhu, 11 wa makilu* ya mpupu ni khuwani lalikulu la vhinyu.+ A fika a nghena ka tempele ya Yehovha aXilo+ ni xidjahana xa yena. 25 Se va gama va dlaya homu, va teka Samuwele va mu yisa ka Eli. 26 Kutani Ana a ku: “Ni rivaleli hosi ya mina! Na funga ka wena hosi ya mina, swaku hi mina wansati lweyi a a nyime na wena ka ndhawu leyi na a khongela ka Yehovha.+ 27 A nkama a ni khongela a ni kombela xidjahana lexi, se Yehovha a hlamule xikhongelo xa mina.+ 28 Swoswi n’wana lweyi ni mu lomba Yehovha. A ta va a lombiwe Yehovha wutomi la yena hinkwalu.”
Kutani Elkana a gama a khizama kolanu phambheni ka Yehovha.