Samuwele Wa Ku Sungula

16 Se Yehovha a byela Samuwele a ku: “U ta rila hi mhaka ya Sawulo+ anze siku muni? Phela ni mu susile swaku a nga ha vi hosi aIsrayele.+ Chela mafurha ka limhondzo li za li tala,+ u gama u famba u ya ka Yese+ lweyi a tshamaka Betlehema, hikusa ni tilangele hosi ka vana va yena.”+ 2 Kambe Samuwele a ku: “Ni ta fambisa ku yini? Loko Sawulo o swi twa, a ta ni dlaya.”+ Yehovha a ku: “Teka xihon’wani u famba na xona u fika u ku: ‘Ni tele ku ta yendlela Yehovha gandzelo.’ 3 Rhamba Yese swaku a ta ka ndhawu leyi u nga ta yendlela ka yona gandzelo; se ni ta ku byela leswi u faneleke u swi yendla. U fanele u mu chela mafurha lweyi ni nga ta ku komba yena.”+

4 Samuwele a yendla leswi Yehovha a nga swi hlaya. Loko a fika Betlehema,+ madoda ya doropa ma rhurhumela hi ku chava loko ma tlhangana na yena, se ma mu vutisa ma ku: “U tele swaswinene?” 5 A ma hlamula a ku: “Ina ni tele swaswinene. Ni tele ku ta yendlela Yehovha gandzelo. Tibasiseni, mi famba na mina lani ni nga ta nyikela kona gandzelo.” Kutani a basisa Yese ni vana va yena, a gama a va teka a famba na vona lani a a ta yendlela kona gandzelo. 6 A nkama va nga fika a vona Eliyabi,+ a gama a tibyela a ku: “Phela lweyi hi yena lweyi Yehovha a nga mu langa.” 7 Kambe Yehovha a byela Samuwele a ku: “U nga txuvuki leswi a nga tshamisa xiswona kumbe ku leha ka yena,+ hikusa a ni mu langanga. Phela mina a ni voni swilo ku fana ni leswi munhu a swi vonisaka xiswona. Munhu a kota ku vona leswi voniwaka hi matihlo ntsena kambe mina Yehovha ni vona leswi nga ka mbilu.”+ 8 Se Yese a vitana Abinadabi+ a mu hundzisa phambheni ka Samuwele, kambe yena a ku: “Ni lweyi, Yehovha a nga mu langanga.” 9 Yese a tlhela a tisa Xamaya,+ kambe Samuwele a ku: “Ni lweyi, Yehovha a nga mu langanga.” 10 Se Yese a hundzisa 7 wa vana va yena aphambheni ka Samuwele, kambe Samuwele a byela Yese a ku: “Yehovha a nga langanga munhu ka lava.”

11 Hi wugamu Samuwele a vutisa Yese a ku: “Vana va wena va madjaha hi volava ntsena?” A mu hlamula a ku: “Ku chota lweyi wamutsongo;+ a ye ku luseni ka tinyempfu.”+ Kutani Samuwele a byela Yese a ku: “A a landziwe, hikusa a hi nge tshami hansi hi dla na a nga se fika lani.” 12 Se a rhuma vanhu va mu landza. Yena a a li mufana wa ku saseka wa matihlo ya ku saseka.+ Kutani Yehovha a ku: “Sekeleka, u mu chela mafurha, hikusa hi yelweyi ni nga mu langa!”+ 13 Samuwele a teka limhondzo la mafurha+ a mu chela, na vamakwavu va yena va swi vona. Se moya wa ku kwetsima wa Yehovha wu sungula ku tirha ka Davhida ku sukela hi siku lelo.+ Hi ku famba ka nkama, Samuwele a tlhela a ya Rama.+

14 Yehovha a susa moya wa yena wa ku kwetsima ka Sawulo,+ a gama Yehovha a pfumelela swaku mimpimiso ya ku biha yi sungula ku mu hlupha.+ 15 Se vatirhi va Sawulo va mu byela va ku: “Wa swi vona swaku Xikwembu xi ku tshika u hluphiwa hi mimpimiso ya ku biha? 16 Hi kombela wena hosi u hi rhuma hina vatirhi va wena hi ya ku lavela munhu lweyi a kotaka ku chaya haripa.+ Loko Xikwembu xi pfumelela swaku u hluphiwa hi mimpimiso ya ku biha, munhu lweyi a ta chaya haripa, se u ta titwa kahle.” 17 A gama Sawulo a byela vatirhi va yena a ku: “Ni kombela mi ya ni lavela munhu lweyi a kotaka ku chaya kahle haripa, mi mu tisa ka mina.”

18 Mun’we wa vatirhi va yena a ku: “Ni tiva n’wana wa Yese wa Betlehema lweyi a kotaka ku chaya kahle haripa, i nhenha ya matimba funtshi a nga chavi nchumu.+ A kota ku vulavula kahle, a sasekile+ naswona Yehovha a na yena.”+ 19 Se Sawulo a rhuma vanhu va ya byela Yese, va ku: “Rhuma Davhida n’wana wa wena, lweyi a lusaka tinyempfu swaku a ta halenu.”+ 20 Kutani Yese a teka pawu, ximbutani ni bolhela la vhinyu leli a li yendliwe hi xikhumba, a swi tlhateka henhla ka mbongolo, a nyika n’wana wa yena Davhida a famba na swona ka Sawulo. 21 Se Davhida a sungula ku tirhela Sawulo.+ Sawulo a mu rhandza hintamu Davhida, a tlhela a mu veka swaku a tamela matlharhi ya yena ya nyimpi. 22 Sawulo a rhumela vanhu va ya ka Yese va ku: “Ni kombela swaku Davhida a tama a ni tirhela, hikusa wa ni tsakisa hintamu.” 23 A nkama Xikwembu a xi pfumelela mimpimiso ya ku biha swaku yi hlupha Sawulo, Davhida a a teka haripa a yi chaya. Sawulo a a gama a pepa mbilu a tlhela a titwa kahle, se mimpimiso ya ku biha leyi a yi mu hlupha yi suka ka yena.+